ÂTHAONA 23
23
Sârâ thina
1Sârâ cha kô 127 hroh ta, cha cha Sârâ hro chhôh kôzy a châ. 2Sârâ cha Kâna râh Kiriathâbâ khih liata thi ta. Cha cha Hebraw a châ. Abarahâ cha Sârâ mâchhiesa awpa nata chakhei awpa ta sie ta. 3Abarahâ cha a lapinô ri hmiakô liata a duah ta, Hiti mo hnohta, 4#Heb 11.9,13; Hmt 7.16“Kei he nama hry liata khichhaipa nata chihropa châ na ta, ei lapinô ri he hmô khao lei awpa ta ei pabu thei nawpa ta, râh na pie teh u,” tah ta. 5Hiti mo ta Abarahâ cha a chhy ei ta, 6“Ei zibeipa y, miah nathlie teh. Nâ cha eima hry liata bei thatlôpa châ chi ta, eima thlâsu pha chaipa liata na lapinô ri cha pabu mah y. Nâma lapinô ri pabu nawpa ta eima hry liata ahy hmah eima thlâ a pasaih leipa y ma pi,” tah ei ta. 7Abarahâ cha thyu ta, cha râh liata phopi a ypa Hiti mo hmiakô liata a bôh ta. 8Ama hnohta, “Ei lapinô ri cha hmô khao lei awpa ta ei pabu awpa nama paryhsa khiahta la, ngiachhiepa ta 9Zôharâ sawchapawpa Epharaw hnohta, a lyu chao liata Mâkâpelâ lôpu a hneipa khu, nama mohmô lia tlai ta thlâ su châta a mâ dopa ta chalei awpa ta na hiapa teh u” tah ta.
10Cha nota Epharaw cha Hiti mo hry liata a tyuh thlâh ha hra ta. Hiti chyhsa Epharaw ta Hiti mo nata khihpi chhikao liata a ypa zydua theina liata Abarahâ hnohta, 11“Châ bao va, ei zibeipa, na nathlie tua. Lyu cha cha pie na ta, a chhôh liata lôpu a ypa chhao ei cha pie pâ. Ei chiheihzy mohmô lia tlai ta lyu cha ei cha pie. Na lapinô ri cha pabu mah y,” tah ta. 12Cha râh chyhsazy hmiakô liata Abarahâ cha a bôh ta. 13Cha râh chyhsazy theina lia tlai ta Epharaw hnohta, “Â ryh na tah khiahta la, ngiachhiepa ta na nathlie teh. Lyu mâ cha ei cha pie aw. Cha liata ei lapinô ri ei pabu thei nawpa ta, lyu mâ ei cha pie awpa cha a pyh mah y,” tah ta. 14Epharaw ta Abarahâ cha a chhy ta, 15“Ei zibeipa, na nathlie tua. Râh cha tâkâ sekel#23.15 “Sekel” cha Izarei tâkâ moh (shekel) châ ta, sekel tlaw kha cha gram 11.5 (kg miakha su hrawh su kha) tlu ta a hripa a châ. 400 mâpa châ ta, cha cha keima nata nâma likah liata rei khi chhao a tloh leipa a châ. Na lapinô ri cha pabu mah y,” tah ta. 16Abarahâ ta Epharaw reipa cha a pyh ta, cha daihti liata sôdaohpazy khopathliahna hmâpa ta, tâkâ sekel 400 Epharaw hnohta pie ta.
17Chatanachata Mamre nochhi lâta a ypa Mâkâpelâ liata Epharaw lyu cha, lyu chhôh liata lôpu a ypa nata lyu liata tho a ypa zydua nata lyuri chheipâh zydua liata tho a ypazy chhaota, 18Hiti mo mohmô nata khihpi chhikao liata a tyuhpa zydua mohmô ta, Abarahâ hnohta a ryuto châta piepa a châ. 19Cha khai tawhta, Abarahâ ta a lapinô Sârâ cha Kâna râh Mamre nochhi lâta a ypa Mâkâpelâ lyu liata lôpu liana chata pabu ha ta. Mâkâpelâ cha Hebraw a châ. 20Lyu nata a chhôh liata lôpu a ypa cha Hiti mo ta Abarahâ hnohta thlâ su nata ryuto châta hnei awpa ta ama pie haw.
Selectat acum:
ÂTHAONA 23: MARVBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.