Etenda 13
13
Banabasi na Saule aa tumiwa
1Mu kereke thzo mu Antioke kwekarire akwakukethza narongithsi: Banabasi, Simioni oyu wethsiwire o Mwiru, Lusiusi o ku Sirene, Manaene oyu wa kurerire pofoci na nguvuru Heroda, no Saule. 2Diyuwa dimweya o kwa rombera Fumu no ku cikanga no nthzara, Mupepo Oukenu wa ambire ci: “Mu ni torwere a Banabasi na Saule a ka kwame ekwama eyi na ni wethsera.” 3Ou a manine ku cikanga no nthzara no ku rombera, a wa kambekire moko o no ku wa fundura.
Banabasi na Paulu mu Sipera
4Ngou honi, momu widi wo, ko ku wa tuma Mupepo Oukenu, a urumukire ku Selusia no ku ka hunyuna ku thza ku diongo dya Sipera. 5Ou a ka kumine mu Salamisi, a ka hongire diywi dya Nyambi mu masinagoge o Majuda. Johani Mareka wa endireno ku wa kwathsa.
6A endire mu diongo dyodihe shime ku ka kuma mu mbongi thza Pafosi. A ka waninemo mukwamasheno, karo o mukwakukethza o mbango o Mujuda o dithzina dyo Ba-Yesu. 7Kuma ekarire na nguvuru Seregusi Paulusi, mukwerume o maano. Oyu nguvuru wethsire Banabasi na Saule inene kuma a fotire ku yuva diywi dya Nyambi. 8Unone Elimasi mukwamasheno (inene eyo yo di na amba dithzina dyenthzi mu Thsigerike), wa wa shomororire no ku ereka ku kwangithsa oya nguvuru ku tawa.
9Unone Saule, oya wethsiwire karo ci Paulu, ko ku yara Mupepo Oukenu wa rupukerire Elimasi no ku mu ambera ci: 10“Owe mwana shamaonga, owe o mukwathsithzimbo thsowawa ouhe, o ku yara kwangera nomango. Ene mbera ko thsii ku petithsa makuñwa o kuoroka a Fumu? 11O teerere! Pano honi Fumu o na ku piruka, kenge o wikara kapuputwa. Ko twethse ku mona shaanga mwethzi o diyuwa ko thsikati thsothsipu. Popo dyundu no mirema ya mu thsikire pa meho, ayepo fafatera ku fotafota munu o ku mu tangerera ku mu kwaterera ku dyoko.”
12Oya nguvuru ou a monine eyi ya tendaharire, wa tawire diywi dya Nyambi, inene wa komokire nene kerongithsa ya Fumu.
Paulu na Banabasi mu Antioke o mu Pisidia
13Ku tunda mu Pafosi, Paulu naenthzenthzi a hunyunine ku thza ku Pega o mu Pamfilia, oku a ka wa thsiire Johani ku huka ku Yerusalema. 14Unone awo a ka shumunine ku tunda mu Pega ku thza ku Antioke o mu Pisidia. Mu diyuwa dyo Savata, a kengenine mu sinagoge no ku kekara. 15Munyima thzo ku vara mu vuka thzo murao nakwakukethza, aendithsi o sinagoge a wa rombire ci: “Andengenu, ngeci mu diko no maywi o ku tanarithsa mbunga mu a ambaure.”
16Paulu ngou emanine no ku wa tutwarithsa ko dyoko, no ku amba ci: “Amwe mwa Maisiraele, namwe mwAnukenge mu na remeka Nyambi, mu ni teerere!
17“Nyambi o Maisiraele wa hangurire akwathsañuruetu, wa ka wa kurithsire mwethsiya thsikati a kekarire mu Egepita, karo kokoro wenthzi wa wa tundithsire muya mu ditunga. 18Wa wa kundire mu myaka thzo makumi ane mu dikunguthsitu. 19Wa yundithsire mishovo thzo mutanu na thzidi thzo mu Kanana, no ku pa edyo ditunga kwanuenthzi Maisiraele ci a di shwane di kare dyo. 20Eyi yoihe ya shimbire myaka thzo ku twethsa ku kwana makumi o dikumi ane no myaka makumi mutanu (450). Munyima thzeyo, Nyambi wa wa pire akwakuratura shime ku ka kuma mu thsikati thsa mukwakukethza Samuele.
21“Ngou honi Maisiraele a rombire ku wa pa fumu, Nyambi ngou a hangurire Saule mwana Kishi o mu mukuta wa Benjamini kwikara fumu wo, oyu wa tuminine myaka thzo makumi ane. 22Ou a tururirepo Saule, Nyambi wa pakirepo Davida ci a pwe fumu wo, oyu a pire ombangi yenthzi Nyambi ci: ‘Ni na ciwanena Davida mwana Jese, mukwerume oyu na shima ko mucima wange, kenge a ku kwama eshima yange yoihe.’
23“Kwanahoka oyu mukwerume ko naa tundithsa Nyambi Muyoyithsi o Maisiraele, aye Yesu, eci edi a i kumbwethzire Nyambi. 24Yesu o ku shime ku keya, Johani wa hongire anu wahe o mu Isiraele ci a cere evi yo a korovethziwe. 25Johani o ku manenena ekwama yenthzi wa ambire ci: ‘Ene mwaa anekera ci yame nodye? Kadi cingwa yame oyu mu na taterera, dyombo, unone kwaa di oyu keya munyima thzange, ka ni roerire shaanga ku putura mashangu o kwidyato yenthzi.’
