ÂTHAONA 38
38
Zudâh nata Tâmâri
1Cha daihti liata, Zudâh cha a unawhzy tawhta zu ta, Adulâ chyhsa pakha a moh Hirâh o lâ kei tlei ta. 2Cha liata Zudâh ta Kâna chyhsa pakha, a moh Sua ama tahpa sawchanô hmô ta, ano cha lapinô ta hnei ta, a zialâh ta. 3Saw phaoh ta, sawchapaw sa ta, Zudâh ta a moh Erâ a bi. 4Saw phaoh heih ta, sawchapaw sa ta, a nô ta a moh Ônâ a bi. 5Sawchapaw sa heih ta, a nô ta a moh Selâh bi ta. Selâh a sa no he Zudâh cha Chezibâ khih liata a y no a châ.
6Zudâh ta a sawchapaw uhtheipa Erâ châta lapinô hiapa ta, a lapinô moh cha Tâmâri a châ. 7Zudâh sawchapaw uhtheipa Erâ cha Abeipa mohmô ta moleipa châ ta, chavâta Abeipa ta ano cha a thie haw. 8Zudâh ta Ônâ hnohta, “Na unawhpa lapinô a zialâh la, vahpa unawhpa tao awpa taopa la, na unawhpa châta chi pathlapa mah y,” tah ta. 9Châhrasala Ônâ ta chi a pathla awpa cha ano pathla châ aw vei tahpa a pahnopa vâta, a unawhpa lapinô â zialâhna maihta, a unawhpa châta chi a pathla lei nawpa ta, a baoti cha alei liata a patlasa ha tyh. 10A hmotaopa cha Abeipa mohmô liata molei ngaitapa châ ta, Abeipa ta ano chhao cha a thie ha hra. 11Zudâh ta a myuhnô Tâmâri hnohta, “Ei sawchapawpa Selâh a pitloh hlâlei cha, na paw o liata nôhmei ta y chy mah y,” tah ta. Selâh chhao a unawh hropazy hawhta a thi pathlei hra aw tahpa a chipa vâta a châ. Chatanachata Tâmâri cha a paw o lâ a di ha ta.
12Bohpi a châ tawhta, Zudâh lapinô, Sua sawchanô cha thi ta. Zudâh cha a mâchhiesapa a pai tawhta, Timnâ khih liata a mietaku hmi ngyutuhpazy lâ a viasapa Adulâ chyhsa Hirâh nata khy ei ta. 13Chyhsazy ta Tâmâri hnohta, “Na parâhpa cha a mietaku hmi ngyu awpa ta Timnâ khih lâ a khy aw,” tahpa chho ei ta. 14A nôhmei chysia pahluh ta, poh a khupa ta, a pahly ta, Timnâ lâpi liata a ypa Enai khih angiana chhikao liata a tyuh ta. Selâh pitloh ha ta, châhrasala ano cha a lapinô ta a pahneisa leipa vâta a châ. 15Zudâh ta ano cha a hmô nahta, a hmia â khu hapa vâta âzuahnô khiah ma tah ta. 16Lâpi kiah liata chanô lâ cha kei pangai ta, “A vy teh, ei châ ziakhei aw,” tah ta. A myuhnô kha a châ tahpa pahno leipa ta. Tâmâri ta, “Einâ ziakhei thei nawpa chi ta, khâpa eina pie aw chi?” tah ta. 17Zudâh ta, “Sahroh zaw hry tawhta mietaw ei cha vaw paphao aw,” tah ta. Tâmâri ta, “Cha cha eina vaw paphao hlâ chi ta sôhkâ châta khâpa chhâ tlyma eina pie aw chi ma?” tah ta. 18Zudâh ta, “Sôhkâ châta khâpa ei cha pie aw?” tah ta. Tâmâri ta, “Na moh chahnaona nata na chaori nata na ku liata nâ chabapa na chôchahrei kha sôhkâ châta ei cha lapa aw,” tah ta. Chazy cha pie ta, a ziakhei ta, Tâmâri cha Zudâh saw phaoh ha ta. 19Tâmâri cha thyu ta, sie ta, poh â khupa hlai ta, a nôhmei chysia a ky heih ta.
20Zudâh ta sôhkâ a sopazy chanô ku tawhta la awpa ta, a viasapa Adulâ chyhsa ku liata mietaw paphao ta. Châhrasala Adulâ ta chanô kha hmô khao leipa ta. 21Chanô yna su liata chyhsazy hnohta, “Enai khih lâpi kiah liata â zuah tyhpa kha khataih liata a y haw?” tah ta. Âmo ta, “He liata âzuahnô y veih ei,” tah ei ta. 22Zudâh lâ a lie ta, “Hmô thei va na, a su liata chyhsazy chhao ta, ‘Âzuahnô rai he liata y veih ei,’ ama tah,” tah ta. 23Zudâh ta, “Hnei palâh thlâh ha lah vâ. Chataleipatala ei maophyuh pathlei aw. Mietaw he paphao na ta, ano hmô thei tlôh leipa chi ta,” tah ta.
24Thla thôh rachhôh khai tawhta, chyhsazy ta Zudâh hnohta, “Na myuhnô Tâmâri kha sihryhpa ta y ta, cha dei châ vei, a sihryhna tawhta riasaw a phaoh haw,” tahpa ta chho ei ta. Zudâh ta, “A vaw chhi u la, raosaopa châ mawh sy,” tah ta. 25Amâ vaw chhi hai nota, Tâmâri ta a parâhpa lâ chyhsa tuah ta, “He hmozy a hneituhpa saw na ei phaoh. Ngiachhiepa ta he moh chahnaona, chaori nata chôchahrei zy he ahy eih ma a châ, pakhâta ta moh tua,” tahpa ta pachhosa ta. 26Zudâh ta cha hmozy cha a hmiasiah ta, “Ano cha kei hlâta a sia via, ei sawchapawpa Selâh ei pahneisa leipa vâta a châ,” tah ta. Cha khai tawhta, Zudâh ta Tâmâri cha a zialâh khao vei.
27Tâmâri cha saw â zeih daihti vaw tlô ta, a chhi liata maphieh y ei ta. 28Saw â zeih hai nota pakha ta a ku vaw papua ta, nawh paytuhpa ta, “He he a pua tua hih,” tah ta, a ku cha patu ta lari saihpa paky ta. 29Châhrasala a ku cha a dao heih ta, a unawhpa tlao vaw pua tua ta. Nawh paytuhpa ta, “Pua nawpa nâ vaw tao thaizie rimâ cha!” tah ta. Chavâta a moh Pereza#38.29 “Pereza” tahpa cha, “Papyu, apyupa” tahna a châ. a bi. 30Cha hnôhlâ ta a ku liata lari saihpa a kypa a unawhpa cha vaw pua ta, a moh Zerâ#38.30 “Zerâ” tahpa cha, “Khihpavâ khaihpa” tahna a châ. a bi.
Selectat acum:
ÂTHAONA 38: MARVBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.