ÂTHAONA 11
11
Babylaw O Sâhpa
1Khizaw liata chyhsa zydua ta reih miakha nata biereizie miakha a hly ei ta. 2Chyhsazy cha nochhi lâ pangaipa ta sie ei ta, Sinâ râh liata bypi hmô ei ta, cha liata pahrâ ei ta. 3“A vy teh u, leiraopazy#11.3 “Leiraopa” cha, o sa nawpa ta alei raopa, Mongyuh reih ta “Bricks” tah ei ta, Hindi reih ta “Itâ” ama tahpa he a châ. tao sih la, a pha kawpa ta rao ei suh u,” tahpa ta âmo nata âmo a chhohia ei ta. Alô vyuhpa ta leiraopa hmâh ei ta, bilâlei vyuhpa ta chiatlao a kiapa hmâh ei ta. 4Chatanachata, “A vy teh u, khihpi padua sih la, o sâhpa a laki avâ a daih awpa sa sih la, eima moh pathâhsa suh u. Chataleipatala alei chô zydua liata papaipa ta eima y pathlei aw na,” tah ei ta.
5 Abeipa cha chyhsa sawzy ta khihpi nata o sâhpa ama paduapa cha mo awpa ta zu ta. 6Abeipa ta, “Moh teh u, chyhsazy cha phopi miakha châ ei ta, ama zydua ta reih miakha a cheihpa ama châ hih. Cha cha tao amâ chhuahpa â thaona deita a châ. Cha hawhta a châ khiahta cha, tao amâ chhuahpa maih ama tao thei lei awpa y khao aw vei. 7A vy teh u, zu sih la, ama biereipa amâ pahno thei lei nawpa ta, ama reih panano khai ha suh u,” tah ta. 8Chavâta Abeipa ta âmo cha, cha su tawhta khizaw su to lâta papai ta, ama khihpi paduapa chhao cha ama bâhsai haw. 9Abeipa ta cha liata khizaw zydua reih a panano khai hapa vâta, cha khihpi moh cha Babylaw#11.9 “Babylaw” he “Baby” (Babel) tahpa châ hra ta, Hebrai reih ta Babel tahpa cha, panano, palâpalao tahna a châ. bipa a châ. Chatanachata Abeipa ta âmo cha, cha su tawhta alei chô zydua liata a papai khai ha ei.
Semâ Pathlazy
10Hezy he Semâ pathlazy ama châ: Semâ cha kô 100 uhtheipa a châ no, tipaua khai tawhta kô nona liata sawchapaw Apasâ sa ta. 11Apasâ a sa tawhta Semâ cha kô 500 hroh ta, sawchapaw nata sawchanô hropazy sa via ta.
12Apasâ cha kô 35 a châ nahta, sawchapaw Selâh sa ta. 13Selâh a sa tawhta Apasâ cha kô 403 hroh ta, sawchapaw nata sawchanô hropazy sa via ta.
14Selâh cha kô 30 a châ nahta, sawchapaw Ebe sa ta. 15Ebe a sa tawhta Selâh cha kô 403 hroh ta, sawchapaw nata sawchanô hropazy sa via ta. 16Ebe cha kô 34 a châ nahta, Pelekâ sa ta. 17Pelekâ a sa tawhta Ebe cha kô 403 hroh ta, sawchapaw nata sawchanô hropazy sa via ta. 18Pelekâ cha kô 30 a châ nahta, Reu sa ta. 19Reu a sa tawhta Pelekâ cha kô 209 hroh ta, sawchapaw nata sawchanô hropazy sa via ta.
20Reu cha kô 32 a châ nahta, Seru sa ta. 21Seru a sa tawhta Reu cha kô 207 hroh ta, sawchapaw nata sawchanô hropazy sa via ta. 22Seru cha kô 30 a châ nahta, Nâhaw sa ta. 23Nâhaw a sa tawhta Seru cha kô 200 hroh ta, sawchapaw nata sawchanô hropazy sa via ta.
24Nâhaw cha kô 29 a châ nahta, Terâ sa ta. 25Terâ a sa tawhta Nâhaw cha kô 119 hroh ta, sawchapaw nata sawchanô hropazy sa via ta.
Terâ pathlazy
26Terâ cha kô 70 a châ nahta, Abarâ, Nâhaw nata Harânâ zy sa ta. 27Hezy he Terâ pathlazy ama châ: Terâ ta Abarâ, Nâhaw nata Harânâ zy sa ta, Harânâ ta Lawta a sa. 28Harânâ cha a pina Kaldia râh Ur khihpi liata a paw Terâ hro chhôh ta thi ha ta.
29Abarâ#11.29 “Abarâ” tahpa cha “paw zachhihpa” tahna a châ. nata Nâhaw cha lapinô hnei ei ta. Abarâ lapinô moh cha Sârai châ ta, Nâhaw lapinô moh cha Harânâ sawchanô Milkâ a châ. Harânâ cha Milkâ nata Iskâ paw a châ. 30Sârai deikua cha choh ha ta, saw hnei vei.
31Terâ cha a sawchapawpa Abarâ, a samohpa Lawta, Harânâ sawchapawpa nata a myuhnô Sârai nata a sawchapawpa Abarâ lapinô zy a chhi ta, Kaldia râh Ur khihpi tawhta Kâna râh lâ sie awpa ta hmaohkha ta ama pua. Châhrasala Harânâ khihpi ama tlô nahta, cha liata pahrâ ei ta. 32Terâ cha kô 205 hroh ta, Harânâ khih liata thi ha ta.
Selectat acum:
ÂTHAONA 11: MARVBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India
© 2023, Used by permission. All rights reserved.