ମାଥିଉ 4
4
ଶୟତାନ ଯୀଶୁଙ୍ଗ୍ ପରିକ୍ଷା କିତାତ୍
(ମାର୍କ. ୧:୧୨-୧୩; ଲୁକ. ୪:୧-୧୩)
1ପାଚେ ପବିତ୍ର ଆତ୍ମା ଯୀଶୁଙ୍ଗ୍ ଟାଙ୍ଗ୍ରାବାହାତ ଅଶାହାଚାତ୍। ହେବେ ଶୟତାନ ତାଙ୍ଗେଙ୍ଗ୍ ପରିକ୍ଷା କିଜି ମାଚାତ୍, 2ଆରେ ଯୀଶୁ ଚାଲିଶ୍ ଦିନ୍ ଚାଲିଶ୍ ରାତି ଇନାକାପା ତିନ୍ୱାଦାଙ୍ଗ୍ ଉଣ୍ୱାଦାଙ୍ଗ୍ ଉପାସ୍ କିତି ପାଚେ ନାସ୍କି ଆତାନ୍। 3ହେବେ ଶୟତାନ ଯୀଶୁଙ୍ଗ୍ ପରିକ୍ଷା କିଦେଙ୍ଗ୍ ତା କଚଣ୍ତ ୱାଜି ୱେଚ୍ଚାତ୍, “ଏନେଙ୍ଗ୍ ଯଦି ଈଶ୍ୱର ମେହିତି, ଲାଗିଙ୍ଗ୍ ଇ କାଲ୍କୁକାଙ୍ଗ୍ ରୁଟି ଆଦେଙ୍ଗ୍ ଆଦେସ୍ ହିୟା।”
4ଯୀଶୁ ଶୟତାନତିଙ୍ଗ୍ ୱେଚ୍ଚାନ୍, “ଈଶ୍ୱର ସାସ୍ତର୍ତାକେ ଲେକା ମାନାତ୍, ମାନାୟାର୍ ୱାରି ରୁଟି ତିନ୍ଞ୍ଜି ଜିଦେଙ୍ଗ୍ ଆଡୁର୍, ମାତର୍ ଈଶ୍ୱର ୱେଇଦାଙ୍ଗ୍ ହିତ୍ତି ୱିଜୁ କାତାତାଙ୍ଗ୍ ଜିନାର୍।”
5ତାପାଚେ ଶୟତାନ ଯୀଶୁଙ୍ଗ୍ ଯିରୁଶାଲାମ ସହର୍ତାକେ ଅଜି ଈଶ୍ୱର ମାନି ମନ୍ଦିର୍ନି ଚାତ୍ ଜପି ନିଲି କିତାତ୍, 6ଆରେ ହେ ଶୟତାନ ଯୀଶୁଙ୍ଗ୍ ୱେଚ୍ଚାତ୍, “ଯଦି ଏନେଙ୍ଗ୍ ଈଶ୍ୱର ମେହିତି, ଲାଗିଙ୍ଗ୍ ଇବେତାଙ୍ଗ୍ ତାରେନ୍ ଗୁମା।” ଦରମ୍ ସାସ୍ତର୍ତାକେ ଲେକା ମାନାତ୍, “ନିଙ୍ଗେଙ୍ଗ୍ ରକ୍ଷା କିଦ୍ଦେଙ୍ଗ୍ ଈଶ୍ୱର ତା ଦୁତ୍କୁକାଙ୍ଗ୍ ଆଦେସ୍ ହିନାନ୍।” ହେଦାଙ୍ଗ୍ କାଜିଙ୍ଗ୍ ମି କାଲ୍ପାନା ଇମ୍ଣି କାଲ୍କୁକାଙ୍ଗ୍ ଉଜୁତ୍।
7ଯୀଶୁ ଶୟତାନତିଙ୍ଗ୍ ୱେଚ୍ଚାନ୍, “ଆରେ ଈଶ୍ୱର ସାସ୍ତର୍ତାକେ ଇ କାତା ପା ଲେକା ମାନାତ୍, ‘ଏପେଙ୍ଗ୍ ଜାର୍ ମାପୃ ଈଶ୍ୱରତିଙ୍ଗ୍ ଇନାୱେଡ଼ାଙ୍ଗ୍ ପା ପରିକ୍ଷା କିମାଟ୍।’ ”
8ତାପାଚେ, ଶୟତାନ ଯୀଶୁଙ୍ଗ୍ ର ପାନ୍ତି ମାଡ଼ିଜପି ଅସାହାଲ୍ଜି ପୁର୍ତିନି ୱିଜୁ ରାଜି ଆରେ ଦନ୍ସମ୍ଫତିନି ହଲ୍ନାକା ଚଚ୍ଚାତ୍। 9ଆରେ ଶୟତାନ ଯୀଶୁଙ୍ଗ୍ ୱେଚ୍ଚାତ୍, “ଏନେଙ୍ଗ୍ ଯଦି ନାଙ୍ଗେଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିତ୍ତିସ୍, ଆନେଙ୍ଗ୍ ଇୱିଜୁ ଦନ୍ ସମ୍ପତି ନିଙ୍ଗେଙ୍ଗ୍ ହିଦ୍ନାଙ୍ଗ୍।”
