Lukas 23
23
Yeesus foer Pilatus
Mateus 27.1-2,11-14; Markus 15.1-5; Yohan 18.28-38a
1Klaych tëm noo is te kanse krup uf kextii un hot Yeesus pis Pilatus kenom. 2Tort, hon se aankefang em aankewe un saate:
— Meyer hon tee man aan ketrof unser folek am uf hetse, tëne am saan solte khee xtayer fer te khayser petsaale un saat weyer te Mesias, en Kheenich.
3Tan froot Pilatus fer Yeesus:
— Pist tuu te yute sayne kheenich?
Yesus anwort:
— Tas sin ayre wërter.
4Tan saat Pilatus fer ti xëfe fon te priister un fer tas folek:
— Ich fine khee uersach fer tee man se konteneere.
5Awer tii hon aankehal un hon wayter kesaat:
— Tee tuut unortnung aanrichte unich em folek iweraal in Yutëya. In Kalilëya hot er aankefang, un yets is er too pay uns.
Yeesus foer Herootes
6Wii Pilatos tas keheyert hot, hot eyer kefroot:
— Is tee man fon Kalilëya?
7Un wii eyer kewaar kep is tas Yeesus fon te rechioon woo Herootes te kowerneyer waar, too hot eyer en tort hiin kexikt, wayl Herootes waar in tëne taache aach kraat in Yeruusalëm. 8Herootes is iwer froo kep, wii eyer Yeesus kesiin hot, wayl tee wolt em xon en lang tsayt siin. Herootes hat xon fiil fom tëm keheyert kehat. Tee wolt kërn siin Yeesus en wuner mache. 9Tan hot er em fiil tings kefroot. Awer Yeesus hot tëm khee antwort kep. 10Ti xëfe fon te priister un ti Kesets mayster hon sich presenteyert un tii hon em mit xtarke wërter aan kep. 11Herootes un tëm sayn soltaate hon Yeesus ferxpot un sin xlecht mit em umkang. Hon Yeesus en fayne mantel aan ketuun un hon em tsurik pay Pilatos kexikt. 12Foerheyer waare Pilatos un Herootes faynte, awer an tëm taach hon se sich fereenicht.
Yeesus wërt tsum toot konteneyert
Mateus 27.15-26; Markus 15.6-15; Yohan 18.39—19.16
13Pilatos hot en fersamlung kemach mit te xëfe fon te priister un te yute sayn fiirer un tas kanse folek, 14un saat:
— Teyer hot mich tee man keprung un saat tee teet tas folek uf hetse. Awer ich hon em aus kefroot pay aych un hon khee uersach kefun fer tas tings woo teyer keeche tee saat. 15Herootes hot aach niks keeche tee kefun un tesweche hot eyer en tsurik fer uns kexikt. Soo, is es klaar tas tee niks kemach hot, fer te toot xtroof fertiine. 16Ich xike en ferpaytxe un noochter lose ich em loos keen.
17[An te Oostre Fest, hat Pilatus ti kewoonheet en kefangne fray keen lose, woo tas folek ferlange teet.] 18Awer, tan, hot tas kanse folek aankefang se xraaye:
— Mach tee man toot! Los Parapaas loos fer uns!
19Parapaas waar in ti katee khom wayl ëyer en rewolte aan kericht hat in te xtat, un aach wayl eyer yemant umkeprung hat.
20Too hot Pilatus noch mool mit te layt kexproch, wayl eyer Yeesus fray lose wolt. 21Awer ti hon wayter kexraayt:
— Pekrayts em! Pekrayts em!
22Un Pilatus saat fer es trite mool:
— Awer was fer telikt hot te man ketuun? Ich fine an tëm khee een uersach fer em umpringe. Tesweche tuun ich em xtroofe mit te paytxt un noochter lose ich en loos.
23Awer ti hon wayter kexraayt un hon ferlangt tas Yeesus solt pekraytst kewe. Tëne sayn xraayeray is aan keheyert kep. 24Pilatus hot Yeesus tsum toot konteneyert, wii se ferlangt hate. 25Un hot te man woo se wolte loos kelos - tee man woo in ti katee khom waar wayl eyer rewolte aan kericht hat un yemant umkeprung hat. Un hot tëne Yeesus ap kep tas se mit tëm mache khënte was se wolte.
Yeesus sayn pekraytsung
Mateus 27.32-44; Markus 15.21-32; Yohan 19.17-27
26Tan hon ti soltaate Yeesus mit kenom. Uf em weech, hon se en man woo fon Tsireene waar aanketrof woo Simon keheest hot, woo fom khamp am khome waar. Tii hon em kekrif, hon tëm man em Yeesus sayn krayts uf te pukel kelaat, un hon em ketswung wayter keen hinich Yeesus mit em krayts.
