Luk 17
17
Zisɔs avɔl kɛ ɔmanɛ wʉ ɛcɔcɔɔ, awa-ɛsɛma nɛ ɔtʉmʉ
1Zisɔs akaŋɛ nɛ vɛnʉl vɛ oyeghe nɔnʉn ala, “Vɛnalɛvɛ yɛ viyele nɛ vɛnʉl óyel ɛcɔcɔɔ, vɛkwa ɛvaana ga, kpa wáya ɛcian, owe wʉ wʉyel vɛnʉl vedivi óyel ɛcɔcɔɔ. 2Akɛ sɛva-sɛva nɛ ɔ̂kɔnd ɔnasɛghɛ kɛ ɔmɛnɛ owuwu, nɛ ɔ̂ta we kɛ ilife, nɛ wʉ wáyel nɛ ɔmɔnɛmɔ wʉ kɛ vamumuneŋ vee nɛ áyel ɛcɔcɔɔ. 3Asɔ kɔl nini ayʉmʉ kɛ itu ɛnalɛ yɛ nɛyele.
“Ikil yɛ wanɛŋgwan wuwu wʉ Ofilikpamɛ ayel ɔmanɛ wʉcɔcɔ, lʉwa nɔnʉn. Ikil yɛ asɛɛl ko, nɛ wʉ́gife ɔn. 4Ikil yɛ ayel ɛcɔcɔɔ nawe ɛkambɛlɛ ɛtaŋɛnɛfaalɛ kɛ ife, ɛnɛ akiil va ɛkambɛlɛ imemi ɛtaŋɛnɛfaalɛ, akaŋɛ ala, ‘Mɛ̂yel cɔ, máma-yel asɔ ga, gife mɛ,’ nɛ wʉ̃gife ɔn.”
5Ɔkambɛlɛ wʉ acɛnda ana âŋgwa asɔ, akaŋɛ ala, “Ɔkʉ, kpend asu nɛ awa-ɛsɛma wasɛ kɛ nɛ Ofilikpamɛ ábo.”
6Akaŋɛ navo ala, “Masɛ awa-ɛsɛma wuwu alɛ kɛ cɔɔ mbis ndalɛ ɛsaŋgɛ, nɛ wʉ́kaŋɛ nɛ ɛtɛghɛ kɛboonaghɛ kiyee wʉla, ‘Nife, nɛ wʉ́za-lɔ ɔmɛnɛ owuwu kɛ ilife,’ nɛ káyel kɛ ndalɛsɛ wʉkaŋɛ.
7“Tɛŋɛ nini anu ala, ɔnʉl wunu ɔmɔ awʉ nɛ ɔnʉl wʉ ɔtʉmʉ, ɛnɛ atɛma ɔn ala ãza-cowulu ɔn ɔfɛnda, akasɛ ãza-wanda ɔn ɛ̈kamɛnɛ. Ɔkambɛlɛ wʉ akul va kɛ owemi, nɛ ákaŋɛ kɛlɛ ala, ‘Va-caal ɛyaŋ, nɛ wʉ́ya ɔyɛ’? 8Cioow! Nɛ ávɔl kɛlɛ ala, ‘Za-wʉʉ ɛyʉlʉ iyuwu, nɛ wʉ́kule mɛ ɔyɛ, nɛ wʉ́wand, nɛ ikil yɛ mɛya kule nɛ wʉ́va-ya owuwu.’ 9Nɛ̂tes anu ala, nɛ ɔkʉnʉl wɔɔ átɛfa ɔnʉl ɔna wʉ ɔtʉmʉ kici yɛ âyel ɔmanɛ kɛɛ ɔn akaŋɛ ala ãyeli? 10Kɛlɛ asɔ ɛnɛ anu kpaa x-naliye nini anu ala ɔ̃tɛfa anu ikil yɛ nɛyel kule ɔmanɛmanɛ kɛɛ alɛ nɛ nɛyel ga. Kaŋɛ nini kɛlɛ anu ala, ‘Savɛ cas kɛlɛ vɛnʉl vɛ ɔtʉmʉ, sɛ̂yel kɛlɛ ɔtʉmʉ wasɛ.’”
