Susuuon 4
4
Pinogotuvang i Pitrus om i Yaya di Pinonguntunan di Tongokotua
1Nga aupo naavi di Pitrus om i Yaya mitangar om kivarono dii i tongotulun toguu rumikot si diolo, irino tongoimam om i kotua do pulis siri Valai Sasambayangan Tagajo om i tongotulun Soduki, iri au aparsaya do ovijau kavagu i tulun nongapatai laid. 2Nokorongou nopo dii iolo diri tinangar di Pitrus om i Yaya do ovijau kavagu i tongotulun nongapatai laid mantad di kapatajon do vinijau di Kinoringan kavagu i Yisus, om araatan dii iolo. 3Om tangkapono dii diolo mongiduvo i susuuon di Yisus, om pojiilo nogi dii diolo do minsosodopno i tadau. Om siri iolo jiil gosob do nosuvaban. 4Nga oguu dii i tongotulun nokorongou di tinangaran di Pitrus om aparsaya dii iolo di Yisus. Koguuo nopo di tongokusai i naparsaya di Yisus nga moo limo noribu do nokopirunggum di tongotulun i naparsaya di Yisus laid.
5Korikotpo dii di susuvab om kivaro dii i tongokotua do tulun Joudi, om i tongomoloingon om i tongotulun monunuduk do Undang-undang Ugama do Joudi minongoi muntun siri Bandar Yorusalim. 6Om kivaropo i Imam Tagajo, ngaranjo iAnas, om i Kayapas, om i Yaya om i Sakandar om i tongokusai vokon mantad siri valai diAnas do minuntun siri. 7Om poingkokotono dii di Pinonguntunan di Tongokotua i Pitrus om i Yaya siri gotuvang diolo. Om duato nogi dii diolo do ka, “Potingkukuro kou mongolingos di toruol diti tulun nokimai? Sombo nontodon kuasa muju, om isai do ngaran napakai muju do mongolingos diti tulun?” kadiolo.
8Nga noponu i ginavo di Pitrus do kuasa di Tatod Tolidang, om jawapno dii isido diolo do ka, “Oou tongokotua do tulun Israil, om tongomoloingon, 9nokokuro do mongoduat kou diri vinaalja paandai diti tulun nokimai do nolingasan isido? 10Rongoo mujuno, Pinonguntunan di Tongokotua om kasangkat kou tulun vokon do Israil. Intutunai muju kasangkat do nolingasan iti tulun diti om poingkakat isido siti gotuvang muju mantad do kuasa do ngaran di Yisus Koristus mantad si Bandar Nasarit. Pinasalib muju i Yisus om napatai Isido. Nga pinovijau do Kinoringan Isido kavagu mantad si kapatajon. 11Nga i Yisusno iri komoion do irad do vatu i pinotulis siri Kitab do ka,
‘Ikovuno irad do mamamaal do valai,
nga kivaro iri vatu nitaam muju,
ombo bala iri do irino vatu sinumiliu do pinonimpuunan mamaal do valai,’ ka.#Antangai Buuk Sinding 118:22.
12Om sosoiso i Yisus buli momijau do tulun gosob do auso koovion; do auso ngaran vokon siti vonuvo do kikuasa momijau daton#4:12 daton: ditokou gosob do auso koovion,” kadi Pitrus.
13Kaantangai nopo dii di pinonguntunan di tongokotua do opusu marong i Pitrus om i Yaya, om oiranan dii iolo do noilaani dii diolo do i Pitrus om i Yaya nopo nga tulun toomod om auso sikul diolo. Om kotutun iolo di duvo tulun dii do songkoruangan di Yisus. 14Nga nokotingkod i pinonguntunan di tongokotua lumavan di Pitrus om i Yaya do naantangan diolo iri tulun nolingasan do poingkakat siri somok di Pitrus om i Yaya. 15Jadi polobusono dii di Pinonguntunan di Tongokotua i Pitrus om i Yaya mantad siri poibisaraan, om poiupapakat nogi dii iolo, 16do kadiolo, “Kukuroyon tokou dii iolo diri? Kasangkat di tongotulun siti Yorusalim nga nokoilo do agajo iti kosunduvan vinaal diolo, om au tokou buli mongolim diri. 17Nga aandai daa do toolikan tokou iolo supaya au popoilo iolo do tulun vokon pasal do ngaran di Yisus om supaya au popitongkop iolo diti abar,” kadiolo.
18Jadi loovono dii di Pinonguntunan di Tongokotua i Pitrus duvo di Yaya masu kavagu. Om kadiolo, “Ada kou marong monuduk om ada kou papaabar kavagu di ngaran di Yisus,” ka.
