ÂTHAONA 26
26
Kerâ nata Besebâ liata Aisika a pahrâ
1Abarahâ a hro nota chakâhna a tlô khai tawhna khata, râh liata chakâhna vaw tlô heih ta. Chavâta Aisika cha Philistinâ bei Abimele yna Kerâ khih lâ sie ta. 2Abeipa a hnohta a vaw luah ta, “Izi râh lâ zu leipa la, râh ei cha chho awpa liata y mah y. 3#Âtn 22.16-18He râh liata y chy la, na hnohta y aw na ta, byhnâ ei cha pie aw. He râh zydua he nâma nata na pathlazy ei cha pie aw ei. Na paw Abarahâ hnohta bie ei taihpa kha ei pa-i aw. 4Avâ liata awhsi zie ta na pathlazy papôhsa aw na ta, he râh zydua he na pathlazy pie aw ei na ta, na chipathla liata khizaw phopi zydua byhnâ topa ta ama y aw, 5Abarahâ ta ei ao thei ta, ei hnawpazy, ei biepiepazy, ei bieraopazy nata ei ryhpazy a zyhpa vâna khata,” tah ta.
Aisika nata Abimele
6Aisika cha Kerâ khih liata pahrâ ta. 7#Âtn 12.13; 20.2Cha khih chyhsazy ta a lapinô thâtih hiahri ei ta, “Ei sietanô na a châ” tah ta. A chhithai kawpa vâta, “A khih chyhsazy ta Rebekâ vâta eina thie pathlei aw ei na,” tah ta, “Ei lapinô na a châ,” a tah ngâh leipa a châ. 8Cha liata bohpi a y tawhta, Philistinâ bei Abimele cha opy tawhta mohmia pasaih ta, Aisika ta a lapinô Rebekâ â pangia palipa hmô ta. 9Abimele ta Aisika cha aw ta, “Pachâ teh, na lapinô a châpa kha! Khazia, ‘Ei sietanô na a châ’ na tah?” tah ta. Aisika ta a hnohta, “‘Ano vâta ei thi pathlei aw,’ tahpa ei pachâpa vâta a châ,” tah ta. 10Abimele ta, “Eima chô liata khâpa hmo ma na tao tly? A râh chyhsa pakha ta na lapinô he naosia kawpa ta a ziakhei thei ta, chatanachata eima chô liata thailei châna na patlôsa thei mâh tâh,” tah ta. 11Abimele ta, “Ahy rai he chyhsa tlyma, a lapinô tlyma a hriapa cha thie thlyu awpa a châ,” tahpa ta chyhsa zydua biepie ta.
12Aisika cha, cha râh liata chi cheih ta, Abeipa ta byhnâ pie ta, cha kô ta a lie za kha ta kô pavei ta. 13Aisika cha vaw hneirôh ta, chyhsa hneirôh ngaitapa a châna taihta hnei via lymâ ta. 14Mietaku zawzy, viahchao zawzy nata sei hluhpi hnei ta, Philistinâ mo ta ano cha ama uahva kaw. 15A paw Abarahâ a hro nota a paw chakaotuhpazy ta tikhaoh ama chaopa zydua Philistinâ mo ta naipa ta alei ta pabie khai ha ei ta. 16Abimele ta Aisika hnohta, “Keimo hlâta thatlô via syulyupa vaw châ ha chi ta, chavâta keimo tawhna heta sie ha mah y,” tah ta.
17Aisika cha, cha su tawhta pua ta, Kerâ saikao liata riehmo paryh ta, cha liata pahrâ ta. 18Aisika ta a paw Abarahâ a hro nota tikhaoh ama chaopa, Abarahâ a thi tawhta Philistinâ mo ta ama nai khai hapazy chao pathi heih ta, a paw ta moh a vaw bipa hawhta ama moh bi heih ta. 19Aisika chakaotuhpazy ta saikao liata tikhaoh chao ei ta, cha liata tihnawh a hneipa tikhaoh hmô ei ta. 20Kerâ liata sahroh vaituhpazy ta, “Ti he keimo eih a châ,” tahpa ta Aisika sahroh vaituhpazy cha a hryuh ei ta. Tikhaoh ama chhupa vâta, Aisika ta tikhaoh cha Eseka#26.20 “Eseka” tahpa cha, “Achhupa” tahna a châ. tahpa ta a moh a bi.