26“Andengenu, amwe mwana Aburahama namwe mwAnukenge amwe mu na remeka Nyambi, ku kwetu naa tumithsiwa aa maywi o kuyoyithsiwa. 27Akwa Yerusalema naendithsi wo ka dimukire Yesu ci edye. Pa ku mu shomorora kwo, a retithsire ci eyi a ñorire akwakukethza i citombore, eyi i na variwanga dyo Savata no Savata. 28Shaanga ci ka mu wanenine murandu o ku roera ku paiwera, a rombire Pilatu ci a mwipae.
29“Ou a manine ku kwama Yesu yoihe eyi ya ñoriwire keyi yenthzi, a mwamburire pa mbinda no ku mu paka mu thsidi. 30Unone Nyambi wa mu pindurire kwafu, 31karo mu mayuwa oangi Yesu wa hokokangire ko waya anu a tundire nenthzi ku Galilea ku thza ku Yerusalema, awa di honi mambangi enthzi ku Maisiraele.
32“Pano honi twaa mi retera Muthzimbu Ouwa ou a kumbwethzire Nyambi kwakwathsañuruetu, 33i na na citombora ku kwetu twanahoka wo ko ku pindura Yesu kwafu eci edi ya ñoriwire mu Dimbo dyo muthsidi ci:
“ ‘O mwanange,
ni na piruka tata woe rero.’
34“Nyambi wa mu pindurire kwafu ci orera mu thsidi, eci dyodi a ambire ci:
‘Kenge na ku mi pa thsiyauthzi thsothsikenu no shemwa thsiya na kumbwethzire Davida.’
35“Karo wa i ambire ko kuyara mu Dimbo dimweya ci:
‘Ko wa ku tawethza ci O Mukenu woe orere mu thsidi.’#Mem 16.10.
36“Inene Davida ou a manine ku kwamena Nyambi mu thsikati thsenthzi, wa fire no ku vumbekiwa oku kwa vumbekiwire akwathsañuruenthzi, karo erama yenthzi yorire, 37unone aye oyu a pindurire Nyambi kwafu ka orire.
38“Mweyo, andengenu, naa fota ci mu dimuke ci kenthzi aye Yesu u hongiwa ku kwenu otetero wevi. 39Kenthzi aye Yesu munu yomuhe oyu na tawa aa tendiwa o muwawa pa meho a Nyambi, eyi mwa kanine ku wana ko murao wa Mushe. 40Mu mamere ci eyi a ambire akwakukethza ya ku tendahara ku kwenu.
41“ ‘Mu mone, amwe mwakwa mushepuruthzi!
Mu komoke no ku fa!
Inene mu mayuwa enu kenge na ku tenda thsinu,
ethsi mwa ku kana ku tawa,
shaanga yoyu thsi mi tongwera munu.’ ”
42Paulu na Banabasi o kwa puna mu sinagoge, anu a wa rombire ci a ku ka huke mu Savata ethzi thza randireko a ku na shumune ku rongithsa eyi enu. 43Mbunga ethzi thzekarire mu sinagoge ou thza cimwaamwaire, Majuda owangi nAnukenge awa engenine mu thsitawo thso Thsijuda a shupwerire Paulu na Banabasi, awa rongithsire no ku wa karaethza ci a twarerere ku tanarithsa thsihemo thsa Nyambi.
44Savata ethzi thza randireko, ongi wanu wahe o mu mbongi a ciwanawanine ku na yuva diywi dya Fumu. 45Unone Majuda ou a monine oo mungi wanu, a wa tenderire mbamba no ku tateka ku rwithsa eyi a ambire Paulu no ku mwipithsa dithzina. 46A Paulu na Banabasi ngou a ambire kondume ci: “Ya roerire ci edi diywi dya Nyambi di tange ku tongoriwa ku kwenu. Uno honi mbeci po mu na di kana no ku ciratura mwathsinda ci ka mu roerire mwoyo o diyere, twaa thsiurukera honi kwAnukenge. 47Inene eyi yodiyo a tu tuminine Fumu ou a ambire ci:
“ ‘Ni na ku kwama kwikara mwethzi kwAnukenge,
ci o rete kuyoyithsiwa ku hura thzo kaye.’ ”
48Anukenge ou a yuvire eyi a nyanyukire no ku shangara diywi dya Fumu. Karo owangi awa hangweriwire mwoyo o diyere a tawire.
49Mweyo, diywi dya Fumu dya eranine muya mu ditunga dyodihe. 50Unone Majuda a shovongorire ambuyama o ku remekiwa awa a cipakire kwa Nyambi nakwerume o wakuru mu thsivaka omo mu mbongi ci a rwithse Paulu na Banabasi no ku wa cithza mu ndau thzo. 51Mweyo, a wa kukumwenine dikungu dyo kwidyato yo#13.51 Ku monithsa ku kaniwa. no ku thza ku Ikoniamu. 52Unone awo akwakutawa o mu Antioke a nyanyukire no ku yara Mupepo Oukenu.
Selectat acum:
Etenda 13: mho
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©2023 The Seed Company
