मत्ती 8

कोढ़ चो रोगी के छिंऊन भाती चेंगा करतोर

1जिदलदाय ईशु हुन डोंगरी थानले उतरलो, तेबे गोटक बड़े भीड़ हुनचो पाटे होऊन गेली। 2आउर दका, गोटक कोढ़ी लगे ऐऊन भाती हुनके जुहार करलो आउर बल्लो, “हे परबु, अगर तुय चाहलो ने, तो मोके शुद्ध करूक सकीस।” 3ईशु हाथ के बड़ाऊन भाती हुनके छिंवलो, आउर बल्लो, “मय चाहायें सें कि तुय शुद्ध होऊन जा।” आउर हुन तुरते कोढ़ ले शुद्ध होऊन गेलो। 4ईशु हुनचो ले बल्लो, “दक, काचीई ले नी बोल, मान्तर जाऊन भाती आपन खुद के याजक के दकाव आउर जोन चढ़ावा मूसा ठेबालो से हुनके चेगाव, बल्ले लोगमन चो काजे गोहई होओ।”

सुबेदार चो बिश्वास उपरे ईशु चो बड़ाई

5जिदलदाय हुन कफरनहूम ने ईलो तेबे गोटक सुबेदार हुनचो लगे ऐऊन भाती हुनचो ले गुहारलो, 6“हे परबु, मोचो सेवक घर ने लकवा बेमार ले खुबे दुख ने पड़लो से।” 7हुन हुनचो ले बल्लो, “मय ऐऊन भाती हुनके चेंगा करेंदे।” 8सुबेदार जबाप दिलो, “हे परबु, मय ऐ लायक नुआय कि तुय मोचो छानी खाले आव, मान्तर मात्र टोंड ले बोलुन देस तेबे मोचो सेवक चेंगा होयदे। 9कसनबल्लोने मय बले पराधीन मनुक आय, आउर पलटन मोचो अधिकार ने आसोत। जिदलदाय मय गोटक ले बोलु आंय, ‘जा!’ तेबे हुन जाऊ आय; आउर दुसर ले, ‘आव!’ तेबे हुन ऐऊ आय; आउर जिदलदाय आपलो दास ले बोलु आंय, ‘ऐ कर!’ तेबे हुन करू आय।”

10ऐ सुनुन भाती ईशु अकचकित होलो, आउर जोन हुनचो पाटे ऐते रवत हुनमन ले बल्लो, “मय तुमचो ले सते बलेंसे कि मय इस्राएल ने बले असन बिश्वास नी पावले। 11आउर मय तुमचो ले बलेंसे कि पूरब आउर पश्चिम ले खुबे असन लोग ऐऊन भाती अब्राहाम आउर इसाक आउर याकूब चो संगे सरग चो राज ने बसदे। 12मान्तर राज चो पिला-झिला बाहरे अंधार ने पकाया जादे: हुता गागतोर आउर दातमन कड़रतोर होयदे।” 13तेबे ईशु सुबेदार ले बल्लो, “जा, जसन तुचो बिश्वास आसे असने ची तुचो काजे होओ।” आउर हुनचो सेवक हुनी समया चेंगा होलो।

पतरस चो घरे खुबे रोगीमन चो चेंगा

14ईशु जिदलदाय पतरस चो घरे ईलो, तेबे हुन हुनचो सतरी के जर ने पड़लोर दकलो। 15हुन हुनचो हाथ के छिंवलो आउर हुनचो जर उतरून गेली, आउर हुन उठून भाती हुनचो सेवा करूक मुरयाली। 16जिदलदाय संझ होली तेबे हुनमन हुनचो लगे खुबे असन लोग के आनला जोनमन थाने दुष्टआत्मामन रली आउर हुन-हुन आत्मामन के आपलो बचन ले निकराऊन दिलो; आउर सपाय बेमारीमन के चेंगा करलो। 17बल्ले जोन बचन यशाया अगम गिआनी चो बाटले बोला जाऊ रये हुन पुरा होओ: “हुन खुद आमचो दुर्बलतामन के धरलो आउर आमचो बेमारमन के उठालो।”

