ဒေါ ဂုဝ် 4
4
လွင် အာကန့် ဂါယ် အာဘဲ
1အာဒါမ် တွိုန် ဟဲ့ လာယ် နာင် အေဝါ အီ မုး အီဘိုန့် အန်။ နာင် အေဝါ ဘော ဒဲ ဘာဒိက် ဆန်ထေ။ ဟဲ့ ဟွတ့် အန် မိုဝ်း ဂွန်။ ဂွန် တီ အန် တဲး အန် စိူဝ် အာကန့်။ အန် မိူဝ် တဝ်း၊ “အုဝ် ဟဲ့ ပွိုန် ဂွန် အီမာယ် ပီ ဒွါ ဇဝ်ဖြာ။”#4:1 ‘ဟဲ့ ပွိုန်’ ခဲင် ဂြုဝ်း ဟဲဘြဲ၊ န့ ပီ ဂေ တဝ်း ‘အာကန့်’ 2ဝါယ် အန် တီ အန် ဝီ မိုဝ်း ဂွန် ပေါ အူ ဝီ၊ အန် တဲး န့ စိူဝ် အာဘဲ။
ဂါယ် ဘော တာင်၊ အာဘဲ ဟဲ့ ဘဲန် ဒါ အီ ဟျီင် မာဘူ၊ အာကန့် ယီ ဘူင် နာ၊ ဘူင် မာန်။ 3ဝါယ် အန် တီ အာဝ် လှေန့်၊ အာကန့် တွိုန် ဒိုဝ်း ပီ ဆမ် ပီ ပိတ် အန်၊ လှူ ဒီ ဇဝ်ဖြာ။ 4အာဘဲ တွိုန် ယီ ဒိုဝ်း မာဘူ အူ ဒုဝ် အီ မုး ဂွန် ဂိန့်။ အန် ဝီ လှူ ဘျြီင် ဂွန် မာဘူ တီ။ ဇဝ်ဖြာ မိူဝ် အိုင် အာဘဲ ဘော ပီ လှူ အန်။ 5န့ ယီ မုး အာကန့် ဂါယ် ပီ လှူ အန်၊ ဇဝ်ဖြာ တူ အိုင်။ ဒေါ အန် တီ အာကန့် ဘော ရူ ကာဆဝ်။ နာ အန် အာဝ် ဟူ ဒါခိုယ်။
6ဇဝ်ဖြာ ယီ ကာလာင် ဂြုဝ်း ဒီ အာကန့်။ အန် တဝ်း “မှဝ် န့ ပါယ် ပီ ရူ မဲ ပါယ် တီ။း မှဝ် န့ ပါယ် နာ မဲ အာဝ် ဒါခိုယ်။း 7ဆေ မဲ ဘူင် နာ မှာန်၊ နဝ်း မဲ ဒီ ဘော ဒါခိုယ်။ ဆေ မဲ ယီ ဘူင် အီ တူ မှာန်၊ မှာပ် ဆီ လိုပ် ခဲင် နဝ်း မဲ။ န့ ဘော ဆီ အိုပ် နဝ်း မဲ။ မဲ ယီ လုဝ် ပဲ မှာပ် တီ၊ ကွဲ့ တဲး အန် အိုပ် မဲ။”
8အာကန့် ယီ ကဝ် ဝါ အန်၊ အီ စိူဝ် အာဘဲ။ တဲး ဂါယ် ဟာဝ် ခဲင် နာ။ ဒေါ ဇမ် ဂါယ် ခဲင် နာ၊ အန် ဘော ထိတ့် ဝါ အန်၊ တဲး ဝါ အန် ကော ငဝ်း ယမ်။
9ဟဲ့ ဟွတ့် ပန် တီ ဇဝ်ဖြာ ဝီ ဒီမွှတ် အာကန့် တဝ်း၊ “မှဝ် ဝါ မဲ၊ အီ စိူဝ် အာဘဲ။း”
အန် ဝျီ့ ဂြုဝ်း တီ တဝ်း၊ “အုဝ် တူ နပ်၊ အုဝ် တူ မုး အီ ရတ့် ဝါ အုဝ်။” 10ဇဝ်ဖြာ ယီ တဝ်း၊ “မဲ ဟဲ့ ဘူင် မာဆေ။း န့ ပီ၊ နှာမ် ဝါ မဲ အီ ကွယ် ဒဲင် ကာဒါယ်၊ ဟဲ့ ဒဲ့ အုဝ် ဇဝ်ဖြာ။
