SAN MATEO 6
6
Nyole Jesús tiꞌj onbil
1Bix e xiꞌ tkbaꞌntl Jesús cye t-xnakꞌatz:
—Cꞌoquel cycwenta tiꞌj tuꞌn miꞌn cybinchana baꞌn nuk oꞌcx tuꞌn cyoc cyeꞌyena cyuꞌn xjal. Ka ma cybinchaya nuk tuꞌn tchicꞌajax cybinchbena cywitz xjal, mlay tzaj kꞌoꞌn cycotza tuꞌn Cymana Dios tuj cyaꞌj. 2Juꞌ tzunj, oj t-xiꞌ cyonena ke mebe, miꞌn txiꞌ cykꞌoꞌna tumel cye xjal tuya xux ti nbaj cyey, tisen nbint cyuꞌn xmeletzꞌ xjal cyuj camon jaaꞌ bix cyuj be, tuꞌntzen cyjaw nimsaꞌn cyuꞌn xjal. Jaxxix cxeꞌl nkbaꞌna cyey, oꞌcx cycotz nuk tuꞌn cyjaw nimset cyuꞌn xjal. 3Jatzen cyey, oj t-xiꞌ cyonena ke mebe, miꞌn txiꞌ cykbaꞌna cye cyuyey ti nbint cyuꞌna. 4Ka juꞌ nbint cyuꞌna tuj ewjel, cxeꞌl tkꞌoꞌn Cymana Dios t-xel cyey, cuma ncyeꞌyen Dios tiꞌj cykilca nbint cyuꞌna tuj ewjel.
Nxiꞌ t-xnakꞌtzaꞌn Jesús ke xjal tiꞌ naj Dios
(Lc. 11:2-4)
5Ojtzen cynaꞌna Dios, miꞌn chi binchana tisen nbint cyuꞌn xmeletzꞌ xjal. Cyaj tuꞌn cyten waꞌl cyuj camon jaaꞌ bix cyuj be tuꞌn cynaꞌn Dios cywitz xjal. Jaxxix cxeꞌl nkbaꞌna cyey, oj nchicaꞌjax cynabl Dios juꞌwa, ya otktzen cyiikꞌ cycotz. Mintiiꞌtl t-xel cye mas yaj. 6Jatzen cyey, oj cynaꞌna Dios, cyocxa cyjunala tuj cyjay, bix tzꞌetz cylomoꞌna tlemel cyjay, bix chi naꞌna Cymana Dios min chicꞌaj. Ncyeꞌyen tiꞌj cykilcaj yaaꞌn chicꞌaj cyuꞌn xjal, bix cxeꞌl tkꞌoꞌn t-xel cyey.
7Ojtzen cynaꞌna Dios, miꞌn txiꞌ cymeltzꞌuꞌna nimcꞌa maj jax cyyola tisen nbint cyuꞌnj xjal yaaꞌn ocslal oj nchi naꞌn cydios. Tuj cywitz, cybiꞌ cydios cyyol tuꞌn nim tken cyyol, pero yaaꞌn juꞌwa. 8Juꞌ tzunj, miꞌn chi binchana tisenj cye, cuma te mitknaꞌx txiꞌ cykanena te Cymana Dios, ya ttzkiꞌntlxin ti cyaja. 9Chi naꞌna Dios tisen ja yecꞌbil lu: “Kman Dios ata tuj cyaꞌj, nimsajxit tbiy cyxol xjal. 10Kaja tuꞌn tul tcawbila twitz txꞌotxꞌ. Chi nimanxit cykilca xjal twitz txꞌotxꞌ tyola tisenx nnimja tuj cyaꞌj. 11Kꞌontza kwaya jaꞌlewe. 12Bix najsanqꞌuey ja il o cub kbinchaꞌna twitza, tisen keya ncub knajsaꞌna jkaꞌ o tzꞌoc cybinchaꞌn xjal kiꞌja. 13Miꞌn ko cub tkꞌoꞌna tuj kniꞌya, sino cloma koꞌya tuj tkꞌab taaw il, cuma jay cawel tibaj cykilca twitz txꞌotxꞌ bix tuj cyaꞌj, bix at mas tipemala cywitz cykilca, bix jawnex tey tibaj cykilca te junx maj. Juꞌxit ttena,” tz̈i cybela oj cynaꞌna Dios. 14Ma cheꞌx nxnakꞌtzaꞌna juꞌwa, cuma ka ma cub cynajsaꞌna cyil ke xjal o tzꞌoc cybinchaꞌn kaꞌ cyiꞌja, jax juꞌx te Cymana Dios tuj cyaꞌj cwel tnajsaꞌnxin cyey cyil. 15Pero ka min ma cub cynajsaꞌna cyil xjal, jax juꞌx miꞌn cub tnajsaꞌn Cymana Dios cyila.
