Susuuon 5
5
IOnonias om i Sopira
1Nga kivaro tulun, duvo misasavo do kitana. Ngaran nopo di kusai dii nga iOnonias, om ngaran nopo di savojo nga i Sopira. Nga nibaagi diOnonias i tanajo do mongojual, 2om miniupakat di savojo do boogijon iri siin di torogo tana itaau#5:2 itaau: itoo om oviton diOnonias iri siin i binaagijo do itaak di susuuon di Yisus.
3Nga duato dii di Pitrus, “Ononias, nokuro do poboyoonnu i Soitan, i kotua do rogon, masu sino ginavonu gosob do minomudutko di Tatod do Kinoringan? Pinataaunu#5:3 Pinataau: Pinotoo i siin vokon, nga kanu, ‘Itino iti torogo do tanaku,’ kanu. 4Aupo nijualnu iri tana, om ikano manansanganu. Kojual nopo dii iri om ika nogi sanganu di siin. Nokokuro do pinikirnu si ginavonu do irad dino? Okonko momudutko do tulun, nga minomudutko do Kinoringan,” kadi Pitrus.
5Om korongou nopo dii iOnonias di tinangar di Pitrus do irad diri, om turusno dii noluluk isido napatai. Om kasangkat di tongotulun nokorongou nga rinumosi marong.
6Om ongoiono dii di piipiro tongotomulok om rilitai dii iri kojuvanjo, om ovitono dii lumabus do mongoi mongolobong.
7Om toluno jaam kama dii mantad diri, om asuno i savo diOnonias nga aui nokoilo isido do napataino i savojo. 8Nga duatono dii di Pitrus isido do ka, “Poiloo oku nong itino iti torogo di tana nijual muju?” ka.
Om jawapno dii isido do ka, “Oo, inono ino bo i torogo diri,” ka.
9Nga kadi Pitrus kavagu, “Nokuro dii do miniupakat kou di savonu do monginam di Tatod do Tuhan? Nga sirino pintu i tongotulun di minongolobong di savonu maino, om moiuup-uup iolo mangakat di kojuvannu nogi,” ka.
10Nga turus noluluk isido napatai si gotuvang di Pitrus. Om sombia nakaasu iri tongotomulok nga kaantangai dii diolo do poingiliuno dii i tongondu napatai. Jadi minoiuup-uup dii iolo mangakat di kojuvanjo do lumabus, om pinirunggum dii di savojo mongolobong. 11Om nokorongou dii i tongotulun i naparsaya di Yisus om i tongotulun vokon do irad diri do napatai duvo misavo om nokorosi dii marong iolo.
Tanda-tanda Kosunduvan om Pongintutunan
12-16Om kivaro dii i kosunduvan om pongintutunan pinivavaal di tongosusuuon di Yisus si pialatan di tongotulun. Om oguu dii iri tongotulun mongovit diri tulun au kataru do pinakaa siri toodopon ko siripo tikam do oviton diolo pakaa siri disan alun-alun, supaya nong tumalib i Pitrus siri, nga olungungan daa iolo diri tolungung di Pitrus, do miintong iolo do olingasan. Om oguu nogi dii iri tongotulun rinumikot mantad siri tongokampung misoliput si Bandar Yorusalim, do minongovit iolo diri tulun au kataru om iri tulun rinosukan do rogon do mongoi mokilingos, om kasangkat diolo diri nga nolingasan. Om kopiiso dii i tongoginavo di tongotulun i naparsaya di Yisus muntun siri Kakilima di Suliman siri Valai Sasambayangan Tagajo. Nga iri nopo tongotulun vokon di aupo naparsaya di Yisus nga auso kobulun rumunggum di tongotulun naparsaya. Nga mangarajou iolo di tulun i naparsaya di Yisus. Om muang-ruang nopo dii i tongotulun do aparsaya di Tuhan, i tongokusai om i tongotongondu nogi.
Pinogidu di Moloikat i Tongosusuuon di Yisus mantad si Jiil
17Nga araatan dii i Imam Tagajo om kasangkat i tongosongkoruanganjo, irino kumpulan Soduki, do tumaai#5:17 tumaai: dumangi marong iolo di tongosusuuon di Yisus. 18Om pokitangkapai dii diolo i tongosusuuon di Yisus om pojiilono dii. 19Nga sodop diri om ukabono dii di moloikat do Tuhan i pintu di jiil. Om angataino dii disido i susuuon di Yisus do palabus, om kadisido, 20“Ongoi kouno ingkakat silo Valai Sasambayangan Tagajo, om poiloono i tongotulun kasangkat di abar pasal do kovijaan kavavagu,” kadi moloikat.
21Om korongou nopo dii iolo di tinangaran di moloikat, om vajano dii iolo diri tinangar disido. Kanavau nopo dii di susuvab ongoino dii iolo monuduk di tongotulun siri Valai Sasambayangan Tagajo.
Nga au alaid mantad diri om nountunno dii i Imam Tagajo om i tongosongkoruanganjo. Om loovono dii diolo i tongomoloingon do tulun Israil do muntun kasangkat iri Pinonguntunan di Tongokotua siri. Om ponuuno dii iolo do pulis do mongongoi di susuuon di Yisus siri jiil. 22Nga korikot nopo dii iolo siri jiil om auso naantangan diolo siri. Jadi poguliaino dii diolo kavagu popoilo di pinonguntunan di tongokotua. 23Kadiolo, “Korikot ikoi silo jiil, om pointutub dii i pintu om nokunsi, om naantanganja i tongosoujor mangajaga songingkakat siri pintu. Nga ukaboja nopo dii iri pintu, nga auso dii naantanganja si saralom,” ka. 24Nga korongou nopo dii i kotua di pulis di Valai Sasambayangan Tagajo om i tongokotua di imam do irad diri om oboringaan dii iolo nong sinombo nongoion di susuuon di Yisus.
