Lug 6

Jesu orɨn̰ dan̰ Dɔnɔ a cay wɔlɛ gɨ ni dorɨn̰ gɨlale gɨ da Jubɨ

(Matɨyo 12:1-8; Marg 2:23-28)

1Dan̰ wɔlɛ gɨ pɨna wo̰, gɨ na wɔlɛ gɨ ni dorɨn̰ gɨlale gɨ da Jubɨ le, Jesu gay duroy yage gɨ gasa andaŋ nee. Ka-aye-cay-tɨbayi poyge cay gasa hɨroyge duroy kobɨge gɨŋ loyge. 2Parɨsɨn̰an̰əŋ ga pɨna wo̰ ɨngɨriige yege hɨn̰: «Toy na mɨna ma, magɨŋ lee hɨnga ga gasɨn̰-kɔl kani nar dan̰ wɔlɛ gɨ ni dorɨn̰ gɨlale le ga?» 3Jesu dɨbɨge cay nee yege hɨn̰: «Hɨnga ga Dabid ba lee dan̰ kalaŋ ga ba orge danayi kɨɗɨn̰ ga kuroŋ ba leege le kɛ, kɨŋ ɗɨngɨsa koldi duroy magtubu dɨŋ naŋ ga? 4Ban or duroy ƴaa-di-da-Kumu di kan leege dan̰ ɓala, ay dan̰ mapa gɨ ɗege dan̰ cɨndi bɨn̰ Kumu boy nee le dii bɨ, ɗe bɨn̰ kan ga orge danayi le diige bɨ. Ama mapa gɨ nee le, ɗege na dan̰ cɨndi bɨn̰ Kumu ojɨn̰ge na cay ka-bɔgɛ kɨbar na ba daage kan̰dɨge le #6:4 Sɨlagɨŋ: 1 Samuel 21:1-6. kɛ, kɨŋ ja hɨn̰ wo̰ naŋ ga?» 5Jesu jɨga dɨbɨge cay nee ɗaŋ coŋ yege hɨn̰: «Ɨŋ-bandi Kurɨn̰-ungo le, ɨŋ ba-sɔmɛ a cay wɔlɛ gɨ ni dorɨn̰ gɨlale gɨ da Jubɨ le.»

Jesu poɗɨ bara gɨ kobi ma

(Matɨyo 12:9-14; Marg 3:1-6)

6Dan̰ wɔlɛ dɔrɛ gɨlale gɨ da Jubɨ gɨ ɗaŋ, Jesu or duroy ƴaa-daye dɨŋ bɨ, ɨre gɨlge kɔl. Bara gɨ pɨna wo̰ gɨ kobi gɨ bara ma ɨre danage nee bɨ. 7Ka-gɨlɨn̰ kalaŋ gasɨn̰-kɔl gɨ da Moyis, dan̰ Parɨsɨn̰an̰əŋ sige cɨndɨge jɛr jɛr solɨn̰ge Jesu, kɛ ban na kɨya poɗii dan̰ wɔlɛ gɨ ni dorɨn̰ gɨlale le ga? Ɗe age na wan̰ gɨyəŋ gɨ ni sɨn̰ kɔl cayi. 8Ama Jesu sol ɨrɨme koge gɨ a kuduroyge nɔm. Na toy di hɨn̰ wo̰ ma ban yen̰ dan̰ bara gɨ kobi ma le ye hɨn̰: «Sa daa, ɨre ɨr duroyni kɛ.» Bara le de say ɨre daa. 9Ɨni na, Jesu yege hɨn̰: «Aŋ ɨngɨrgɨŋ je ƴee bɨ: Kɛ wɔlɛ gɨ ni dorɨn̰ gɨlale le, na wɔlɛ gɨ ni loon̰ hɨnga ga ɗari wala, na wɔlɛ gɨ ni loon̰ hɨnga ga ɨsɨni ga? Kɛ na wɔlɛ gɨ ni poɗɨn̰ ungo wala, na wɔlɛ gɨ ni ɗon̰ ungo mundoŋ ga?» 10Jesu solge pɨna pɨna nɔm bɨ, yen̰ dan̰ bara gɨ kobi ma le ye hɨn̰: «Tara kobɨn̰.» Gaa ma, kobi le jɨga poɗɨ hɨn̰ gɨ tumɔ wo̰. 11Ama Parɨsɨn̰an̰əŋ dan̰ ka-gɨlɨn̰ kalaŋ gasɨn̰-kɔl gɨ da Moyis le kuduroyge ɨl cəŋ cəŋ bɨ, man̰ge kɔl duroyge ojɨ cay hɨnga ga kan kɨya lɔɔ danayi bɨ.

