Matiyu 8
8
Isa ka kunatɔ dɔ lasɛnɛya teme
Malɛkɛ 1.40-45; Luka 5.12-16
1Isa jii ka bɔ tini kɔkan, jama ba ka bila a kɔ. 2Wo waate, kunatɔ dɔ ka na k'i majii a kɔlɔ, a vɛɛ a yɛ: «Ǹ Kuntii, ni i ka diɲa, i yi sene ǹ lasɛnɛyala.» 3Isa k'a bolo lɔsama k'a tuu kɛ́ la k'a fɔ a yɛ, a vɛɛ: «M̀'ɛ diɲa, i la yi sɛnɛya.» Wo fɔ Isa bolo, a falikolo la ka sɛnɛya telemanin. 4Isa do vɛɛ a yɛ: «I y'alama, i kà min fɔ mɔɔ suu suu yɛ. Kɛɛ fɔ yi taa i jɛlɛ jiya salakalaseba la ka niilifen bɔ iwo Nabi Musa k'a jamali teme. Wo le kɛtɔ a jiyala bɛ la ko i la vɛ sɛnɛya.»
Isa ka sɔdasi kuntii dɔ ya bɔiden lakɛnɛya teme
Luka 7.1-10; Yohana 4.43-54
5Isa ka don Kapɛlɛnamu so kɔnɔ mingɛ, Lɔmu sɔdasi kuntii dɔ k'i madon a la k'a madiya, 6a vɛɛ: «Ǹ Kuntii, ǹa bɔiden lanin bon na, a fali faanin a ma. A do vɛ tɔlɔya bubale.»
7Isa vɛɛ a yɛ: «Ǹ taatɔ a lakɛnɛyala.»
8Sɔdasi kuntii vɛɛ: «Ǹ Kuntii, hɔlɔ tɛ ǹ ne k'a fɔ i yi don ǹa bon na. I do vɛ kuma kelen fɔla dein, ǹa bɔiden yi kɛnɛyale. 9Kamasɔlɔn ǹe fana yi dɔ le ya fanga kɔlɔ, ado sɔdasilu yi ǹa fanga kɔlɔ. M̀'ɛ a fɔla min yɛ: ‹Taa!›, wo yi taale. Ǹe do v'a fɔla min yɛ: ‹Na!›, wo yi nale. M̀'ɛ a fɔla ǹa bɔiden yɛ: ‹Min kɛ!›, a yi wo kɛle.»
10Wo mɛn Isa bolo, a ka kawakoya k'a fɔ a kɔbilabalu yɛ, a vɛɛ: «Ǹ'i tuɲa fɔ ài yɛ, m̀ ma limaniya min ɲɔɔzii ye ba Bani Isilankalu tɛma bene. 11#Luka 13.29.Ǹ'a fɔ ài yɛ, haijɛnɛ masaya waate lɔ, mɔɔ siyama kɛtɔ bɔla dunuɲa fan bɛ lɔ, ka na ai sii feetikɛya lɔ Nabi Ibulahima ni Isiyaka ni Janguba tɔɔfɛ. 12#Matiyu 22.13; 25.30; Luka 13.28.Kɛɛ mɔɔ minu fɛ tɛɛ ka kan ka kɛ Ala ya masaya la, wolu lafilitɔ divi lɔ banama, ai kasitɔ k'ai ɲii sii i ɲɔɔ na dimin bolo je.» 13Wo fɔ Isa bolo, a k'a fɔ sɔdasi kuntii yɛ, a vɛɛ: «Taa iya luu ma. I yi min ɲininna, wo kɛtɔ i yɛ ka bɛn iya limaniya ma.»
Wo waate kelen ne lɔ, sɔdasi kuntii ya bɔiden ka kɛnɛya.
Isa ka jangalotɔlu lakɛnɛya
Malɛkɛ 1.29-34; Luka 4.38-41
14Wo kɔ, Isa ka taa Piyɛli ya bon na, ka Piyɛli bilanmoso lanin ye nɛnɛgbani bolo. 15Isa k'a bolo tuu moso bolo la mingɛ, nɛnɛgbani ka bɔ a fali lɔ. A do k'i wuli ka gbadon a yɛ.
16Wo lon wulala, mɔɔlu ka na jinatɔ siyama le Isa fɛ. A tɛɛ jinalu gbɛnna ka bɔ mɔɔlu lɔ a kumakan ne le, ani ka jangalotɔlu bɛ lakɛnɛya. 17A ka kɛ ten fɔsa kuma min fɔnin Nabi Ezayi bolo, wo ma yi fa teme, ko:
«A ka maa tɔlɔyalu ta k'ai kɛ a kundoni ne,
ka maa jangalolu doni la a jɛlɛkanu kun.»
