ÂTHAONA 41
41
Phiraoh mâsapa Zawsi ta a chhopasia
1Kô no a khô tawhta, Phiraoh ta mâ sa ta. A mâ lâta chavah kiah liata a duah ta. 2Viahchao panô pô sari, a mihpa nata a thawhpa chavah tawhta kaw pua ei ta, liaryh lohthi thih liata ama lao bâ ei ta. 3Âmo hnôhlâ ta viahchao panô hropa pô sari, a chhiepa nata a zaoh kariepa chavah tawhta kaw pua ei ta, chavah kiah liata viahchao panô hropazy kiapâh liata a vaw duah ei ta. 4Viahchao panô chhiepa nata zaoh kariepazy chata viahchao panô mihpa nata thawhpazy cha nie khai ha ei ta. Phiraoh cha a vaw hra ta. 5A mô heih ta, mâ sa heih ta: Sâh kô kha tawhta sâh suh pahlypa nata patapa suh sari kaw pua ei ta. 6Âmo hnôhlâ ta sâh suh sihpa nata nochhi thlih ta a chhei chahrie hapa suh sari kaw pua ei ta. 7Sâh suh sihpazy chata sâh suh patapa nata pahlypazy cha palâ khai ha ei ta. Phiraoh cha a vaw hra ta, a mâ vaw châ ta. 8#Dân 2.2My a vaw châ nahta, a palôh a nôpo kaw ta. Chyhsa tuah ta, Izi râh liata moliethaipa zydua nata chyhsa sopa zydua aw ta. Phiraoh ta a mâzy cha âmo chho ta, châhrasala Phiraoh a chhopasia theipa y tlâ veih ei.
9Cha nota, nyu hlâtuhpazy hyutuhpa ta Phiraoh hnohta, “Tanoh he ei tao chheipa ei vaw thei haw. 10Ei kha cha Phiraoh ta a chakaotuhpazy chô liata a hiehâh ta, kei nata viahchhâ taotuhpazy hyutuhpa cha vaituhpazy hyutuhpa o liata miah patâh ta. 11Kei nata ano cha, zâ zâ kha ta mâ sa khoh pi ta, eima mâ sapa deikua cha a chhopasiana a lyu leipa ta. 12Hebrai satlia pakha eima hnohta cha liata a tâh hra ta. Ano cha vaituhpazy hyutuhpa sei a châ. Eima mâzy cha ano chho pi ta, eima mâ yzie chyu hawhta miah chhopasia ta. 13Miah a chhopasiapa hawh tlai ta vaw tlô ta. Kei cha ei raihria liata padua heihpa châ na ta, ano cha paaosaopa a châ,” tah ta.
14Phiraoh ta Zawsi cha paawsa ta, patâhna o tawhta thlai a vaw chhi ei ta. A hmaohmi nata a kâhhmizy a ngyu ta, a chysia â patly khai tawhta, Phiraoh lâ a ngia ta. 15Phiraoh ta Zawsi hnohta, “Mâ sa na ta, a chhopasia theipa y veih ei. Nâ cha mâ na thei nahta, na chhopasia theipa kyh ama reipa ei vaw thei,” tah ta. 16Zawsi ta Phiraoh cha a chhy ta, “Cha cha keima liata y vei. Khazohpa ta Phiraoh hnohta palôtlâh a chhihpa achhyna tlao a pie aw,” tah ta. 17Phiraoh ta Zawsi hnohta, “Ei mâ lâta chavah kiah liata a duah na ta. 18Viahchao panô thawhpa nata mihpa pô sari chavah tawhta kaw pua ei ta, liaryh lohthi thih liata ama lao bâ ei ta. 19Chatawhcha viahchao panô hropa pô sari, chieh leipa nata a chhiepa nata a zaoh kariepa, cha tlu ta a chhiepa Izi râh liata ei hmô beih leipa cha, âmo hnôhlâ ta kaw pua ei ta. 20Viahchao panô zaoh kariepa nata chhiepazy chata viahchao panô thawhpa a kaw pua tuapa pô sarizy cha ama nie khai haw. 21Ama nie khai tawh chhao ta, viahchao panô mihpa nata thawhpazy ama nie khai hapa a hno vei. Hmialâ ta ama zaohpa hawhna khata ama zaoh karie thlâh ha chy. Chatanachata a vaw hra ha na ta.
