LUKA 21

Cougmoo" Myhi, Da" Alu: Ngei

(Mat 12:41-44)

1Yesu lheing: yu" kaid uri yoo" mo, di mo, No' ku" yhoem: moo" mo ngei boin" moo alu: kaid nyid boem ziri myang. 2Houg: yo' dakhyoo" ti"- gyid dingga" eig cu' ri shojhen: da" cougmoo" myhi, dayug re" kaid nyid ziri we myang. 3Nyang: tid zigi ngoo nanu" ri tid ba:- he: da" shojhen: cougmoo" myhi, gi dangain" bang: tho' moo je kaid abye:. 4Houg: bang: gi nyang: nya: ngei jain" ngei thang: mo alu: dakaid ago". Nghoidsho' loug we' he: da" myiyi: myhi, gi shojhen: da" zi nyang: yo' gu: dangain" zoo: wa zi dangain" ri kaid pyam abye: ga tid.

Yesu Gi: Kyu" Mho' Yhoem: Moo" Byo, Loo" Wa Zi Kho" Kyo"

(Mat 24:1-2; Mar 13:1-2)

5Cangzoo: yi dayham" gi noku yhoem: moo" gi lugloem: joem yo"- Mangsoo ri ab noung" to" ziyoo joem gi myang lho: hau: zi khayhi' young" lha" ga: tid go" nyid boem. 6Hau: uri Yesu gi Nanu" shau" myang da" zi joem dangain" gi lug daloem: we' akhang: joyoo moo ake" too" loo: sho' byo sain" pyam da ayo, ju" loo wa" ga: tid.

Shen" Yhen Zi yo' Yau: Khe" Khyoo:

(Mat 24:3-14; Mar 13:3-13)

7Houg: bang: gi sara: we"- he: da" moo" gi kha: uri bue" loo wa lha". he: moo" bue" lo da" uri ce: noem alhoo: again yi bue" thu' loo wa lha"» ga: zheing: myid: boem.

8Yesu tid zigi Nanu" ri mhau zi athoung" shau" wa shid' re" zed" nyid ge' Byu myoo" sho' mo, nyang:- nga" n ga" khyoo: yo' sen: lho: ngoo gi nyang: nghoid ga: tid da" ayo, ju" ri" wa nghoid loug we' houg: bang: da" thang: moo acang loo" goo. 9Nanu" gi meing byo, lo da" gyi dang: yo"- doin: lhoem" keing" khyoo, go" da" lu dang: shaug" gyoo: lo da" uri adain agyug goo"- houg: yhang: te" da" moo" gi xang" shid" bue" loo wa. Nghoidloug we' lo" thang zigi anghoid shi" ga: tid.

10Nyang: yhe: lho: xo' tid da" zigi Byu damyu" yo" damyu"- damoug: yo' damoug: mungdain: daloem: yo" daloem:- gyipui" phang meing: zain go" loo wa. 11Joyoo khang" moo" moo myid leig gyi" sho' leig da" khyoo:- zooyoid phang" khoug: gyoo" zi dab, lei da" noophyoo" aja: aja: myo: loo wa. Mougkhung: mo gyoug pho" ziyo'- mau" pho" alhoo: again bue" thu' loo wa. 12Nghoidloug we' he: da" moo" abue" loo shi" da" uri byu yi gi nanu" ri myheig yu, lho: shen" yhen lo boem wa. Nanu" ri tarha" yung" moo zheing: ab pyam wigi Tarha" dang: kho" lho: thung: khyo, pyam zi shau" boem wa. Nanu" gi nga" myeing yoomo kho: kham" yi yo"- amyeing" ci: mo, da" shid' khoin" moo ju" lo" boem wam bye. 13Hid: su" bue" loo loug - nanu" gi ngei bu: lu dang: ri tid loo" wa shid re" amyeing akhang" ri yo" yu boem wa nghoid. 14Houg: yoomo nanu" gi ce: khyo" phougtu" wa ziri agung youg wa shid' mo nanu" da" nheigloem: ri nyang: soin' too" ge'- 15Khasu" wim gari nanu" da" gyivoo yi ayo" ngeig- ayo" shang" yab jo, sho' wim da" dang: yo"- nyan phajhi" yo' mungdang: ri ngoo nanu" ri byid: wa byid: loo wa yoomo nghoid. 16Nangnu" gi nya: myhi' nya: phoo- nya: mang: nya: nhung"- bidnoem seing" cang" yi yo"- nanu" nya: da" byen cang" yi wigi gyivoo yi da" lo, moo ab pyam zi shau" boem wa. Nanu" mo dayham" rigi said pyam boem wa nghoid. 17Nga" myeing yoomo byu yug khang" moo" gi nanu" ri ngheing" lo boem wa. 18Nghoidloug we' nanu" da" vhuloem mo xam: dakhaid we' byug wa zi anghoid. 19Nanu" gi geung: geung: teing teing yab, jo, ge' houg: lang" she khyoid yu zi dashau" boem wa.

