Luka 22
22
Isa juulu k'a minako ɲaɲinin teme
Matiyu 26.1-5, 14-16; Malɛkɛ 14.1-2, 10-11; Yohana 11.45-53
1Bulufununbali Selilon ma tɛɛ vɛ sulunya, ai y'a fɔla min ma ko Timinkunna Selibɔ. 2Wo ma, salakalase kuntiibalu ni seliya kalanmɔɔlu tɛɛ Isa faako ɲaɲininna doon nɔ, kamasɔlɔn ai tɛɛ siyanna jama ɲa.
3Wo waate, Soitana ka don Judasi josokun nɔ, ai y'a fɔla min ma ko Isekaliyɔti, min tɛɛ Isa ya keladen mɔɔ tan ni fila (12) dɔ le. 4Judasi do ka taa salakalase kuntiibalu ma, ani lɔhɔlɔmabonba lakana kuntiibalu, ka kuma ai fɛ ka bɛn Isa donko ma ai bolo. 5Ai do ka sawa wo lɔ, ka lahedi ta a yɛ ko ai kɛtɔ wɔli dila a ma. 6Judasi do ka diɲa wo ma. Ka ta wo waate ma, Judasi tɛɛ Isa donko ɲaɲininna ai bolo jama ɲina ma.
Isa kɔbiladennu ka Timinkunna Selilon dɔnnifen lɔbɛn teme
Matiyu 26.17-25; Malɛkɛ 14.12-21; Yohana 13.21-30
7Bulufununbali Selilon ka se, Jahudiyalu tɛɛ ka kan ka saa bolan kannatɛɛ lon min na ka Timinkunna Selilon salaka bɔ. 8Wo lɔ, Isa ka Piyɛli ni Yohana kelaya, a vɛɛ: «Ài yi taa Timinkunna Selilon dɔnnifen lɔbɛn mɔ yɛ.»
9Ai do k'a maɲininga, ai vɛɛ: «I y'a fɛ m'a lɔbɛn mineja?»
10Isa vɛɛ ai yɛ: «Ài vɛ donna so kɔnɔ, ài kɛtɔ ài ɲɔɔmɛnna kɛ́ dɔ le, jidaa yi min kun. Ài yi bila a kɔ. A vɛ donna bon min na, 11ài y'a fɔ lutii wo yɛ, ài vɛɛ: ‹Kalanmɔɔ bolo ko a jiyabon yi min ne, ale ni a kɔbiladennu kɛtɔ Timinkunna Selilon dɔnni kɛla tɛɛminja?› 12Kɛ́ wo kɛtɔ sangaso sanmabon ba dɔ jiyala ài la min lɔbɛnnin kobɛn. Ài yi dɔnnifen lɔbɛn woja.»
13Wo fɔ, Piyɛli ni Yohana ka bɔ je ka kolu talan iwo Isa k'a fɔ ai yɛ teme. Ai do ka Timinkunna Selilon dɔnnifen lɔbɛn je.
Mɔ Tii ya dɔnni laban
Matiyu 26.26-30; Malɛkɛ 14.22-26
14A waate senin, Isa ni aa keladennu k'i sii dɔnnikɛya lɔ. 15A do vɛɛ ai yɛ: «A lɔɔ tɛɛ ǹ na bubale ka Timinkunna Selilon dɔnni min kɛ ài fɛ jani ǹ'i tɔlɔya. 16Kamasɔlɔn ǹ'a fɔ ài yɛ, ǹ tɛnala dɔnni min suu kɛla butu, haan fɔɔ a kɔlɔ ma vɛ fala Ala ya masaya lɔ.»
17Wo fɔ, a ka jiyafɛ ta ka balika bɔ Ala yɛ. A do vɛɛ ai yɛ: «Ài kelenkelenna bɛ y'a ta k'a dɔ min a lɔ. 18Kamasɔlɔn ǹ'a fɔ ài yɛ, ǹ tɛnala lɛzɛnji minna butu, haan fɔɔ Ala ya masaya la vɛ nkɛnɛmayala lon min na.»
