MATEO 17
17
U chica'anil Jesuse' cu jelpajal
(Mc 9.2-13; Lc 9.28-36)
1Cu dzo'ocol u máan seis kiino'obe' Jesuse' tu bisaj Pedro, Jacobo yéetel Juan u yíidzin Jacobo, ca j bin tu juunal yéetelo'ob ti' jun p'éel ca'anal pu'uc. 2Te'elo' jelpaj u chica'anil tu táano'ob. U táan yiche' jo'op' u léenbal je'el bix le kiino', u nooke' sacchaji je'el bix le sáasilo'. 3Leti'obe' tu yilajo'ob xan Moisés yéetel Elías táan u tzicbalo'ob yéetel Jesús. 4Pedroe' tu ya'alaj ti' Jesús: Yuumtzil, ¡buca'aj ma'alobil ca p'áataco'on waye', wa a káate' cu páajtal c beetic óox p'éel paselo'ob! jun p'éele' a ti'ali', u láake' u ti'al Moisés u láake' u ti'al Elías.
5Ca'aliquil táan u t'aan Pedroe', j pi'ixo'ob tumen jun p'éel sacjome'en múuyal; ti' le múuyalo' jóok jun p'éel t'aan tu ya'alaje': Lela' in yaabilaj Paal, tu yo'olal máax jach qui'imac in wóol. Leti' a wu'uye'ex u t'aan.
6Le ca tu yu'ubajo'ob lela', le j canbalo'obo' j noclajo'ob lu'ume' ca jach sajacchajo'ob. 7Jesús túune' tu nadzajuba ti'ob, tu péedz kabtajo'obe' ca tu ya'alaj ti'ob: Líikene'ex, ma' a ch'a'ique'ex sajaquil.
8Le ca j paacatnajo'obe' mix máac u láak tu yilajo'ob, chéen Jesús.
9Ca'aliquil táan u yéemelo'ob ti' le pu'uco', Jesuse' tu ya'alaj ti'ob: Ma' a tzicbaltique'ex ti' mix máac le ba'ax dzo'oc a wilique'exa', p'ate'ex tac quéen ca'a púut cuxlac u Paal Máac ti' ichil le quimeno'obo'.
10Le aj canbalo'ob túuno' tu káat chi'ito'ob ti' Jesús: ¿Ba'ax ten u aj ca'anbesajilo'ob le a'almaj t'aano' cu ya'alico'ob yaan u taal yáax táanil Elías?
11Jesuse' tu núucaj ti'ob: Tu jaajile' Eliase' yaan u taal yáax táanil, yéetel yaan u nu'ucbesic tuláacal ba'al. 12Ten túune' quin wa'alic te'exe' Eliase' dzo'oc u taal, ba'ale' leti'obe' ma' tu kaj óolto'obi', yéetel tu beetajo'ob ti' tuláacal ba'ax tu yóoltajo'ob. Bey xan cun mukyaj u Paal Máac tu kabo'obo'.
13Le aj canbalo'ob túuno' tu na'atajo'ob táan u t'aan tu yo'olal Juan Bautista.
Jesuse' cu dzáic u toj óolal jun túul xi'ipal yaan jun túul kaakas pixan ti'
(Mc 9.14-29; Lc 9.37-43)
14Le ca j kucho'ob tac tu'ux yaan le máaco'obo', jun túul máaque' tu nadzajubáa ti' Jesús, xolaj tu táane' ca tu ya'alaj ti':
15Yuumtzil, ch'a'a óotzilil ti' in paal, tumen cu léequel yéetel jach yaj u mukyaj; ya'ab u téenel cu lúubul ich káak wa ich ja'. 16Tin taasaj ti' a aj canbalo'ob ba'ale' ma' páatji u dzaquico'obi'.
17Jesuse' tu ya'alaj: ¡Ma' ocsaj óol yéetel loolob wíinique'ex! ¿Tac ba'ax kiin kabéet in wantal ta wéetele'ex? ¿Tac ba'ax kiin yaan in mukyajtique'ex? Taase'ex way le xi'ipalo'.
18Jesús túune' tu keyaj le kaakas pixano' ca tu beetaj u jóokol ti' le xi'ipalo' máax utzchaj ti' le jun súutuco'.
19Cu dzo'ocole' le aj canbalo'obo' j t'aanajo'ob jun páayil yéetel Jesús ca tu káat chi'ito'ob ti': ¿Ba'axten to'one' ma' páatji c jóokesic le kaakas pixano'?
20Jesuse' tu ya'alaj ti'ob: Tumen te'exe' jach jun p'íit a wocsaj óolale'ex. Tu jaajil quin wa'alic te'exe', wa yaan a wocsaj óolale'ex quexi' bey jun p'éel u neek mostazae', je'el a wa'alique'ex ti' le pu'uca': Lukesabáa te'ela' xeen táaxel tu'ux; le pu'uco' yaan u lukul. Tuláacal ba'al je'el u páajtal a beetique'ex wa yaan a wocsaj óolala'ex. 21Ba'ale' le kaakas pixano'ob beyo'oba', chéen yéetel payalchi' yéetel su'ukin cu páajtal u jóoksa'alo'ob.
Jesuse' cu ya'alic tu ca'a téen yaan u quíimsa'al.
22Ca'aliquil táan u múuch' máano'ob tu lu'umil Galileae', Jesuse' tu ya'alaj ti'ob: U Paal Máaque' yaan u ku'ubul tu kab máaco'ob, 23yéetel yaan u quíimsa'al, ba'ale' yaan u ca'a púut cuxtal tu yóox p'éel kiin. Jach okomchaj u yóolo'ob tu yo'olal le ba'ax a'ala'ab ti'oba'.
U bo'olil le patan u ti'al le kulnaj
24Le ca j kuch Jesús yéetel u aj canbalo'ob tu caajil Capernaume', le máaxo'ob cu kamico'ob le patano'ob u ti'al le kulnajo' j bino'ob u yilo'ob Pedroe' ca tu káat chi'ito'ob ti': ¿A aj ca'anbesaje'exe' ma' tu bo'otic le patano'ob u ti'al kulnaj?
25Pedroe' tu núucaj: Cu bo'otic. Le ca j ooc Pedro ich naje', Jesuse' j t'anaj táanil táan u ya'alic ti': ¿Bix a wilic, Simón? ¿U ajawo'ob yóokolcaabe', máax ti'ob cu tzáico'ob le patano' yéetel le u láak bo'olalo'obo': ti' u yéet caajalo'ob wa ti' le táanxel lu'umilo'obo'?
26Pedroe' tu núucaj ti': ti' le táanxel lu'umo'obo'. Jesuse' tu ya'alaj ti': U yéet caajalo'ob túune' ma' kabéet u bo'olalo'obi'. 27Ba'ale' u ti'al ma' c beetic u kuuxil mix máaque', xeen te j ka'anabo', pul a x lutzube' ca a jóokes le yáax cay cun lúubulo'. Tu chi'e ti' can a wil jun p'éel taakin je'el u chúucpajal u ti'al a bo'otic in patan yéetel a ti'ale'; bise ca a bo'ote.
Selectat acum:
MATEO 17: YUA04
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Maya de YucatánTumben Nupt'an NT © Sociedad Bíblica de Mexico, 2004.
