Luk 13
13
Sɛɛl nini ɛcɔcɔɔ iyunu, ga nɛ nɛ́kwo
1Kɛ ɔkambɛlɛ wɔɔ, vɛnʉl vedivi ɔ̂lɛ fini vɛ ɔ̂vɔlʉ Zisɔs ɔkagh wʉ vɛnʉl vɛ Galili vedivi. Pailet âtɛma vɛnʉl ala ɔ̃yɛva vo ɔkambɛlɛ wʉ ɔ̂naa ɛsalanavɛ ivovu kɛ nɛ Ofilikpamɛ. 2Zisɔs afii vo ala, “Nɛ̂tes anu ala vɛnʉl vɛ Galili vee ɔ̂ya ɛcian asɔ kici yɛ ivo ɛcɔcɔɔ ɛnɛ ifo iyɛ vɛnʉl vedivi vɛ Galili omwem? 3Mɛvɔl anu mɛla, eey! Kpa sɛɛl nini ɛcɔcɔɔ iyunu, ga nɛ anu omwem kpaa nɛ́kwo kɛlɛ ndalɛ vo. 4Akasɛ nɛ̂tes anu ala kɛlɛ vɛ likwoŋ nɛ onivini vɛ itimbe iyɛnelena ɛ̂gba yɛva vo kɛ Silom vɔɔ, ɛnɛ ɛcɔcɔɔ ivo ifo iyɛ ɔmɔnɛmɔ wʉ alɛ kɛ Zelusalem? 5Cioow! Kpa mɛvɔl anu mɛla, sɛɛl ɛcɔcɔɔ iyunu, ga nɛ anu kpaa nɛ́kwo kɛ ndalɛ vo.”
Ɛkan yɛ agɛmba wʉ ayumwe aduŋgu ga
6Saŋ Zisɔs atɛfa vo ɛkan yee, “Ɔnʉl ɔmɔ âlɔ agɛmba kɛ ɛkʉŋʉ ɛna, ava-lii aduŋgu kɛ agɛmba wɔɔ, kpa akol masɛ kɛmɔɔ ga. 7Asɔ akaŋɛ nɛ ɔnʉl wʉ awanda ɛkʉŋʉ wɔɔ ala, ‘Tiye, ɛnya kɛlɛ anyʉmʉ ataalɛ ayɛ mɛva-liye aduŋgu fan agɛmba wee, kpa mɛ̂kol masɛ kɛmɔɔ ga. Tɛla ta ɔn kɛ ɛyaŋ. Ini acɔɔ zaa mɛ ɛyaŋɛ?’
8“Kpa ɔnʉl wʉ awanda ɛkʉŋʉ wɔɔ agɔl nɔnʉn ala, ‘Ɔkʉ, kpɛnɛ-de ɔn ɛnyʉm yee kpaa, kaka nɛ mɛ́time ɛyaŋɛ kɛ itine ɛna, mɛ́wa afʉʉ kini. 9Ikil yɛ áyumwe aduŋgu ɛnyʉm ɔkʉlʉ, nɛ kásɛva, ga nɛ wʉ́tɛla ta kɛ ɛyaŋ.’”
Zisɔs akʉs okeyi kɛ ife yɛyeŋena
10Kɛ ife yɛyeŋena, Zisɔs âlɛ kɛ iteena kɛ ɛca ɛmɔ iyɛ vɛ Zu, 11okeyi ɔmɔ âlɛ fini wʉ mʉndʉ wʉcɔcɔ âyeli ɔn alɛ nɛ igund kɛ izime. Âlɛ kɛ mɛfɔ wee anyʉmʉ likwoŋ nɛ anyieni, abɛ acoole ɛsɛla dɛŋ ga. 12Wʉ Zisɔs âyeni ɔn, ayɛla ɔn ala ãva kan isi, akaŋɛ nɔnʉn ala, “Okeyi, wʉ̂kʉna kɛ awaŋgɛ wuwu.” 13Saŋ apɛma ovoghu ɔnaghɛ kɛ ɔn, saŋ fini acoolu ɛsɛla dɛŋ, ahee ɛsɛghana Ofilikpamɛ.