19Wo fɔ Isa bolo, a ka bulu ta ka balika bɔ Ala yɛ, ka ban k'a lɔkalikali k'a di ai ma. A do vɛɛ: «Ǹ falikolo le min ne, min dinin àiya ko lɔ. Ài yi min kɛ k'ài hangili to ǹ nɔ.» 20Dɔnni ban kɔ, Isa ka jiyafɛ fana ta k'a di ai ma. A do vɛɛ ai yɛ: «Jiyafɛ min yi salatikan kula tɔɔmase le le, ka bɛn ǹ jeli bɔnko ma àiya ko lɔ. 21Kɛɛ do, mɔɔ min kɛtɔ ǹ janvala, wo siinin ǹ dafɛ dɔnnikɛya lɔ jan. 22Mɔɔnivin Tanin faatɔle iwo a latɛɛnin teme Ala bolo. Kɛɛ do, mɔɔ min kɛtɔ a janvala, gbalo yi wo tii yɛ!»
23Ai do v'i ɲɔɔ maɲiningala ko jene y'ai tɛma min yi diɲa ka ko suu wo kɛ.
Jene yi ɲamɔɔ le?
24 #
Matiyu 18.1; Malɛkɛ 9.34; Luka 9.46. Wo waate, sɔsɔyali dɔ k'i wuli ai tɛma ko jene ka kan ka jate ɲamɔɔ le. 25Wo lɔ, Isa vɛɛ ai yɛ: «Siboloma gbɛlɛ masakɛlu yi kuntiiya kɛla aiya jamanadennu kunna diyanigbeya boloma. Ai do y'a fɔla ai jɛlɛ ma ko koɲumakɛbalu. 26#Matiyu 23.11; Malɛkɛ 9.35.#Matiyu 20.25-27; Malɛkɛ 10.42-44.Kɛɛ a do man kan ka kɛ ten ài tɛma. Mɔɔ min yi ɲamɔɔ le ài tɛma, wo tii y'a jɛlɛ kɛ iwo denni. Mɔɔ min do yi kuntiiya la, wo tii yi kɛ iwo bɔiden. 27#Yohana 13.12-15.A yi di? Bɔiden min yi gbadonna ani aa kuntii min siinin dɔnnikɛya lɔ, a jene buɲanin a dɔ le? Min siinin dɔnnikɛya lɔ, kɛlɛ? Wo bɛ n'a kɛ, ǹ kɛyine ài tɛma iwo bɔiden.
28«Àilu le tonin ǹ kɔ ǹa lɔsumani ko bɛ lɔ. 29Wo lɔ saa, ǹ'i masaya dila ài ma, iwo ǹ Fa na masaya dila m̀ ma teme, 30#Matiyu 19.28.fɔsa ài yi dɔnni kɛ ani k'ài min ǹ fɛ ǹa masaya lɔ, ani k'ài sii masayasiifennu lɔ ka Bani Isilankalu ya kabila tan ni fila (12) ya kiti tɛɛ.»
Isa k'a fɔ ko Piyɛli kɛtɔ i banna a lɔ
Matiyu 26.31-35; Malɛkɛ 14.27-31; Yohana 13.36-38
31Wo kɔ, Isa vɛɛ: «Simɔn, Simɔn, i tolomalɔ. Soitana vɛ see madali ài lɔsumanko lɔ, iwo malo ni a fofo wotɛ yi bɔla teme. 32Kɛɛ m̀'ɛ Ala dali i yɛ, fɔsa iya limaniya kana koli. Ni ile do ka seikɔ m̀ ma, i i badenmalu sɛmɛdon.»
33Wo fɔ Isa bolo, Piyɛli vɛɛ: «Ǹ Kuntii, ǹ lɔbɛnnin ka taa i fɛ kaso la, ani ka faa i fɛ!»
34Isa do vɛɛ a yɛ: «Piyɛli, ǹ'a fɔ i yɛ, donon tɛnala kumunna bi, ni i m'a fɔ siɲa sawa le ko i ma ǹ lɔn.»
Isa ya keladennu y'ai jɛlɛ lɔbɛn
35 #
Matiyu 10.9, 10; Malɛkɛ 6.8, 9; Luka 9.3; 10.4. Isa k'a fɔ aa keladennu yɛ kɔtunun, a vɛɛ: «Ǹ n'ài kelayala waate min nɔ k'a fɔ ko ài kà taa wɔlibilabɔlɔ le, niwotɛ taamabɔlɔ, niwotɛ samala, jalasa wo waate, ài ka gbala le fen ko lɔ?»
