Wepélisiananu 6
6
Mi sɛrɛle
(LvS 14:1–4; Rom 3:10–18)
1Mi kɛlɛle di pélisia aan wo tɛrɛ la, wo nélomu yaa, 2yé Bale benu munu lunu ye, léé, wa nɔnɔmi, yé wo wo si ’wo nanu nya, é sɔ wo lɛ fɛan zo, a zo. 3Yé Gakelebale léma: An léli ’ka dan vo lɛ mi gi yifaama lo. Munu a wimi nya é pla, yé wolé tɛrɛlalɛɛ é dan kɛlɛ lɛ sin yɔ suiɛdo.
4’Bɛ bléyi va, ’té gɔné glaliglalinu a tɛrɛ la. Yé ’bɛ zuo é ziin, dé Bale benu go munu lunu zuo, yé ’bɛnu né yaa wo lɛ, wolé nénu kɛlɛ nyanazannu nya, yé wo ɛ tɔ ye é li.
5Gakelebale a ye léé, munu a weple kɛlɛna é baba tɛrɛ la, yé wolé gi bɔrɔle faa a gona wenaané saa va yi faa do do ma. 6Gakelebale bli kyɛ dɔ yé a bli nɔla mi kɛlɛle ma tɛrɛ la. 7Yé Gakelebale léé: Mɛmalé maa mi kɛlɛ tɛrɛ laa? Mi lé maa kɛlɛ bɛ, maa dan a si lɛ tɛrɛ la tata; yee koo, winu koo, tawoplɛlawinu koo, lagi mianénu koo, maa dan wo faa si lɛ tɛrɛ la tata.
8Naa, Noé kɛlɛ mi zin nya Gakelebale yuɛ gi.
Noé ’yitagoro kɛlɛ
(Ébr 11:7; 1 Pi 3:19–20; 2 Pi 2:5–9)
9Noé lé nénu lé ke ’ko: Noé a mi zin nya, é a mi tegele nya ézé bléyi va. Noé tawoo Kazambale va.
10Noé né yaa négɔné nya yaa. Sɛm koo, Sam koo, Jafɛt koo, woo lé.
11Tɛrɛ sɛrɛ Gakelebale yuɛ gi, yé glawe kɛlɛle sɔɔla tɛrɛ faa la. 12Gakelebale tɛrɛ nagini yé é a ye léé, é sɛrɛ; mi faa ébo lé tawobɛ sɛrɛ tɛrɛ la.
13Yé Gakelebale lé Noé lɛ léé: Mi faa lé we nyaa; maa ɛ fe; naa, wo glawe kɛlɛle sɔɔla tɛrɛ faa la, amalé maa dan wo guru zana lɛ a gi, tɛrɛ boen koo é ziin. 14’Izé ’yitagoro kɛlɛ goféyili nya. ’I ’yitagoro gi bɔi kɔnnénu nya, yé ’i wele gié a gi valé a lala. 15Bé kɛlɛ ’ko zo: ’yitagoro sangi ’é kɛlɛ mɛtrɛ yɔ sɔrafié wɔlɛ vu. A ’wuola ’é kɛlɛ mɛtrɛ yɔ do wɔlɛ soru. A wuo nwale ’é kɛlɛ mɛtrɛ vu ta soru. 16’I fɛnɛti do pa a ma, yé ’bɛ wuo nwale loru ’é kɛlɛ mɛtrɛ buu. ’I duoli do kɛlɛ a san do la. ’I kɔn yaa dɔ é ke nwiin a gi. 17Maa dan lɛɛ blɛn zun lɛ tɛrɛ la, fɛ faa lé éé flin‐é la wuo, wo sɛrɛle we gi. Fɛnu faa lé ke tɛrɛ la, wo dan ga lɛ. 18Naa, maa gi pa do i va. I dan wɔra lɛ ’yitagoro gi. Bii valé i benu koo, i na koo, i be nanu koo, ka faa lé. 19Fɛ faa lé ke é yuɛma, ’i wo si fié fié gɔnɔ do do gi; ’i wo wɔra ’yitagoro gi yé wo vo é yuɛma i va. A gɔné ’é kɛlɛ do, yé a da ’é kɛlɛ do. 20Mianénu dɔgɔnɔ koo, flawinu dɔgɔnɔ koo, tawoplɛlawinu faa lé ke tɛrɛ la koo, wo gɔnɔ do do gi wo fié fié é dan da lɛ i va, i yuɛpale wo ta yé wo vo é yuɛma we gi. 21Yé bii, fɛnu faa lé wa blé, bé si yé é vo é tadɔle i va, bii koo, wo koo, kalé fɛblele nya. 22Yee lé Noé a kɛlɛ; we faa lé Bale a fe a lɛ, é a kɛlɛ.
Selectat acum:
Wepélisiananu 6: GOURU
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alliance Biblique de Cote d'Ivoire 1979