मत्ति 14
14
बप्तिस्मा पिघुबा युहन्ना सेॽनेबॽआ
(मरकुस ६:१४-२९; लुका ९:७-९)
1मोडोक्पेॽ गालिलबेॽ राज्य ले़ःॽखुबा हाङ्बा हेरोदडे़ॽ येसुमि टुम्बेॽ खेप्सु। 2मोबा खोमि तिरिङ्गाजि लुसुजि, “इगोगो बप्तिस्मा पिघुबा युहन्नानोॽ ले़ये! खोगो सेॽनेबॽआ ले़टे़। खो सिघे़ॽपॽआबाङ फेरि हिङ्बोॽइटा। मोडोगे़ॽनोॽ खोसे़ॽ इडोक्हा खरिहा योम्बोक ले़ःॽमे़ॽनिङ्सिन्डुहा।”
3हेरोदियास चाहिँ हेरोदमि निसा फिलिपमि बनिमा ले़टे़। हेरोदडे़ॽ निसामि बनिमा हेरोदियास खोमबनिमा टोङ्नुङ युङ्बॽआसे़ॽ युहन्नाडे़ॽ वोप्पॽआ ले़टे़। मोडोगे़ॽ हेरोदडे़ॽ युहन्ना राःप्नुङ तिरिङ्गा खिमबेॽ से़क्युङ्बॽआ ले़टे़। 4युहन्नाडे़ॽ हेरोद बेॽलोखेॽ इडोॽ लुबॽआ ले़टे़, “टाङ्बामि निसामि बनिमा हे़ने़ॽ बनिमा टोङ्नुङ निवाहाङ्मि नियम टेडिघरिक ले़ःॽमा फे़न्निबा।” 5इगो खामि टुम्बेॽनोॽ हेरोदडे़ॽ युहन्ना सेॽनेमा योक्पॽआ ले़टे़। तर याॽमिजिनुङ खो किस्सिडे़ इन्ढोङ्होङ चोप याॽमिजिडे़ॽ युहन्ना अगमबक्ता मिॽटुजे।
6तर हेरोद टोक्पॽआ याक लेस्सा बेॽलो याॽमिजिमि पोम्बेॽ हेरोदियासमि सम्समापसाडे़ॽ नुरोॽ सिम्आबॽआसे़ॽ हेरोद सारोनोॽ साप्थक्सा। 7मोबा हेरोदडे़ॽ हेन्ज्रुङ हे़न्नुङ मो पिच्छा लुसु, “हे़ने़ॽ आयु इमाङ ङाःगुहोङ्सो पिन्ने़।” 8मो पिच्छाडे़ॽ खोम्मे़ॽ इःॽपॽआ खानोॽ इडोॽ लुनुङ ङाःगु, “का हागोनोॽ बप्तिस्मा पिघुबा युहन्नामि निन्डवाँ थालाबेॽ युङ्नुङ पिमा।” 9मोडोक्मा खा खेम्नुङ हेरोदमि निवा टुगा। तर खोसे़ॽ मोढे़ॽलोहा चाबाङ्जिमि पोम्बेॽ हेन्ज्रुङ हे़म्बॽआसे़ॽ खोसे़ॽ मो पिॽछे़ॽ लुबॽआडोक्नोॽ ले़ःॽमे हुकुम पिसुजि। 10मोडोगे़ॽ हेरोदडे़ॽ तिरिङ्गा खिमबेॽ युहन्नामि निन्डवाँ चेम्मेॽटुजि। 11मो युहन्नामि निन्डवाँ थालाबेॽ युङ्नुङ मो पिच्छा पिसु। खोसे़ॽ मो खोम्मा पिसु। 12मोबा ए़क्साङ युहन्नामि चोङ्साजिडे़ॽ सिगुयाक चाहिँ लाघे़ॽनुङ येःॽमाबेॽ युक्सुजि। मोबा खे़ॽनुङ इगो खा येसु इःबेॽटुजि।
येसुडे़ॽ ङाउम हजार याॽमिजि चरेपा हिङ्बॽआ
(मरकुस ६:३०-४४; लुका ९:१०-१७; युहन्ना ६:१-१४)
13येसुडे़ॽ मो लम्बवाँ खेम्नुङ ए़क्साङ खो नाउबेॽ साङ्नुङ सङ्गासुमा ठाउँबेॽ खडा। तर याॽमिजिडे़ॽ येसु खे़ॽपॽआ खा लेनुङ सहर सहरबाङ राम्साङ खोबेॽ लेस्सामि। 14येसु नाउबाङ पाखाबेॽ आप्माबेॽको बेॽलो याॽमिजि खाङ्डोक्टुजि, माहाजि खाङ्नुङ खोसे़ॽ नम्नावा मिॽनुङ मोबेॽहा टुक्खुबाजि नुबोगुजि।
15मोबा युडा लिमे़ॽनिङ्सिडा चोङ्साजि येसुबेॽ लेन्नुङ इडोॽ लुसुजि, “हे परभु, इगो सङ्गासुमा ठाउँ ले़ये, नम किक्खे़टे़, इघा याॽमिजि बिदा पिसाजे, खोजिटाङ्बामि लागि किॽयु मिॽयुहा खिम्डेमराजि खे़ॽनुङ चामाया इन्जामिरो।” 16तर येसुडे़ॽ माहाजि लुसुजि, “अक्खाजि खे़ॽमा पाप्नि, हे़निङे़ॽनोॽ इघाजि चामा पिसानुमे।” 17चोङ्साजिडे़ॽ येसु लुसुजि, “कानिङ्नुङ्गो ङाउम चरेपानुङ निच्चि ङारेॽनोॽ टुहा।” 18येसुडे़ॽ लुसुजि, “खोइ अक्खा चरेपानुङ ङा काबेॽ लाप्टानुमे।”
