Luke 4
4
Sesu agwaarile mu dimaangu
1Ve burugu Sesu gu Surde abile wubasu ne Dinyunyi Disuungeme, ne Dinyunyi dyene diyenze yandi gu kumu. 2Guune, amaangu ne mukolitsi mu magumi mamane ma batsufu ne aseyi mu batsufu tsyene, ve vu batsufu tsyene ayulu nzale. 3Kere vane mukolitsi ayambile yandi re: «Mumbare yire Mwaane Nzambi, rume dimanyi didi dikalugi dipe.» 4Sesu agabusile yandi re: «Diteendu gu maambu ma Nzambi re: “Monyu wu mutu sake muyi dipe piinze.”»
5Kere vane mukolitsi ayende naandi guga yulu. Vane ne vane aritsige yandi batseengi tsyotsu tsi buloongu, 6ne wuyambile re: «Maguveege yu busine ne bunduumbe bu batseengi tsyene. Mare wuveegu bine byootsu ne marungule wuveege byo gu wotsu wumakeroonde.» 7Kagu ga yibondimine me, maguveege yu bivaave byene byootsu! 8Sesu amugabusile re: «Diteendu mu maambu ma Nzambi re: Bondimine ke Fumwagu Nzambi, ne salile ke yandi piinze.» 9Ve yulu vane mukolitsi ayende naandi gu Serusalem, anakige yandi gu yulu mwaanze wu Ndagu Nzambi. Ne amuyambile re: «Ve yu Mwaane Nzambi, vele ne gu tsi! 10Mumbare diteendu gu maambu ma Nzambi re: Nzambi agurume bakime baandi bagu yulu mukyele yu.» 11Ne vane baguyake yu mu myogu myawu mure yikere gubegane gyoru mu dimanyi. 12Sesu agabusile yandi re: «Diteendu mu maambu ma Nzambi re: “Yiyamaange Fumwagu Nzambi.”» 13Ve vu masuge mootsu mumaange Sesu, mukolitsi aburugu ve yandi kwanga ne mu dikyesi dimosi diyelimine dikeroonde Nzambi.
Sesu abaande mudyanzu wandi gu Galilé.
14Sesu agabuge gu Galilé wubasu ne ngudi yi Dinyunyi Disuungeme. Tsaangwandi yitsamugu mu museengi wotsu. 15Aloonzenge gu bandagu tsi bibeengunu bi masaambulu, ne batu bootsu bakumisenge yandi.
Sesu abusu ne baandi
16Wisi wumoosi Sesu ayende gu Nasarete gu bungugu yandi. Mu wisi wukaloogi Basifu anyingene gu ndagu disaambulu navagenge yandi ne kale. Ne ateleme murange mabigu. 17Baveege yandi mugaande wu mubigitsi Isayi, anyangule wo ve yitsige giteendu re:
18«Dinyunyi di Fumu diyi mu me,
mumbare asoole me muyende guloonze tsaangu yiyinyi gu masaandi.
Asindige me muyambile bisi tsugu re yenu dimayobugu,
ne gu bange pafu re miisu menu mamabalugu,
asindige me muyobule babagoneritsugu maguge.
19Muloonze re: Yilime gigi re gikelabe batu bootsu manyi ma Fumu.»
