SAN MATEO 7
7
Miꞌn chi yolena kaꞌ cyiꞌ xjal
(Lc. 6:37-38, 41-42)
1Bix e xiꞌ tkbaꞌntl Jesús cye t-xnakꞌatz:
—Miꞌn tzꞌoc cycyeꞌyena ke xjal tuꞌn t-xiꞌ cykbaꞌna ka kaꞌke xjal, tuꞌntzen miꞌn cub castiwa tuꞌn Dios cyibaja, 2cuma ka ma chi yolena cyiꞌ xjal tuya cyiw yol, jax tzul tkꞌoꞌn Dios cyiw yol cyey. N-oc tcyeꞌyen Dios laꞌ ti cyey nxiꞌ cykꞌoꞌn cye xjal, bix ctkꞌaꞌ t-xel cyey. 3¿Tikentzen nyoleney tiꞌj jun tuyey tocx jun niꞌ tzꞌis tuj tbakꞌ twitz, pero min tzꞌel tniꞌya tiꞌj tuj tey tbakꞌ twitz tocxe jun tzeeꞌ? 4¿Tikentzen nxiꞌ tkbaꞌna te tuyey: “Hermano, qꞌueletz wiiꞌna niꞌ tzꞌis tuj tbakꞌ twitza,” tz̈iy, pero jeyꞌ, lu jun tzeeꞌ tocx tuj tey twitza? 5Jay at tpaltela, pero nbint tuꞌna tisencꞌa mintiiꞌ tila. Kꞌimetz jtey nejl jtzeeꞌ tocx tuj twitza, tuꞌntzen baꞌn tetz tiiꞌna jte tuyey tocx tuj twitz.
6Miꞌn txiꞌ cykꞌoꞌna tyol Dios te cyej xjal min tzꞌoc takꞌ cye. Ka ma txiꞌ cykꞌoꞌna tyol Dios juꞌwa, tisentzen nxiꞌ cykꞌoꞌna cye txyan jnajben te Dios, bix ka tisen ma txiꞌ cykꞌoꞌna cykꞌinemala cywitz boch. Nuk pjel cywaꞌben boch tuꞌn cyken, bix chi aal meltzꞌajjil tuꞌn cybaj tzakena cyuꞌnjil.
Cxeꞌl kkaꞌna te Dios tuꞌn tbint baꞌn kuꞌn chi cobtl xjal
(Lc. 11:9-13; 6:31)
7Cykanenx te Dios tuꞌn ttzaj tkꞌoꞌn jnajben cyey, bix ctzaal kꞌoꞌn cyey. Cycubsanx cywitza te Dios, bix tzul tbiꞌn. Bix cytcoꞌncx tlemel tjaxin, tuꞌntzen tjket cywitza. 8Jaca juun xjal nxiꞌ tkanen te Dios, ctzaaltzen tkꞌoꞌn Dios te, bix jaca juun xjal ncubsan twitz te Dios tiꞌ onbilte, ctiikꞌeltzen, bix jaca juun xjal n-oc cytcoꞌn tlemel jaaꞌ, cjketel twitz. 9Ka ma txiꞌ tkanen tcwal jun xjal twa, ¿atpa jun mambaj cyxola cxeꞌl tkꞌoꞌn jun xak te tcwal? Min. 10Bix ka ma txiꞌ tkanen jun quis̈, ¿lbajpa cxeꞌl tkꞌoꞌn tman te? Min. 11Mlay cybinchay juꞌwa. Amale aj iletkey, pero jaj baꞌn cxeꞌl cykꞌoꞌna cye cycwala. Yajtzen te Cymana tuj cyaꞌj, ¿yaaꞌmpale masxsen jaj baꞌn ctzaal tkꞌoꞌn cyey oj t-xiꞌ cykanena? 12Juꞌ tzunj, ka cyaja tuꞌn tbint jun baꞌn cyey cyuꞌn xjal, ccybinchay jun baꞌn cye, cuma juꞌ tzin tkbaꞌn tley Moisés bix juꞌ e cykba tyolel Dios tuj tyol Dios.
Jun chꞌin twitz ttziiꞌ tcawbil Dios
(Lc. 13:24)
13Chꞌin twitz ttziiꞌ tcawbil Dios, pero cykꞌoꞌnc cyipena tiꞌj tuꞌn cyocxa tuj, cuma nim twitz ttziiꞌ jbe nxiꞌ tiiꞌn ke xjal tuj kꞌakꞌ, bix te nim tweꞌ ja beꞌwe, bix nim xjal nchi ocx tuj, cuma yaaꞌn cyiw tuꞌn cyocx. 14Pero ttziiꞌ jbe nxiꞌ tiiꞌn ke xjal tuꞌn cypon tuj cychunkꞌlal tuya Dios, chꞌin twitz, bix yaaꞌn nim xjal ncnet ja be lu cyuꞌn.