Ai k'a javi, ai vɛɛ: «Ɛnɛn, mɔ ma gbala foi lɔ.»
36Isa vɛɛ: «Kɛɛ tandainɔ yi ne, ni wɔlibilabɔlɔ ka kɛ mɔɔ min bolo, wo tii y'a ta, ani taamabɔlɔ. Ni do siyamifan tɛ mɔɔ min bolo, wo tii y'aa faaniba fele k'a dɔ san. 37Kamasɔlɔn ǹ'a fɔ ài yɛ, ko min sɛvɛnin kitabu kɔnɔ ka bɛn m̀ ma, fɔ wo ma yi fa, ko: ‹Ai na a kɔndɛla koyonkɛbalu le tɛma.› Wo ma, wo mafa waate ma vɛ sulunya.»
38A kɔbiladennu do vɛɛ a yɛ: «Mɔ Kuntii, i ɲa kaa, siyamifan fila le ne.»
A do vɛɛ ai yɛ: «Wo vɛ je bɔ.»
Isa ka Ala dali Zeituna tini kɔkan teme
Matiyu 26.36-46; Malɛkɛ 14.32-42
39Wo kɔ, Isa ka bɔ je ka taa Zeituna tini kɔkan iwo a deinin tɛɛ a kɛla teme. A kɔbiladennu do ka bila a kɔ. 40Ai senin je, a vɛɛ ai yɛ: «Ài yi Ala dali, fɔsa ài ma kana nɛɛ k'ài bila koyon nɔ.»
41Wo fɔ, a k'i mataa ai la dɔɔni ka se kawa lafiliya kelen nɔ, k'i majii Aladaliko lɔ. 42A do vɛɛ: «Ǹ Fa, ni i ka diɲa a ma, i kà ǹ lamin jiyafɛ min nɔ. Kɛɛ ǹe gbu sawo kà kɛ, mafɔ i sawo.»
43Wo waate kelen, mɛlɛka dɔ ka bɔ haijɛnɛ ka na k'a sɛmɛdon. 44Isa ka to josomakasi lɔ, a k'a dɔ la aa madaili kɔkan, a talaji vɛ benbenna duu ma iwo jeli.
45A wɔlinin Ala dalila, a v'i wulila ka taa a kɔbiladennu fɛlɔ k'ai talan sunɔɔ lɔ, kamasɔlɔn ai tɛɛ vɛ sɛyɛ josomakasi boloma. 46A do vɛɛ ai yɛ: «Mindɛ lɔ ài yi sunɔɔ lɔ? Ài wuli, ài yi Ala dali fɔsa ài ma kana nɛɛ k'ài bila koyon nɔ.»
Isa minako
Matiyu 26.47-56; Malɛkɛ 14.43-50; Yohana 18.3-11
47Isa ka to kumala, jama k'i kun labɔ ai ma. Judasi, min tɛɛ aa keladen mɔɔ tan ni fila (12) dɔ le, wo le tɛɛ jama ɲa. A do v'i madonna Isa la k'a sumu a tama lɔ. 48Kɛɛ Isa do vɛɛ a yɛ: «Judasi, i yi janva donna Mɔɔnivin Tanin ma sumuli le le?»
49A kɔbiladennu k'a ye mingɛ ko jama vɛ na Isa minaya lɔ, ai k'a maɲininga, ai vɛɛ: «Mɔ Kuntii, mɔ tɛ ai kɛlɛ maa siyamifannu le?» 50Ai lɔ kelen ka aa siyamifan fili ka salakalase kuntiiba ya jɔn gbasi, k'a bolokini tolo tɛɛ a la.
51Kɛɛ Isa vɛɛ: «Ài y'a to ten!» A do k'a bolo tuu kɛ́ wo tolo la k'a lakɛnɛya.
52Wo kɛ, Isa k'a fɔ salakalase kuntiibalu yɛ, ani lɔhɔlɔmabonba lakana kuntiibalu, ani kɛmɔbalu minu nanin tɛɛ a minaya lɔ, a vɛɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benkannikɛba kanma teme? 53#Luka 19.47; 21.37.Lon bɛ, ǹ tɛɛ ài fɛ lɔhɔlɔmabonba la, kɛɛ do, ài m'i lɔja ka m̀ mina je. Kɛɛ àiya waate le ne, ani divi ya seesɔlɔn waate.»
