यूहन्ना 3

ईशु आउर निकुदेमुस

1फरीसीमन ने नीकुदेमुस नाव चो गोटक माने रलो, जोन यहूदीमन चो सरदार रलो। 2हुन राती दाय ईशु चो लगे ऐऊन भाती हुनचो ले बल्लो, “हे रब्बी, आमी जानु से कि तुय माहापुरू चो बाटले गुरू होऊन भाती ईली सीस, कसनबल्लोने कोनी ऐ चिनामन के जोन तुय दकाय सीस, अगर माहापुरू हुनचो संगे नी रवो तो नी दकाऊक सकतीस।” 3ईशु हुनके जबाप दिलो, “मय तुचो ले सते-सते बलें सें, अगर कोनी नवा ढंग ले नी जनमे तो माहापुरू चो राज दकुक नी सके।” 4नीकुदेमुस हुनचो ले बल्लो, “माने जिदलदाय डोकरा होऊन गेलो, तो कसन जनमुक सके दे? काय हुन आपलो आया चो गरब ने दुसरहार परवेश करून भाती जनमुक सकु आय?” 5ईशु जबाप दिलो, “मय तुचो ले सते-सते बलें सें, जिदलदाय ले कोनी माने पानी आउर आत्मा ले नी जनमे तेबे हुन माहापुरू चो राज ने ओलुक नी सके। 6कसनबल्लोने जोन देंह ले जनम लो से, हुन देंह आय; आउर जोन आत्मा ले जनम लो से, हुन आत्मा ले आय। 7अकचकित नी कर कि मय तुचो ले बल्ले, ‘तुके नवा ढंग ले जनम धरतोर जरूरी आय।’ 8लेहरा जोन बाटे चाहाऊ आय हुन बाटे जाऊ आय आउर तुय हुनचो शब्द सुनु आस, मान्तर नी जानीस कि हुन काहां ले ऐऊ आय आउर कोन बाटे जाऊ आय? जोन कोनी आत्मा ले जनमलो से हुन असने ची आय।” 9नीकुदेमुस हुनके जबाप दिलो, “ऐ गोठमन कसन होऊक सके?” 10ऐ सुनुन भाती ईशु हुनचो ले बल्लो, “तुय इस्राएलीमन चो गुरू होऊन भाती बले काय ऐ गोठमन के नी समजीस? 11मय तुचो ले सत-सत बलें सें कि आमी जोन जानु आंव हुन बोलु आंव, आउर जोन के आमी दकलु से हुनचो गोहई देऊ आंव, आउर तुमी आमचो गोहई गरहन नी करास। 12जिदलदाय मय तुमचो ले धरतनी चो गोठमन बल्ले आउर तुमी बिश्वास नी करास, तो अगर मय तुमचो ले सरग चो गोठमन सांगेदे तेबे फेर कसन बिश्वास करा से? 13कोनी सरग ने नी चेगला, मात्र हुनी जोन सरग ले उतरलो, बल्लोने माने चो बेटा जोन सरग ने आसे। 14आउर जोन रीति ले मूसा रान थानले सांप के डेंगे चेगालो, हुनी रीति ले जरूरी आय कि माने चो बेटा बले डेंग थाने चेगाया जाओ; 15बल्ले जोन कोनी हुनचो उपरे बिश्वास करो हुन अमर जीवना पाओ।” 16“कसनबल्लोने माहापुरू जगत ले असन मया संगालो कि हुन आपलो गोटकी ची बेटा देऊन दिलो, बल्ले जोन कोनी हुनचो उपरे बिश्वास करोत हुन नष्ट नी होओत, मान्तर अमर जीवना पाओत। 17माहापुरू आपलो बेटा के जगत ने ऐईकाजे नी पठालो कि जगत ने डण्ड चो हुकुम देओ, मान्तर ऐईकाजे कि जगत हुनचो बाटले मुक्ति पाओ। 18जोन हुनचो उपरे बिश्वास करू आय, हुनचो उपरे डण्ड चो हुकुम नी होये, मान्तर जोन हुनचो उपरे बिश्वास नी करे, हुन दोषी ठेबुन चुकलो; ऐईकाजे कि हुन माहापुरू चो गोटकी ची बेटा चो नाव थाने बिश्वास नी करलो। 19आउर डण्ड चो हुकुम चो कारन ऐ आय कि उजर जगत ने ईली से, आउर मानेमन अंधार के उजर ले खुबे लाड़ जानला कसनबल्लोने हुनमन चो काम खराप रये। 20कसनबल्लोने जोन कोनी खराप करू आय, हुन उजर ले बईर संगाऊ आय, आउर उजर चो लगे नी ऐये, असन नी होओ कि हुनचो काममन थाने दोष लगाया जाओ। 21मान्तर जोन सत ने चलु आय, हुन उजर चो लगे ऐऊ आय, बल्ले हुनचो काम उजागर होओ कि हुन माहापुरू चो बाटले करा गेली से।”