Jesu tor ka-gɨre-gɨye ga mɔjɨ-cayge-sɔɔ

(Matɨyo 5:1; 10:1-4; Marg 3:13-19)

12Wɔlɛ gɨ pɨna wo̰, Jesu nay or a cay garma gɨŋ kɨya ɔlɛ Kumu. Ma ban ol Kumu duroy son̰do dɨŋ bɨrɨŋ kɨɗɨn̰ wolii daa. 13Kɨɗɨn̰ ga kɨɗɨn̰ wol yarara, ɨni na ban tee ka-aye-cay-tɨbayi gusi bɨ, ban tor kan ga won̰ mɔjɨ-cayge-sɔɔ duroyge ɗege dan̰ cɨndɨge teege ka-gɨre-gɨye kayi. 14Ka-gɨre-gɨye le gusɔŋdɨge ba kɛ: Simo gɨ Jesu si gusondi na Pɨyɛr dan̰ Andɨre gɨ ni kurundi, Jag dan̰ Ja̰, Pilib dan̰ Bartelemi, 15Matɨyo dan̰ Tomas, Jag kurɨn̰ Alpe dan̰ Simo kɨye ba-ƴaa gɨ gey dɔrɛ kalaŋ kayi kobɨ ka-dɔɔ cayge, 16Jud kurɨn̰ Jag dan̰ Judasɨ Isikarɨyɔt, ban gɨ ba-aye cay Jesu bɨn̰ ka-baadi le.

Jesu gɨlɨn̰ dɨmdɨrdi kalaŋ kɔl bɨ poɗɨ ka-hɔmɨn̰ɛ bɨ

(Matɨyo 4:24-25; Marg 3:7-11)

17Jesu gɨsɨn danage jɨn̰ dugo te garma gɨŋ bɨ, ɨre dugo wolwa gɨŋ. Ka-aye-cay-tɨbayi ga dan̰ kondige ɨrege danayi nee bɨ. Dɨmdɨrdi kalaŋ le, saygage na cay gɨsəŋ ga Jude gaŋ dan̰ Jerusalɛm bɨ, a cay ƴaa-ga-gɨmɨdoŋ ga Tir dan̰ Sido̰ ga woy a bongi kuray gɨŋ bɨ. 18Kan ɨrgage na kɨya togɨyige bɨ, ɗe ban na poɗɨge bɨ. Kan ga turnɔ ga ɨsɨndəŋ gɨlge-cɨn̰ kalɨn̰ ma, turnɔ ga ɨsɨndəŋ le duroŋ gusɨge bɨ. 19Dɨmdɨrdi kalaŋ le ongɨlge gusɨge age na ɨsɨbii kɨya gɨ tɔgɨ da Kumu andaŋ gusi poɗɨge nɔm.

Gɨle kɔl gɨ da Jesu-Kɨris

(Matɨyo 5:1-12)

20Jesu ay cɨndi daa solɨn̰ ka-aye-cay-tɨbayi bɨ yege hɨn̰:

«Tumoy wolwa woy kol caygɨŋ, kɨŋ ga kandi wɔɔdɨgɨŋ unɔ. Kɨya wa dɔɔ-ƴaa di da Kumu na togɨŋ!

21Tumoy wolwa woy kol caygɨŋ, kɨŋ ga kurɔŋ ləgɨŋ haw kɛ, kɨya wa kɨŋ kɨya sɨdɨldəŋ jɨŋ jɨŋ ƴee!

Tumoy wolwa woy kol caygɨŋ, kɨŋ ga ka-ɨle haw kɛ, kɨya wa wɔlɛdi gɨ kɨŋ kɨya ase dan̰ gusi-mɔwa le kɨya caga ƴee!