Piyɛli k'i ban Isa lɔ teme
Matiyu 26.57-58, 67-75; Malɛkɛ 14.53-54, 66-72; Yohana 18.12-18, 25-27
54Wo kɛ, ai ka Isa mina ka taa a le salakalasebalu ya kuntiiba ya bon na, k'a talan Piyɛli tɛɛ ai kɔ poon. 55Ai wɔlinin taa bilala luu tɛma k'i sii a kunna, Piyɛli fana k'i sii ai tɛma.
56Wo kɛ, bɔidenmoso dɔ ka na ka Piyɛli siinin ye taamɛnɛn kɛnɛya la. A do k'a lasaa kobɛn k'a fɔ, a vɛɛ: «Kɛ́ min fana tɛɛ Isa le fɛ jɔ!»
57Kɛɛ Piyɛli k'i ban a ma, a vɛɛ: «Moso, m̀ ma kɛ́ wo lɔn.»
58A lɔ ma mɛn, mɔɔ gbɛlɛ ka Piyɛli ye k'a fɔ a yɛ, a vɛɛ: «Ile fana y'ai dɔ le le.»
Kɛɛ Piyɛli do vɛɛ a yɛ: «Kɛ́, ǹ tɛ ai dɔ le dɛ!»
59Lɛlɛ kelen jate timinnin kɔ, mɔɔ gbɛlɛ ka na k'a fɔ k'a magbeleya, a vɛɛ: «Tuɲa le, kɛ́ min tɛɛ Isa le fɛ, kamasɔlɔn ale fana yi Galileka le le.»
60Wo fɔ, Piyɛli vɛɛ a yɛ: «Kɛ́, m̀ m'iya kuma ɲaye.»
Piyɛli ka to kumala, donon ka kumun telemanin. 61Wo waate kelen nɔ, mɔ Kuntii k'i ɲa tilimin k'i ɲa kaa Piyɛli lɔ. Piyɛli hangili ka bila mɔ Kuntii kumakan nɔ, ko: «Jani donon yi kumun bi, i kɛtɔ a fɔla siɲa sawa le ko i ma ǹ lɔn.» 62Wo kɛ, Piyɛli ka bɔ luu ma ka kasi josomakasa boloma.
Ai ka Isa lafeya k'a gbasi teme
Matiyu 26.67-68; Malɛkɛ 14.65
63Wo waate, Isa minabalu k'a lafeya ni a gbasi damina. 64Ai do k'a ɲa lasili ka to a maɲiningala, ai vɛɛ: «Kelaya kɛ vɛ! Mɔɔ min n'i gbasila, i yi wo tii tɔɔ fɔ.» 65Ai ka to a jɛvɛla ka jɛlɛbɔ a lɔ.
Ai ka taa Isa le kititɛɛya lɔ teme
Matiyu 26.59-66; Malɛkɛ 14.55-64; Yohana 18.19-24
66Kɛnɛ bɔnin, salakalase kuntiibalu ni seliya kalanmɔɔlu k'aiya kititɛɛjama ladɛn ka na Isa lalɔ ai ɲakɔlɔ. 67Ai do vɛɛ a yɛ: «I y'a fɔ mɔ yɛ ni ile le Masa Tɔɔmasenin ne.»
Isa k'ai javi, a vɛɛ: «Ni ǹ k'a fɔ ài yɛ, ài tɛnala lala ǹ na. 68Ni ǹe fana k'ài maɲininga, ài tɛnala ǹ javila. 69Kɛɛ ǹ'a fɔ ài yɛ, ka ta bi ma, Mɔɔnivin Tanin kɛtɔ a siila Seebɛtii Ala bolokini fannɔ.»
70Wo fɔ Isa bolo, ai bɛ vɛɛ a yɛ: «Jalasa Ala Denkɛ le i le le?»
Isa k'ai javi, a vɛɛ: «Àilu gbu v'a fɔ ko ǹe le.»
71Ai do vɛɛ: «Mɔ mako tɛ mɔɔ ya seleyakan na butu. Ǹu gbu vɛ ban a jɛlɛkanu kumakan mɛnna!»
Selectat acum:
Luka 22: MBT2023
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Manya Bible Translation, © SIM International, 2023
