Yaya 20
20
Kinovijaan di Yisus Kavagu
(Mat. 28:1-10; Mar. 16:1-8; Luk. 24:1-12)
1Om otutuvongpo dii di minsarap di Tadau Minggu, irino tadau koiso saralom sominggu, om ongoino dii i Moria, i tulun mantad si Bandar Madala, siri lobong di Yisus om kaantangai dii disido i vatu do noluvidno mantad si pintu do lobong. 2Om panangkusno#20:2 panangkus: pogundak dii i Moria do mongoi siri dagai di Simun Pitrus do iokuno, i Yaya, i tulun di Yisus om au Isido kojuu dogo. Om pitangarno dii i Moria dagai do, “Inongoi do tulun i Tuhan do mantad siri lobong om auno dii oilaan dagai nong inombo pinoilian Disido,” kadi Moria.
3-4Om pivaja ikoino dii di Pitrus do minanangkus#20:3 minanangkus: minogundak mongoi siri lobong. Nga kopogulu okupo mantad di Pitrus korikot si lobong sabap osijau okupo ko i Pitrus. 5Om tijongkud okuno dii moniliu siri saralom lobong, om kaantangaiku dii i kain do topurak do poingiliu, nga au okui minasu siri saralom lobong. 6Nga kosusuut nopo dii i Simun Pitrus do rumikot om asu siri lobong. Om kaantangai dii disido i kain do topurak do poingiliu. 7Om ii nopo kain, iri nisingal#20:7 nisingal: nidatar ko niulos si tulu di Yisus, om aui nokoinsomok di kinoilio di kain do topurak nga poinlulun siri sondiangko pantok. 8Om asu oku nogi dii siri lobong sumusuut di Pitrus, om ioku dii nga nokoontong om kaparsayaai nogi dii diri tinangar di Moria. 9Nga aupo nakaarati ikoi di tangar siri Kitab i minitangar do misti vijauon i Yisus mantad do pialatan di tulun napatai. 10Om uli ikoino dii mongiduvo sompori-ori siri valai kondiri.
Minintalang i Yisus siri di Moria
11Nga ginumuli i Moria, i tulun mantad si Bandar Madala, siri lobong om poingkakat siri pintu di lobong do miad-iad, om tiliuno dii isido di lobong di miad-iad isido. 12Om kaantangai dii disido i duvo moloikat do kipakaian topurak, do pinisomputulan mogom i pinoilian di kojuvan di Yisus. 13Om pongoduatno dii mongiduvo i moloikat di Moria do, “Abu, nokuroko do mogiadko?” ka.
Om jawapno dii i Moria do ka, “Mogiad oku do inongoi do tulun i Tuhanku om okonko noilaanku dii nong sinombo pinoilian Disido,” ka.
14Koopodpo dii isido mitangar do inong diri om kovilino dii, kaantangai dii disido i Yisus do poingkakat, nga aui otutunan disido nong isai. 15Om pongoduatno dii i Yisus disido do, “Abu, nokuroko do mogiad? Isai iumonnu?” ka.
Nga andasan nopo daa di Moria nong tulun diri mangangajaga di kabun om kadii di Moria Disido, “Tuan, nong Ika minaganu Disido, poiloo oku nong sinombo pinoijanannu om ongoionkui Isido,” ka.
16Om pitangarno dii i Yisus disido do ka, “Moria!” ka.
Om gotuvangai dii di Moria i Yisus do minitangar Disido do tangar do Ibrani, “Rabuni,” ka. Komoion nopo diri nga ‘Guru’.
17Om pitangarno dii i Yisus disido do ka, “Ada Oku kuutai marong do au Okupo nokoinsavat silo diAmoKu.#20:17 diAmo: diApa Nga ongoi nono porongou di tongokosusuladanKu do ka, ‘Minsavat Okuno silo diAmoKu, irino KinoringanKu, om iAmo#20:17 iAmo: iApa muju, irino Kinoringan muju nogi,’ kanto diolo,” kadi Yisus.