Zisɔs akʉs vɛnʉl likwoŋ vɛ ɔ̂lɛ nɛ ɛmanda
11Ndalɛsɛ Zisɔs âzaa kɛ Zelusalem, awo kɛ ɔwa wʉ ɔlɛ kɛ atɛŋatɛŋɛ wʉ ɛyaŋɛ iyɛ Samalia nɛ Galili. 12Wʉ ânyɔla zaa fɛ ɔswaŋ ɔmɔ fini, vɛnʉl vɛ ɛmanda likwoŋ ocoolu ɛlɛmb, 13okoo gbaŋ ala, “Ɔkʉ Zisɔs, kɔl isonu kɛ asu.”
14Wʉ âtii vo, akaŋɛ navo ala, “Za-te nini ɛmɛnɛ iyunu kɛ nɛ vɛnʉl vɛ ɔsala Ofilikpamɛ.” Ndalɛsɛ ɔ̂lɛ ɛzaana, ɔkʉna.
15Ikil yɛ ɔnʉl vo ɔmɔ atii ala ɔn âkʉna, akiil va kɛ nɛ Zisɔs, kɛ icivilena Ofilikpamɛ nɛ ɛmʉ iyɛboona. 16Ava-ŋgul kɛ ɛyaŋ fɛ isi kɛ Zisɔs, atɛfa ɔn. Kpa wʉ âlɛ kɛlɛ ɔnʉl wʉ Samalia.
17Saŋ Zisɔs afii ala, “Vɛnʉl likwoŋ ɛnɛ ɔ̂kʉna ga? Vɛ ɔtaŋɛnonyin vedivi vɔɔ ye? 18Kâyel naa ɛnɛ ɔtanda wee cas ɛnɛ akiil wʉ ava-tɛfa Ofilikpamɛ?” 19Saŋ akaŋɛ nɔnʉn ala, “Mʉwa ɛsɛla, nɛ wʉ́zaa. Awa-ɛsɛma wuwu âkʉs we.”
Zisɔs ate vɛnʉl ɔkambɛlɛ wʉ Ɔtʉlʉ vɛ Ofilikpamɛ váva
20Ife ɛmɔ, vɛ Falasi vedivi ofii Zisɔs ɔkambɛlɛ wʉ Ɔtʉlʉ vɛ Ofilikpamɛ váva. Akaŋɛ navo ala, “Ɔtʉlʉ vɛ Ofilikpamɛ, váva nɛ akɛvɛ ayɛ vɛnʉl váyen asi ga, 21akasɛ nɛ vɛnʉl ɔ́vɔl ala, ‘Vo ɛnɛ ɔlɛ vee,’ akasɛ ‘Vo ɛnɛ ɔlɛ vɔɔ’ ga, kici yɛ Ɔtʉlʉ vɛ Ofilikpamɛ avɛ ye fan nɛ anu.”
22Saŋ Zisɔs akaŋɛ kɛ nɛ vɛnʉl vɛ oyeghe nɔnʉn ala, “Ɔkalaka awʉ ɛvaana, wʉ ɛsalɛ ɛ́lɛ anu cɛŋ wʉ náyen masɛ kɛ ife ɛmɔɔ kɛ afe ayɛ ɛmɛ Wanɛ wʉ Ɔnʉlʉ málɛ mɛfʉwa, kpa nɛ nɛ́yen kɛ ɛn ga. 23Nɛ vɛnʉl ɔ́kaŋɛ nɛ anu ala, ‘Tiye ɔn ɛnɛ alɛ kɔ wɔɔ,’ akasɛ ‘Ɔn ɛnɛ alɛ fan wee.’ Ikil yɛ ɔkaŋɛ asɔ, x-naŋgwaa kɛ navo ga. 24Kici yɛ Wanɛ wʉ Ɔnʉlʉ áyam, kɛ ife ɛna yɛ áva kɛ ndalɛ ɔyamanavɛ vɛ oweeme kɛ ago, hee kɛ ɛfanɛ iyee kaka za-bi iyidi iyɔɔ. 25Kpa ámbaa nɛ áya ɛcian cɛŋ keŋ-keŋ, nɛ vɛnʉl vɛ aŋgiee wee ɔmɔ ágɔl ɔn ga.