27En kroos folek waar Yeesus noo am keen. Waare phaar fraae tepay woo sich peklaacht hon un keprilt hon weche tëm. 28Yeesus hot sich noo tëne rom kewënt un saat:
— Fraa layt fon Yeerusalëm, prilt net weche mich, awer prilt weche aych selepst un weche ayre khiner! 29Wayl khome ti taache woo se al saan: “Kliklich sin ti fraae woo nii khiner kriit hon, woo nii en khint uf ti welt keprung hon un nii se trinke kep hon”. 30Khomt ti tsayt woo se al fer ti përiche saan: “Falt uf uns!” Un saat aach fer ti hiwle: “Tekt uns tsuu!” 31Wayl, wën tas ales kemach kept wën tas hols kriin is, was wil tan paseere wën tas hols troke is?
32Hon ach tswaay pantite mit kenom fer toot kemach kewe mit Yeesus. 33Wii se an tas plats khom sin, woo Kalwaario kenënt waar, too hon se Yeesus pekraytst un mit tëm ti tswaay pantite, ëne uf sayn rechts sayt un anere uf sayn links sayt.
34[Tan saat Yeesus:
— Fater, unxulticht ti layt! Tii wise net was se am mache sin.]
Klaych tëm noo, hon tii soltaate em Yeesus sayn tsaych aus kexpiilt un unich sich ferteelt. 35Tas folek is too keplip am kuke, un ti xëfe fon te yute hon Yeesus ferxpot, am saan:
— Eyer hot ti anere keret. Tee sol sich yets selwer rete, wën er te Mesias is woo Hërkot raus kesuucht hot.
36Ti soltaate hon Yeesus aach ferxpot. Sin ticht pay em kang un hon xlechte wayn aan kepot, 37un saate:
— Wëns tuu te kheenich fon te yute pist, ret tich selepst!
38Am krayts, iwer sayne khop, waare tii wërter kexrip: “Yeesus Nasareenus, Kheenich fon te Yute.”
39Eene fon te pantite woo aach pekraytst waar, hot Yeesus ferxënt, am saan:
— Pist tuu net te Mesias? Tan ret tich selepst un uns aach!
40Awer, te anere hot em kexteyert, am saan:
— Klaapst tuu net an Kot? Meyer sin al unich em selwiche xtroof. Unsere xtroof is kerecht. 41Wayl meyer hon tee xtroof fertiint; awer tee hot niks ferkheyertes kemach.
42Tan saat eyer:
— Yeesus, tënk an mich wën tuu in tayne Raych khomst!
43Yeesus antwort:
— Ich saan sicher fer tich tas tas woer is: hayt noch wërst tuu mit mich im paratiis sin.
Yeesus sayne toot
Mateus 27.45-56; Markus 15.33-41; Yohan 19.28-30
44Es waar unkefeyer mitach, wii ti sun uf keheyert hot se xayne un en tunkelheet ti eyert tsuu ketekt hot pis mitachs, tray uer. 45Un te foerhang fom Thëmpel is in te mite torich keris. 46Tan hot Yeesus in hat xtim kexraayt:
— Fater, in tayn hënt kewe ich mayne kayst ap!
Wii eyer tas kesaat hat, is eyer kextorep. 47Wii te reemixe ofitsier kesiin hot was paseyert waar, hot eyer Kot keloopt am saan:
— Tee man waar wërklich unxultich.
48Ti kanse layt, woo sich kesamelt hate fer tas sich tsuu kuke, wii se kesiin hon was paseyert waar, sin se hëm kang un hon sich uf ti prust keklopt, als sinaal fon traurichkheet. 49Yeesus sayn kanse froynte un ti fraae woo em noo kang sin fon Kalilëya aan, hon sich tas ales fon waytem aan kekukt.
Yeesus sayn pekreepnis
Mateus 27.57-61; Markus 15.42-47; Yohan 19.38-42
50-51Waar en man woo Yoosef keheest hot, fon te xtat Arimatëya, in te rechioon fon Yutëya. Tee waar en kuute un kerechte man un waar te Hërkots Raych am waate. Waar mitkliiter fom Yute Raat, awer hot net tsuu kextimt mit was te Konseel ap kextimt hat un mit was se kemach hate. 52Yoosef is pis Pilatos kang un hot Yeesus sayne khërwer ferlangt. 53Tan hot eyer em fom krayts ap kemach un hot em in en layn tuuch in kewikelt. Nocheyer hot eyer em in en kraap ketuun woo an en fels aus kehoolt waar un woo nii foerheyer penutst kep waar. 54Tas ales is paseyert am fraytach. Te samstach waar ticht.
55Ti fraae, woo mit Yeesus khom waare fon Kalilëya sin mit Yoosef kang un hon tas kraap kesiin un wii te khërwer tort hiin ketuun kep waar. 56Too sin se hëm kang un hon parfum un eel prepariert fer tëm an te khërwer se xmeere.
Un am samstach hon se keruut, wii ti Kesets pexraypt.
Selectat acum:
Lukas 23: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
