ဒေါ ဂုဝ် 3
3
လွင် ဒူအီ ကာစုး ဒီ ဘူင် မှာပ်
1ခဲ့ မိုဝ်း ဂေ ဒုဝ် ဆတ်ဒါဝါ ပဲ့ ဟဲ့ ဘူင် ဇဝ်ဖြာ၊ န့ မိူဝ် မိုဝ်း မာဟန့်၊ အန် လွှက့် လွှိုမ် ဒုဝ် ဟဝ် ဒွန် မျုဝ်။ မာဟန့် တီ ဝီ တး ဒူင် ကွယ် အီဘိုန့်၊ ကာလာင် ဂြုဝ်း ဒီ အီဘိုန့်။ အန် ဒီမွှတ် တဝ်း၊ “ဟဲ့ မှာန်၊ ဇဝ်ဖြာ တူ တဲး ဘာယ် ဟူမ် ဘ့လေ ဟေ ဒွန် မျုဝ် ခဲင် ကာပိုမ် နီ။း”
2အီဘိုန့် ဝီ တဝ်း၊ “ဇဝ်ဖြာ ဟဲ့ တဲး ယာယ် ဟူမ် ဘ့လေ ဒွန် မျုဝ်။ 3ယီ မိုဝ်း ဟေ အူ ကာဒင် ဒီ ကာတဲ ကာပိုမ် တီ။ အန် ဇဝ် ဟဲ့ တဝ်း၊ ‘ဘာယ် ကွဲ့ ဟူမ် ဘ့လေ တီ၊ ဘာယ် မိူဝ် ကွဲ့ ပါ၊ ယုဝ် ဘာယ် ယမ်။’”
4မာဟန့် တွိုန် ဝီ တဝ်း၊ “အာဝ် မုး ပါယ် တီ။ ဘာယ် တူ လုဝ် ယမ်။ 5ဇဝ်ဖြာ ဟဲ့ နပ်၊ ဆေ ဘာယ် ဟူမ် ဘ့လေ တီ၊ န့ ဒီ လိုဝ်း ဒီ ဘာယ်။ ဘာယ် ဒီ ဘော ဘဲန် ပီ အန် ဇဝ်။ ပါယ် တီ ဘာယ် ဒီ ဘော နပ် အီ မွှိုမ်၊ အီ တူ မွှိုမ်။”
6ပန် တီ အီဘိုန့် ဘော ယွတ်၊ အန် မိူဝ် ယိုဝ် ဘ့လေ တီ ဟဲ့ စှိတ်၊ ဟဲ့ မွှိုမ် ဟူမ် ဘော တဲး အန် ကော နပ် တူတ့် ဒွန် မျုဝ်။ အန် မိူဝ် ဒိုဝ်း ဟူမ် ဘ့လေ တီ။ အန် ဟဲ့ ဟွတ့် ဟူမ်၊ အန် ဝီ ဒွါ ဘော အီမာယ် အန် ဟူမ်။ 7ဂါယ် အာ ဝီ ဟဲ့ ဟွတ့် ဟူမ် ဘ့လေ တီ၊ န့ ဘော လိုဝ်း ဒီ ဂါယ် အူ ဇေန့်။ ဂါယ် ဘော နပ်၊ ဂါယ် ဟဲ့ ဂ့လ။ န့ မိူဝ် မိုဝ်း ဟေ ဒီပူ။ ဂါယ် ဒိုဝ်း လှာ ဟေ တီ၊ စိန့် တဲး န့ ကာဒး ဒုဝ် ဂါယ်။
8ဘော ဇမ် ဝါယ် ဟူမ်၊ ဇဝ်ဖြာ မိူဝ် ဟာဝ် ဝိန် ဒီ လဲ ခဲင် ကာပိုမ်။ ဂါယ် အီမာယ် အီဘိုန့် တွိုန် ယီ ယိုဝ် ဂြန့် အန် ဇဝ် တီ၊ ဂါယ် အာ ဝီ ဝီ ချြီင် ဒုဝ် ဂါယ် ခဲင် နင် ဟေ ခဲင် ကာပိုမ် တွိုန်၊ ကွဲ့ တဲး ဇဝ်ဖြာ ယိုဝ် ဂါယ်။ 9ဇဝ်ဖြာ ယီ ဒဲ့ ဂါယ်။ အန် တဝ်း၊ “အိုယ်၊ မှဝ် ဘာယ် ကွယ်။း”