20Ve yulu vane Sesu afurige mugaande, agabuse wo gu musalitsi, ne atsagele. Batu bootsu bababile gu ndagu disaambulu, miisu mawu mabile keke mu yandi. 21Kere vane Sesu abaande wuyambile yawu re: «Mabigu mameyulu yenu mateendu mu mugaande wu Nzambi mamesupuge ne munyi.» 22Bootsu bayambilenge bumweenyi bwandi ne bagibeme mu munoongu mabigu ma manyi maloonzenge yandi. Bayubulenenge re: «Wuwu sare mwaane Susefwa?» 23Sesu ayambile yawu re: «Mayatsi re yenu diguverile me noongu re: “Mubugitsi sabeelusi yibene.” Ne yenu digubeyambile me re: “Yetu ditseyulu tsaangu yi bimwiile byootsu bitsevage yu gu Kapernawum, sakoondi wuvage byo gu diimbu dyagu.”» 24Abekoonde re: «Nungyenze mayambile yenu, mubigitsi asakagobusu gu diimbu dyandi. 25Nungyenze mayambile yenu, mu dikyesi di mubigitsi Ili, gubile mbili bakwiili gu Israel, ve Nzambi asikige fule mu bilime bireru ne yirini, ne nzale yi yinene yidugulu mu tseengi yotsu. 26Ili asesindugu gu bakwiili bootsu ba Israel veengu gu mukwiili wu mweenyi, mwisi Sarepta gu museengi wu Sidon. 27Ne mu dikyesi di mubigitsi Ilisé gubile mbili batu ne makyedi gu Israel te gu yawu bootsu gusebeeluge mutu nisi wumoosi, veengu Naame mwisi Siri.»
28Ve yulu batu bootsu bababile gu ndagu disaambulu maambu mene, babase ne kabu. 29Yawu bateleme, bapunze Sesu gu diimbu ne bayende naandi gu yulu mukoongu wurungu Nasarete divule dyawu, muroonde wulikule yandi gu mbeengi. 30Te Sesu agyelugu, avyoge veganegarawu nuyendenge.
Sesu apunze dinyunyi didibi
31Kere vane Sesu agulumuge gu Kapernawum, divule di museengi wu Galilé; ne aloonzenge batu wisi wukaloogu. 32Bavure gibeme mumbare aloonzenge ne dinyaange dyotsu. 33Gubile mutu ne dinyunyi didibi gu ndagu disaambulu gu lonzenge Sesu ne yandi abwamugu pepe re: 34«O Sesu mwisi Nasarete, yiyagogule gu yetu, duke gune, mayatsi re yimitse nde gubunge yetu ne yire wuyelimine, yu wutsesoolu ne Nzambi!» 35Sesu abetile dinyunyi dyene, amuyambile re: «Rumbe, pule gugare mutu wuwu!» Ne dinyunyi di dibi divate, ne dilagise mutu ve ganegare piti gugayulusu yandi pyavi. 36Bootsu bavure gibeme ne bayambilenge yawu ne yawu re: «Nungyenze maame mabigu mane ngudi, agonerume ne dinyaange ne ngudi gu manyunyi mu wupule. Ne mo marepule!» 37Ne tsaangu yi Sesu yidugulu bitsige byootsu bi museengi.
Sesu abeeluse babeetsi
38Ve vate Sesu gu ndagu disaambulu, anyingene gu ndagu yi Simu. Adagise boyi bu Simu bu mugyetu abile ne yidine girage, ne vane bange ndagu baleende Sesu mubeeluse yandi. 39Aviindemine yandi nubetile yidine, ne gyo givu. Vane ne vane ateleme, ne abaande laambile yawu.
40Ve diviindemunu di wisi, bootsu bababile ne batu bane mabeelise ma minoongu minoongu babage yawu gu Sesu. Asunzile mutu mutu makake nubeeluse yawu. 41Manyunyi mamabi gaandi mavate mu mbili batu ne wubwamugu re: «Yinde Mwaane Nzambi!» Te abetile mo nukare mo wuyambile, mumbare manyunyi mene masetsiimbungu re yandi re Wusoolu ne Nzambi.
Sesu aloonzenge mu bandagu ba masaambulu
42Ne magyelu, Sesu avate gu divule, nuyende ve yitsige gigabile batu. Mbili batu bamubenenge, bapule ve yandi, baroonde re abilingi ke nawu. 43Te ayambile yawu re: «Bweedi mareyende guloonze tsaangu yiyinyi yi Bufumu bu Nzambi gu miseengi mimosi mumbare gine re yisalu gisindugu me ne Nzambi mudyanze.» 44Kere vane, aloonzenge mu bandagu ba masaambulu tsi museengi wu Sudé.
Selectat acum:
Luke 4: SNQ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