ईशु चो चेला बनतोर किमत

18ईशु जिदलदाय आपलो भोंवरक गोटक बड़े भीड़ दकलो तेबे झील चो हुनपाट जातोर हुकुम दिलो। 19तेबे गोटक शास्तरी लगे ऐऊन भाती हुनचो ले बल्लो, “हे गुरू, जोन थाने तुय जासे, मय तुचो पाटे होयेंदे।” 20ईशु हुनचो ले बल्लो, “लोकड़लीमन चो भील आउर बादरी चो चड़ीईमन चो डेरामन होऊ आय; मान्तर माने चो बेटा चो काजे मुण्ड संगातोर बले जगा निआय।” 21गोटक आउर चेला हुनचो ले बल्लो, “हे परबु, मोके पयले जाऊक देस कि आपलो बुआ के तोपुन देयेंदे।” 22ईशु हुनचो ले बल्लो, “तुय मोचो पाट-पाट आव, आउर मरलो लोग के आपलो मोड़ी तोपुक देस।”

लेहरा-धुका के थमातोर

23जिदलदाय हुन ड़ोंगा थाने चेगलो, तेबे हुनचो चेलामन हुनचो पाट-पाट गेला। 24आउर दका, झील ने गोटक असन बड़े लेहरा-धुका उठली कि ड़ोंगा हुरलामन ले ढापी होऊक मुरयाली, आउर हुन सोहते रलो। 25तेबे चेलामन लगे ऐऊन भाती हुनके चेताला आउर बल्ला, “हे परबु, आमके बचाव, आमी नष्ट होऊंसे।” 26हुन हुनमन ले बल्लो, “हे अल्पबिश्वासीमन, केंव डरेसास?” तेबे हुन उठून भाती लेहरा धुका आउर पानी के खिजलो, आउर सपाय शान्त होऊन गेली। 27आउर हुनमन भकवा होऊन बोलुक मुरयाला, “ऐ कसन माने आय कि लेहरा धुका आउर पानी बले हुनचो हुकुम मानु आत।”

दुष्टआत्मामन के बराहांमन चो गोहड़ी ने पटातोर

28जिदलदाय हुन हुनपाट गदरेनीमन चो देश ने अमरलो, तेबे दुय झान माने जेचो थाने दुष्टआत्मा रली कबरमन ले निकरते-निकरते हुनके भेटला। हुनमन इतलो परचंड रवत कि कोनी हुन बाट ले जाऊक नी सकते रवत। 29हुनमन चिचयाऊन भाती बल्ला, “हे माहापुरू चो बेटा, आमचो तुचो ले काय काम? काय तुय समया ले पयले आमके दुक देऊक लाय ऐथा ईली सीस?” 30हुनमन ले खिन्डिक लापी खुबे असन बराहांमन चो गोअड़ी चरते रये। 31दुष्टआत्मामन हुनचो ले ऐ बोलुन भाती गुहारला कि, “अगर तुय आमके निकराय सीस, तो बराहांमन चो गोअड़ी ने पटाऊन देस।” 32हुन हुनमन ले बल्लो, “जाहा!” आउर हुनमन निकरून भाती बराहांमन ने भिड़ला आउर दका, सपाय गोअड़ी डोंगरी ऊपर ले झंझाड़ी होऊन भाती पानी ने जाऊन पड़ला, आउर बुडून मरला। 33हुनमन चो चरातो बितामन पराला, आउर नंगर ने जाऊन भाती ऐ सपाय गोठमन आउर जोनमन थाने दुष्टआत्मामन रली आउर हुनमन चो सपाय हाल सांगुन सुनाला। 34तेबे सपाय नंगर चो लोग ईशु के भेट होतो काजे निकरून ईला, आउर हुनके दकुन भाती गुहारला कि आमचो संदी ले बाहरे जा।

Selectat acum:

मत्ती 8: HLBNT

Evidențiere

Partajează

Copiază