SAN MATEO 10
10
Tej tjaw jyet cablaaj t-xnakꞌatz Jesús
(Mr. 3:13-19; Lc. 6:12-26)
1Bix e cub tchmoꞌn Jesús kej cablaaj t-xnakꞌatz, bix e xiꞌ tkꞌoꞌnxin tipemalxin cye tuꞌn tel cylojoꞌn biman cyiꞌ xjal bix tuꞌn cykꞌanenxin tiꞌ cykilca wik cyyabel xjal. 2Ejeeꞌtzen xinj e tsicyꞌ Jesús te t-xel, ejeeꞌj xin lu: Tneel, ja Simón, jxjal oc tbi te Pedro tuꞌn Jesús, bix tuyax Andrés, titzꞌen Simón, tuya Jacobo, tcwal jxin Zebedeo, tuya Juan, titzꞌen Jacobo, 3tuya Felipe, tuya Bartolomé, tuya Tomás, tuya Mateo, jxin chmol alcabala, tuya Jacobo, tcwal jxin Alfeo, tuya Tadeo, 4tuya Simón, jxjal tocx te jun cloj Cananeo tbi, tuya Judas Iscariote, jxjal e xiꞌ tqꞌueyen Jesús mas yaj.
Taakꞌen cablaaj t-xnakꞌatz Jesús
(Mr. 6:7-13; Lc. 9:1-6)
5Ejeeꞌ tzunj cablaaj xjal e xiꞌ tchkꞌoꞌn Jesús te binchalte taakꞌen. Pero tneelxix, e xiꞌ tkbaꞌnxin cyexin:
—Miꞌn cheꞌxa cyxol kej xjal yaaꞌn judío, bix miꞌn chi ocxa tuj cytanem aj Samaria. 6Nuk oꞌcx chi xeꞌla cyxol kej aj Israel o chi tzpet. 7Ojtzen cyxiꞌy, cykꞌumenx cye xjal cyjulu: “Tzul lkꞌe tcawbil Dios tzul tuj cyaꞌj,” tz̈i cybela. 8Cykꞌanenx kej xjal yaab. Chi jawetz cyitzꞌjsaꞌna kej xjal cyimne tuj cyamecy. Cykꞌanenx kej xjal ma tzꞌel kꞌey cykꞌab bix cyken tuꞌnj yabel lepra. Qꞌuelel cylojoꞌna biman cyiꞌj xjal ma chi oc biman cyiꞌj. Bix miꞌn chi kanena pwak cye xjal oj tcub cykꞌanena, cuma nuk cotz jwipemala ma cyiikꞌa. 9Miꞌn txiꞌ cyiiꞌna pwak, mi nuket oro bix ka plata bix ka cobre tuꞌn cyitzꞌja. 10Bix miꞌn txiꞌ cyiiꞌna cypay tuj be, mi nuket cychꞌixpubla cyiꞌja, mi nuket juntl moj cyxaaba, mi nuket juntl cybardona te tcab, cuma il tiꞌj tuꞌn tkꞌoj twa jun t-akꞌanal Dios. 11Oj cyocxa tuj jun tnom bix ka tuj jun aldea, cykanenx cye xjal ka at jun xjal at tajbil tuꞌn tkꞌon posada cye t-akꞌanal Dios, bix chi cyjela tuya ojxe cyiꞌya tuj ja tnoma. 12Oj cyocxa tuj jaaꞌ jaaꞌ tumel chi wutala, nejl cxeꞌl cykꞌoꞌna jun kꞌolbebl te cykilca xjal tuj jaaꞌ. 13Ka ma tiikꞌ taaw jaaꞌ ejeeꞌy tuya cykil tcꞌuꞌj, tzajxit cykꞌoꞌna cyxtalbila te. Pero ka tcyꞌi ejeeꞌy, miꞌn txiꞌ cykꞌoꞌna cyxtalbila te. 14Ka at xjal cycyꞌi ejeeꞌy bix ka ma tzꞌel cyxooꞌn cyyola, oj cyiꞌya tuj cyja bix ka tuj cytanem, cytz̈toncjtzen kuk tiꞌ cyxaaba cywitz, te yecꞌbil min chi kꞌumentla tyol Dios cyxol. 15Jaxxix cxeꞌl nkbaꞌna cyey, tuj jkꞌij te castiwa tzul, mas castiwa tzul tkꞌoꞌn Dios cyej tnom n-el cyiiqꞌuen tkꞌumj tyolxin twitzj e cub tkꞌoꞌnxin cyibaj kaꞌ tnom te Sodoma tuyax tnom te Gomorra jatxe ootxa.
