मत्ती 10

बारा पठालोबितामन

1फेर ईशु आपलो बारा चेलामन के लगे हाग देऊन भाती, हुनमन के अशुद्ध आत्मामन उपरे अधिकार दिलो कि हुनमन के निकराओत आउर सपाय परकार चो बेमारमन के आउर सपाय परकार चो कमजोरीमन के दूर करोत। 2ये बारहो पठालोबितामन चो नाव ऐ आय पयला शिमोन, जोन पतरस बलाया जाऊ आय, आउर हुनचो भाई अन्द्रियास; जबदी चो बेटा याकूब, आउर हुनचो भाई यूहन्ना; 3फिलिप्पुस, आउर बरतुल्मय, थोमा, आउर कर धरू बिता मत्ती, हलफई चो बेटा याकूब, आउर तदय, 4शिमोन कनानी, आउर यहूदा इस्करियोती जोन हुनके धराऊन बले दिलो।

चेलामन के परचार करतो काजे पटातोर

5ऐ बारहो के ईशु ऐ हुकुम देऊन भाती पठालो, “दुसर जातिमन चो बाटे नी जाहा, आउर सामरीमन चो कोनी नंगर ने नी ओला। 6मान्तर इस्राएल चो घरमन ने ची हाजलो बिती मेंडामन चो लगे जाहा।” 7आउर हिन्ड़ते-हिन्ड़ते ऐ परचार करा सरग चो राज लगे ईलीसे। 8बेमारीमन के चेंगा करा, मरलो बितामन के जिआहा, कोढ़ीमन के शुद्ध करा, दुष्टआत्मामन के निकराहा। तुमी तो फोकाहा पावलासास, फोकाहा दिआस। 9आपलो थयलीमन ने ना तो सोना, आउर ना रूपा, आउर ना तांबा संगाहा; 10बाट चो काजे ना झोरा संगाहा, ना दुय ठान कुड़ता, ना पनही आउर ना बड़गी धरा, कसनबल्लोने भुतीयार के हुनचो भुती मिरतोर जरूरी आसे।

11“जोन कोनी नंगर नाहले गाँव ने जाहा, तेबे पता लगाहा कि हुता कोन लायक आय। आउर जिदलदाय ले हुन थानले नी निकरा, हुनची थाने राहा। 12घर ने ओलते-ओलते हुनके आशिष दिआस। 13अगर हुन घर चो लोग लायक होदे तो तुमचो आशिष हुनमन थाने अमरे दे, मान्तर अगर हुनमन लायक नी होओत तेबे तुमचो आशिष तुमचो लगे लेवटून ऐयदे। 14जोन कोनी तुमके गरहन नी करोत आउर तुमचो गोठमन नी सुनोत, हुन घर नाहले हुन नंगर ले निकरते-निकरते आपलो पाँयमन चो धुरला फाफडून दिआस। 15मय तुमचो ले सते बलेंसें कि नियाय चो दिने हुन नंगर चो हाल ले सदोम आउर अमोरा चो देश चो हाल खुबे कटलातो लायक होयदे।”

ऐतो बिती मशकिल समया

16“दका, मय तुमके मेंडामन चो असन बिगवामन चो मंजी ने पटायें से, ऐईकाजे सांपमन चो असन अकल बिता आउर परेयांमन चो असन सोज बना। 17मान्तर लोगमन ले खबड़दार राहा, कसनबल्लोने हुनमन तुमके माहासभामन ने सोपदे, आउर आपलो पंचायतमन ने तुमके कोड़ा मारदे। 18तुमी मोचो काजे हाकिममन आउर राजामन चो पुरे हुनमन थाने, आउर दुसर जातिमन थाने गोहई होतो काजे पोंचाया जाआसे। 19जिदलदाय हुनमन तुमके धरादे तेबे ऐ चिन्ता नी करा कि आमी कसन रीति ले नाहले काय बोलवां, कसनबल्लोने जोन काई तुमके बोलतोर होयेदे, हुन हुनी घड़ी तुमके सांगुन दिआ जायेदे। 20कसनबल्लोने बोलतो बिता तुमी नुआस, मान्तर तुमचो बुआ चो आत्मा तुमचो ने बोलु आय।”