22Tumoy wolwa woy kol caygɨŋ, kɨŋ ga kalaŋ ƴomgɨŋge dan̰ kuduroyge bɨ, kɨŋ ga kalaŋ kan̰gɨŋge bɨ, kɨŋ ga kalaŋ yagɨdɨgɨŋge bɨ, kɨŋ ga kalaŋ solgɨŋge leen̰ kalaŋ ga ɨsɨndəŋ kɨya canɨ ɨŋ-bandi Kurɨn̰-ungo bɨ.

23Wɔlɛ gɨ hɨnga ga nee le nɔm na andaŋ caygɨŋ na, laagɨŋ gusi-mɔwa bɨ, tɨgagɨŋ pɨrɛ bɨ!

Ho’o sɨlagɨŋ cay kobɨgɨŋ gɨ gumu woy gamgɨŋ a daa nii!

Halegɨŋ gɨybəŋ naŋ, mon̰igɨŋ kalɨn̰ ma gɨlɨn̰ge ka-yɔɔ-kɔl-gɨ-Kumu-ba-yɔɔ cɨn̰-gɨle-cɨn̰ na hɨn̰ wo̰ bɨ.

24Ama cɨn̰-n̰age ba caygɨŋ, kɨya wa kɨŋ way ɗarwa togɨŋ ɨni!

25Cɨn̰-n̰age ba caygɨŋ kɨŋ ga haw kɛ kuduroygɨŋ sɨdɨldəŋ jɨŋ jɨŋ le, kardi nee kuroŋ kɨya loogɨŋ!

Cɨn̰-n̰age baa caygɨŋ kɨŋ ga haw kɛ ase wadɨldɨn̰ kɨbɨ gɨŋ le, kardi nee kɨŋ kɨya sɔmɛ duroy n̰age dan̰ ɨle!

26Cɨn̰-n̰age baa caygɨŋ kɨŋ ga kalaŋ nɔm ye kɔldɨgɨŋ kuɗa le, kɨya wa na hɨn̰ wo̰ ma mon̰igɨŋ ga jɨne kalɨn̰ ma leege dan̰ ka-yɔɔ-kɔl-gɨ-Kumu-ba-yɔɔ ga leege gusɨge hɨn̰ kan na ka-yɔɔ-kɔl-gɨ-Kumu-ba-yɔɔ, ama kan na ka-poyi le.»

Lɔɔ wandɨ dan̰ ka-baadɨgɨŋ

(Matɨyo 5:39-47)

27«Ama kɨŋ ga ba je kɔl hɨnge labɨde le, aŋ yəgɨŋ daa waŋ: Geygɨŋ ka-baadɨgɨŋ bɨ, laagɨŋ ɗarwa dan̰ kan ga ka-ƴomgɨŋge dan̰ kuduroyge bɨ. 28Tɨragɨŋ-kɨbɨgɨŋ cay kan ga ka-ɓɨsgɨŋ bɨ, ulagɨŋ Kumu kɨya cay kan ga ka-pɔyɛ kɔl ɗɔɔ caygɨŋ bɨ. 29Hɨn̰ gɨ ungo na dɨga kɨway maŋjɨn̰ ga pɨna na, bɨl kɨway maŋjɨn̰ ga ɗaŋ ban ɗe de nee ƴee. Hɨn̰ gɨ ungo na ungɨla badɨge kan̰ ga gumu ga ji dobɨ cay kamdɨge gaŋ danan̰ na, ɗayi ɗe ban ƴee gumɔjɨ kon̰ nee bɨ. 30Ungo na ɨngɨrɨn̰ hɨnga na narii naŋ bɨ, hɨn̰ gɨ ungo na ungula hɨnga kan̰ ƴa na, jɔgɛ ɨngɨrii ɗaŋ naŋ bɨ. 31Hɨnga nɔm ga kɨŋ gey gɨ kalaŋ na laa danagɨŋ le, kɨŋ kalɨn̰ ma laagɨŋ danage hɨn̰ wo̰ ca ca bɨ. 32Hɨn̰ gɨ kɨŋ na gey naa kalaŋ ga ka-geygɨŋ jaŋ ƴɔbɨ na, cay kobɨgɨŋ ba ani ga? Kalaŋ ga ka-lɔɔ ɨsɨna kalɨn̰ ma ƴomge wandɨ na dan̰ kalaŋ ga ƴom wandɨ danage bɨ. 33Hɨn̰ gɨ kɨŋ na laa ɗarwa na dan̰ kalaŋ ga leege ɗarwa danagɨŋ jaŋ ƴɔbɨ na, cay kobɨgɨŋ ba ani ga? Kalaŋ ga ka-lɔɔ ɨsɨna kalɨn̰ ma, leen̰ge gusɨge na hɨn̰ wo̰ bɨ. 34Hɨn̰ gɨ kɨŋ na ɨban̰ naa kalaŋ ga kɨŋ ɨrɨm hɨn̰ gɨ kan na kɨya ɓale jogɨn̰ daa bɨgɨŋ na, cay kobɨgɨŋ ba ani ga? Kalaŋ ga ka-lɔɔ ɨsɨna kalɨn̰ ma obin̰ge na ka-lɔɔ ɨsɨna ga ɓal jogɨn̰ daa bɨge bɨ. 35Ama ƴɨmagɨŋ wandɨ dan̰ ka-baadɨgɨŋ bɨ, laagɨŋ ɗarwa bɨ, ɨban̰gɨŋ kalaŋ hɨnga dɨle ɨrɨme hɨn̰ gɨ kan na kɨya jogin̰ bɨgɨŋ daa bɨ. Hɨn̰ gɨ kɨŋ na laa hɨn̰ wo̰ na, Kumu kɨya bɨgɨŋ cay kobɨgɨŋ gɨ gumu bɨ, kan kɨya yɔ hɨn̰ gɨ kɨŋ na karɨn̰ Ban gɨ Ɗɨn̰ cay hɨnga nɔm. Kɨya wa Kumu kalɨn̰ ma, lee ɗarwa dan̰ kalaŋ ga sɨlage ɗarwa di Ban laage naŋ bɨ, dan̰ kalaŋ ga ka-lɔɔ ɨsɨna bɨ. 36Sɨlagɨŋ cɨn̰-n̰age di da kalaŋ hɨn̰ gɨ Baygɨŋ Kumu ba solɨn̰ cɨn̰-n̰age di da kalaŋ wo̰ bɨ.