21Tikhaoh hropa chao heih ei ta, cha chhao cha chhu ha heih ei ta. Chavâta tikhaoh moh cha Sinâ#26.21 “Sinâ” tahpa cha, “Akhakhaina” tahna a châ. a bi. 22Aisika cha, cha su tawhta a pasie ta, tikhaoh hropa chao heih ta, cha deikua cha chhu khao veih ei. Chavâta “Tahmâ cha Abeipa ta su miah taopa ha ta, he râh liata thei hluhpi eima pathei ha aw,” tah ta, a moh Rehôbô#26.22 “Rehôbô” tahpa cha, khotalaina, su kawhpa, atyhpakhyna su tahnazy chakhi ta, reih thabypa liata a yzie cha ahripazy pahrâ khoh kawna tho miakha moh a châ. a bi. 23Cha tawhna chata Besebâ lâ sie ta. 24Cha zâ ta a hnohta Abeipa a vaw luah ta, “Kei he na paw Abarahâ Khazohpa ei châ. Chi khah y, ei cha ypâ lymâ aw. Byhnâ cha pie aw na ta, nâ chakaotuhpa Abarahâ zawhzi ta na pathlazy ei papôh aw,” tah ta. 25Chatanachata Aisika cha, cha liata maisâh tao ta, Abeipa moh pado ta. Aisika cha, cha liata poh o rai ta, a chakaotuhpazy ta tikhaoh chao ei ta.
Aisika nata Abimele azaona
26 #
Âtn 21.22
Abimele cha, a viasapa Ahusâ nata a pheisaih hyutuhpa Phikaw chhaota Kerâ tawhta Aisika yna lâ vawh ta. 27Aisika ta ama hnohta, “Khâpa vâta kei lâ â vypa ma nama châ? Nâ hao kaw ei chi ta, nâmo tawhta eina papua hapa ei chi kha châ ta,” tah ta. 28Âmo ta, “Abeipa na hnohta a y tahpa a siapa ta eima hmô haw. Chavâta eima likah liata, keimo nata nâma likah liata bietai y sala, na hnohta biehrai tao awpa eima khoh. 29Na pei cha hria leipa pi ta, hmo phapa dei leipa ta na chô liata khâpa hmah tao beih leipa pi ta, thlalôhpa ta eima cha pasiesapa hawhna khata, nâ chhao ta eima chhie nawpa na tao lei nawpa ta, na hnohta biehrai tao awpa eima khoh. Tahmâ cha Abeipa ta byhnâ a piepa na châ haw,” tah ei ta.
30Aisika ta âmo châta kyhchhi tao ta, niepa ta doh ei ta. 31Mydi ta thyu ei ta, bie a taih raihrie ei ta. Aisika ta âmo cha pasiesa ta, ano tawhta thlalôhpa ta pua ha ei ta. 32Cha noh lilaw ta Aisika chakaotuhpazy vaw tlô ei ta, ama tikhaoh chaopa thâtih chho ei ta, a hnohta, “Ti eima hmô haw,” tah ei ta. 33Aisika ta tikhaoh moh cha Sebâ#26.33 “Sebâ” cha “Bietai” tahna châ ta, “Be” (Beer) cha Tikhaoh tahna châ ta, “Besebâ” cha “Bietai Tikhaoh” tahna a châ. Tikhaoh Miasari tahna a châ hra. bi ta, chavâta khihpi moh chhao tanoh taihta Besebâ tahpa a châ. 34Esaw cha kô sypalih a châ nahta, Hiti chyhsa Beri sawchanô Zudi nata Hiti chyhsa Elôni sawchanô Bâsemâ zy lapinô ta hnei ta. 35Âmo cha Aisika nata Rebekâ châta palôh rietheina a tlôkheituhpazy ama châ.
Selectat acum:
ÂTHAONA 26: MARVBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.