ईशु चो बारे ने यूहन्ना चो गोहई

22ऐचो पाचे ईशु आउर हुनचो चेलामन यहूदीया देश ने ईला; आउर हुन हुता हुनमन चो संगे रऊन भाती डूबन देऊक मुरयालो। 23यूहन्ना बले शालेम चो लगे ऐनोन लंदी ने डूबन देते रलो, कसनबल्लोने हुता खुबे पानी रये, आउर लोग ऐऊन भाती डूबन धरते रवत 24यूहन्ना हुन समया तक जयलघर ने नी डाला जाऊ रये 25हुता यूहन्ना चो चेलामन चो कोनी यहूदी चो संगे शुद्धी चो बारे ने बाता-बाती होली। 26आउर हुनमन यूहन्ना चो लगे ऐऊन भाती हुनचो ले बल्ला, “हे गुरू, जोन माने यरदन लंदी चो हुनपाट तुचो संगे रये, आउर जेचो तुय गोहई दिली सीस; दक, हुन डूबन देऊ आय, आउर सपाय हुनचो लगे ऐऊ आत।” 27यूहन्ना जबाप दिलो, “जिदलदाय ले माने के सरग ले नी दिया जाये, तेबे तक हुन काई नी पाऊक सके। 28तुमी तो खुदे ची मोचो गोहई आहास कि मय बल्ले, ‘मय मसीह नुआय, मान्तर हुनचो पुरे पटाया गेले से।’ 29जेचो दुली आसे, हुनी दुला आय: मान्तर दुला चो मीत जोन उबा होलो हुनचो सुनु आय, दुला चो शब्द ले खुबे हरिक होऊ आय; अदायं मोचो ऐ हरिक पुरा होली से। 30जरूरी आय कि हुन बाड़ो आउर मय घटे।” 31“जोन उपर ले ऐऊ आय हुन सपाय ले अच्छा आय; जोन धरतनी ले ऐऊ आय हुन धरतनी चो आय, आउर धरतनी चो ची गोठमन के बोलु आय: जोन सरग ले ऐऊ आय, हुन सपाय ले उपरे आसे। 32जोन काई हुन दकलो आउर सुनलो से, हुनचेई गोहई देऊ आय; आउर कोनी हुनचो गोहई गरहन नी करे। 33जोन हुनचो गोहई गरहन करला हुन ऐ गोठ थाने छापा लगाऊन दिला कि माहापुरू सते आय। 34कसनबल्लोने जोन के माहापुरू पठालो से, हुन माहापुरू चो गोठमन बोलु आय; कसनबल्लोने हुन आत्मा नापुन-नापुन भाती नी देये। 35बुआ बेटा ले मया संगाऊ आय, आउर हुन सपाय तीजमन हुनचो हाथ ने देऊन दिलो से। 36जोन बेटा उपरे बिश्वास करू आय, अमर जीवना हुनचो आय; मान्तर जोन बेटा चो नी माने, हुन जीवना के नी दकें दें, मान्तर माहापुरू चो रीस हुनचो उपरे रऊ आय।”

Selectat acum:

यूहन्ना 3: HLBNT

Evidențiere

Partajează

Copiază