25Om kivaro iso tulun rinumikot popoilo di pinonguntunan di tongokotua pasal di susuuon di Yisus, om kadisido, “Iri nopo tulun pinojiil muju nga silono Valai Sasambayangan Tagajo maino. Songingkakat iolo monuduk di tongotulun,” ka. 26Jadi minampanauno dii i kotua do pulis om i tongopulisjo mongoi siri Valai Sasambayangan Tagajo do mongongoi di tongosusuuon di Yisus. Nga okonko pajalon diolo i susuuon di Yisus, do rumosi iolo do dumpauon di tongotulun do vatu.
27Om kaangatai nopo dii di pulis i tongosusuuon di Yisus, om poingkokotono dii siri gotuvang do Pinonguntunan di Tongokotua. Om moniasat dii i Imam Tagajo diolo irad diti, 28“Sinuuja marong ikovu do ada kou monuduk di tongotulun saralom di ngaran di Yisus. Tau-tau pinotongkop muju i ponudukan diri siti Yorusalim. Om papasala kou daa dagai do kapatajan di Yisus,” kadisido.
29Nga jawapno dii i Pitrus om i tongosusuuon vokon do irad diti, “Monuduk ikoi pasal di Yisus do apatut tumunduk ikoi di Kinoringan, om okoniko tumunduk ikoi di tuluni toomod. 30Ikovu nopo nga minamatai di Yisus do pinapapak muju Isido si salib. Nga i Kinoringan nopo om minomijau Disido kavagu ino sambawon diodu-aki tokou. 31Om pinoinsavat do Kinoringan i Yisus siri ponong vananJo, om noonuan Isido pangkat do Vovojoon om i Momimijau do tulun. Jadi nong rumorogo tokou, nga obuli tokou tulun Israil oompunan di duso tokou. 32Om monuu dii i Tatod do Kinoringan dagai sumaksi kasangkat diti. Isai-isai nopo tumunduk di Kinoringan nga onuan do Tatod Tolidang,” kadi Pitrus.
33Nga korongou nopo dii i pinonguntunan di tongokotua di tinangar di Pitrus om ongaraatan dii marong iolo, om sipamatai dii iolo di tongosusuuon di Yisus. 34Nga kivaro iso tulun Porisi i monunuduk do Undang-undang Ugama do Joudi, ngaranjo nopo nga i Gomoliol. Rojoon#5:34 Rojoon: Ompodon isido di kasangkat di tongotulun. Om miningkakat isido siri di Pinonguntunan di Tongokotua, om minonuu isido palabus di tongosusuuon di Yisus do oruai. 35Nga nakalabus nopo dii iolo, om kadi Gomoliol diri Pinonguntunan di Tongokotua, “Oou kosusuladanku, antatangai mujuno marong nong kukuroyon muju iolo dilo. 36I pogulu nopo nga kivaro iso tulun ngaranjo nopo nga i Toidas do misinggagajo, om oguu tongotulun nakavaja disido. Koguuo nopo dii nga apat naatus kama ginuu. Nga pinatai i Toidas do tulun om minoiririjang i tongotulun i nakavaja disido, om ausono dii kinoongongoio diolo. 37Mantad diri ontok do mongijap i porinta di tongotulun, kivaro iso tulun, ngaranjo i Yudas mantad si Vonuvo Golilia, di papavaja di oguu tulun nogi. Nga pinatai isido do tulun om kasangkat iri tongotulun i nakavaja disido nga nokopoiririjang. Nga irad nopo diri auso kinoongongoio diolo. 38Maino om mitangar oku dikovu, poboyoon i tongotulun dilo. Do nong iti ponudukan diolo om iti karaja diolo mantad di kuasa do tulun nga auso koompusonjo. 39Nga nong iti ponudukan diolo om iti karaja diolo mantad di kuasa do Kinoringan, au kou kalavan diolo. Jadi ada muju pokukuroyo iolo dilo supaya au kou lumavan di Kinoringan,” kadi Gomoliol.
40Om vojoo nopo dii diri Pinonguntunan di Tongokotua i tinangaran di Gomoliol, om poosuo nogi dii kavagu diolo i tongosusuuon di Yisus, om pininlalapos dii iolo. Om bilinai nogi dii diolo i tongosusuuon di Yisus do ka, “Ada kouno paabar kavagu saralom do ngaran di Yisus,” ka. Om poiduo nogi dii diolo i tongosusuuon di Yisus.
41Om minampanauno dii i tongosusuuon di Yisus mantad si gotuvang di Pinonguntunan di Tongokotua, om asanang dii i ginavo diolo do anggapon iolo di Kinoringan do apatut kaanu iolo do kosusaan sabap di ngaran di Yisus. 42Nga auso kotingkadai diolo monuduk di Abar do Aandai, do pointikid-tikid tadau mongoi iolo siri Valai Sasambayangan Tagajo om siri kavavalajan monuduk di tongotulun om mangaabar diolo do, “Yisus nopo nga i Koristus, irino i pinili do Kinoringan sumiliu do Raja,” kadiolo.
Selectat acum:
Susuuon 5: LabukPKV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1995, Wycliffe Bible Translators, Inc. All rights reserved.