T-xnakꞌatz Jesús tiꞌj oj ncub cypaꞌn xjal weyaj
16Bix oj ncub cypaꞌna weyaj, miꞌn txiꞌ cyyeecꞌana cywitza tisen nchi bisena, tisenx nbint cyuꞌn xmeletzꞌ xjal. Cyaj tuꞌn tchicꞌajax ka ncub cypaꞌn weyaj, bix juꞌ tzunj min nxiꞌ cybinchaꞌn cywitz, tuꞌntzen bis cycyeꞌnc. Jaxxix cxeꞌl nkbaꞌna cyey, mintiiꞌtl t-xel cye, cuma oꞌcx t-xel cye ma tzꞌoc cycyeꞌyen xjal ejeeꞌ. 17Jatzen cyey, ka ma cub cypaꞌna weyaj, cykꞌonwexa cꞌocꞌsbil cywiꞌy bix cytxjomela cywitza tisex cytena, 18tuꞌntzen miꞌn txiꞌ cyyeecꞌana cye xjal ka ncub cypaꞌna weyaj. Nuk oꞌcx twitz Cymana Dios min chicꞌaj cwel cypaꞌna weyaj. Bix cuma tzin tcyeꞌyen Dios cykilcaj nbint tuj ewjel, ctzaal tkꞌoꞌnxin t-xel cyey.
Jun kkꞌinemabl tuj cyaꞌj
(Lc. 12:32-34)
19Miꞌn nuk tzꞌoc cyipena tiꞌj tchmoj kꞌinemala twitz txꞌotxꞌ. Nuk oꞌcx cꞌoquex pocꞌ tuj te xitlte, bix pjel acumax, bix chi oquex alakꞌ cyjay te kꞌilbetzte. 20Mas baꞌn tuꞌn tbaj cychmoꞌna cykꞌinemala te tuj cyaꞌj, jaaꞌ mlay tzꞌocx pocꞌ tuj te xitlte bix miꞌn baj acumax bix min-al alakꞌ baꞌn tocx tiꞌj. 21Ka n-oc cyipena tiꞌj cykꞌinemala te tuj cyaꞌj, ja tzunj lu tzin tyeecꞌan at jcyajbila tuya ti taj Dios, pero ka nuk oꞌcx n-oc cyipena tiꞌj cykꞌinemala te twitz txꞌotxꞌ, ja tzunja nyeecꞌante mintiiꞌ cyanema tuya Dios.
Ntzaj tkꞌoꞌn Dios knaabl tuꞌntzen kten tuj spiꞌyen
(Lc. 11:33-36)
22Yaltzen te cynaabla, tisen tbakꞌ cywitza. Nchi ajben tbakꞌ cywitza tuꞌn cycyeꞌyena. Ka baꞌn tbakꞌ cywitza, baꞌntzen cycyeꞌyena alcyej cchicꞌajaxel tuꞌn tken luz. 23Pero ka yaaꞌn baꞌn tbakꞌ cywitza, eteꞌy tuj klolj. Jaxse juꞌx cynaabla. Juꞌ tzunj, ka tcyꞌi cynaabla tuꞌn cyela baꞌn twitz Dios, tisen tuj nimxsen klolj eteꞌy.
Dios bix jun kꞌinemabl
(Lc. 16:13)
24Mlay tzꞌajben jun akꞌanal te caꞌba patrón. Ka ma tjoy tuꞌn tajben te jun patrón, cyjeltzen tkꞌoꞌn juntl. Bix ka jatz ma takꞌa tiib tuya tcab patrón, cyjeltzen tkꞌoꞌn jxin tneel. Juꞌtzen tten tuya Dios bix kꞌinemal. Ka tuya cykil cycꞌuꞌja ncheꞌx lpey tiꞌ kꞌinemal, mintzentiiꞌ cyaja tuꞌn cyajbena te Dios.