14Kpa ɛsɛma ɛcɔ ɔkʉnʉl wʉ kɛ ɛca iyɛ vɛ Zu kici yɛ Zisɔs âkʉs kɛ ife yɛyeŋena. Asɔ akaŋɛ nɛ vɛnʉl ala, “Masaŋga ɔmɔnɛmɔ awʉ nɛ afe atalata ayayelena ɔtʉmʉ. Va nɛ ɔ́kʉs we kɛ afe ayɔɔ; x-navaa kɛlɛ kɛ ife yɛyeŋena ga.”
15Ɔkʉ agɔl nɔnʉn ala, “Anu vɛ nɛcuu vɛnʉl kɛ ayeli ayunu! Ɔmɔnɛmɔ wunu awʉ fan wʉ kɛ ife yɛyeŋena afala agund akasɛ ɛziakas ɛna kɛ oci wʉ ɛca, nɛ áza-see ɛn, nɛ ɛ́ŋwa ɛzɔl ga? 16Ɛnɛ kɛlɛ okeyi wee, wanɛ wʉ Abɛlaham, wʉ Satan akɔnd ɔn anyʉmʉ likwoŋ nɛ anyieni, ɛnɛ alɛ wʉ ɔmɔ áwal ɔn kɛ ife yɛyeŋena ga?”
17Wʉ Zisɔs âvɔlʉ asɔ, icwe ɛkɔl ɔmɔnɛmɔ wʉ agɔl ɔn ga, kpa vɛnʉl vedivi vɔɔ ɔsɛgha kici yɛ ɛnalɛvɛ iyɛsɛɛ yɛ Zisɔs âyele.
Ɔtʉlʉ vɛ Ofilikpamɛ avɛ kɛ ndalɛ ɛsaŋgɛ iyɛcɔɔ
18Saŋ Zisɔs afii ala, “Ɔtʉlʉ vɛ Ofilikpamɛ avɛ la kɛ ndalɛ ini? Mákal vo kɛ nɛ ini? 19Avɛ kɛ ndalɛ ɛsaŋgɛ yɛ mɛkɔkɔ wʉ ɛtɛghɛ, yɛ ɛlɛ cɔɔ. Ɔnʉl aza-lɔ ɛn kɛ ɛkʉŋʉ ɛna, nɛ ínel, nɛ íkiil ɛtɛghɛ kɛɛ ɛ̈nʉnʉ ɛva-waa aya kɛ azaŋgɛ ana.”
Ɔtʉlʉ vɛ Ofilikpamɛ ndalɛ ɔmanɛ kɛɛ amʉla
20Saŋ akɛ-fii pe ala, “Mákal Ɔtʉlʉ vɛ Ofilikpamɛ kɛ nɛ ini? 21Avɛ kɛ ndalɛ ɔmanɛ kɛɛ amʉla mɛgomu wʉ ɔyɛla ala yis wʉ okeyi atɛŋɛ cɔɔ, nɛ áce zwaŋ kɛ mɛgomu mɛ ɛkandɛghɛ mɛ mɛbo cɛŋ. Nɛ kásivi cɔɔ, nɛ yis wɔɔ áyel nɛ mɛgomu mɔɔ mɛ́mʉlʉ caca.”
Ɔfɛla wʉsʉndʉlaŋ
22Ndalɛsɛ Zisɔs âzaa kɛ Zelusalem, awo kɛ ɛswaŋ iyɛboona nɛ iyɛcɔcɔ, iteena vɛnʉl ɛnalɛvɛ. 23Ɔnʉl ɔmɔ afii ɔn ala, “Ɔkʉ, kɛlɛ vɛnʉl vacɔɔ cas ɛnɛ ife váwal?”
Zisɔs agɔl navo ala, 24“Nɔŋgʉ gbaŋ nɛ nɛ́nyɔl kɛlɛ kɛ ɔfɛla wʉsʉndʉlaŋ, kici yɛ mɛvɔl anu mɛla, vɛnʉl cɛŋ vánɔŋg ɛnyɔlana, kpa nɛ ɔmɔ ábɛ ga. 25Ɔkambɛlɛ wʉ oweni wʉ itimbe aguu ɔfɛla, nɛ nɛ́saŋ ocoolenavɛ kɛ ɔswaŋ, kɛ ɛkɛmana nɛ kɛ ɛkɔlana uno anu ala, ‘Ɔkʉ, kpɛnɛ-vuu asu ɔfɛla!’