11ဒေါ တီ နီ၊ အုဝ် ဒီ ဒိူင် မဲ။ မဲ အာဝ် ဟူ ပွိုန် ဘူင် နာ၊ ဘူင် မာန်။ ကာဒါယ် တီ ဟဲ့ ဟွတ့် ဟူမ် နှာမ် ဝါ မဲ ပီ ငဝ်း ဝဲန် မဲ။ 12ဒဲင် ကာဒါယ် တီ၊ အာဝ် ဟူ လတ့် မာဆေ။ န့ တူ တဲး မဲ မိုဝ်း ပီ ဒီ ဟူမ်။ မဲ ဒီ ဘော ဝိန် ဒီ လဲ၊ လုဝ် ကာထုဝ့် ဟာဝ် ဆေဆေ။ အာဝ် ပွိုန် ကွယ် အူ ပ့လုဝ့်။”
13ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာကန့် ဝီ တဝ်း၊ “မဲ ဇဝ်ဖြာ ဟဲ့ ဒမ် မှာပ် အုဝ်၊ ဟဲ့ ကိူန် ကာဆဝ်။ အုဝ် အာဝ် ဟူ ပဲ ဒီ ခမ်။ 14အာတိုဝ် မဲ ဇဝ်ဖြာ ဟဲ့ ဟုဝ် အုဝ် လေး ခဲင် ကာဒါယ် ဒူင် ကွယ် အုဝ်။ အုဝ် ဘော လုဝ် ချြီင် ဒုဝ် အုဝ်၊ အာဝ် ဟူ ပွိုန် ကွယ် အူ ပ့လုဝ့်။ ဆေ အုဝ် ဘော လုဝ် ဟာဝ် ဘဲန် ပ့လုဝ့် ဘဲန် ပ့လုဝ့်၊ န့ ဒီ မိုဝ်း ဂေ အီ ယိုဝ် အုဝ်၊ ဂေ ဒွန် အီ ဒီ ဘော ဆီ ငဝ်း ယမ် အုဝ်။”
15ပန် တီ ဇဝ်ဖြာ ဝီ တဝ်း ဒီ အန်။ “အာဆေ ငဝ်း ယမ် မဲ အာကန့်၊ အုဝ် ဒီ ဒမ် မှာပ် ဒီ အန် ဘူ တုဝ့်။” အန် ဇဝ် မိူဝ် ဒဲမ် မှာယ် အုန် ဒီ ကာတဝ်း အာကန့် တွိုန်၊ ကွဲ့ တဲး ဂေ အီ ယိုဝ် အန် ပွိုန် ဒီ ငဝ်း ဝဲန် အန်။ 16ဝါယ် အန် တီ အာကန့် လေး တ ဒူင် ကာလာင် ဇဝ်ဖြာ ဒီ အန်။ အန် ဟာဝ် ကွယ် ခဲင် မိူင် နူတ်။ မိူင် နူတ် တီ၊ န့ ကွယ် နာ လေး ဆီငဲ မိူင် အေဒေန်။
17အာကန့် တွိုန် မိူဝ် လာယ် အီဘိုန့် အန်။ ဟဲ့ ဟွတ့်၊ အီဘိုန့် အန် ဝီ ဒဲ ဘာဒိက် ဆန်ထေ။ ဂွန် အန်၊ အန် တဲး အန် စိူဝ် အာဟေန်။ အာဟေန် တွိုန် ဘဲန် ဒါ အီ ဒဲ မိူင် ကာမာယ်။ မိူင် တီ အာကန့် တဲး န့ စိူဝ် ပီ ဂွန် အန် အာဟေန် တွိုန်။ 18အာဟေန် တွိုန် ဝီ မိုဝ်း ဂွန် အီ စိူဝ် အာအီရာတ်။ ဂွန် အာအီရာတ် ဝီ စိူဝ် အာမေဟူဇာအေန်။ ဂွန် အာမေဟူဇာအေန် ဝီ စိူဝ် အာမေထူဆာတ်။ အာမေထူဆာတ် ဝီ မိုဝ်း ဂွန် အီ စိူဝ် အာလာမ်။
