Wepélisiananu 16
16
Agaa lé we
(WP 21:9–21)
1Abram na Sarai ’ka né do kpen yaa lɛ Abram lɛ lo. Éjipiti le do a Sarai wuozan nya, wa laama Agaa. 2Yé Sarai lé Abram lɛ léé: Maa lé ma, Gakelebale an kɛlɛ sɔnzan nya. Ilé zanté, ’i go an wuole va, dé an bɔa nénu yele lɛ ’bɛ maa? Abram Sarai dére ’ma. 3Abram nyana Kanaan tɛrɛ la lɛɛ vu; ’bɛ zuo Abram na Sarai é wuozan Éjipiti le Agaa si, yé é a nɔ é zana Abram lɛ a na nya.
4Abram yi gyɛ Agaa va, yé ’bɛ bɔn si. Dé ébo ye bɔnzan nya, azan ’ka a yuɛ gi bɔ lɛ é dɛrɛ lo. 5Yé Sarai lé Abram lɛ léé: Wenaané lé i na ke a kɛlɛna an lɛ bɛ, ’é kɛlɛ bii ɛ zé nya ma. Maa an wuole nɔ i lɛ, yé é a ye léé, é bɔn a ’é ma, yé an ’ka a yuɛ gi bɔa é dɛrɛ lo. Gakelebale ’é maa valé bii lé we ble ma. 6Abram lé Sarai lɛ léé: I wuole ’ka ibo bɛ nya loo? Dé wean sɔ i lɛ, bé kɛlɛ a lɛ. Yé Sarai nyané pa Agaa ta yé é vɔ fli gi baa.
7Gakelebale lé lanje Agaa ye ’yibɔna sɔnɔ bwi gi; ’yibɔna lé ke Suré lé zi ta, yee lé. 8É léé: Agaa, Sarai wuole, i si kyɛɛn? Yé i go kyɛɛn? Lezan lé a lɛ léé: An vɔ anzan Sarai lee bwi gi. 9Yé Gakelebale lé lanje lé a lɛ léé: ’I nɔla izan va i pa gi, yé ibo pla a wuo bo kiéné nya. 10Gakelebale lé lanje lé a lɛ léé: Maa dan i kulunu kɛlɛ lɛ di; wo dan kɛlɛ lɛ kiɛre, ’té mi do ’ka bɔa wo nɔnɔle lɛ lo. 11Gakelebale lé lanje lé a lɛ léé: Bé ye, i bɔn a i ma. I dan né ’ko yaa lɛ gɔné nya. Gakelebale i dére ’ma ilé kleblele gi, bɛwemalé bé tɔ pa Ismaɛl. 12É dan kɛlɛ lɛ bélé bwi gi sokofale zo. É dan kɛlɛ lɛ munu faa nyanézan nya, yé munu faa é dan kɛlɛ lɛ a nyanézan nya é ziin, yé é dan nyana lɛ é zuanénu faa punma. 13É léé: Bale lé an yele zuo, an ’ka fɛ do ye lɛ ’ko loo? Bɛwemalé Gakelebale lé ’bɛ we fe a lɛ bɛ, é a tɔ laa Ata‐El‐roi. 14Amalé ’yiguru ’ko, wa laa Lakai‐roi ’yiguru. É a Kadɛs valé Barɛd worona.
15Agaa né yaa gɔné nya Abram zé nya. Yé né lé Agaa a yaa Abram lɛ, Abram a tɔ pa Ismaɛl. 16Yian nya lé Agaa Ismaɛl yaa Abram lɛ, ’té Abram lɛɛ a yɔ ziɛn wɔlɛ suiɛdo.
Selectat acum:
Wepélisiananu 16: GOURU
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alliance Biblique de Cote d'Ivoire 1979