19Nga duatono di Pitrus duvo di Yaya iolo do ka, “Soromono muju marong nong onu iri gaagaya do apatut si di Kinoringan. Maja ikoi do tinangaran muju ko maja ikoi do tinangaran do Kinoringan? 20Do au ikoi buli tumingkod popoilo diri naantanganja om iri norongouja mantad si di Yisus,” kadi Pitrus.
21Nga makin nogi dii mongindorosi i pinonguntunan di tongokotua di Pitrus om i Yaya. Om polobuso nogi dii diolo i Pitrus om i Yaya, do auso nuu oukuman diolo. Do mangarajou#4:21 mangarajou: mongompod i tongotulun vokon do Kinoringan sabap do nolingasan iri tulun nokimai. 22Do umur nopo di tulun nolingasan diri nga apat nopulu toun lobi.
Sumambayang i Tulun iri Aparsaya Mokianu supaya Opusu
23Om pinalabus nopo dii i Pitrus om i Yaya om minongoi siri songkoruanganjo, om paabaro dii diolo kasangkat iri tinangaran di tongokotua di imam om iri tongomoloingon. 24Om korongou nopo dii i songkoruangan diolo, om kopiiso ginavo diolo do sumambayang do Kinoringan irad diti, “Tuhan dagai, Ikano minomorun diti tavan,#4:24 tavan: langit om vonuvo, om vaig om kasangkat iri tongosondiang si saralom diri. 25Minonuu i TatodNu Tolidang di taki dagai i Raja Daud popolombus di tinangaranNu do isidono susuuonNu, om itino tinangar niabar disido do ka,
‘Araatan marong di Tuhan i tongotulun di okonko bansa Joudi.
Om osia-siai dii iri poiupapakatan di tongotulun Israil diri lumavan do Kinoringan.
26Nokountunno i tongoraja om i tulun monguasa sumodia lumavan do Tuhan,
om lumavan diri piniliJo sumiliu do Raja,’ kadi Daud.#Antangai Buuk Sinding 2:1, 2.
27Oinomodno do nokountun iIrudis, om i Pountus Pilatus, om i tulun di okonko bansa Joudi, om kasangkat di tulun do Israil siti Yorusalim do lumavan di Yisus, irino SusuuonNu tolidang. Isidono piniliNu sumiliu di Koristus. 28Nountun nopo dii iolo do mamatai di Yisus, nga poboyoonNu iolo do irino kouvanganNu om kuasaNu inaturNu laaid. 29Tuhan dagai, antangai ikoipo maino do indorosijon ikoi diolo. Ikoi nopo diti nga susuuonNu om onuai ikoino kuasa supaya opusu ikoi popoilo di tinangaranNu. 30Om mokituduk ikoi di kuasaNu supaya kolingos ikoi do toruol do tulun. Om mokitulung ikoi supaya obuli mamaal do pongintutunan om koiranan mantad di kuasa do ngaran di Yisus, irino SusuuonNu tolidang,” kadiolo.
31Nga koopodpo dii iolo sumambayang om ginumunggun dii iri kinountunan diolo. Om kasangkat di ginavo diolo nga noponu do kuasa di Tatod Tolidang, om opusu dii iolo popoilo di tongotulun do tinangaran do Kinoringan.
I Tongotulun i Naparsaya Moitataak
32Ii nopo tongotulun i naparsaya di Yisus nga kopiiso ginavo diolo, om auso sumanganu do poromponjo kondiri. Kasangkat diolo nga moitataak om moitutulung do auso tulun odoot. 33Om agajo kuasa di susuuon di Yisus popoilo do novijauno i Tuhan Yisus kavagu mantad si kapatajon. Om agajo barakat do Kinoringan di tongotulun i naparsaya Disido. 34Om auso tulun osimpitan si diolo, do isaai nopo i kitana ko kivalai nga poboogijon do pojual, om ovitono dii i torogo diri 35do pataakon di susuuon di Yisus. Om popiboboogijon dii iri siin di tulun nosimpitan. Isai iri osimpit marong nga oguu pataakon.
36Om irad nogi diri kivaro iso tulun koturunan di Liwi, ngaranjo i Jusip, mantad Puru#4:36 Puru: Pulau Siprus om ponguranan di susuuon di Yisus do i Banabas. Komoion nopo diri nga “Ponoluod”.#4:36 Ponoluod: Ponginsasamod 37Kitana isido, om pinabaagijo do pojualo dii iri, om inovit siri susuuon di Yisus iri torogo diri tanajo Kadajan.
Selectat acum:
Susuuon 4: LabukPKV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1995, Wycliffe Bible Translators, Inc. All rights reserved.
