Matiyu 12

Isa le Kuntii le Nɔningɛlon kunna

Malɛkɛ 2.23-28; Luka 6.1-5

1Nɔningɛlon dɔ, Isa nu timintɔla sɛnɛlu tɛma. Kɔɔn tɛɛ a kɔbiladennu la. Ai do vɛ sɛnɛfen tizan dɔlu bɔla k'a dɔn. 2Wo ye Falisilu bolo, ai do vɛɛ Isa yɛ: «A ye, i kɔbiladennu yi ko kɛla min ladaannin tɛ Nɔningɛlon!»

3Isa k'ai javi, a vɛɛ: «A yi di? Masakɛ Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan? 4A ka don mingɛ Alabatobon na, a ka bulu dɔlu ta, minu lasenin tɛɛ Ala ma. A ka wo dɔ dɔn, k'a dɔ di a taamaɲɔɔlu ma, k'a talan wolu ladaannin tɛɛ tɛ ale yɛ, kumatɛ a taamaɲɔɔlu ma, mafɔ salakalasebalu dein. 5Jalasa ài ma a sɛvɛnin ye Nabi Musa ya Taulati kɔnɔ ko salakalaseba minu yi baalela lɔhɔlɔmabonba la, wolu yi Nɔningɛlon seliyalu tiɲala, k'a talan wo tɛ jatela julumbuko le? 6Ǹ'a fɔ ài yɛ, dɔ vɛ jan min fisanin lɔhɔlɔmabonba le. 7#Matiyu 9.13.A sɛvɛnin kitabu kɔnɔ ko: ‹Henandeya diyanin vɛ ǹ yɛ ka timin kolofen salaka la.› Ni ài tɛɛ vɛ wo kɔlɔ lɔnna, ài tɛɛ tɛnala mɔɔlu jobaliyala, minu ma julumbu ta. 8Kamasɔlɔn Mɔɔnivin Tanin le Kuntii le Nɔningɛlon kunna.»

Isa ka jangalotɔ lakɛnɛya Nɔningɛlon teme

Malɛkɛ 3.1-6; Luka 6.6-11

9Isa bɔtɔla je, a ka taa don aiya Aladalibon na. 10Kɛ́ dɔ tɛɛ je min bolo faanin tɛɛ a ma. Mɔɔ dɔlu tɛɛ dailu ɲininna Isa jalakiko lɔ. Wo lɔ, ai k'a maɲininga, ai vɛɛ: «Ka mɔɔ lakɛnɛya Nɔningɛlon, wo ladaanyine?»

11 # Luka 14.5. Wo lɔ, Isa vɛɛ ai yɛ: «Jene y'ài tɛma, ni aa saa den kelen k'a ben diɲa lɔ Nɔningɛlon, a tɛnala a labɔla? 12Ài do k'a lɔn ne k'a fɔ ko mɔɔnivin kulugbeleyanin vɛ saa le, kɛlɛ? Wo lɔ saa, a ladaanyine feu ka kokein kɛ mɔɔnivin yɛ Nɔningɛlon.» 13Wo fɔ Isa bolo, a vɛɛ kɛ́ wo yɛ: «I i bolo lɔsama.»

Kɛ́ k'a bolo lɔsama mingɛ, wo ka kɛnɛya ka kɛ iwo a bolo tɔ kelen. 14Wo kɛ, Falisilu ka bɔ je ka taa ai kun bilin i ɲɔɔ ma Isa faako lɔ.

Isa yi Ala ya bɔiden tanin ne le

15Isa ka wo mɛn mingɛ, a ka bɔ je ka taa, ado jama ba tɛɛ a kɔ. A k'ai bɛ lakɛnɛya. 16A k'a fɔ ai yɛ k'a magbeleya ko ai kà a mangan lajɛzɛn. 17Wo bɛ ka kɛ fɔsa kuma min fɔnin Nabi Ezayi bolo, wo ma yi fa teme, ko:

18«Ǹa bɔiden ne ne,

ǹ na min tala mɔɔlu tɛma.

A do yi ǹ diyananmɔɔ le, min yi ǹ kɔnɔlɔdiyala bubale.

Ǹ kɛtɔ ǹ Nii Sɛnɛyanin lajiila a kɔkan,

a do kɛtɔ Ala ya telenmandeyako lasena siboloma gbɛlɛlu ma.

19A tɛnala sɔsɔyali kɛla,

a do tɛnala a kan labɔla.

Mɔɔlu tɛnala a gbanɔkan mɛnna siya kɔkan.

20A tɛnala gbɔɔ kalinin lɔkalikalila.

