मत्ति 1
1
येसु खिरिस्टमि टुबालाबाजि
(लुका ३:२३-३८)
1येसु खिरिस्ट चाहिँ अब्राहामनुङ दाउदमि बङ्समि याॽमि ले़टा। येसु खिरिस्टमि टुबालाबाजिमि निङ्मि सुचि इडोॽ ले़ये- 2अब्राहाममि पसा इसहाक ले़टा, इसहाकमि पसा याकुब, याकुबमि पसाजि यहुदानुङ हाइखा वावानिसाजि टुसामि। 3यहुदामि याक्लोए बनिमा तामारबाङ्हा पसाजि फारेसनुङ जाहेर, फारेसमि पसा हेस्रोन, हेस्रोनमि पसा आराम। 4आराममि पसा अम्मिनादाब, अम्मिनादाबमि पसा नहसोन, नहसोनमि पसा सल्मोन, 5सल्मोनमि बनिमा राहाबबाङ्ए पसा बोअज, बोअजमि बनिमा रुथबाङ्ए पसा ओबेद, ओबेदमि पसा यिसै। 6यिसैमि पसा हाङ्बा दाउद ले़टे़।
दाउदमि पसा सोलोमन। सोलोमनमि मामा चाहिँ उरियाहमि बनिमा ले़टे़। 7सोलोमनमि पसा रहबाम, रहबाममि पसा अबिया, अबियामि पसा आसा, 8आसामि पसा यहोसापात, यहोसापातमि पसा यहोराम, यहोराममि पसा उज्जियाह, 9उज्जियाहमि पसा योताम, योताममि पसा आहाज, आहाजमि पसा हिजकिया, 10हिजकियामि पसा मनस्से, मनस्सेमि पसा आमोननुङ आमोनमि पसा योसियाह ले़टे़। 11योसियाहमि यकोनियासनुङ हाइखा पसाजिसो टुसामे। माहाजि यहुदिजि बन्दि टोङ्नुङ बेबिलोन देसबेॽ लाघे़ॽमे बेलाराजि टोक्पॽआ ले़टामे।
12बेबिलोनबेॽ लाघे़ॽनुङ ए़क्साङ यकोनियासमि पसा सालतिएल टोगा, सालतिएलमि पसा यरुबाबेल, 13यरुबाबेलमि पसा अबिउद, अबिउदमि पसा एल्याकिम, एल्याकिममि पसा आजोर, 14आजोरमि पसा सादोक, सादोकमि पसा आखिम, आखिममि पसा एलिउद, 15एलिउदमि पसा एलाजार, एलाजारमि पसा मत्तान, मत्तानमि पसा याकुब, 16मोबा याकुबमि पसा योसेफ ले़टा। इगो योसेफ चाहिँ मरियममि बनिबा ले़टे़। इगो मरियमबाङ खिरिस्ट टोगा।
17इडोॽ अब्राहामबाङ हाङ्बा दाउदठोक चौधो पुस्ता, मोबा दाउदमि पालोबाङ इस्राएलिजि बेबिलोन लाघे़ॽलोबेॽ चौधो पुस्ता, मो बेलाबाङ खिरिस्ट टोक्मे बेलाठोक्पेॽ फेरि चौधो पुस्तानोॽ लिये।
येसु खिरिस्ट टोक्पॽआ
(लुका २:१-७)
18येसु खिरिस्ट इडोॽ टोगा, खोमि मामा मरियममि योसेफनुङ फुङ्सया लिमामि साक्खि राःप्पेबाॽअ ले़टे़। खोजिमि फुङ्सया लिमा याक्लोनोॽ मरियम पबित्रा होङ्निवामि सक्तिबाङ उक्खाइसुम्मा लिबॽआ ले़टा। 19योसेफ धरमि याॽमि ले़टे़न्से़ॽ खोसे़ॽ याॽमिजिमि पोम्बेॽ मरियम बेजेत ए़ले़ःॽमामि खुस्रिङ्मु लेप्पेमा योगु।
20योसेफडे़ॽ निवाबेॽ इडोॽ मिॽमे़ॽनिङ्सिमाबेॽ परमपरभुमि थाङ्सिरिदुत खोनुङ सेम्माङ्बेॽ खाङ्मुनुङ इडोॽ लुसु, “होउ योसेफ, दाउदमि पसा, मरियम फुङ्सया ले़ःॽमा ए़क्किसिने, इन्ढोङ्होङ खोमि रुङ्माबेॽ टुये ओङे़कको पबित्रा होङ्निवामि सक्तिबाङ लिबॽआ ले़ये, 21हागो मरियमडे़ॽ इक्को पसा टोइन्डुए, मो ओङे़कमि निङ हे़ने़ॽ येसु युङ्मे, इन्ढोङ्होङ खोसे़ॽ खोमि याॽमिजि पापबाङ छुट्कारा पिन्डुजे#भजनसङ्ग्रह १३०:८।”
22परमपरभुडे़ॽ अगमबक्ताजिबाङ याक्लोएम्बाङ लुबॽआ बचन पुरा लिमामि लागिनोॽ इघा चोप लिबॽआ ले़ये-
23“खाक्सानुमे इक्को राङ्मिॽ पिच्छा (कन्या) उक्खाइसुम्मा लिये।
“खोसे़ॽ इक्को पसा टोॽइन्डुए,
“खोमि ‘निङ इम्मानुएल’ युङ्इये,
“इगो लुबॽआ चाहिँ ‘निवाहाङ कानिङ्नुङ’ टुये।”#यसैया ७:१४
24मोबा योसेफ इम्माबाङ हुम्बुक्नुङ खो सेम्माङ्बेॽ थाङ्सिरिदुतडे़ॽ लुबॽआडोक्नोॽ खोसे़ॽ मरियम फुङ्सया ले़ःॽनुङ खोमि खिमबेॽ चिक्खे़ॽटु। 25मरियमडे़ॽ पसा मे़न्टोक्लो योसेफ खोनुङ सोरि मे़इप्सा। मरियमडे़ॽ पसा टोगु मोबा योसेफडे़ॽ मो ओङे़कमि निङ येसु युक्सु।
Selectat acum:
मत्ति 1: YAMP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023, Wycliffe Bible Translators, Inc. and Nepal Bible Society