“Kpa nɛ ágɔl nɛ anu ala, ‘Mɛ̂cil anu ga, mɛ̂cil masɛ fɛsɛ nɛsime ga.’
26“Saŋ nɛ́kaŋɛ anu ala, ‘Sɛlɛ-ya ɔyɛ, aa sɛŋwa mɛsɔlʉmʉ ɔlʉŋgʉ nawe, aa wʉte kpaa kɛ ɛswaŋ ɛyasɛ.’
27“Kpa nɛ ágɔl nɛ anu ala, ‘Mɛ̂cil anu ga, mɛ̂cil masɛ fɛsɛ nɛsime ga. Mʉwa nini fan isi kaŋgɛghɛ, anu omwem vɛ nɛyele ɛcɔcɔɔ.’
28“Fɛ oci ɔnawɔɔ nɛ nɛ́liaa, nɛ nɛ́yaa anyɛ, ɔkambɛlɛ wʉ nɛyen Abɛlaham, Azik nɛ Ziakɔb nɛ vɛnʉl omwem vɛ ɔtɔwa kici yɛ Ofilikpamɛ kɛ Ɔtʉlʉ ɔnavɛ, kpa nɛ ɔ́ta anu kɛ ɔswaŋ. 29Vɛnʉl ósime kɛ aziŋgili amemi fan ɔtalɛ wee, nɛ ɔ́va-caal kɛ ituŋunu iyɛboona iyɛ ɛlɛ kɛ Ɔtʉlʉ vɛ Ofilikpamɛ. 30Kɛ ife ɛnayɔɔ nɛ vɛnʉl vɛ ɔlɛ ɔmasɛ ɛtɔ aŋgiee vee, kɛlɛ vo sɛnɛ ɔ́lɛ vɛ isi, nɛ vɛ ɔlɛ isi aŋgiee vee, kɛlɛ vo sɛnɛ ɔ́masɛ ɛtɔ.”
Zisɔs alia kici yɛ Zelusalem
31Kɛ ɔkambɛlɛ wɔɔ, vɛnʉl vɛ Falasi vedivi ɔva-kaŋɛ nɛ Zisɔs ala, “Mʉwa fan oci wee, nɛ wʉ́za kɛ oci wudi. Helod aliyē wʉ áyɛva we.”
32Akaŋɛ navo ala, “Za-vɔlʉ nini izowu yɔɔ anu ala, ‘Máza isi kɛ isimena mʉndʉ vacɔcɔ nɛ kɛ ɛkʉsana vɛnʉl ɛnya nɛ ɔkʉlʉ, saŋ nɛ oyi nɛ mɛ́kule ɔmanɛ kɛɛ mɛva iyelena.’ 33Masɛ ini iyel, másaŋ ɔza-za ɛnya, nɛ ɔkʉlʉ nɛ oyi, kici yɛ akɛ gel-gel wʉ ɔnʉl wʉ atɔwa kici yɛ Ofilikpamɛ ákwo kɛ ɔswaŋ wudi ga, kpa kɛlɛ kɛ Zelusalem.
34“Woow! Zelusalem, Zelusalem! Wʉ̂yɛva vɛnʉl vɛ ɔtɔwa kici yɛ Ofilikpamɛ! Wʉ̂ta yɛva vo vɛ ɔtɛma kɛ nawe kɛ agon. Ɛkambɛlɛ cɛŋ mɛliye mɛla mátuŋunu ɔvɔnʉ vumbuvu ocici, ndalɛsɛ ɛŋgwan ikowu atuŋune ɔvɔnʉ ɔnavɛ kɛ avaalɛ ana, kpa nɛliye ga. 35Yene, ɔ̂sɛɛl itimbe iyuwu wa. Mɛvɔl nawe mɛla wáma-yen kamɛ ga, kaka nɛ wʉ́vɔl wʉla, ‘Vicowenavɛ ayɛ kɛ nɔnʉn wʉ ava kɛ ite iyɛ Ɔkʉ Ofilikpamɛ.’”
Selectat acum:
Luk 13: Iceve-Maci
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©️2024 Luke Initiative for Scripture Translation