Tzul qꞌuixcꞌaj cyiꞌ ocslal
16Qꞌueleltzen cyniꞌya tiꞌj ejeeꞌy nuk cyisen tal carnel bix chi xeꞌl nsmaꞌna cyxolj xjal cyisen xoꞌj. Juꞌ tzunj, chi tena ẍbiꞌl tisen lbaj, pero jax chi tena tisen cucuꞌ. Miꞌn cybinchay kaꞌ cyiꞌ xjal. 17Cycꞌojlamxix cyiiba cye xjal, cuma chi xeꞌl kꞌoꞌna cywitz juez nuk wiꞌjcꞌa, bix cxeꞌl cykꞌoꞌn tzꞌuꞌn cyiꞌja cyuj cycamon jaaꞌ. 18Hasta cywitz gobernador bix cywitz rey chi xeꞌl chkꞌeta nuk wiꞌjcꞌa, tuꞌntzen tkꞌumj nbiꞌya cyexin bix cyej xjal yaaꞌn judío. 19Pero oj cytzyeta, miꞌn chi labta tiꞌj ti tten tuꞌn cyclon cyiiba bix tiꞌj alcye yol tuꞌn t-xiꞌ cykbaꞌna cywitz cawel, cuma oj tpon tumel, chi xeꞌl onet cyey tiꞌ cyyola. 20Yaaꞌn tiꞌ cywiꞌy ctzaala cyyola, sino ja te Espíritu Santo kꞌoꞌn cyey tuꞌn Cymana Dios cxeꞌl kꞌonte cyyola.
21Tzul jun kꞌij at xjal cyitzꞌen cyiib bix jun cxeꞌl qꞌueyente juntl tuj cykꞌab cawel tuꞌn cybyet, bix jax cxeꞌl cyqꞌueyen cyman ke cycwal tuꞌn cybyet. Bix ke cwal chi oquel kꞌojl cyiꞌ cyman, bix chi oquel cyipen tiꞌj tuꞌn cybyet cyman. 22Cykilca xjal qꞌuelel cyiiqꞌuen ejeeꞌy tuꞌnj cykꞌon cyiiba wuyena. Pero alj xjal miꞌn cyaj tcyeꞌyen inayena, amale n-oquet cyiw qꞌuixcꞌaj tiꞌj, cleteltzen tuꞌn Dios.
23Ka ma chi yajlaja tuj jun tnom, cyiyꞌ oka tuj juntl tnom. Pero jaxxix cxeꞌl nkbaꞌna cyey, mitknaꞌx t-xiꞌ cykꞌumena tyol Dios tuj cykilca tnom te Israel oj wul meltzꞌaja, inayena, jxjal Smaꞌn tuꞌn Dios tuꞌn ntena cyuya xjal.
24Yaaꞌn ejeeꞌy mas jawnex nwitza, tisen jun xjal nxnakꞌtzan yaaꞌn mas jawnex twitz tmaystro, bix jun akꞌanal yaaꞌn mas jawnex twitz tpatrón. 25Jnbaj tiꞌ jun maystro, jax nbaj tiꞌ t-xnakꞌatz. Bix jnbaj tiꞌ jun patrón, jax nbaj tiꞌ t-akꞌanal. Juꞌ tzunj, jcbinel wiꞌja cyuꞌn xjal, jax cbinel cyiꞌja. Ma tzꞌoc cykꞌoꞌn xjal nbiꞌya te Cyaaw biman. Katzen juꞌ ma cykba xjal wiꞌja, jaxse juꞌx cꞌoquel cyyasen xjal ejeeꞌy.