Bɔyɛgɨŋ kɔl cay kamdɨgɨŋ naŋ

(Matɨyo 5:48; 7:1-12; 15:14; 10:24-25; 7:3-5)

37«Bɔyɛgɨŋ kɔl cay kamdɨgɨŋ naŋ, na hɨn̰ wo̰ ma Kumu kalɨn̰ ma kɨya bɔyɛ kɔl caygɨŋ naŋ bɨ. Yɔgɨŋ gɨ kɔl na ƴom cay kamdɨgɨŋ naŋ, na hɨn̰ wo̰ ma Kumu kalɨn̰ ma kɨya yɔ gɨ kɔl na ƴɨma caygɨŋ naŋ bɨ. Ɗagɨŋ kuduroygɨŋ jala cay kamdɨgɨŋ bɨ, Kumu kɨya ɗɔɔ kuduroy jalɨwa caygɨŋ bɨ. 38Bɨn̰gɨŋ kamdɨgɨŋ hɨnga, na hɨn̰ wo̰ ma Kumu kalɨn̰ ma kɨya bɨgɨŋ hɨnga bɨ. Kan kɨya gɨse hɨnga yɨbagɨde, ɗɨsɨge ɗe walɨn̰ dɨr dɨr bɨrɨŋ ɗɔɔ ɔrɛ coŋ, bɔgɛ kɨbɨ badɨge kagɨŋ gaŋ.» Kɨya wa kan kɨya gɨse hɨnga bɨgɨŋ na boy hɨnga ga kɨŋ gɨsɨn̰ hɨnga nee bɨn̰ kamdɨgɨŋ bɨ.