26“Kɛ ndalɛsɛ kalɛ-lɛ kɛ ɛyaŋgɛ kɛɛ Nʉwa, asɔ kpaa ɛnɛ kálɛ kɛ ɛyaŋgɛ kɛɛ Wanɛ wʉ Ɔnʉlʉ. 27Vɛnʉl ɔ̂lɛ kɛ ɛyaana ɔyɛ nɛ kɛ ɛŋwaana mɛsɔlʉmʉ. Ɔ̂lɛ kɛ ɛyɔsana nɛ kɛ ɛmʉwana ayɔsʉ, kaka za-bi ife yɛ Nʉwa alɛ-nyɔlʉ kɛ ɛkpand kɛboonaghɛ. Saŋ ɔvɛla ɔna kaka ɛzɔl ɛkʉwa ɔtalɛ, ɛyɛva vo omwem.
28“Asɔ kpaa ɛnɛ kalɛ-lɛ kɛ ɛyaŋgɛ kɛɛ Lɔt. Vɛnʉl ɔ̂lɛ kɛ ɛyaana ɔyɛ nɛ kɛ ɛŋwaana mɛsɔlʉmʉ, ɛkʉndana nɛ ɛsiaana, ɛlɔɔna nɛ ɛmaana atimbe. 29Kpa ife yɛ Lɔt alɛ-mʉwa fɛ Sɔdɔm, ogusu nɛ akalɛ ayayeŋgilena asime kɛ ago, awule kan ɛyaŋ ndalɛ ɔvɛla, ayɛva vo omwem.
30“Kɛlɛ asɔ kpaa, ɛnɛ kálɛ kɛ ife yɛ Wanɛ wʉ Ɔnʉlʉ ásime gbaŋgaŋ. 31Kɛ ife ɛnayɔɔ, ɔmɔnɛmɔ wʉ alɛ kɛ ɔsɔwʉ ɔna wʉ itimbe#17:31 Kɛ ɔkambɛlɛ wɔɔ, ɛsɔwʉ iyɛ atimbe ɛ̂lɛ lendeŋ, ndalɛsɛ vɛnʉl váyeŋe kini. Yen kɛ aziŋge-ziŋge wʉ kɛ Luk 5:19., nɛ vɛnalɛvɛ ɛnavɛ kɛ itimbe atɛŋ, nɛ áma-sene zaa ala ɔn áza-ŋgiee yo ga. Asɔ kpaa, ɛnɛ ɔmɔnɛmɔ wʉ alɛ kɛ ɔfɛnda nɛ áma-kiile zaa ala ɔn aza-ŋgiee ɔmanɛ kɛ itimbe ga. 32Tesi nini ɔmanɛ kɛɛ ayel nɛ okeyi wʉ Lɔt#17:32 Okeyi wʉ Lɔt âkiili ɛtɔ, ɛyʉlʉ ɛna ikiil mɛkaŋɛmɛ matavanamɛ (Gen 19:26).. 33Ɔmɔnɛmɔ wʉ akan ala ɔn awal ɛyɛma ɛna, nɛ áyile ɛnɛ. Kpa ɔmɔnɛmɔ wʉ ayile ɛyɛma ɛna, nɛ ákol ɛnɛ. 34Mɛvɔl anu kacɛb, kɛ ife ɛnayɔɔ nɛ ife, vɛnʉl ɔfaalɛ válɛ kɛ ɛnaŋgɛ, nɛ óŋgiee ɔmɔɔ, nɛ wudi ásaŋ. 35Okevi ɔfaalɛ válɛ kɛ ɛgɔɔna asaŋgɛ ɔlʉŋgʉ, nɛ óŋgiee ɔmɔɔ, nɛ wudi ásaŋ.”#17:35 Voŋgwe vedivi avɛ nɛ ɔlʉndʉlʉ wee ndalɛ Mat 24:40, wʉ ɔkaŋɛ ala, 36 “Vɛnʉl ɔfaalɛ válɛ kɛ ɔfɛnda, nɛ óŋgiee ɔmɔɔ, nɛ wudi ásaŋ.”
37Ofii ɔn ala, “Ɔkʉ, fɛna ɛnɛ kiyee káyel?”
Avɔl navo ala, “Fɛsɛ ɛkʉmʉ ɛlɛ, fini ɛnɛ ɛ̈nʉnʉ iyɛ ɛyaa akʉmʉ ɛ́zwaŋa.”
Selectat acum:
Luk 17: Iceve-Maci
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©️2024 Luke Initiative for Scripture Translation