10ହେବେ ଯୀଶୁ ତାଙ୍ଗେଙ୍ଗ୍ ୱେଚ୍ଚାନ୍, “ନାବେତାଙ୍ଗ୍ ଦେହା ଆ ଶୟତାନ, ‘ଲାଗିଙ୍ଗ୍ ଈଶ୍ୱର ସାସ୍ତର୍ତାକେ ଲେକା ମାନାତ୍, ଏପେଙ୍ଗ୍ ଜାର୍ ମାପୃତିଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିନାଦେର୍, ଆରେ ହେୱାନିଙ୍ଗ୍ନେ ହେବା କିନାଦେର୍।’ ”
11ଲାଗିଙ୍ଗ୍ ଶୟତାନ ଯୀଶୁଙ୍ଗ୍ ପିସ୍ତି ହାଚାତ୍, ତାପାଚେ ସରଗ୍ନି ଦୁତ୍କୁ ୱାଜି ଯୀଶୁଙ୍ଗ୍ ହେବାକିତିକ୍।
ଯୀଶୁ ଗାଲିଲୀ ଜିଲ୍ଲାତ ଶୁଣାୟ୍ କିଦେଙ୍ଗ୍ ହାଙ୍ଗ୍ତାନ୍
(ମାର୍କ. ୧:୧୪-୧୫; ଲୁକ. ୪:୧୪-୧୫-୩୧)
12କେତ୍ଦିନ୍ ପାଚେ ହେରୋଦ ରାଜା ଯୋହନତିଙ୍ଗ୍ ଗାଚ୍ଚି ଜଇଲ୍ ଇଞ୍ଜ ଇଡ଼୍ତାନ୍ ଇଞ୍ଜି ଯୀଶୁ ୱେଚାନ୍, ହେୱାନ୍ ଯିହୁଦା ଜିଲ୍ଲା ବାହା ପିସ୍ତି ଗାଲିଲୀ ଜିଲ୍ଲାତ ହାଚାନ୍। 13ଆରେ ଯୀଶୁ ନାଜରିତ ସହର୍ତାକେ ୱାତି ପାଚେ ଗାଲିଲୀ ଜିଲ୍ଲାନି ହାମ୍ଦୁର୍ କାଣ୍ଡିନି କପୁର୍ନାହୁମ୍ ସହର୍ତାକେ ସବୁଲୁନ୍ ଆରେ ନପ୍ତାଲି ମାନାୟାର୍ ମାନି ସହର୍ତାକେ ବାହା କିତାନ୍।
14ଇନେସ୍କି ଯିଶାୟ ଭବିଷ୍ଯତବକ୍ତାତାଙ୍ଗ୍ ଈଶ୍ୱର ଇନାକା ୱେଚ୍ଚି ମାଚାନ୍, ହେ କାତା ପୁରା ଆଦେଙ୍ଗ୍ ଯୀଶୁ ଲେକିକିଜି ମାଚାନ୍।
15“ସବୁଲୁନ୍ ଦେସ୍ ଆରେ ନପ୍ତାଲି ଦେସ୍ନି ମାନାୟାର୍, ହାମ୍ଦୁର୍ ଲାଗାୟ୍ନି ଯର୍ଦ୍ଦନ ନାଗୁଡ଼୍ ହେପାଡ଼୍କାନି ଗାଲିଲୀ ଜିଲ୍ଲାତ ମାନି ବିନ୍ଜାତିନି ମାନାୟାର୍,
16ୱେନାଟ୍। ଇମ୍ଣାକାର୍ ମାଜ୍ଗାତାକେ ମାଚାର୍, ହେୱାରିଙ୍ଗ୍ ମାପୃ ଅଜଡ଼୍ ଚଚ୍ଚାନ୍। ଇମ୍ଣାକାର୍ ଦୁଗେର୍ ଲେକେ ମାଜ୍ଗା ଦେସ୍ତ ମାଚାର୍, ହେୱାର୍ ଜପି ଅଜଡ଼୍ ପଡ଼୍ତାତ୍।”
17ହେଦିନ୍ତାଙ୍ଗ୍ ଯୀଶୁ ଶୁଣାୟ୍ କିଦେଙ୍ଗ୍ ହାଙ୍ଗ୍ତାନ୍। ହେୱାନ୍ ୱେଚ୍ଚାନ୍, “ପାପ୍ କାମାୟ୍ ପିସ୍ତି ମାପୃତାକେ ୱାଡ, ଇନେସ୍କି ଈଶ୍ୱର ସାସନ୍ କିନି ରାଜି ଲାଗେ ଇକାୱାତାତେ।”
ଯୀଶୁ କେତ୍ଜାଣ୍ ଚେଲାହିରିଙ୍ଗ୍ ବାଚିକିତାନ୍
(ମାର୍କ. ୧:୧୬-୨୦; ଲୁକ. ୫:୧-୧୧; ଯୋହନ. ୧:୩୫-୪୨)