10ဒူအီ တွိုန် ဝီ ယဝ်း တဝ်း၊ “ဒေါ ယိုဝ် အုဝ် ဂြန့် မဲ ဇဝ် ခဲင် ကာပိုမ်၊ အုဝ် ဘော ယုဝ်။ ခုဝ်၊ အုဝ် ဟဲ့ ဂ့လ။ အုဝ် ဘော ဟာဝ် ချြီင် အုဝ်။”
11ဇဝ်ဖြာ ဝီ ဒီမွှတ် တဝ်း၊ “အာဆေ ဟဲ့ တဝ်း၊ မဲ ဟဲ့ ဂ့လ။း မဲ ဟဲ့ ဟူမ် ဘ့လေ ပီ တဝ်း အုဝ်၊ ကွဲ့ ဟူမ်။း”
12ပန် တီ ဒူအီ တွိုန် ဝီ တဝ်း၊ “အီဘိုန့် ပီ ဒွါ မဲ ဒီ အုဝ် တဲး အန် ဘဲန် အီ စွယ် အုဝ်၊ အန် ဟဲ့ ဒွါ အုဝ် ဟူမ်။ အုဝ် ဘော ဟူမ်။”
13ဇဝ်ဖြာ ဝီ တဝ်း ဒီ အီဘိုန့်၊ “မာဆေ ပီ ဘူင် မဲ။း” အီဘိုန့် ဝီ တဝ်း၊ “ဟန့် ဟဲ့ ကာလုဝ် အုဝ်၊ ဟဲ့ ဟွတ့် အုဝ် ဘော ဟူမ်။”
14ဝါယ် အန် တီ ဇဝ်ဖြာ ဝီ ကာလာင် ဒီ မာဟန့်။ အန် တဝ်း၊
“ကူပ် ဘူင် မဲ ပါယ် တီ အုဝ် ဒိူင် မဲ ဟန့် ဒေါ တီ နီ။ ခဲ့ ကွယ် ဂေ ဒုဝ် ဆတ်ဒါဝါ ဒဲင် ကာဒါယ်၊ မဲ ဟန့် အူ မျုဝ် အာဝ် မွှိုမ်။ တဲး မဲ လှန် လှိန်၊ ဟာဝ် ဒဲင် ဝတ့် မဲ။
15အုဝ် ဒီ တဲး မဲ ဟန့် ဘဲန် ရန်ဆူ အီဘိုန့်၊ တဲး ဘာယ် လာယ် ဇွင့် ဆေဆေ။ ဂွန် အာမျုဝ် မဲ ဘော ဂွန် အာမျုဝ် အီဘိုန့် တွိုန်၊ ဂါယ် ဒီ လာယ် ကာဂုဝ်း။
ဂွန် အီဘိုန့် တွိုန် ဒီ ကာတိး ဂိန့် မဲ။ မဲ ယီ ဒီ ဇုဝ့် ခါနှုတ့် အန်။”
16ဟဲ့ ဟွတ့်၊ အန် ဇဝ် ဝီ ကာလာင် ဒီ အီဘိုန့် တွိုန် တဝ်း၊ “အုဝ် ဒီ တဲး မဲ ခမ် ဒုက် ဒေါ ဒဲ မဲ ဘာဒိက် ဆန်ထေ။ ပန် ဒီ ဂွန် မဲ၊ မဲ ဒီ ခမ် ဆဝ် ကာဆဝ်။ ပီ ဘော ဟဲ့ ပါယ် တီ မဲ နဲ့ အီ ဆီ ပွိုန် အီမာယ်။ အန် ဒီ အိုပ် မဲ။”
17ဟဲ့ ဟွတ့်၊ ဇဝ်ဖြာ ဝီ ကာလာင် ဂြုဝ်း ဒီ အီမာယ် တွိုန် အီ စိူဝ် အာဒါမ်။ အန် တဝ်း၊ “မဲ ဟဲ့ ဟွတ့် ထူမ် ဂြုဝ်း အီဘိုန့် မဲ။ မဲ မိူဝ် ဟဲ့ ဟွတ့် ဟူမ် ဘ့လေ ဟေ ပီ တူ တဲး အုဝ် ဘာယ် ဟူမ်။ ခုဝ် အန် တီ၊ အုဝ် ဝီ ဒိူင် ကာဒါယ် ပီ လုဝ် ရန့် မဲ။ ကူပ် ဟဲ့ ဘူင် မဲ မှာပ် တီ၊ မဲ ဒီ လုဝ် ခမ် ဒုက် ဘော ကာဒုး ဒီ ဘူင် မာန် ကိူန် ဇမ် တူတ့် အာဆာက် မဲ။ မဲ လုဝ် ရန့် ဂါန် ကာဆဝ်၊ မဲ ကော ဒီ မိုဝ်း ပီ ဒီ ဟူမ်။