A do tɛnala fitina lasala, hali taa min yi sa boloma.

A totɔ siya wo le kan haan fɔɔ a vɛ telenmandeya ladonna fan bɛ lɔ.

21Ado sibolomalu bɛ kɛtɔ ai jei siila a tɔɔ le la.»

Isa ya seetiiya bɔnin min ne?

Malɛkɛ 3.20-30; Luka 11.14-23; 12.10

22Wo kɔ, mɔɔlu ka na kɛ́ dɔ le, jina tɛɛ vɛ min ɲa gbɛ, ani k'a kɛ bobo le. Isa k'a lakɛnɛya mingɛ, a tɛɛ kuma ni yeni kɛla. 23Mɔɔ bɛ ka kawakoya, ai vɛɛ: «Ai y'a fɔla mɔɔ min ma ko Dawuda Bɔzɔn, ale le min ne?» 24#Matiyu 9.34; 10.25.Falisilu ka wo mɛn mingɛ, ai vɛɛ: «Kɛ́ min tɛ jinalu gbɛnna mɔɔlu lɔ boloɲa gbɛlɛ ma ni Biyɛzɛbɔ ya seetiiya tɛ, min yi jinalu ya kuntii le.»

25Kɛɛ Isa tɛɛ k'ai miliya lɔn. Wo lɔ, a vɛɛ ai yɛ: «Ni jamana min mɔɔlu ka falan a ma k'i ɲɔɔ kɛlɛ, wo jamana yi tiɲale feu. Ni sokɔnɔmɔɔlu, niwotɛ bonnamɔɔlu ka falan a ma k'i ɲɔɔ kɛlɛ, wo so niwotɛ wo bon yi halakile. 26Wo boloɲa kelen ma, ni Soitana yi Soitana le gbɛnna, a a jɛlɛ le kɛlɛla. Aa masaya yi to a ma di wo lɔ? 27A yi di? Ni ǹe yi jinalu gbɛnna mɔɔlu lɔ Biyɛzɛbɔ ya seetiiya le lɔ, wo lɔ, ài kɔbiladennu do? Wolu yi jinalu gbɛnna mɔɔlu lɔ jene ya seetiiya lɔ? Wo le y'a ma, ài kɔbiladennu gbu le kɛtɔ àiya kiti tɛɛla. 28Kɛɛ ni a ka talan ǹ'i jinalu gbɛnna mɔɔlu lɔ Ala Nii Sɛnɛyanin ya seetiiya le lɔ, wo vɛ kɛla, Ala ya masaya vɛ ban sena ài tɛma.

29«Mɔɔ tɛ se donna kɛ́ fangama ya bon na k'a bolofennu suɲa, ni a ma wo tii mina kunfɔlɔ le k'a sili, kɛlɛ? Wo vɛ kɛla, a yi sene wo tii ya bon latɛla tɛtɛ.

30 # Malɛkɛ 9.40. «Mɔɔ min tɛ ǹ fɛ, wo tii yi ǹ juu le le. Mɔɔ min do tɛ m̀ madɛmɛnna mɔɔlu ladɛnko lɔ, wo tii yi mɔɔlɔjɛzɛnba le le. 31Wo le y'a ma, ǹ'a fɔla ài yɛ, mɔɔlu yi julumbu minu bɛ tala, ani ai yi lafeyalikan suu suu fɔla, wo bɛ lɔ yi sene kotola. Kɛɛ mɔɔ mɔɔ vɛ lafeyalikan fɔla Nii Sɛnɛyanin ma, wo tii ma tɛ koto tuun. 32#Luka 12.10.Ni mɔɔ mɔɔ ka lafeyalikan fɔ Mɔɔnivin Tanin ma, a ma yi sene kotola. Kɛɛ ni mɔɔ mɔɔ ka lafeyalikan fɔ Nii Sɛnɛyanin ma, wo tii ma tɛ koto dunuɲa min nɔ. A do ma tɛ koto habadan.»

Kɔlɔman yi lɔnna a den ne ma

Luka 6.43-45

33 # Matiyu 7.20; Luka 6.44. «Kɔlɔmanden kein yi bɔla kɔlɔman ya ɲumaya le lɔ. Kɔlɔmanden kɛwon do yi bɔla kɔlɔman ya kɛwonya le lɔ, kamasɔlɔn kɔlɔman yi lɔnna a den ne ma. 34#Matiyu 3.7; 23.33; Luka 3.7; Matiyu 15.18; Luka 6.45.Àilu fɔnfɔnnidennu! Ài dajoo man ɲin. Ài yi se kuma kein fɔla di wo lɔ? Mɔɔ josokun lafanin ko min na, a da yi wo le fɔla. 35Mɔɔ kein yi kokein ne kɛla, kamasɔlɔn wo yi bɔla a josokun kein ne lɔ. Kɛɛ do, mɔɔ yon yi koyon ne kɛla, kamasɔlɔn wo yi bɔla a josokun yon ne lɔ.