Miꞌn ko labt miꞌn baj kcꞌuꞌj tiꞌj ti jilel tuꞌn kitzꞌj
(Lc. 12:22-31)
25Cuma ma tzaj tkꞌoꞌn Dios cychunkꞌlala, juꞌ tzunj cxeꞌl nkbaꞌna cyey, miꞌn chi labta tiꞌj cyway bix cycꞌaꞌy tuꞌn cyitzꞌja bix tiꞌj cyxbalena te cyxumlala. ¿Mimpa o tzaj tkꞌoꞌn Dios cychunkꞌlala tiꞌj mas nuk nchi waaꞌna? ¿Bix mimpa o tzaj tkꞌoꞌn Dios cyxumlala tiꞌj mas nuk n-oc cyxbalena? 26Cycyeꞌyenc ke chꞌit twitz cyaꞌj. Min nchi awanjil, bix min nchi jtxꞌonjil, bix min nchi chmonjil twitz awal tuj cytxꞌutxꞌjil. Pero nchi itzꞌjjil, cuma ntzaj tkꞌoꞌn Cymana Dios tuj cyaꞌj cywajil. Yajtzen cyey, ¿yaaꞌmpa mas jawnexkey cywitz chꞌit? 27¿Cꞌajbelpa oj nchi labta tiꞌ jun tiiꞌ? Mi nuket jun kꞌij baꞌn txiꞌ cykꞌoꞌna te cychunkꞌlala tuꞌnj nchi labta tiꞌj. 28¿Tikentzen nchi labta tiꞌ cyxbalena? Cycyeꞌyenc kej abech. Ntz̈ꞌiy, amale mint nchi chkon bix min nchi tz̈mon. 29Pero amale mint nchi labt tiꞌj cyxmaquel, pero cxeꞌl nkbaꞌna cyey, mas cyeca cycyeꞌnc twitzj jawnex t-xbalen jrey Salomón. 30Ntzaj tkꞌoꞌn Dios cyxmaquel cꞌul, amale nuket caꞌba oxe kꞌij nten bix n-el tzꞌak bix ncub patet. Yaltzen cyey, ¿yaaꞌmpa mas jawnexkey cywitz cꞌul? Ejeeꞌy yaaꞌn nimxix n-oc ke cycꞌuꞌja tiꞌj Dios. Ka ma tzaj tkꞌoꞌnxin cyxmaquel cꞌul, jax juꞌx ctzaal tkꞌoꞌnxin cyxbalena. 31Juꞌ tzunj, miꞌn chi labta tiꞌj ti tten tuꞌn cyitzꞌja. Miꞌn txiꞌ cykbaꞌna: “¿Ti cxeꞌl kwaaꞌna?” bix ka “¿Ti cxeꞌl kcꞌaꞌna?” bix ka “¿Jaaꞌ ctzaal kxbalena?” 32Miꞌn chi tena tisen kej xjal yaaꞌn ttanem Dios, cuma nuk oꞌcx nchi labt tiꞌj cykilcaj lu. Miꞌn chi labta, cuma ttzkiꞌn Cymana Dios tuj cyaꞌj najben cykilcaj lu cyey. 33Mas il tiꞌj tuꞌn t-xiꞌ cykꞌon cyiiba tiꞌj tajbil Dios bix tuꞌn cytena jiquen twitzxin. Ka ma cheꞌx lpey tiꞌj jlu, cykilcatzen najben tuꞌn cyitzꞌja cxeꞌl kꞌoꞌn cyey. 34Juꞌ tzunj, miꞌn chi labta tiꞌj ti pjel nchiꞌj, cuma oj tpon nchiꞌj, otktzen pon tumel tuꞌn tiyꞌx jqꞌuixcaj te nchiꞌj cyuꞌna. Oꞌcx tuꞌn tiyꞌx jn-oc cyiꞌja jaꞌlewe―tz̈i Jesús.
Selectat acum:
SAN MATEO 6: mamTS
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2000, Wycliffe Bible Translators, Inc. All rights reserved.