21“भाई, भाई के आउर बुआ के बेटा, मरातो काजे सोपदे, आउर पिलामन आया-बुआ चो बिरूद ने उठून भाती हुनमन के मरादे। 22मोचो नाव चो लागुन सपाय लोग तुमचो ले बईर करदे, मान्तर जोन आखरी तक धीरज धरू रयदे हुनचेई मुक्ति होयेदे। 23जिदलदाय हुनमन तुमके गोटक नंगर ने कन्दरादे, तेबे दुसर बाटे पराहा। मय तुमचो ले सते बलेंसे, तुमी इस्राएल परदेश चो सपाय नंगरमन ने नी फिरून चुकासे कि माने चो बेटा ऐयेदे।”

चेला होतोर अरत

24“चेला आपलो गुरू ले बड़े नी होये; आउर ना दास आपलो मालिक ले। 25चेला के गुरू चो, आउर दास के मालिक चो बराबर होतोर ची खुबे आय। जिदलदाय हुनमन घर चो मालिक के शयतान बल्ला तेबे हुनचो घर बितामन के केंव नी बलदे।”

काचो ले डरवां

26ऐईकाजे मानेमन ले नी डरा; कसनबल्लोने काई ढ़ाकलोर निआय जोन उगाढ़ा नी जायदे, आउर ना काई लुकली से जोन जाना नी जाये दे। 27जोन मय तुमचो ले अंधार ने बलेंसे, हुनके तुमी उजर ने बोला; आउर जोन काने कान सुनसास, हुनके छानीमन उपरे ले परचार करा। 28जोन देंह के घात करू आत, मान्तर आत्मा के घात नी करूक सकोत, हुनमन ले नी डरा; मान्तर हुनची ले डरा, जोन आत्मा आउर देंह दुनो के नरक ने नष्ट करूक सके। 29काय पयसा ले दुय ठान चटेयामन नी बीके? तेबले बले तुमचो बुआ चो इच्छा चो बिना हुनमन थानले गोटक बले भूईं थाने नी घसरुक सकोत। 30तुमचो मुण्ड चो केश बले सपाय गनलोर आसे। 31ऐईकाजे नी डरा; तुमी खुबे चटेयामन ले बडुन भाती आहास।

ईशु के मानतोर नाहले नी मानतोर

32“जोन कोनी मानेमन चो पुरे मोके मानेदे, हुनके मय बले आपलो सरग चो बुआ चो पुरे मानेंदे। 33मान्तर जोन कोनी मानेमन चो पुरे मोचो इन्कार करेदे, हुनचो ले मय बले आपलो सरग चो बुआ चो पुरे इन्कार करेंदे।

34“ऐ नी समजा कि मय धरतनी थाने मिलाप कराऊक ईलेसे; मय मिलाप कराऊक नाई, मान्तर तलवार चलाऊक ईले से। 35मय तो ईले से, कि ‘माने के हुनचो बुआ ले, आउर बेटी के हुनचो आया ले, आउर बुआरी के हुनचो सतरी ले अलग करून देयें; 36माने चो बयरी हुनचो घर चेई लोग होदे।’

37“जोन आया नाहले बुआ के मोचो ले आगर लाड़ करू आय, हुन मोचो लायक नुआय; आउर जोन बेटा नाहले बेटी के मोचो ले आगर मया करू आय, हुन मोचो लायक नुआय; 38आउर जोन आपलो कुरूस धरून भाती मोचो पाट-पाट नी चले हुन मोचो लायक नुआय। 39जोन आपलो जीव बचाऊ आय, हुन हुनके नी बचाए; आउर जोन मोचो लागुन आपलो जीव देऊ आय, हुन हुनके पायदे।

करलो फल

40“जोन तुमके गरहन करू आय, हुन मोके गरहन करू आय; आउर जोन मोके गरहन करू आय, हुन मोचो पठालोबिता के गरहन करू आय। 41जोन अगम गिआनी के अगम गिआनी जानुन भाती गरहन करो, हुन अगम गिआनी चो पलटा पायदे; आउर जोन धरमी के धरमी जानुन भाती गरहन करो, हुन धरमी चो पलटा पायदे। 42जोन कोनी ऐ नानीमन थानले गोटक के मोचो चेला जानुन भाती मात्र गोटक बटका करा पानी पिआओ, मय तुमचो ले सते बलेंसें, हुन कोनी रीति ले आपलो ईनाम नी हजाये।”

Selectat acum:

मत्ती 10: HLBNT

Evidențiere

Partajează

Copiază