36«Kɛɛ ǹ'a fɔ ài yɛ, mɔɔlu yi kuma kolon suu suu fɔla, ai kɛtɔ wo bɛ dandɛɛli kɛla kititɛɛlon. 37Kamasɔlɔn i kumakannu fɛ, Ala kɛtɔ i lajola, niwotɛ k'i jobaliya.»

Falisilu k'a fɔ ko Isa yi kawananko dɔ kɛ

Malɛkɛ 8.11-12; Luka 11.29-32

38 # Matiyu 16.1; Malɛkɛ 8.11; Luka 11.16. Wo kɔ, seliya kalanmɔɔ dɔlu ni Falisi dɔlu k'a fɔ Isa yɛ, ai vɛɛ: «Kalanmɔɔ, m'a fɛ le i yi kawananko tɔɔmase dɔ kɛ mɔ ɲana.»

39 # Matiyu 16.4; Malɛkɛ 8.12. Isa k'ai javi, a vɛɛ: «Bi mɔɔlu yi limaniyabali le le ani kɔnɔlɔgbeyamɔɔ. Ai yi kawananko tɔɔmase dɔ ɲininna, kɛɛ tɔɔmase foi tɛnala jiyala ai la mafɔ Nabi Yunusa ta. 40Kamasɔlɔn Nabi Yunusa ka tele sawa ni su sawa kɛ jɛɛ ba kɔnɔ teme, Mɔɔnivin Tanin fana kɛtɔ tele sawa ni su sawa kɛla kabulu lɔ ten ne. 41Kititɛɛlon, Ninivekalu wulitɔ ka bi mɔɔlu jobaliya, kamasɔlɔn Nabi Yunusa ka wolu kawani waate min nɔ, ai k'ai dajoo mafalin. Tandainɔ yi ne, dɔ vɛ jan min fisayanin Yunusa le. 42Kititɛɛlon, Seba jamana mosomasa wulitɔ ka bi mɔɔlu jobaliya, kamasɔlɔn ale ka bɔ haan fɔɔ dunuɲa dan na, ka na a tolomalɔ Masakɛ Sulimana ya hangilimaya la. Tandainɔ yi ne, dɔ vɛ jan min fisayanin Sulimana le.

43«Ni jinajuu ka bɔ mɔɔ dɔ lɔ, a yi timintiminna fuwa lɔ k'a nɔningɛya ɲinin. Ni a do ka koli, 44a kɛtɔ a fɔla a jɛlɛ yɛ, a vɛɛ: ‹Fɔ ǹ'i seikɔ m̀ bɔya lɔ.› A do vɛ nala, a kɛtɔ bon lakolon yena, je matɛnin vɛ k'a lɔbɛn. 45Wo vɛ kɛla, jina taatɔ jina wolowulan ladɛnna, minu yonyanin ale gbu le, ai natɔ donna k'ai makɛ je. Ado jinatɔ wo laban kɛwonyatɔle ka timin a kunfɔlɔ ta la. Bi mɔɔ yonnu ta kɛtɔ ten ne.»

Isa ba ni a dɔɔkɛlu

Malɛkɛ 3.31-35; Luka 8.19-21

46Isa ka to kumala jama fɛ, a ba ni a dɔɔkɛlu ka na k'i lɔ luu ma, ko ai y'a fɛ ka kuma a fɛ. 47Mɔɔ dɔ vɛɛ Isa yɛ: «I ba ni i dɔɔkɛlu lɔnin luu ma. Ai y'a fɛ ka kuma i fɛ.» 48A ka mɔɔ wo javi, a vɛɛ: «Jene yi m̀ ba le? Ǹ dɔɔkɛlu yi jene ni jenelu le?» 49A do k'a bolo telen a kɔbiladennu la k'a fɔ, a vɛɛ: «M̀ ba ni ǹ dɔɔkɛlu le ve. 50Kamasɔlɔn mɔɔ mɔɔ vɛ ǹ Fa sawo kɛla min yi haijɛnɛ, wo tii yi ǹ dɔɔkɛ ni ǹ dɔɔmoso ni m̀ ba le le.»

Selectat acum:

Matiyu 12: MBT2023

Evidențiere

Partajează

Copiază