Luka 14

Yesu aa porithsa munu mu diyuwa dyo Savata

1Diyuwa dimweya dyo Savata, Yesu wa thzire ku ka dya mu nthzio thza muendithsi wAfarithsi, anu awa ekariremo wahe a mu kengererire. 2Ku rupara rwenthzi kwekarire mukwerume o ku tuumana mauru no moko. 3Yesu wepurire Afarithsi nakwakutongonona murao o Thsijuda ci: “Ene murao ne waa tawethza ku porithsa munu mu diyuwa dyo Savata nji dyombo?” 4Unone ka mu tawire thsimweya. Aye wa kwatire mukwakukora no ku mu porithsa no ku mu ambera ci a thze ku diumbo dyenthzi.

5Wa wepurire karo ci: “Ngeci yumweya ku kwenu o di no mwane nji puru ayepo wera mu dithsima dyodithzungi mu diyuwa dyo Savata, ene tumba nga a mu tundithsamo wangu nji?” 6Unone napo karo ka twethsire ku mu tawa thsimweya.

Yesu aa rongithsa keyi yo kucihuthsa kushi

7Yesu ou a monine enda amweya edi a cihangwerire epura yo direma ku tafure, wa wa terire aka kathsimo ci: 8“O ku na raiwa ku thsidika thso wenga, wa thzererera ku kekara mu thsipura thso direma. Ngeci owepo tenda kengeyo kuinashimi munu yumweya o ku remekiwa kupita owe naye na raiwa oko ku thsidika. 9Oyu na ku raa kenge a keya ku na ku ambera ci: ‘O pe oyu ekare omo o nekara.’ Uno honi kenge o katuka ko honyi no ku kekara mu thsipura thso kupira direma ku manyima.

10“Unone o ku na raiwa ku thsidika o wikare mu thsipura thso kupira direma ci oyu na ku raa ku thsidika ou a keya naa ku ambere ci: ‘Shadi, o katuke o kekare mu thsipura thso direma!’ Mweyo, kenge o remekiwa mu kaci kowa na raiwa wahe. 11Inene munu yomuhe o ku cithzineka kenge a ku huthsiwa kushi, unone o ku cihuthsa kushi kenge a ku thzinekiwa.”

12Karo Yesu wa amberire oyu wa mu raire ci: “O ku na raa anu ku mucithsuko nji murarero wethsako ambushoe, aminoe, akuruoe, apoe, nji andamboe wafumanyi. Ngeci owepo o tenda kengeyo, nawo kenge a ku ku raa nowe ci a ka ku huthsere eyi no wa pa. 13Unone o ku na kwama dishambirera o withseko ahepwe, ekunga, erema no tupuputwa. 14Ngeci owepo o tenda kengeyo, kenge wa kwikara no thsiyauthzi. Shaanga ci ka ku twethsa ku ku huthsera thsimweya, Nyambi yodiyo wa ku ku huthsera mu diyuwa dyo kupinduka kwafu kowa owawawa.”

Kathsimo ko thsidika thsoshokuru

(Mat 22.1-10)

15Yumweya kowa dire na Yesu ou a yuvire eyo, wa amberire Yesu ci: “Wa thsiyauthzi munu oyu wa kwikara ku tafure, ku thsidika mu Kutumina kwa Nyambi.”

16Yesu wa mu tawire ko kathsimo ci: “Kwekarire mukwerume oyu wa kwamine thsidika thsoshokuru oku a raerire anu owangi. 17Thsidika o ku thsi di po pepi no ku tendahara, wa tumine mupikenthzi ku ka tongwera anu awa a raire ci a keye, inene enu yoihe i na kwana.

18“Unone wahe a ka tatekire ku amburura. O kutanga wa ambire ci: ‘Na ni uru dikanda naa fota ci ni ka di mone, o ni kwatereko.’

19“Yumweya wa ambire ci: ‘Na ni uru mapuru epani yo mutanu naa fota ku ka a ereka. O adikane o ni kwatereko.’

20“Yumweya karo wa ambire ci: ‘Mu wenga ni di, tumba i tawa ci ni keye.’

21“Oya mupika wa hukire no ku ka tongwera ñathsire wenthzi yoihe. Thsinda thsa thsidika wa anthzipire no ku ambera mupikenthzi ci: ‘O thze mu makuñwa no mu mambanthza o mu maumbo, o rete ahepwe, erema, tupuputwa nekunga.’

22“Oya mupika ou a ka hukire wa amberire ñathsire wenthzi ci: ‘Ni na tende ethsi o na ni raerera, unone nthzio ka thzi yarire.’

23“Ñathsire wenthzi wa mu amberire ci: ‘O thze mu mikwakwa no mu makuñwa oahe, o ka konge anu wahe awo wana a keye ci nthzio thzange thzi yare. 24Naa ku ambera yoshemwa ci kwithsa shaanga yofoci kowa na ni tanga ku raa oyu dya ku dishambirera dyange.’ ”

Eyi i na fotahara ci o wikare thsirongwa thsa Yesu

(Mat 10.37-38)

25Mbunga thzothzikuru thza shupwerire Yesu, wa cithsetukire no ku wa ambera ci: 26“Yomuhe o ku fota ku keya ku kwange ci ekare thsirongwa thsange, shime a tange tango ku thzimba tata wenthzi, mama wenthzi, munuwenthzi, anenthzi, apenthzi, aminenthzi, akurwenthzi no mwoyo wenthzi. 27Munu o kukana ku shimba mbinda thzenthzi no ku ni shupwera, tumba a twethsa kwikara thsirongwa thsange.

28“Mu anekere ci yumweya ku kwenu nga aa fota ku umba otara, shime a tange tango kwikara pashi no ku tara ecikwathsithsa eyi nga i twethsa ku manenena ekwama ci a dimuke ci vungashi nga i uriwa. 29Ngeci ayepo tateka ku shisha mushisho no ku kwanga ku u mana, wahe awa a ku u mona kenge a ku mu teurura. 30Kenge a ku amba ci: ‘Oyu munu ne, na a tateka nawa ku umba, unone naa kwanga ku manenena ekwama yenthzi.’

31“Nji nga fumu yumweya ayepo fota ku ka rwithsa fumu yumweya. Ene nga ka a tanga tango kwikara pashi ku anekera ci mashwarare enthzi o 10,000 ne kenge nga a twethsa ku ka rwithsa oya keya no mashwarare o 20,000? 32Ngeci ayepo mona ci tumba a mu twethsa ku mu rwithsa, kenge a tumako anu o ku di ko kure ku ka ambaura noya keya ci kwikare thsiyaro. 33Mofoci nenu, o kukana ku shuva eyi a di nayo yoihe tumba a twethsa kwikara thsirongwa thsange.

Mungwa o ku tutukwa

(Mat 5.13; Mar 9.50)

34“Mungwa po uwa, unone ngeci u na tutukwa ne ngepi nga u kwamiwa karo ci u toware. 35Ka u roerire shaanga ku muve nji kwikara wiro. Waa roera pohuma ku u mwaera pora. Oyu di no matwi o ku yuvithsa a yuve.”

Selectat acum:

Luka 14: mho

Evidențiere

Partajează

Copiază