Tuꞌnj cybinchben qꞌuelel cyniꞌya cyiꞌj
(Lc. 6:43-44)
15Cycꞌojlam cyiiba cye kej xnakꞌtzal tyol Dios ẍtakꞌ chi ul cyuyey. Ccyeecꞌa cyiib tisencꞌa carnelke, pero xoꞌjke, bix cyaj tuꞌn cyxitja. 16Tuꞌnj cybinchben qꞌuelel cyniꞌya tiꞌj ti tten cyanem. ¿Jacꞌapa tzꞌel loꞌpj te uva tiꞌ jun skman chꞌiꞌx, bix loꞌpj te higo tiꞌ jun tzeeꞌ at chꞌutel? 17Mlay. Jun tzeeꞌ kaꞌ tzin tkꞌoꞌn twitz kaꞌ, bix jun tzeeꞌ baꞌn tzin tkꞌoꞌn twitz baꞌn. 18Jun tzeeꞌ baꞌn, mlay takꞌ twitz yaaꞌn baꞌn. Bix jun tzeeꞌ yaaꞌn baꞌn, mlay takꞌ twitz baꞌn. 19Jaca juun tzeeꞌ, ka yaaꞌn baꞌn twitz tzin tkꞌoꞌn, cjawel txꞌomet bix cꞌoquex tuj kꞌakꞌ. 20Cxeꞌl nkbaꞌna cyey, qꞌuelel cyniꞌya tiꞌj ka baꞌn jun xjal bix ka yaaꞌn baꞌn laꞌ tiiꞌn tbinchben.
Min ntzkiꞌnkey
(Lc. 13:25-27)
21At nim xjal tzin cykbaꞌn weya, “Kaaw, Kaaw.” Pero yaaꞌn cykilcake chi oquex tuj cyaꞌj. Nuk oꞌcx kej xjal tzin cybinchaꞌn tajbil Nmana tuj cyaꞌj chi oquex tuj tcawbilxin. 22Tuj jkꞌij tzul oj cyoc cykil xjal tuj xkela, nim xjal ctzaal tkbaꞌn weya: “Taat, Taat, ¿mimpatzen e xiꞌ kkꞌumena tyol Dios tuꞌn tipemal tey tbi? ¿Bix mimpatzen el kiiꞌna biman cyiꞌ xjal tuꞌn tipemal tey tbi? ¿Bix mimpatzen e kbinchaya nim akꞌuntl jawnex tuj taakꞌen Dios tuꞌn tipemal tey tbi?” tz̈i cybel. 23Cxeꞌltzen nkbaꞌna cye: “Min ntzkiꞌnkey. Cypaꞌmel cyiiba wiꞌja, key binchal il,” tz̈i nbela.
Tej tyole Jesús tiꞌj caꞌba tkꞌuklel jaaꞌ
(Lc. 6:46-49)
24Tuꞌn tpon baj twiꞌ nyola, cxeꞌl nkbaꞌna cyey jun techel. Jaca juun xjal tzin tbiꞌn nyola bix nbint tuꞌn, ja tzunja tisen jun xjal at tnaabl e jaw tbinchaꞌn tja twiꞌ xak cyiw. 25Bix e cub nintzaj jbal, bix e jaw noj nimaꞌ, bix e tzaj nim cykꞌiꞌk, bix oc punntzꞌaj aꞌ tuyax cykꞌiꞌk tiꞌ jaaꞌ. Pero min iyꞌ tzꞌak jaaꞌ, cuma baꞌnxix e cub kꞌukbet twiꞌ xak. 26Pero jaca juun xjal tzin tbiꞌn nyola pero min tniman, ja tzunja tisen jun xjal mintiiꞌ tnaabl e jaw tbinchaꞌn tja tuj ttxa tzꞌaꞌn. 27Bix e cub nintzaj jbal, bix e jaw noj nimaꞌ, bix e tzaj nim cykꞌiꞌk, bix oc punntzꞌaj aꞌ tuyax cykꞌiꞌk tiꞌ jaaꞌ, bix iyꞌ tzꞌak jaaꞌ, biꞌx e cub xitj cykilca―tz̈i Jesús cye t-xnakꞌatz.
28Tejtzen tbaj yolen Jesús, cykilca xjal e jaw kleeꞌ tiꞌj t-xnakꞌtzbilxin, 29cuma e xnakꞌtzanxin tisen jun xjal tuya tipemal, yaaꞌn tisenj cyej xin txꞌolbal ley.
Selectat acum:
SAN MATEO 7: mamTS
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2000, Wycliffe Bible Translators, Inc. All rights reserved.
