Nai Vakatekivu 30
30
Sa vuvutaki tuakana ko Rejeli, ka solia na nona vada vei Jekope, 1-8. Sa qai solia na nona vada ko Lia, 9-13. Sa domona ko Rejeli na ka e kunea ko Rupeni, 14-16. Sa vakasucu tale ko Lia, 17-21. Sa vakasucu ko Rejeli, 22-24. Sa gu ki nona vanua ko Jekope; a sa masuta ko Lepani me tiko ga, a sa yalataka na kenai voli, 25-36. A ka sa cakava ko Jekope me levu kina na nona manumanu, 37-43.
1Ia ni sa kunea ko Rejeli ni sa tawa vakasucu vei Jekope, sa qai vuvutaki tuakana ko Rejeli; a sa kaya vei Jekope, Solia mada vei au na gone, deʼu mate. 2A sa waqa mai na cudru i Jekope vei Rejeli: a sa kaya, Oi au beka nai karua ni Kalou, o koya sa bureitaka vei iko na vua ni kete? 3A sa kaya ko koya, Raica, na noqu vada ko Pila, mo curu vua; ka me vakasucu meʼu tenea, a meʼu vakaivakawa vua koi au talega. 4A sa soli Pila na nona vada me watina: a sa curu vua ko Jekope. 5A sa kunekune ko Pila, ka vakasucuma na goneatagane vei Jekope. 6A sa kaya ko Rejeli, Sa lewai au na Kalou, a sa rogoca na domoqu, a sa solia vei au na goneatagane: o koya sa vakatoka kina na yacana ko Tani [Sa lewa ko koya.] 7A sa kunekune tale ko Pila na vada i Rejeli, a sa vakasucuma vei Jekope nai karua ni luvena. 8A sa kaya ko Rejeli, Au sa veibo matua kei tuakaqu, ia kaʼu sa gumatua: a sa vakatoka na yacana ko Nafitali [Na veibo].
9Ia ni sa kunea ko Lia ni sa cegu ni vakasucu, sa tauri Silipa na nona vada, a sa solia vei Jekope me watina. 10A sa vakasucuma vei Jekope e dua na luvena tagane, ko Silipa na vada i Lia. 11A sa kaya ko Lia, Sa lako mai na vinaka. A sa vakatoka na yacana ko Kata [Na vinaka]. 12A sa vakasucuma vei Jekope nai karua ni luvena, ko Silipa na vada i Lia. 13A sa kaya ko Lia, Au sa kalougata, ni ra na vosavakalougatataki au na gonealewa: a sa vakatoka na yacana ko Aseri [Sa kalougata]. 14A sa lako voli yani ko Rupeni e nai tabayabaki sa tamusuki kina na witi, a sa kunea e so na tuta mai na veico, a sa kauta mai kivei Lia na tinana. A sa kaya vei Lia ko Rejeli, Mo solia mada vei au e so na nona tuta na luvemu. 15A sa kaya vua ko koya, E ka lailai beka ni ko sa kauta tani na watiqu? ia ko sa via kauta talega na nona tuta na luvequ, ne? A sa kaya ko Rejeli, O koya ena moce kina kei iko ko koya e na bogi o qo e na vuku ni nona tuta na luvemu. 16A sa lako mai na veico ko Jekope e na yakavi, a sa laʼki veitata kaya ko Lia, a sa kaya, O na curu mai vei au; niʼu sa voli iko dina ga e na nona tuta na luvequ. A sa moce kaya ko koya e na bogi ko ya.
17A sa rogoci Lia na Kalou, a sa kunekune ko koya, a sa vakasucuma vei Jekope na kenai kalima ni luvena. 18A sa kaya ko Lia, Sa solia vei au na Kalou na ka kaʼu a volia, e na vuku niʼu a solia na noqu vada vua na watiqu: a sa vakatoka na yacana ko Isakari [Nai voli]. 19A sa kunekune tale ko Lia, a sa vakasucuma vei Jekope na kenai kaono ni luvena. 20A sa kaya ko Lia, Sa solia vei au na Kalou nai loloma vinaka; sa na qai via tiko vata kei au na watiqu, e na vuku niʼu sa vakasucuma vua e ono na luvena tagane: a sa vakatoka na yacana ko Sepuloni [Na tiko vata]. 21Ia emuri, sa vakasucuma e dua na luvena alewa, a sa vakatoka na yacana ko Taina [Na lewa].
22A sa nanumi Rejeli na Kalou, a sa rogoci koya na Kalou, a sa cakava me vakasucu rawa. 23A sa kunekune ko koya, ka vakasucuma e dua na luvena tagane; a sa kaya, Sa kauta tani na noqu madua na Kalou: 24a sa vakatoka na yacana ko Josefa [Ai kuri]; a sa kaya, Ena kuria tale vei au e dua na luvequ ko Jiova.