18ଯୀଶୁ ଗାଲିଲୀନି ହାମ୍ଦୁର୍ କାଣ୍ତିତିଙ୍ଗ୍ ହାନିହିଙ୍ଗ୍ ଶିମୋନ, ଇନେରିଙ୍ଗ୍ ପିତର ଇଞ୍ଜି ଇନାର୍, ଆରେ ତା ଟଣ୍ଡାହି ଆନ୍ଦ୍ରିୟଙ୍ଗ୍, ଇ ରିୟାରିଙ୍ଗ୍ ହାମ୍ଦୁର୍ତାକେ ଜାଲ୍ ଇଡ଼୍ନାକା ହୁଡ଼୍ତାନ୍, ଇନେସ୍କି ହେୱାର୍ କେଉଟ୍ ମାଚାର୍। 19ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନା ପାଚେ ୱାଡ ନଙ୍ଗୟ୍ ପାତେକ୍ ଏପେଙ୍ଗ୍ କେଉଟ୍ ମାଚାଦେର୍, ମାତର୍ ମାନାୟାରିଙ୍ଗ୍ ନା ଚେଲାରହ୍ନାକା ଆନେଙ୍ଗ୍ ମିଙ୍ଗେଙ୍ଗ୍ ହିକାଇ କିଦ୍ନାଙ୍ଗ୍।” 20ହେବେତାଙ୍ଗ୍ ହେୱାର୍ ହେଦାପ୍ରେ ତା ମିନ୍କୁ ଆହ୍ନି ଜାଲ୍ତିଙ୍ଗ୍ ପିସ୍ତି ତାପାଚେ ହାଚାର୍।
21ଯୀଶୁ ହେବେତାଙ୍ଗ୍ ଆଗେ ହାଲ୍ଜି ଟଣ୍ଡ୍ରିୟାର୍ ଯାକୁବ ଆରେ ଯୋହନ ଲାତ୍ରାହି ଜେବଦି ହୁଦାଙ୍ଗ୍ ଡଙ୍ଗାତାକେ ଜାଲ୍ ମାଡ଼୍ତାକିନାକା ହୁଡ଼୍ଜି ହେୱାରିଙ୍ଗ୍ କୁକ୍ତାନ୍। 22ହେବେତାଙ୍ଗ୍ ହେୱାର୍ ହେଦାପ୍ରେ ଡଙ୍ଗା ଆରେ ଲାତ୍ରାହିଙ୍ଗ୍ ପିସ୍ତି ଯୀଶୁ ପାଚେ ହାଚାର୍।
ଯୀଶୁ ମାନାୟାରିଙ୍ଗ୍ ଉପ୍ଦେସ୍ ହିତାନ୍ ଆରେ ରଗ୍ କାଟାକାରିଙ୍ଗ୍ ହାର୍କିତାନ୍
(ଲୁକ. ୬:୧୭-୧୯)
23ପାଚେ ଯୀଶୁ ଗାଲିଲୀ ଜିଲ୍ଲାତ ବୁଲାଆନିହିଙ୍ଗ୍, ଯିହୁଦିର୍ ପାର୍ତାନା ଇଞ୍ଜ ହିକ୍ଷାହିଜି ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ଶୁଣାୟ୍ କିଜି ଆରେ ବାରବିନି ରଗ୍ ଆରେ ୱିଜୁ ଦୁକ୍ କଷ୍ଟନିକାରିଙ୍ଗ୍ ହାର୍କିତାନ୍। 24ଆରେ ତା ବିଷୟ ସିରିୟା ଦେସ୍ ପାତେକ୍ ବିଚାଆତାତ୍। ଆରେ ହେବେ ବୁତ୍ଆତ୍ମା ଡୁୟାଆତାକାରିଙ୍ଗ୍, ଆପ୍ରାଙ୍ଗ୍ ରଗ୍, ଆରେ ହିର୍କଲ୍ ରଗ୍, ଆରେ ବାରବିନି ରଗ୍ ଆତାକାରିଙ୍ଗ୍ ଆରେ କଷ୍ଟନିକାରିଙ୍ଗ୍ ତା କଚଣ୍ତ ତାହିୱାତାର୍, ଆରେ ଯୀଶୁ ହେୱାରିଙ୍ଗ୍ ହାର୍କିତାନ୍। 25ଲାଗିଙ୍ଗ୍ ଗାଲିଲୀ ଜିଲ୍ଲା, ଦେକାପଲି (ଇନେରିଙ୍ଗ୍ କି ଦଶ୍ଗଟା ସହର୍କୁକାଙ୍ଗ୍ ଦେକାପଲି ଇନାର୍) ଯିରୁଶାଲାମ ସହର୍, ଯିହୁଦା ଜିଲ୍ଲା ଆରେ ଯର୍ଦ୍ଦନ ନାଗୁଡ଼୍ ହେପାଡ଼୍କାତାଙ୍ଗ୍ ବେସିହେନି ମାନାୟାର୍ ଯୀଶୁ ପାଚେ-ପାଚେ ହାଞ୍ଜେଙ୍ଗ୍ ଲାଗାତାର୍।
Selectat acum:
ମାଥିଉ 4: PEGNT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