Mas il tiꞌj tuꞌn ttzaj ttz̈i Dios kiꞌj twitzj tuꞌn ttzaj cytz̈i kiꞌj kej xjal cyqꞌui Dios
(Lc. 12:2-9)
26Juꞌ tzunj, tuꞌn cyajbena weya, miꞌn tzaj cytz̈i kej yasel xjal cyiꞌja. Jjaxxix yol eꞌwen jaꞌlewe, ilxsen tiꞌj tuꞌn tkꞌumj. 27Jnxiꞌ nkbaꞌna cyey oj nko tena kjunal, qꞌuelex cypocbaꞌna tuj cykil lugar. Bix jnxiꞌ njasena cyey jaꞌlewe tuj ewjel, cykꞌumenx te cykil xjal. 28Miꞌn tzaj cytz̈i cyiꞌja kej xjal pjel cybyoꞌn cyxumlala. Oꞌcx jlu cbinel cyuꞌn, pero mintiiꞌ cyipemal tuꞌn tcub cyanema cyuꞌn. Mas il tiꞌj tuꞌn ttzaj ttz̈i Dios cyiꞌja, jaj xjal at tipemal tuꞌn tcuꞌx tkꞌoꞌn cyxumlala tuyax cyanema tuj kꞌakꞌ te junx maj. 29Ncyeꞌyen Dios cykilcaj nbaj cyiꞌja. Cꞌoquel cycꞌuꞌja cyiꞌj tal chꞌit. ¿Mimpatiiꞌ nqꞌueyj caꞌba tuꞌn nuk jun centavo? Pero amale yaaꞌnt nim cywiꞌ, mi nuk jun cwel tzꞌak twitz txꞌotxꞌ bix mint n-oc tcyeꞌyen Dios. 30Yajtzen cyey, ¿chi elelpey tuj tcꞌuꞌj Dios? Min. Hasta ttzmal cywiꞌy ttzkiꞌn Dios jteꞌ. 31Juꞌ tzunj, miꞌn tzaj ttz̈i jcbinel cyiꞌja, cuma at mas cyajbela cywitz nim chꞌit.
32Kej xjal tzin cykbaꞌn cywitz xjal ka lepchecke wiꞌja, cxeꞌltzen nkꞌumena twitz Nmana tuj cyaꞌj ka ejeeꞌtzen nxjalja. 33Pero kej xjal cycyꞌi cykba cywitz xjal ka lepchecke wiꞌja, cxeꞌltzen nkbaꞌna twitz Nmana tuj cyaꞌj ka yaaꞌn ejeeꞌja weya.
Tej tyole Jesús tiꞌj tpabl kiib
(Lc. 12:49-53; 14:26-27)
34Miꞌn cub cybisena in ula twitz txꞌotxꞌ tuꞌn tweꞌ cykil kꞌoj wuꞌna. Yaaꞌn juꞌwa, sino in ula kꞌol kꞌoj cyxol xjal. 35In ula kꞌol kꞌoj jkꞌa cwal tuya tmankꞌa, bix jtxin cwal tuya ttxutxin, bix jtxin elibj tuya tliibtxin. 36Kej tuj tja jun xjal, chi oqueltzen te aj kꞌoj tiꞌj.
37Alcyej xjal taj tzꞌoc lpe wiꞌja, pero mas n-oc takꞌ tman bix ka ttxu te nwitza, mlay tzꞌoc te nxnakꞌatza. Bix alcyej xjal mas n-oc takꞌ tcyꞌaal te bix ka tmeel, mlay tzꞌoc te nxnakꞌatza. 38Bix alcyej xjal yaaꞌn binne tten tuꞌn tiyꞌx qꞌuixcꞌaj bix chꞌixbajil tuꞌn tuꞌn toc lpe wiꞌja, mlay tzꞌoc te nxnakꞌatza. 39Ja tzunj xjal tcyꞌi tzꞌoc lpe wiꞌja cuma at cytz̈i kej xjal tiꞌj cyaj tuꞌn tcub, cxeꞌl t-xooꞌn tchunkꞌlal. Pero ja tzunj xjal cyjel tkꞌoꞌn tchunkꞌlal te twitz txꞌotxꞌ tuꞌnj lepchec wiꞌja, ctcamantzen tchunkꞌlal te junx maj.
Chojbil
(Mr. 9:41)
40Chi xeꞌla te nxela, bix alcye xjal cꞌoquel tbiꞌn cyyola, jax n-oc tbiꞌn jweya. Bix alcye xjal cꞌocslal wiꞌja, jax n-ocslan tiꞌj Dios e tzaj tsmaꞌn inayena. 41Alcyej xjal ctkꞌaꞌ posada cyey cuma jaxxix tyolel Dioskey tuj twitz, ctzaaltzen kꞌoꞌn te jaxj cotz ntzaj kꞌoꞌn cye tyolel Dios. Bix alcyej xjal ctkꞌaꞌ tkꞌolbebl cyey cuma jiquenkey tuj twitz, ctzaaltzen kꞌoꞌn te jaxj cotz ntzaj kꞌoꞌn cyej xjal jiquen. 42Bix alcye jun xjal ctzaal onente cyey cuma nxnakꞌatzkey tuj twitz, amale nuket jun vas aꞌ tzaj tkꞌoꞌn te cyey, bix ka ma tzaj tkꞌoꞌn te jun mas chꞌin cyxola, il tiꞌj ctzaal kꞌoꞌn tcotz―tz̈i Jesús cye t-xnakꞌatz.
Selectat acum:
SAN MATEO 10: mamTS
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2000, Wycliffe Bible Translators, Inc. All rights reserved.
