Nai Vakatekivu 32
32
Sa rairai vei Jekope e so na agilose, 1, 2. Sa talaki vei Iso ko koya, 3-6. Sa rerevaki Iso, 7, 8; a sa masuta kina na Kalou, 9-12. A nona ka ni loloma vei Iso, 13-23. Sa veikitaki kei na agilose, 24-32.
1A SA lako yani e nona sala ko Jekope, a ra sa sota kaya na agilose ni Kalou. 2Ia ni sa kunei ira ko Jekope, sa kaya, O qo na nona matai valu na Kalou. A sa vakatoka na yaca ni yasana ko ya ko Meeneimi [A matai valu e rua].
3A sa tala nai talatala ko Jekope me liutaki koya kivei Iso na tuakana, ki na vanua ko Seira, ki na vanua i Itomi. 4A sa vakaroti ira, ka kaya, Dou vosa vakaoqo vua na noqu turaga ko Iso; Sa kaya vakaoqo na nomu tamata ko Jekope, Au tiko vulagi kei Lepani, a sa dede kina me yacova na gauna o qo: 5a sa tu vei au na karavau, kei na asa, na sipi, kei nai talatala, kei na vada: ia kaʼu sa qai talaki meʼu tukuna vua na noqu turaga, meʼu kune loloma vei iko.
6A ra sa lesu mai kivei Jekope nai talaki, a ra kaya, Keitou a lako vua na tuakamu ko Iso, a sa lako talega mai ko koya me mai tavaki iko, kei ira vata kaya na tamata e lewe va na drau.
7A sa rere vakalevu ko Jekope, a sa rise-kete: a sa wasea na tamata era tiko kaya, kei na sipi, kei na karavau, kei na kameli, ka me mata e rua; 8ni sa kaya, Kevaka sa lako mai ko Iso ki na mata e dua, ka yavita, ena qai dro bula na mata sa vo tiko.
9A sa kaya ko Jekope, Na Kalou ni tamaqu ko Eparaama, ko iko na Kalou talega i Aisake na tamaqu, i Jiova, ko a kaya vei au, Mo lesu ki na nomu vanua, kei na wekamu, kaʼu na caka vinaka vei iko: 10au a tawa yaga meʼu rawata e dua na ka lailai e na nomui loloma kecega, kei na nomu vosa dina, ko sa cakava vei au na nomu tamata; niʼu a lako wale kaya na noqui titoko niʼu a lako-kosova na Joritani o qo; ia kaʼu sa qai tubu me mata e rua: 11au masuti iko, mo vakabulai au mada mai na liga i tuakaqu, mai na liga i Iso: niʼu sa rerevaki koya, de na lako mai ko koya ka mai yaviti au, kei ira vata na gone kei tinadra: 12ia ko a kaya, Kaʼu na caka vinaka vakaidina vei iko, ka cakava na nomu kawa me ra vaka na nuku mai na matasawa, a ya sa sega ni wiliki rawa e na vuku ni levu.
13A sa moce maikea e na bogi ko ya: a sa taura na ka sa tiko vua me ka ni loloma vei Iso na tuakana; 14e rua na drau na koti alewa, ka ruasagavulu na koti tagane, e rua na drau na sipi alewa, ka ruasagavulu na sipi tagane, 15e tolusagavulu na kameli tinatina kei na luvedra, e vasagavulu na karavau alewa, ka tini na karavau tagane, e ruasagavulu na asa alewa, ka tini na luve ni asa. 16A sa solia ki na ligadra na nona tamata, me lako vakai koya na mata e dua kei na mata e dua; a sa kaya vei ira na nona tamata, Dou liutaki au yani, ka me veiyawaki na mata e dua kei na mata e dua. 17A sa vakarota vua sa liu, ka kaya, Ni sa sota kei iko ko Iso na tuakaqu, ka tarogi iko, ka kaya, A nei cei ko iko? ka ko sa lako kivei? ka nei cei na ka o qo sa liutaki iko? 18mo qai kaya, A nei Jekope na nomu tamata; o qori nai loloma sa kauti vua na noqu turaga ko Iso: ka, raica, sa muri keitou talega ko koya. 19A sa vakarota nai karua talega, kei nai katolu, kei ira kecega era muria na qele ni manumanu, a sa kaya, Dou vosa vakaoqo vei Iso, ni dou sa kunea: 20ia dou kaya talega, Raica, sa muri keitou mai ko Jekope na nomu tamata. Ni sa kaya ko koya, Au na vakayalovinakataka e na ka ni loloma sa liutaki au, ia emuri kaʼu na raica na matana; de vinakati au beka.
21A sa liutaki koya yani na ka ni loloma: a sa tiko ko koya e na koro e na bogi ko ya. 22A sa tu cake ko koya e na bogi ko ya, ka kauti rau na watina e rua, kei rau na nona vada, kei iratou na luvena tagane e tinikadua, a sa lako-kosova na uciwai ko Yapoki: 23a sa kauti ira, ka talai ira me ra lako-kosova na uciwai, ia sa tala ki tai kadua na nona ka.
24A sa vo ko Jekope a sa tiko duadua; a rau sa veikitaki kei na dua na tamata ka yaco ki na kida ni mataka. 25Ia ni sa kunea ko koya ni sa tawa gumatua vua, sa tara na veiuturi ni dibina; a sa mavule na veiuturi ni dibi i Jekope, ni sa veikitaki tiko kaya. 26A sa kaya ko koya, Mo laivi au mada meʼu lako, ni sa kida mai na mataka. A sa kaya ko Jekope, Au na tawa laivi iko, kevaka ko tawa vosavakalougatataki au. 27A sa kaya vua ko koya, Ko cei na yacamu? A sa kaya, Ko Jekope. 28A sa kaya, Ena tawa kacivi tiko na yacamu ko Jekope, ko Isireli ga: ni ko sa kaukauwa vua na Kalou kei ira na tamata, ka ko sa gumatua. 29A sa taroga ko Jekope, ka kaya, Mo tukuna mada mai vei au na yacamu. A sa kaya ko koya, A cava o qo ni ko sa taroga na yacaqu? A sa vakalougatataki koya maikea. 30A sa vakatoka ko Jekope na yaca ni yasana ko ya ko Penieli [A mata ni Kalou]: ni keirau sa veiraici kei na Kalou e na mata i keirau, ia kaʼu sa bula ga.
31A sa cadra vua na siga ni sa lako tani mai Penieli, a sa lokiloki lako e dibina. 32O koya era sega ni kania kina na na a ya mai na veiuturi ni dibi ko ira na luve i Isireli, ka yacova na gauna o qo: e na vuku ni ka tara ko koya na ua mai na veiuturi ni dibi i Jekope.
Selectat acum:
Nai Vakatekivu 32: FIJ1864
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
First full Bible in the Fijian language © British and Foreign Bible Society, 1864.