Wepélisiananu 13
13
Abram go Kanaan tɛrɛ la é pai
1Abram si Éjipiti tɛrɛ la, yé é gié yirinwana bɛyilazia, yee valé é na, ’bɛ valé élé fɛnu faa nya, yé Lɔt go a va. 2Abram fua ble é baba; trubɛ koo, gɔɔli koo, kyan koo, wa a lee. 3Yé é si yirinwana bɛyilazia, yé é gié Bétɛl, yé é bɔ fɛana lé alé sɔkɔn ke é vinin, Bétɛl valé Ai worona, ana, 4fɛana lé é balebanna kɛlɛ é kyɛn bɛ, ana. Yé Abram Gakelebale tɔ laa ana mi.
Abram valé Lɔt kini ékema
(Mt 5:9)
5Lɔt lé, ’bɛ tawo Abram va bɛ, ’blanu koo, dirinu koo, sɔkɔnnu koo, wa ’bɛ lee é ziin. 6Yé ana tɛrɛ ’ka blɛn yé é wo fiénu zé bɔ lo. Wolé fɛnu a di, amalé wo ’ka bɔ lɛ nyanale lɛ ékeva lo. 7Yé Abram lé trubɛ tabinzannu koo, Lɔt lé trubɛ tabinzannu koo, wo we sia. ’Bɛ bléyi va Kanaan munu valé Férézi munu ana ’bɛ tɛrɛ la. 8Abram lé Lɔt lɛ léé: Ilé zanté, té we é kɛlɛ maa valé bii méléna lo ma; anlé trubɛ tabinmunu koo, ilé trubɛ?-?tabinmunu koo, té we do kpen é kɛlɛ wo méléna lo ma. Ko a mi do nya. 9Tɛrɛ faa ’ka i ’lɛ loo? Ko kini ékema ma. Dé i go bɛbolazia, ’maa go bɛyilazia. Yé dé i go bɛyilazia, ’maa go bɛbolazia. 10Lɔt é yuɛ vɔ, yé é Juudɛn yuu lé fɛna pɛblɛɛ ye, ’té ’yi yoro ana di. ’Té Kazambale ’ka tan Sɔdɔm valé Gɔmɔɔ kyɛ ble lɛ lo; ana a bélé Gakelebale lé féi zo. É a bélé Éjipiti tɛrɛ la zo fɔɔ é bɔ Soaa. 11Yé Lɔt Juudɛn yuu lé fɛna pɛblɛɛ si ézé nya, yé é go yirinwanazia. ’Bɛ zo lé wo kini ékema. 12Abram nyana Kanaan tɛrɛ la, yé Lɔt nyana fɛna pɛblɛɛ lé flanu ta yé é sɔkɔnnu dɔ fɔɔ Sɔdɔm. 13Sɔdɔm munu a nyané, yé woo wenyané blɛnblɛn kɛla Gakelebale ma.
Kazambale blivolɛdére fe Abram lɛ
(WP 15:18–21; 17:1–8; Mt 5:5)
14Lɔt valé Abram kinile ékema zuo, Gakelebale lé Abram lɛ léé: Fɛ lé i ke ana bɛ, ’i dɔ ana yé ’i yuɛ vɔ yirinwana valé yirivɔna, é valé yiri san fié gi, yé bé nagini. 15Yé tɛrɛ faa lé bé ye, maa dan a nɔ lɛ bii koo, ilé nénu koo, ka lɛ, lɛɛfaama zé nya. 16Maa dan ilé nénu kɛlɛ lɛ bélé tɛrɛ lé vun zo di. ’Bɛ ma, dé mi é bɔa lɛ é tɛrɛ lé vun nɔnɔ, ’té é bɔa ilé nénu nɔnɔle lɛ é ziin. 17’I nwa, ’i gié tɛrɛ sangi valé tɛrɛ ’wuo la, naa, maa dan a nɔ lɛ i lɛ.
18Abram élé sɔkɔnnu si, yé é da nyana lɛ Mamré lé sɛnéyilinu méléna, ’té é ke Ébrɔn sɔnɔ bɛ. É Gakelebale banna do kɛlɛ ’bɛna.
Selectat acum:
Wepélisiananu 13: GOURU
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alliance Biblique de Cote d'Ivoire 1979