19အာလာမ် တွိုန် ယီ မိုဝ်း အီဘိုန့် အာ ဝီ။ အူ ဝီ အန် စိူဝ် နာင် အေဒါ။ ပေါ အူ ဝီ အန် စိူဝ် နာင် ဇီလာ။ 20နာင် အေဒါ တွိုန် မိုဝ်း ဂွန်၊ အီ စိူဝ် အာဇာပ်။ အာဇာပ် ဝီ ဘဲန် ဂုန့် ဒင် ဂေ ဒူအီ အီ ကွယ် ခဲင် ထိုပ် ဘိက်။ ဂေ ကွယ် ရိုမ် ဒူပ် ဖိုင် ဒုဝ် ဆတ်ဒါဝါ ဂေ။ 21ဝါ အာဇာပ် စိူဝ် အာဇုပ်။ အန် ဟဲ့ ဘဲန် ဂုန့် ဒင် ဂေ ဒူအီ အီ နပ် ဒီ ဘး ဒိင် ဘော ဘုတ် ဝဝ်။ 22ဘော နာင် ဇီလာ တွိုန် ဝီ မိုဝ်း ဂွန်။ အန် စိူဝ် အာထူဘာကန့်။ အန် ဟဲ့ ဘဲန် ဂုန့် ဂေ ဒူအီ အီ စိုမ် ဟိန်။ ဝါ အီဘိုန့် အန် စိူဝ် နာင် နာမာ။
23ဒါ အာလာမ် တွိုန် ဝီ ကာလာင် ဒီ အီဘိုန့် အန် တဝ်း၊ “ဘာယ် နာင် အေဒါ ဘော နာင် ဇီလာ၊ တဲး ဘာယ် ထူမ် ဂြုဝ်း အုဝ်။ ဘာယ် အီဘိုန့် အုဝ်၊ တဲး ဘာယ် ထူမ် ပီ တဝ်း အုဝ်။ အုဝ် ဟဲ့ ငဝ်း ဒါ အူ ဝီ ဒေါ ဘူင် အန် တဲး အုဝ် မိုဝ်း ဒိမ်။ အုဝ် ဟဲ့ ငဝ်း ယမ် ဂွန် အီမာယ် အူ ဝီ ဒေါ ဟဲ့ မး အန် ဒီ အုဝ်။
24အာဆေ ဘူင် နာ တူ မွှိုမ် ဒီ အာကန့် တွိုန်၊ အန် လုဝ် ခမ် မှာပ် အန် ဘူ တုဝ့်။ အာဆေ ယီ ဘူင် နာ တူ မွှိုမ် ဒီ အုဝ် အာလာမ်၊ အန် ဒီ လုဝ် ခမ် မှာပ် အန် ဘူ ဂိုဝ် ဒီ ဘူ တုဝ့်။”
25ဝါယ် အန် တီ၊ အာဒါမ် တွိုန် ဝီ လာယ် အီဘိုန့် အန်။ အန် ဝီ မိုဝ်း ဂွန် ပေါ အူ ဝီ အီ စိူဝ် အာဆေတ်။ အာဒါမ် တဲး အန် စိူဝ် ပါယ် တီ ခုဝ်၊ ဇဝ်ဖြာ ဟဲ့ ဒွါ ဂွန် တီ ဒါင် အာဘဲ တွိုန်၊ ဝီ ပီ ငဝ်း ဝဲန် အာကန့် တွိုန်။#4:25 ‘ဟဲ့ ဒွါ’ ခဲင် ဂြုဝ်း ဟဲဘြဲ၊ လွင် ဒါင် အန် မုး ‘အာဆေတ်’ 26အာဆေတ် တွိုန် ဝီ မိုဝ်း ဂွန် အီ စိူဝ် အာအေန်။
ဆိန့် ဒေါ အန် တီ ဂေ ဒူအီ အီ ကွယ် ဒဲင် ကာဒါယ် နီ၊ ဂေ ဝီ စုး ဒီ ကြိုပ် ဇဝ်ဖြာ။
Selectat acum:
ဒေါ ဂုဝ် 4: pce
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023, Wycliffe Bible Translators, Inc. All rights reserved.