Luka 13

Yesu aa ambera anu ci a cere

1Kwa di awa ekarirepo kethsiya thsikati, awa a tongwerire Yesu yo Magalilea awa epaire Pilatu o kwa tumekera eyambero mu Tembere. 2Yesu wa tawire ci: “Ene mwaa anekera ci awo Magalilea po anu wevi nene kupita Magalilea amweya ngethsi a fererire kengeyo nji? 3Dyombo! Unone namwe ngeci ka mwa ku cera ekwama yenu yoimango kenge mwa ku fa kengeyo. 4Awaya ne, waya o dikumi na mutanu nahatu awaya wa wererire otara wa Siloami, ene mwaa anekera ci epithsire nene kupita amweya awa ekarire mu Yerusalema nji? 5Dyombo! Naa mi ambera karo ci ngeci ka mwa ku cera, namwe mwahe kenge mwa ku fa eci awo.”

Kathsimo kokuyu o kukana kwima

6Yesu wa wa tongwerire aka kathsimo ci: “Munu yumweya wa kunine okuyu mu dikanda dyenthzi. Wa thzire ku ka fotako ñuyu, unone ka a ka thzi wanineko. 7Wa amberire mukwakunyunga dikanda ci: ‘Ni na kwanithsa myaka thzihatu honi o ku na ni fotangako ñuyu oku kukuyu, unone kwithsa ku thzi wanako. O u hendure kwithsa eyi nga wipithsera muve.’

8“Unone mukwakunyunga dikanda wa ambire ci: ‘Ñathsire wange, o u thsie uno mwaka pohuma, kenge na ku thsima ku thzingurukithsa dithsina dyao na ku pakeko wiro. 9Ngeci o wa kwime ku makomwa i na roo. Unone ngeci ka wa kwima mbeci wa ku u hendure.’ ”

Yesu aa porithsa mbuyama dyo Savata

10Diyuwa dimweya dyo Savata, Yesu o ku rongithsa mu sinagoge, 11kwekarire mbuyama oyu wa korire myaka thzo dikumi na mutanu na thzihatu. Wekarire no mupepo oumango ou wa mu kundumanithsire muongo karo kadi wa ku twethsa ku oroka. 12Yesu ou a mu monine wa mwithsire no ku mu ambera ci: “Mama! O na rukururiwa kwikora yoe.” 13Wa mu kambekire moko, popo wa orokire ayepo shangara Nyambi.

14Unone muendithsi o sinagoge wa anthzipire pa ku mu porithsa Yesu dyo Savata. Wa amberire mbunga ci: “Ko a di mayuwa o mutanu na dyofoci o ku kwama, mu keyange mwao mayuwa ku na mi porithsa, kadi dyo Savata.”

15Fumu wa mu tawire ci: “Amwe mwakwamahetaheta! Munu no munu ku kwenu aa kwamanga dyo Savata! Ene ka mu puturangire mapuru enu nji endongi yenu pa fungo no ku i twara ku ka nwa meyu dyo Savata nji? 16Uno honi oyu mbuyama mwana Aburahama, oyu na angiwa kwa Satana myaka thzo dikumi na mutanu na thzihatu ne kadi iwa ku mu putura mu diyuwa dyo Savata nji?”

17Eyi a tawire Yesu ya enithsire akwethzimbo yenthzi. Unone mbunga thzothzihe thza roerire yoihe eyi a kwamine.

Kathsimo ko dinanda dyotata no mamene

(Mat 13.31-32; Mar 4.30-32)

18Yesu wa ambire ci: “Kutumina kwa Nyambi ne kwaa cipitura eci thsine? No thsine nga ni ku piturithsa? 19Kwaa cipitura eci dinanda dyotata edi a kunine munu mu dikanda dyenthzi. Dya menine no ku piruka thsitondo nenyunyi ya umberireko mataratara ku mite thzathso.”

Kathsimo ko mamene

(Mat 13.33)

20Karo wa ambire ci: “No thsine nga ni ku piturithsa Kutumina kwa Nyambi? 21Kwaa cipitura eci mamene aa a na pakerera mbuyama noshunga ku ruva ci dikende di tunduruke.”

Thsero thzo kuciomba

(Mat 7.13-14,21-23)

22Yesu ou a thzire ku Yerusalema wa pitire mu mambongi no mu maumbo o ku thza o rongithsa. 23Munu yumweya wa mwipurire ci: “Fumu! Ene anu owapu awa a ku yoyithsiwa nji?”

Wa wa amberire ci: 24“Mu citanarithse ci mwingene mu thsero thzo ku ciomba, inene owangi kenge a ku ereka kwingenamo, unone ka ku twethsa kwingenamo. 25Thsinda thsa nthzio ou a ku pata ku thsero, kenge mwa kwimana pora ku ngongomona no ku adikanena ci: ‘Ñathsire wetu, o tu yanthzurwere.’

“Unone kenge a ku mi tawa ci: ‘Ka ni mi dimuka nji ku dimuka oku mu na tundu.’

26“Unone kenge mwa ku mu huthsa ci: ‘Twa dire no ku nwa noe karo shime waa rongithsa mu makuñwa etu.’

27“Aye kenge a ku mi tawa ci: ‘Ka ni mi dimuka nji ku dimuka oku mu na tundu. Mu tunde ku kwange mwahe amwe mwanu owamango.’

28“Omo kenge kwa kwikara ku dira no ku cihuma nwaeo, inene kenge mwa ku mona Aburahama, Isaka, Jakovo nakwakukethza wahe mu Kutumina kwa Nyambi, unone amwe kenge mwa ku konthzeriwa pora. 29Anu kenge a ku tunda ku muvo no ku mutoko, ku wiko no ku mboera ku nekara ku tafure ku thsidika mu Kutumina kwa Nyambi. 30Yoshemwa kwa di awa a di ku manyima awa a kwikara ku rupara, karo awa a di ku rupara kenge a kwikara ku manyima.”

Yesu aa direrera Yerusalema

(Mat 23.37-39)

31Kethsiya thsikati Afarithsi amweya a keyire kwa Yesu no ku amba ci: “O tunde muno mu ndau o thze kwako. Heroda aa fota ku kwipaa.”

32Yesu wa tawire ci: “Mu thze mu ka tongwere oyo mbwawa ci: ‘Kenge ni twara ku rupara ku cithza mathzimu no ku porithsa anu rero no peunthza, mu diyuwa dyo muthsihatu o ku ni na mana ekwama yange.’

33“Shaanga kengeyo naa roera ku katuka rero, peunthza no pandere o ku ni enda, inene ka ku roerire ci mukwakukethza a ku paiwere kwako shime mu Yerusalema!

34“Mayuwane Yerusalema, mayuwane Yerusalema, owe o nepaanga akwakukethza no ku povaura no mawe tunganda twa Nyambi. Kadi edi ni na foto ku paka pofoci anoe eci ñathzishushwa edi a na pakanga tuciyociyo twenthzi mu mando enthzi, unone ka mu fotire! 35O na mono honi, diumbo dyoe kenge dya kwikara diundu. Ka mwa ku ni mona shime apa mwa ku amba ci: ‘Wa thsiyauthzi oyu keya mu dithzina dya Fumu.’ ”#Mem 118.26.

Selectat acum:

Luka 13: mho

Evidențiere

Partajează

Copiază