39Ban ay kɨradi-kɔl gɨ ɗaŋ yege hɨn̰: «Kɛ ba-bɨbe kɨya ɓale gɨlɨn̰ mɨgayi ba-bɨbe gɨyəŋ ga? Naŋ na, kan sɔɗɨmɔŋ toge kɨya laydaŋge guduru gɨŋ. 40Ba-aye-cay-tɨbay ba-gɨle hɨnga le, kɨya ɗɨn̰ dan̰ gɨ ba-gɨli hɨnga naŋ. Ama ba-aye-cay-tɨbay ba-gɨli hɨnga gɨ gɨliige kɔl walɨn̰ kuduroyna, kɨya gɨlɨn̰a na hɨn̰ ba-gɨli hɨnga wo̰. 41Kɨya wa ma mɨn̰ si tɨdɨn̰ solɨn̰ bugɗi hɛɗɨmɛ ga woy a tii kurɨndɨn̰, ama ji sɨla te tabi di gumu di woy a tɨdɨn̰ naŋ ga? 42Kɛ na mɨna ma mɨn̰ gɨ yon̰ kurɨndɨn̰ yɔ hɨn̰: “Kurnɨ, ɗaŋ aŋ dor bugɗi hɛɗɨmɛ ga woy a tɨdɨn̰” ama ji-bandi kalɨn̰ ma ji sɨla te tabi di gumu di woy a tɨdɨn̰ naŋ ga? Ji gɨ ba-yɔɔ-kɔl-kɨbɨn̰-sɔɔ-sɔɔ le, kuɗa gɨ ji dɨra sɨya gɨ gumu gɨ woy a tɨdɨn̰ an̰ solɨn̰ kɨɗɨn̰ kuɗa pa dɨm ma mɨn̰ da sɔlɛ kɨɗɨn̰ kuɗa gɨ ni dorɨn̰ bugɗi hɛɗɨmɛ ga a tii kurɨndɨn̰ ƴee. 43Hɨya gɨ ɗari le kɨya wɔɔ wɔɔdi gɨ ɨsɨni naŋ bɨ, hɨya gɨ ɨsɨni le kɨya wɔɔ wɔɔdi gɨ ɗari naŋ bɨ. 44Hɨya gɨ ani ani kalɨn̰ ma na toyge ba gɨle wɔɔdɨge. Cay pɨna ungo ara tuguyɔŋ a cay sɨləlɨm dɨŋ naŋ bɨ, ungo ara suru a cay gɨm gɨŋ naŋ bɨ. 45Ungo gɨ ɗari le, gɨye-lɔɔdi kuɗa na kɨya kuduroy ga kuɗa. Ama ungo gɨ ɨsɨnde le, gɨye-lɔɔdi ɨsɨnde na kɨya kuduroy ga ɨsɨnde. Kɨya wa na kɔl gɨ walin̰ kuduroy ungo jɨŋ jɨŋ ba basaŋ doŋ kɨbi.

Kɨradi-kɔl gɨ ojɨ cay ƴaa ga sɔɔ

(Matɨyo 7:24-27)

46«Na kɨya wa ma magɨŋ təŋ: “Ba-gulɔŋ, Ba-gulɔŋ” bɨ, kɨŋ laa hɨnga ga ɨŋ yəgɨŋ le naŋ ga? 47Waŋ waŋ gɨ na ɨre gusɨnɨ ma na ja kɔl hɨnge bɨ, aya laan̰ gɨye bɨ na, ɨŋ kɨya gɨlgɨŋ kɛ ban gɨlɨn̰ na dan̰ waŋ ga? 48Ban gɨlɨn̰ na hɨn̰ ungo gɨ ba gaɗe ƴaa, ama pay umboŋ ɗe ɗɨge mɨrɨg bɨrɨŋ andaŋ cay garma gɨŋ pa dɨm ma ɗen̰ te ƴaa cay nee ƴee wo̰. Kɨɗɨn̰ ga kaŋdi kuray na buyoŋ ɨra te ƴaa di nee dɨŋ bɨ, tɨgaa paj paj bɨ, yɨbagdaa yɨbag yɨbag bɨ kalɨn̰ ma ƴaa le kɨya dusoŋ naŋ. Kɨya gɨ ungo le gaɗɨ ƴaa le kuɗa. 49Ama waŋ waŋ gɨ na ja kɔl hɨnge ma na aya laan̰ gɨye naŋ na, ban gɨlɨn̰ na hɨn̰ ungo gɨ gaɗɨ ƴaa a cay gɨsəŋ gaŋ dɨle pɔ umboŋ ɗon̰ te ƴaa. Kɨɗɨn̰ ga kaŋdi kuray na buyoŋ ɨra te ƴaa dɨŋ bɨ, tɨgaa paj paj bɨ na, kɔl gɨ kɨbɨna kɛ bɨ, ƴaa le kɨya dusoŋ buɗɔg buɗɔg dugo.»

Selectat acum:

Lug 6: gab

Evidențiere

Partajează

Copiază