22“Ei mâ lâta hmô heih na ta, sâh kô kha tawhta sâh suh pahlypa nata patapa suh sari kaw pua ta. 23Cha hnôhlâ ta sâh suh sihpa nata dipa, nochhi thlih ta a chhei chahrie hapa suh sari kaw pua ei ta. 24Sâh suh sihpazy chata sâh suh patapa suh saripazy cha ama palâ khai haw. Moliethaipazy chho ei na ta, châhrasala nâ chhopasia theipa y veih ei,” tah ta.
25Zawsi ta Phiraoh hnohta, “Phiraoh mâsapazy cha miakhapa a châ. Khazohpa ta a tao patoh awpazy Phiraoh a pahnosa. 26Viahchao panô phapa pô sarizy kha kô sari châ ei ta, sâh suh phapa suh sarizy kha kô sari ama châ hra. Mâzy cha miakhapa ama châ. 27Ama hnôhlâ ta viahchao panô chhiepa nata zaoh kariepa pô sari a kaw puapazy chhao kha, kô sari châ ei ta, sâh suh ruapa, nochhi thlih ta a chhei chahrie hapa suh sarizy chhao kha, kô sari chakâh nawpa a châ hra. 28Cha cha na a châ, Phiraoh hnohta ei reipa hawhna khata, Khazohpa ta a tao patoh awpa Phiraoh a pahnosa. 29Izi râh zydua liata kô sari chhôh kôvei thata a pha aw. 30Cha hnôhlâ ta kô sari chhôh chakâh mozoh vaw tlô aw ta, Izi râh kôvei phana zydua kha my khaipa a châ aw. Chakâhna ta râh a nie khai aw. 31Kôvei phana a vaw pazipa chakâh mozohna cha, a rarôh y ngaita awpa vâta, râh liata kôvei phana kha a thei khao aw veih ei. 32Phiraoh hnohta yzie a lyupa mâ ei no tlai piepa a châpa heta, Khazohpa ta a tao awpa liahsa pathlu ha ta, a tao patoh awpa a châzie a pa-i. 33Chavâta tahmâ he Phiraoh ta hmo a pahno thaipa nata chyhsa sopa tlua sala, Izi râh chô liata biehneituhpa ta rao mawh sy. 34Cha hmo cha Phiraoh ta tao sala, râh chô liata hyutuhpazy rao sala, kôvei phana kô sari chhôh ta, Izi râh kôveina zydua su pangawh liata su kha khei lymâ mawh sy. 35Âmo chata kô pha a vaw tlô awpazy liata niedo zydua cha pakhy ei sala, khihpizy liata nie awpa ta, Phiraoh biehneina ry liata sâh pahmaoh ei sala, vaih mawh ei sy. 36Chakâh mozohpa vâta râh a leidia lei nawpa ta, sâhzy cha Izi râh liata kô sari chhôh chakâh mozohpa a vaw tlô awpa daihti châta sopa a châ aw,” tah ta.