18Ongoino dii i Moria om pitangar di tongotulun di Yisus do ka, “Nokoontong oku di Tuhan,” ka, om pinaabar nogi dii disido iri nisuu di Yisus.
Minintalang i Yisus siri di TongotulunJo
(Mar. 16:14-18; Luk. 24:36-49)
19Sodop di tadau diri, irino Tadau do Minggu, om songingkunsi i pintu nijonon dagai di tongotulun di Yisus do rumosi ikoi di tongokotua do tulun Joudi. Om tigogi dii do nokorikot i Yisus do poingkakat siri lintanga dagai, om pitangarno dii Isido dagai do ka, “Asanang-sanang kovi?” ka. 20Om natangarpo dii Disido iri om paantangai nogi dii Disido ikoi diri damat si palad om tobikJo. Om kotutunai dii dagai i Tuhanja om asanang nogi dii marong i ginavoja.
21Om pitangarno kavagu i Yisus dagai do, “Asanang-sanang kovi? Potingkuro iAmoKu#20:21 iAmo: iApa minonuu Dogo siti vonuvo pogulupo, om irad nogi dino Ioku monuu dikovu potongkop di Abar do Aandai siti vonuvo,” kadi Yisus. 22Om natangarpo dii Disido iri, om obusaino dii ikoi Disido, om pitangarno do, “Torimawo mujuno i Tatod Tolidang. 23Om isaai nopo oompunan muju di duso om oompunanno i duso do tulun diri. Om isaai nopo tulun di au muju oompunan di dusojo nga auno oompunan i duso do tulun diri,” kadi Yisus.
I Yisus om i Tumas
24Ontok di rikot i Yisus sodop diri, nga au sino siri dagai i Tumas, i pangalaavan dagai i Tapid, iri iso dagai di opulu om duvo tulun di Yisus. 25Om pitangarno dii ikoi i songkoruangan di Tumas do ka, “Nokoontong ikoino dagai di Tuhan,” ka.
Nga kadi Tumas do ka, “Nong aukupo nokoontong di ralap di pinapakan siri palad Disido, om aupo nokotudu iti tunturuku si ralap do pinapakan, om aupo nakaavor iti paladku siri tobik di sinuak om au okupo aparsaya,” kadi Tumas.
26Nga somingguno mantad diri kinovijaan di Yisus kavagu om nountunno kavagu ikoi i tongotulun Disido siri valai diri, om i Tumas nogi nga siri dagai, om i pintu di valai nga songingkunsi. Om tigogi dii nokorikot kavagu i Yisus do poingkakat siri lintanga dagai om pitangar dii dagai do ka, “Asanang-sanang kovi?” ka. 27Om pitangar nogi dii Isido di Tumas do, “Antangaino pogi iti paladKu om potuduono ino tunturunu siti paladKu, om porolojono ino longonnu om ovoro siti tobikKu. Adano opiduvo ino ginavonu, kaparsayano Dogo,” ka.
28Om kadi Tumas di Yisus, “Ikano Tuhanku om Kinoringanku,” ka.
29Kadii di Yisus disido, “Nokoontongko Dogo om aparsayako nogi. Nga ososogitno iri tulun i aparsaya insan au nokoontong Dogo,” kadi Yisus.
Kogunaan diti Buuk
30Oguupo i pongintutunan do vinaal di Yisus siri gotuvang di tongotulunJo do au nokotulis siti buuk. 31Nga tinulisku iti buuk supaya aparsaya kou do i Yisus nopo nga i Koristus, i pinili di Kinoringan sumiliu do Raja, om Isidono i Tanak do Kinoringan. Om kaanu kou do kovijaan mantad di kuasa di ngaranJo.
Selectat acum:
Yaya 20: LabukPKV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1995, Wycliffe Bible Translators, Inc. All rights reserved.