19येसुडे़ॽ माहा याॽमिजि चउरबेॽ पेम्मे आग्या पिनुङ खोसे़ॽ माहा ङाउम चरेपानुङ निच्चि ङा ठेॽनुङ थाङ्सिरिॽटु खाङ्साङ निवाहाङ ओहाक पिसु। मोबा माहा चरेपा एॽनुङ चोङ्साजि पिसुजि, खोजिडे़ॽ याॽमिजि हाबेॽटुजि। 20माहा याॽमिजिडे़ॽ उक्खारो चासेॽनुङ एम्बॽआ सुम्माबेॽ बारो ओखे़ङ इःगुजि। 21मोबेॽ चाघुबाजिबेॽ मेॽनामिॽनुङ पिच्छाजि मे़ने़ॽलेॽ वडाङ्पसाजिरेॽ ङाउम हजारडोक टुसामि।
येसु योङासोक्पेॽ राम्बॽआ
(मरकुस ६:४५-५६; युहन्ना ६:१५-२१)
22मोबा ए़क्साङ येसुडे़ॽ खोमि चोङ्साजि खोबाङ याक्लो नाउबाङ मे़ॽए़रेङ पाक्सुजि। खो चाहिँ सुम्बॽआ याॽमिजि बिदा पिमामि मोबेॽ पेना। 23माहा याॽमिजि बिदा पिसेॽनुङ येसु खोम्दाङ्बा चाहिँ पारथना ले़ःॽमामि टोक्टोक्मे़ॽटु सक्सा। युडा सेन्जुगुप लिघे़ॽलो खोरेॽ मोबेॽ टुसा। 24मोडोक्रोबेॽ चोङ्साजि साङ्बॽआ नाउँ चाहिँ टोम्लिॽवामि के़क्बाङ बेॽलोनोॽ ओः रुक्खे़ॽपॽआ ले़टा। मोबा बेॽए फुइक्सुमाडे़ॽ नाउँ किॽयु मिॽयु ठोःप्मे़ॽनिङ्सिडुएसे़ॽ पोम्बेॽ मे़ङ्खे़ॽहेसामि। 25माक्मि सुम्बोङ राजि येसु योङासोक्पेॽ राम्साङ चोङ्साजिबेॽ आबा। 26येसु योङासोक्पेॽ राम्साङ आप्मे़ॽनिङ्सिबॽआ खाङ्नुङ खोमि चोङ्साजि किस्सिमानुङ कासामि, “इगोगो माङे़ॽमा चापरे ले़!” कासाङ विःक्पोगामि। 27तर मोडोक्पेॽनोॽ येसुडे़ॽ माहाजि लुसुजि, “ए़क्किस्सिडानिङे, का ले़ङे, आट ले़टानुमे।”
28पत्रुसडे़ॽ येसु लुसु, “परभु, हे़न्नोॽ ले़येहोङ, कासो योङासोक्पेॽ राम्नुङ हे़नबेॽ आप्मे आग्या पिमाना।” 29येसुडे़ॽ लुसु, “लो आबे!” पत्रुस नाउबाङ आप्नुङ योङासोक्पेॽ राम्साङ येसुबेॽ खे़ॽपोगा। 30तर बेॽए फुइक्सुमा खाङ्नुङ पत्रुस किस्सिडा मोबा खो हुम्घे़ॽसिॽ पोरोक्पॽआसे़ॽ विक्साङ कासा, “हे परभु, का राःप्माना।” 31येसुडे़ॽ चान्डो राःप्नुङ लुसु, “खोइ हे़ने़ए़ बिस्वास, इन्ढोङ सङ्क ले़टुए ?” 32मोबा येसुनुङ पत्रुस नाउँबेॽ सक्साजि मोबा ए़क्साङ फुइक्सुमासो एॽयुसा। 33मोबा नाउँबेॽहा चोङ्साजिडे़ॽ सेवा मुसाङ लुसुजि, “चइबानोॽ हे़न निवाहाङ्मिनोॽ पसा ले़येले़!”
34येसु चोङ्साजिनुङ माहोङ्मामि मेए़रेङ रुक्नुङ गनेसरेत ठाउँबेॽ लेस्सामि। 35मोबेॽहा याॽमिजिडे़ॽ येसु लुनुङ लेडोक्टुजि मोबा माहाजिडे़ॽ मो छेत्रामि किॽयु मिॽयुहा खिम्डेमबेॽ लम्बवाँ पाक्सुजि। मोबा याॽमिजिडे़ॽ चोप खालहा टुक्खुबाजि येसुबेॽ लाजे़डुजि। 36माहाजिडे़ॽ येसुमि चेॽमि इक्के़ङ्रेॽनोॽहोङ्सो के़क्मा पिमा लुनुङ बिन्ति ले़टुजि। मोबा इन्डोक जनाडे़ॽ के़गुजि माहा याॽमिजि चोप नुबोगामि।
Selectat acum:
मत्ति 14: YAMP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023, Wycliffe Bible Translators, Inc. and Nepal Bible Society