18တဲး မာအာတ့် မိုဝ်း ကိူန် ခဲင် နာ ခဲင် မာန် မဲ။ ဒီမှုး မဲ ကော ဒီလာတ့်၊ မဲ ကော ဒီ ပွိုန် ဒီ ဟူမ်။
19မဲ လုဝ် ရန့် ဂါန်၊ တဲး န့ ကော တူတ့် အာဆာက် မဲ။ ဟဲ့ ဟွတ့်၊ မဲ ဒီ ဝီ ဘဲန် ကာဒါယ် ပီ ဒွိုမ် တာ အုဝ် ဒေါ ဘူင် ဘ့လေး အုဝ် ဒီ မဲ။ ဒေါ ဂုဝ် အန်၊ ဒုဝ် မဲ ဟဲ့ မုး ကာဒါယ်။ ခုဝ်၊ မဲ ဒီ ဝီ ဘဲန် ကာဒါယ် ပီ ဘြိမ်။”
20အာဒါမ် တွိုန် ဒါင် အီဘိုန့် အန် စိူဝ် နာင် အေဝါ။ နာင် အေဝါ တွိုန် ဘဲန် မာ ဒင် ဒူအီ အီ ကွယ် ဒဲင် ကာဒါယ်။ စိူဝ် အန် လေး ဆီဖဝ် ပါယ် တီ။ 21ဝါယ် အန် တီ ဇဝ်ဖြာ မိူဝ် ဒိုဝ်း ဟုန် ဒုဝ် ဆတ်ဒါဝါ၊ ဘူင် ခြိုင် ပီ ဒီ တာ၊ ဒွါ ဒီ အီမာယ် ဂါယ် အီဘိုန့်။ 22ဇဝ်ဖြာ မိူဝ် တဝ်း၊ “ယွတ်၊ ဒူအီ ဟဲ့ ဘဲန် ပီ အုဝ်။ ဂါယ် ဟဲ့ ဟွတ့် နပ် အီ မွှိုမ်၊ အီ တူ မွှိုမ်။ ဒေါ တီ နီ၊ ယုဝ် ဂါယ် ဒီ ဘော ဒိုဝ်း ဟူမ် ဘ့လေ ဟေ အီ ဒွါ အာဆာက် ဒီ အီ။ ဆေ ဟီ ပါယ် တီ ဒူအီ ဒီ ဘော အိမ် ဆေဆေ။” 23ခုဝ်၊ ဇဝ်ဖြာ မိူဝ် ဟုဝ် ဂါယ် လေး ခဲင် ကာပိုမ် အေဒေန် တွိုန်၊ တဲး ဂါယ် ရန့် နာ ဂေ မာန် ဒီ ကာဒါယ် ပီ ဒွိုမ် ဒိုဝ်း ဇဝ်ဖြာ ဒေါ ဘူင် အန် ဒူအီ။ 24ဇဝ်ဖြာ ဟဲ့ ဟွတ့် ဟုဝ် လေး ဂါယ် ခဲင် ကာပိုမ် တွိုန်၊ အန် စ်ု ဂေ အာမူ အာမာတ် ဇဝ်ဖြာ အီ စိူဝ် ခေရုပ်၊ တဲး ဂေ ကွယ် နာ လေး ဆီငဲ။ ဇဝ်ဖြာ ဘော ဘ့လေး ဘော မာပွါ့ လာင် အန် ဒီ တီ။ မာပွါ့ လာင် တီ န့ ပီ ငဝ်။ န့ ပီ ဘော ပ့လ မ့ပ့လေတ့်။ ပါယ် တီ ဇဝ်ဖြာ တဲး ဂေ ဘ်ု ဟေ အီ ဒွါ အာဆာက်၊ ကွဲ့ တဲး အီ ပွိုန် ဒီ ဟာဝ် ဒူင် ကွယ် ဟေ တီ။
Selectat acum:
ဒေါ ဂုဝ် 3: pce
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023, Wycliffe Bible Translators, Inc. All rights reserved.