Zawsi Izi râh ryureituhpa
37Phiraoh nata a chakaotuhpazy ta Zawsi pahruana cha pha tah ei ta. 38Phiraoh ta a chakaotuhpazy hnohta, “He hawhta Khazohpa Thlahpa ta a ypâpa chyhsa he eima hmô thei aw mâ?” tah ta. 39Phiraoh ta Zawsi hnohta, “Khazohpa ta cha hmo zydua cha a cha pahnosapa châ ta, chavâta nâma tlu ta hmo a pahno thaipa nata a sopa rai y veih ei. 40#Hmt 7.10Ei o liata hyutuhpa ta y aw chi ta, na bie hawhta ei chyhsa zydua ama y khai aw. Beidyuchhai kyh lia deita ta nâma hlâta kei ei bei via aw,” tah ta. 41Phiraoh ta Zawsi hnohta, “Pachâ teh, Izi râh zydua chô liata biehneituhpa ta ei cha tao,” tah ta. 42#Dân 5.29Phiraoh ta a moh chahnaona kusadi a ku tawhta pahluh ta, Zawsi ku liata paky ta, lini chysia rônahpa ta tobi ta, a rao liata ngôh pachhih paao ta. 43A talailih mianona liata pakiasa ta, a hmia lâta, “Pakhu paneih teh u” tahpa ta awh lymâ ei ta. Cha hawhna chata Phiraoh ta Zawsi cha Izi râh zydua chô liata biehneituhpa ta a tao haw. 44Phiraoh ta Zawsi hnohta, “Kei he Phiraoh ei châ. Nâma bie leipa ta ahy hmah Izi râh chhôh zydua liata ama ku tlyma, ama phei tlyma, ama hy awpa châ vei,” tah ta. 45Phiraoh ta Zawsi cha a moh Zaphenâpania bi ta, Ôni khih theihthaipa Pawtipherâ sawchanônô Asenâ cha a lapinô ta pahneisa ta. Zawsi cha Izi râh chahryh ta.
46Zawsi cha Izi bei Phiraoh chakaona rai liata â ngia nota kô sythôhpa a châ. Zawsi cha Phiraoh hmiakô tawhta pua ta, Izi râh zydua chahryh ta. 47Kô pha kô, kô sari chhôh chhaohlei ta kôvei thata papua ta. 48Izi râh liata kô pha kô, kô sari chhôh zydua Zawsi ta sâh pahmaoh ta, sâhzy cha khihpizy liata sohpakhy ta. Cha hawhna chata a chheipâh lyu liata sâhzy cha khihpi to liata sohpakhy lymâ ta. 49Zawsi ta sâh cha a hluh thei chaipa ta, tilaipi liata sadi zie ta pahmaoh ta, a panua chhao panua khao veih ei. A hluh tu hapa vâta panua tiah awpa châ khao vei.
50Chakâhna a vaw tlô hlâta Zawsi ta sawchapaw pano sa ta, âmo cha Ôni theihthaipa Pawtipherâ sawchanô Asenâ ta Zawsi châta a sapazy ama châ. 51Zawsi ta, “Khazohpa ta ei rairuna zydua nata ei paw o eina pamysa haw,” tah ta, a sawchapaw uhtheipa moh cha Manase#41.51 “Manase” tahpa cha, “Pamysana” tahna a châ. a bi. 52“Khazohpa ta ei riethei taona râh liata ei chipathla a papôh haw,” tah ta, a panona moh cha Epharai#41.52 “Epharai” tahpa cha, “Thei patheisa” tahna a châ. a bi.
53Kô pha kô, kô sari Izi râh liata a tlôpa cha vaw chhâ ta. 54#Hmt 7.11Chakâh kô, kô sari cha, Zawsi ta a reipa hawh tlai ta, vaw tlô pathao ta. Râh to liata chakâhna tlô ta, Izi râh chhôh zydua liata deikua sâh y ta. 55#Zhn 2.5Izi râh zydua ta ama nodi ta, chyhsazy ta Phiraoh hnohta nie awpa hiah ei ta. Phiraoh ta Izi chyhsa zydua hnohta, “Zawsi lâ vawh u la, a cha chhopa maih tao muh vy,” tah ta. 56Khizaw zydua liata chakâhna vaw tlô ta, Izi râh liata chhao chakâh mozoh tlô ta. Zawsi ta sawvâ zydua pahy ta, Izi mo hnohta zuah lymâ ta. 57Khizaw zydua liata chakâh mozoh a tlôpa vâta, Zawsi tawhta sâh chalei awpa ta, râh to tawhta Izi râh lâ vaw pangai ei ta.
Selectat acum:
ÂTHAONA 41: MARVBSI
Evidențiere
Împărtășește
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.