Matiu 3
3
Jọn Mingi Saraḅọ Asọ Tẹ́lẹ́mam
(Mak 1.1-8; Luk 3.1-18; Jọn 1.19-28)
1Anịsáa ma ḅụ Jọn Mingi Saraḅọ Judiya elesiri ma ḅom sị ẹ́gẹ́rẹ́kọọ wásámaarị ḅẹẹ, 2<<Ọ sii ḅụ pịghị tegó so ama ásẹ́mẹ́kiri ma kikiamam.>> 3Jọn anịị ikiakoro Aizaya ḅẹarị ḅọ ma ọ dugho sáá ḅẹẹ,
<<Gbẹ́rẹ́ pụghọ ilúghuarị elesiri, ḅụ,
<Asọ tẹlẹma Gbámásóḅọ ma pịrị,
gbụ́nụ́nụ́ asọ mịẹ ọ pịrịị.> >>
4Kameli pa sị nama oju osuka anịị Jọn pa ori bịtẹ mịẹnyẹ nnị pịghị námá apara pa mịẹ kundu kpọnyẹ́ anịị o kundu fịnịnyẹ ori fị́nyẹ anịị ápịrịgbánị na ịwọ akamapulo. 5Túminị́ warị saghị Jerusalem na Judiya gbọrụ na pịghị Jọdan ma na kikia angaá mamgba ḅụ pághá ọ damaḅo. 6Nnị nna sii kịẹm, n warị ọ ḅara mingi sara Jọdan tọ́rụ ḅụ. 7Kụ́ma ọ ḅoo tọgha Farisii na Sadusiiapụ árị sáá ọ damaḅoapụ ḅẹ́ ọ mingi pa n sara, ori ḅẹm: <<Ọmịnị tọgha sii ododó! Tụọ ọ birinụ́nụ́ ḅẹ́ ọ mangị ḅoarị tọ́rụ́siarị ma pịrị? 8Ọmịnị ibinyẹ mịẹ, diebẹnyẹ ḅẹ́ ọ sii ḅụ pịghịmam. 9Ọ mịnị ọkọsima sị dugho ọ ḅụ pịrị ḅẹẹ, <Ebraham anịị wámịna opu daḅọ.> A dugho ọ́ pịrịm ḅẹ́ mịná dapịrị ma ḅụ Tamuno ine awọ tẹ́mẹ́ sághị Ebraham pịrịbẹm. 10Ḅẹẹ mị́sa kumḅu ma nnị pá sị ma kune ḅụ wárịmam, ibi sịmgbọ́lụ suagha sịmgbọ́lụ gonyẹ́ gonyẹ́ nnị anị pẹlẹgbibẹm si anị gbi kọrịfịnị bie sua.
11<<A mingi pa mingi pa ọ saram, diearịnyẹ ḅẹ́ o sii ḅụ pịghịmam. Kụ́ma iyẹ ọḅụju ḅoarị ḅo imi opuma kụrọ i nẹngịḅọ ọ sua agbaa a laagha anị dighiákị ḅụ. Ori Tọ́ntọ́ Tẹ́mẹ́ ma na kọrịfịnị pa mingi pa ọ sárábẹm. 12Ori ọ ḅarabie ọ nyẹ ọlọm ọ pa ákpákpá ma sẹlẹ sii sịmgbọlụ ma ḅụ, sị sịmgbọlụ ma kobiri nnị anị koko koko yọ sua, sị ákpákpá ma dọ́ghụ́ma kọrịbibịgha fịnịbie.>>
Jizọs Mingi Sara
(Mak 1.9-11; Luk 3.21,22)
13Anịsáa Jizọs warị Galili ḅụ saghị Jọdan ḅoo Jọn mingi pa ọ sara bẹ ḅara. 14Kụ́ma Jọn asọ dọ́ghụm ori okiki, ḅẹarị ḅẹẹ, <<Ịrị mingi pa i sara bẹ nakaragha ị́ i damaḅoo ḅẹẹ a mingi pa ị sara?>> 15Jizọs pagharam, <<Wáriso anị ọkọfịnị mị́sa; ḅẹẹ anị ḅara ma wamịnị ine Tamuno binyẹ gonyẹ́ gonyẹ́ mịẹbẹm.>> Jọn warị minini. 16Jizọs mingi sara fama gbẹ́rẹ́kiri ọ mingi ma bie ḅọ́rọ́ ọgọnọ iwoom. Anịsáa ma ḅụ so warị findi ọ warị Tamuno Tẹ́mẹ́ ma árị elesia ḅara pa kóróḅoarị sị ọ ḅụ gbana. 17Pụghọ warị sobie saghị ẹ́gẹ́rẹ́ ḅẹẹ, <<Mịị i Tụ́wọ ma, a ḅẹlẹma ḅo, ọ ḅụ a opuma bieḅẹlẹm.>>
Selectat acum:
Matiu 3: IBY
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©2024 Luke Initiative for Scripture Translation