Isa kɔbiladenya ni aa tɔlɔya
Luka 9.57-62
18Isa ka jama ba ye mingɛ a laminin nɔ, a k'a jamali di a kɔbiladennu ma ko ai yi taa kɔɔ kɔma. 19Wo kɛ, seliya kalanmɔɔ dɔ k'i madon Isa la k'a fɔ a yɛ, a vɛɛ: «Kalanmɔɔ, i vɛ taala tɛɛ o tɛɛ lɔ, ǹ'i bilale i kɔ.»
20Isa do vɛɛ a yɛ: «Diɲa yi jɛɛkani bolo, ɲaa yi kɔnɔni bolo, kɛɛ dingila tɛ Mɔɔnivin Tanin bolo, a a nɔningɛ tɛɛminja.»
21A kɔbiladen dɔgbɛlɛ vɛɛ a yɛ: «Ǹ Kuntii, diɲa ǹ'i taa ǹ fa sudoon bene.»
22Kɛɛ Isa do vɛɛ a yɛ: «Bila ǹ kɔ. Fulenilu to je, ai y'ai fuleni ɲɔɔlu sudoon.»
Isa ka fɔɲɛ ba lɔsumaya teme tue
Malɛkɛ 4.35-41; Luka 8.22-25
23Wo kɔ, Isa ni a kɔbiladennu ka don kulun kɔnɔ ka taa. 24Telemanin, sanfɔɲɛ ba k'i wuli ka kɔɔ lajaman haan fɔɔ ji tɛɛ donna kulun kɔnɔ, wo k'a talan Isa tɛɛ sunɔɔ lɔ.
25Wo lɔ, a kɔbiladennu ka na k'a lakunun, ai vɛɛ: «Mɔ Kuntii! I yi mɔ lakisi! Mɔ satɔle!»
26Kɛɛ a do vɛɛ ai yɛ: «Àilu minu ya limaniya dɔɔyanin, mindɛ do y'a kɛla vɛ ài yi siyanna?» Wo fɔ a bolo, a k'i wuli ka kɔɔ ni fɔɲɛ jamali, ado kɔɔ ni fɔɲɛ lɔ ka sumaya tue.
27A kɔbiladennu ka kawakoya, k'a kɛ a fɔle i ɲɔɔ yɛ, ai vɛɛ: «Mɔɔ suu mindɛ le min ne? Hali fɔɲɛ ni kɔɔ gbu y'a kumakan labatola!»
Isa ka jina gbɛn kɛ́ fila lɔ teme
Malɛkɛ 5.1-20; Luka 8.26-39
28Ai wɔlinin kɔɔ tɛɛla ka se Gadalakalu makɛya lɔ, jinatɔ fila vɛ bɔla kabuluso la ka na Isa labɛn. Wolu faiyanin tɛɛ bubale, haan fɔɔ mɔɔ tɛɛ tɛ se timinna woja. 29Ai ka gbanɔ, ai vɛɛ: «Ala Denkɛ, mindɛ le ile ni ǹu wotɛ? I nanin mɔ jangataya le lɔ jani a waate yi se?»
30Wo k'a talan kɔsɛ kulu ba tɛɛ dɔnni kɛla je dafɛla lɔ. 31Jinalu vɛ Isa madiyala, ai vɛɛ: «Ni i ka mɔ gbɛn, i yi diɲa m'i taa don kɔsɛlu lɔ.»
32Isa do vɛɛ ai yɛ: «Ài yi taa!» Wo fɔ, jinalu ka bɔ kɛ́ fila wolu lɔ ka taa don kɔsɛlu lɔ. Ado kɔsɛlu bɛ vɛ tini lajiila bɔli le, ka don kɔɔ kɔlɔ k'ai bɛ faa.
33Min kɛnin jinatɔ fila la, kɔsɛkunnasiibalu vɛ bɔlila ka taa wo bɛ ɲafɔ mɔɔlu yɛ so kɔnɔ. 34Wo kɛ, sokɔnɔmɔɔlu bɛ vɛ nala ka Isa kunkɔlɔbɛn. Ai do ka Isa ye mingɛ, ai k'a madiya ko a yi bɔ ai makɛya lɔ.
Selectat acum:
Matiyu 8: MBT2023
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Manya Bible Translation, © SIM International, 2023