Yesu Gi: Yerusalem Voo Moo" Byo, Loo Wa Khyoo: Ri Tid

(Mat 24:15-21; Mar 13:14-19)

20Yerusalem voo moo" ri gyivoo joem re" lheing: kham: ci: ziri nanu" myang da" uri hau: voo byo, loo" wa zi jhang bye: ein: si' loo: ge'. 21Hau: uri Yuda mung" moo nyid da" mung" byu yi gi boem tho' khyoo: phang: do, loo" ca" goo" wa. Soo" yo voogung moo nyid mo, gi voo moo" khyoo: avang loo goo. Voo moo" mo bang: we phang: ca" goo" wa. 22Khasu" wim gari hau: bidnyid gi jhoem: mungdang: moo tid to" ziyo' dakhyoo ti"- joeb byeung" lo da" yooboo dam kaid da" bidnyid nghoid. 23Hau: ayo, moo gunglid: ci: da" myiyi: yi yo"- zoonu" nya: myhi' gi gyoug pho" zi shau" boem wa nghoid. Hau: meing: moo gyoug pho" jamjau ju" lo lho: houg: mo byu yi we' Mangso yooboo dam kaid zi shau" boem wa nghoid. 24Byu dayham" gi sham: dam yo" said pyam zi shau" boem wa. Dayham" bang: rigi join khyo" myheig shu" lo" boem wigi mung" zoo: mung" zeing: moo byo sain" lo" boem wa. Tungbau Byumyu" yi gi nyang: nya: vhoeb khang" da" pyaid athang thang gi Yerusalem voo moo" ri khyidvoo: khoug: moo nang zeug ci: boem wa.

Byu Nya: Zoo: Ju" Ri" Wa Khyoo:

(Mat 24:29-31; Mar 13:24-27)

25Bid kyi: lham" moo" joem moo mau" pho" alhoo: again bue" thu' loo wa. Mougmyid tho' mo byumyu" bain sho' mo, gi Panglai gyid mung" mo being mhoid baid poug myheing go" da" thui:- shaug" gyoo: boem yoomo nheig coid coid lo" boem wa. 26Mougkhung: tho' mo yoem: vhoo" joem ri nyangnu" da" moozoo" mo khaid khyo' kaid zi shug yoomo myidjang: tho' moo bue" loo wa shid' gyoin noo gyoin ri myang yoomo byu yi gi gyoug dain coid leung lo" boem wa. 27Hau: thang: ri jhoem" moug" khoug moo gyi: thang da" yoem: moo" phung" yoeb yo'-byu nya: zoo: gi thu' myang gyoo" loo wa. 28He: da: moozoo" bue" thu' lo da" uri nanu" da" khyoid yu khyoo: gi jhang loo bye yoomo to' yab lho: nanu" da" vhuloem joem tu" yu" ge' khasu" wim gari nanu" da" khyoid yu khyoo: gi jhoug loo bye.

Lafoem Gam Mo Jhau" Yu Khyoo:

(Mat 24:32-35; Mar 13:28-31)

29Hau: thang: ri Yesu gi nyangnu" ri dangtu' yu lho: tid zigi lafoem gam yo" gootu: da" seig gam joem ri tu, yu" ge'. 30Hau: seig gam joem moo anyug toin loo lang" gi nanu" hau ziri myang lang" zain vang khoem" jhang bye: zi se' ago". 31Houg: yo' dakhyoo" ti"- tid kyo" lid lo da" moozoo" joem bue" lo da" ziri myang lang" gi Mangso da" mungdain: gi jhang bye: ein: nanu" xoem" too" loo: ge'.

32Akhid" dei nyid da" byu yi he: yam" dangain" shid: shi" ri he: khyoo: dangain" bue" loo wa ziri myid boin: ge'. 33Mougkhung: yo" myidjang: lid lo" byug nghoid loug we' nga" mungdang: gi khanham we' alailoo" wa.

Zid" Lhid Nyid Ca" Khyoo:

34Nanu" gi zo: pyoo: shug pyoo: yed coid ziyo' nyid' lho: he: pyaid shid' re" za: myid myo nyid wigi-ge da" ayo, ri aze" thang wa shid' re" lhid zed" nyid ge'. 35Houg: su" alhid zid" nyid nghoid rigi Tarha" dang: kho" da" bidnyid gi mang: khung" beig gyoo" lo yhangti"- nanu" da" atho' moo dalheing: dam beig gyoo" loo wa. Hau: bidnyid gi byu xangsu: bain sho' mo, da" tho' moo gyoo" loo wa nghoid. 36Gyeing: gyeing: soo" soo" koid: nyid ge' ju" gyoo" loo wa da" myo, dain' dei: da" shid: gyoin noo gyoin ri yo" kham: zeing: yab jo, lho: wigi Byu nya: zoo: da" shid' khoin" moo dain: dain: yo" yab lho: tarha" dang: kho" ziri yo" kham: wa shid' re" khanham we akyu" damho, nyid ge'.

37Yesu gi hau: danyid" goin" noku yhoem: moo" moo jhau" mho' byid: nyid lho: myenthang: zoo" rigi zhainlun ga: da" boug khyoo: do, lo" lho: damyen goin houg: moo lo" nyid. 38Byu myoo" sho' mo, gi nya: dang: ri tam" gyoo: wa shid' re" No' ku" yhoem: moo" moo nab kyoo no" re" lo boem.

Selectat acum:

LUKA 21: LCL

Evidențiere

Partajează

Copiază