25Ia ni sa vakasueumi Josefa ko Rejeli, sa qai kaya vei Lepani ko Jekope, Mo laivi au meʼu lako ki na noqu yasana, kei na noqu vanua: 26mo solia na watiqu kei na luvequ, ko iratou kaʼu sa qaravi iko kina, ka meʼu lako: ni ko sa kila na noqu cakacaka kaʼu sa cakava vei iko.
27A sa kaya vua ko Lepani, Kevaka ko sa lomani au, mo kakua: niʼu sa kila vinaka sa vakalougatataki au ko Jiova e na vukumu. 28Sa kaya talega ko koya, Cavuta vei au na nomui voli, kaʼu na solia.
29A sa kaya ko koya, O sa kila na noqui valavala niʼu sa qaravi iko, kei nai; tovo ni nomu manumanu ni sa tiko kei au: 30ni sa lailai na nomu ka niʼu a sega ni lako mai, a sa qai tubu me levu; ia sa vakalougatataki iko ko Jiova ni kaʼu sa tiko eke: ia o qo, kaʼu na vakarau ninaica e na vuku ni noqu vale talega?
31A sa kaya, A cava meʼu solia vei iko?
A sa kaya ko Jekope, E sega na ka mo solia vei au: kevaka ko na cakava vei au na ka o qo, kaʼu na vakania ka vakatawa tale na nomu manumanu; 32au na lako e loma ni nomu qele ni manumanu kecega e na siga edaidai, ka kauta tani maikina na manumanu kecega sa volai vakamatailalai se sa volai vakamatailelevu, kei na manumanu damudamu vei ira na sipi, kei na kena sa volai vakamatailelevu se sa volai vakamatailalai vei ira na koti; ia ena kequi voli na kena sa vakaoqo emuri: 33ia ena qai tukuni au e matamu e na gauna emuri na noqui valavala dodonu, ni ko sa laʼki raica na kequi voli: ko ya kecega sa tu vei au, sa tawa volai vakamatailalai se volai vakamatailelevu vei ira na koti, se damudamu vei ira na sipi, ia sa butakoci o qori.
34A sa kaya ko Lepani, Raica, e vinaka me vaka na nomu vosa.
35A sa tawasea tani ko koya e na siga ko ya na koti tagane sa vola koso ka volai vakamatailelevu, kei na koti alewa sa volai vaka matai lalai ka volai vakamatailelevu, ko ya kecega sa vulavula e so na tikina, kei na ka damudamu kecega vei ira na sipi, a sa solia ki na ligadratou na luvena. 36A sa lewa me nona yawa kei Jekope na yawa e lakovi rawa e na siga e tolu: a sa vakania ko Jekope na kena vo ni qele ni manumanu i Lepani.
37A sa kauta ko Jekope na taba ni kau vulavula sa drokadroka, kei na taba ni vutu kei na ivi ni papalagi; a sa karia me vulavula e so na tikina, a sa kitaka me rairai na vulavula e na taba ni kau: 38ia na taba ni kau sa karia oti, sa viritu e na mata ni qele ni manumanu e na takona, e nai gunugunu, ka lako mai kina na qele ni manumanu me gunu; ni ra daukunekune ni ra lako mai me gunu. 39A sa kunekune na qele ni manumanu e na mata ni taba ni kau, a sa vakasucuma na manumanu e vola koso, ka volai vakalalai, ka volai vakalelevu. 40A sa wasea tani ko Jekope na lami, a sa vaqara na mata ni sipi kivaka ki na vola koso, kei na sipi damudamu kecega e na qele ni manumanu nei Lepani: a sa kauta na nona qele ni manumanu me tiko vakai ira, ka sega ni kauta me tiko kei na manumanu i Lepani. 41A sa yaco ni sa kunekune na manumanu kaukauwa, sa qai viritu na taba ni kau ko Jekope e na mata ni manumanu e na takona, ka me ra kunekune e na maliwa ni taba ni kau. 42Ia ni sa malumalumu na manumanu, sa sega ni viritu kina: a sa yaco me nei Lepani na ka malumalumu, ka nei Jekope na ka kaukauwa. 43A sa vutuniyau vakalevu sara na tamata ko ya, a sa levu na nona manumanu, kei na nona vada, kei nai talatala, kei na kameli, kei na asa.
Selectat acum:
Nai Vakatekivu 30: FIJ1864
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
First full Bible in the Fijian language © British and Foreign Bible Society, 1864.