Lukas 21
21
Ti opfer fon en aarem witfraa
Markus 12.41-44
1Yeesus waar uf em hoof fom Thëmpel, am kuke was am paseere waar, un siit ti rayche kelt in te opfer khaste tuun. 2Hot aach en aarem witfraa kesiin, woo tswaay kleene nikle woo weenich kekilt hon rin ketuun hot. 3Tan saat er:
— Ich fersichere aych tas tii aarem witfraa mee kep hot als ti anere al. 4Wayl ti anere hon kep fon was iwerich waar. Awer tii, woo soo aarem is, hot ales kep was se hat fer se leewe.
Yeesus xprecht iwich ti fernichtung fom Thëmpel
Mateus 24.1-2; Markus 13.1-2
5Phaar layt waare am xpreche wii te Thëmpel ferputst waar mit xeene xteen un mit tëm tings woo keopfert kep waar. Tan saat Yeesus:
6— Khomt te taach woo tas ales was teyer siit pis in te pootem fernicht kept. Un playpt khee xteen uf em anere woo net niter khomt.
Persekusioone un layte
Mateus 24.3-14; Markus 13.3-13
7Too, hon se kefroot:
— Mayster, wan sol tas paseere? Was fer sinaal kept tas fer se tsayche wan tas paseere sol?
8Yeesus antwort:
— Past uf tas nimant aych hinerkeet. Wayl fiil wëre khome un mache wii wëns ich weyer, am saan: “Ich sin te Mesias” ore “Ti tsayt is xon khom”. Awer, keet tëne layt net noo. 9Khee pang hon wën teyer xpreche heyert iwich kriiche un rewolutsioone. Wayl is neetich tas tas tings eyerxt paseyert. Awer tas wil noch net saan tas te ën ticht is.
10Un Yeesus saat wayter:
— Een natsioon kriicht keeche ti aner, un een lant tuut tas anere iwerfale. 11Uf fiile plets kept es kroose eyert xutre, es ese khomt ans feele un epitemiis wëre foer khome. Xreklich tings wërt paseere, un kroose sinaale wëre am himel kesiin.
12— Awer, eep tas ales peseyert, wërt teyer inkexpërt un keyacht. Teyer wërt ap kep fer julkeyert se kewe in te sinakooke un tëm noo kept teyer in ti katee kexmis. Wayl teyer mayn aanhënger sayt, wërt teyer foer ti kheeniche un foer ti kowerneyer kenom fer julkeyert se kewe. 13Un tas kept aych oportuniteet fer te ewankeelium aan saan. 14Resolweyert yets klaych xon tas teyer aych net khimere tuut, eep ti xtun khomt, was teyer saan solt fer aych se tefenteere. 15Wayl ich kewe aych wërter un wisheet tas ayre faynte net aus hale khëne un net ap saan khëne. 16Ayre aychne eltre, kexwister, ferwante un froynte wëre aych ap kewe fer ti autoriteet, un phaar fon aych kewe toot kemach. 17Al tuun aych hase wayl teyer mayn aanhënger sayt. 18Awer net mool en hoer faatem fon aych wërt ferloer keen. 19Playpt fest im klaawe, wayl soo kept teyer keret.
Yeesus xprecht iwich ti fernichtung fon Yeruusalëm
Mateus 24.15-28; Markus 13.14-23
20Yeesus saat noch:
— Wën teyer ti xtat fon Yeruusalëm siit umkekrayst fon militeere, wërt teyer kewaar tas se klaych fernicht kept. 21Tan, tii woo in te rechioon fon Yutëya sin sole aus rayse, uf tas përiche lant. Weyer in te xtat is sol klaych raus keen. Weyer uf em khamp is sol net in ti xtat rin keen. 22Wayl tii taache sin ti “Xtroof Taache”, un in tëne taache paseyert ales was ti Hayliche Xrifte saan. 23Ay fon te fraae woo khiner am waarte sin un fon te motre woo noch se trinke am kewe sin in tëne taache! Wayl khomt iwich ti eyert en kroos laytung, un falt iwich tii mënxe en xrekliche Hërkots xtroof. 24Fiil kewe toot kemach torich ti xwaart, anere kewe als kefangne noo ale natsioone fon te welt kexikt. Un tii woo khee yute sin wëre Yeruusalëm iwerfale, pis ti tsayt rom keet fer tas se mache.
Wan te Soon fom Man khomt
Mateus 24.29-31; Markus 13.24-27
25Un Yeesus saat wayter:
— Es kept sinaale an te sun, am moont un an te xtërne. Un, uf te eyert, ale natsioone kewe hofnungs loos, fol mit pang fom xrekliche ratau fom meer un fon te wele. 26Uf te kans welt tuun fiile layt samer fale fon xreke wën se tënke an was paseere khan, wayl ti macht fom himel kept aan kexitelt. 27Tan khomt te Soon fom Man runer, uf en wolek, mit macht un kroos kloor. 28Wën tas tings aanfangt se paseere, playpt fest im klaawe un mit ayre khop kehoop, wayl klaych kept teyer keret.
Ti paraapel fom fayche xtok
Mateus 24.32-35; Markus 13.28-31
29Klaych tëm noo hot Yeesus tii ferklaychung kemach:
— Kukt te payxpiil fom fayche xtok aan ore ti anere peem. 30Wën teyer siit tas ti pleter aanfange ausxlaan, wist teyer tas te sumer am khome is. 31Soo aach, wën teyer tas tings paseere siit, tan wist teyer tas te Hërkots Raych am aan khome is. 32Ich fersichere aych tas tas woer is: tas tings wil paseere eep al tii woo yets leewent sin xtërwe. 33Te himel un ti eyert wëre ferxwine, awer mayn wërter playwe fer imer.
Ti neetichkheet fer wache
34Un Yeesus macht xlus, am saan:
— Playpt am wache! Lost net tas ti feste, ore tas trinke, ore ti propleeme fon tëm leewe aych soo fol soriche lose tas tee taach aych unferhoft fange tuut, 35wii wëns en fal weyer. Wayl tee taach falt pletslich iwer yeete mënx uf te kans welt. 36Soo, playpt am wache un peet imer, tas teyer ausrayse khënt fon tëm tings woo paseere tuut un tas teyer uf xteen khënt foer em Soon fom Man, wën tee khome tuut.
37Yeete taach hot Yeesus uf em hoof fom Thëmpel keuntericht. Awer nachts is eyer imer pis an te Oliiwe Përich kang un is oft too keplip pis moynts. 38Un tas kanse folek is foer taach xon pis an te thëmpel kang fer em aan se heere.
Selectat acum:
Lukas 21: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
