Luka 19

Isa ni Zakiya

1Wo kɔ, Isa ka don Jɛliko ka so lɔtimin. 2Kɛ́ dɔ tɛɛ je, min tɔɔ tɛɛ ko Zakiya. Niisɔɔnminabalu ya kuntii le tɛɛ a le, ani nafolotii. 3A lɔɔ tɛɛ a la k'a ɲa la Isa kan ani k'a lɔn. Kɛɛ a tɛɛ tɛ se ka bɛn aa sulunya ma ani jama wala jate. 4A do vɛ bɔlila ka taa jama ɲa ka jɛlɛ toloju la fɔsa a yi Isa ye, kamasɔlɔn wo tɛɛ timinna siya wo le kɔkan. 5Isa senin toloju kɔlɔ, a k'a ɲa lajɛlɛ k'a fɔ Zakiya yɛ, a vɛɛ: «Zakiya, i i lateleja, i yi jii. Fɔ ǹ'i jiya i fɛ le lɔ bi.»

6Wo fɔ, Zakiya k'i jii telemanin ka Isa labɛn sawa boloma. 7Wo ye mɔɔlu bolo, ai bɛ vɛ Isa mafɔla, ai vɛɛ: «A diɲanin ka julumbutɔ kɛ a jetii le.»

8Kɛɛ Zakiya k'i lɔ k'a fɔ mɔ Kuntii yɛ, a vɛɛ: «Ǹ Kuntii, i tolomalɔ! Ǹ'i m̀ bolofennu lɔtalala k'a fan kelen di bolokolonnu ma. Ni a k'a talan ǹ na mɔɔ dɔ tɔɲɔla k'a bolofen mina a la, ǹ kɛtɔ wo ɲɔɔzii naani laseila wo tii ma.»

9Wo fɔ Zakiya bolo, Isa vɛɛ a yɛ: «Bi kisiko vɛ se bon min na, kamasɔlɔn kɛ́ min fana yi Nabi Ibulahima bɔzɔn dɔ le le. 10Kamasɔlɔn Mɔɔnivin Tanin nanin fɔsa a yi mɔɔ filininnu ɲinin k'ai lakisi.»

Bɔiden sawa ma sana

Matiyu 25.14-30

11Mɔɔlu ka to ai tolomalɔla kuma wolu la, Isa ka sana dɔ la ai yɛ kamasɔlɔn ai ma tɛɛ vɛ sulunya Jelusalɛmu so la, ado mɔɔlu tɛɛ ai milila ko Ala ya masaya lankɛnɛmayatɔ wo waate gbugbu le lɔ. 12Wo le k'a kɛ, Isa vɛɛ: «A ka kɛ faamaden dɔ le le, min tɛɛ taama boloma jamana majaannin dɔ lɔ, fɔsa a yi masaya sɔlɔn ka na k'i sii aa jamanamɔɔlu kunna. 13A do ka aa bɔiden mɔɔ tan kili ka wɔligbɛ gbana tan lɔtala ai wotɛ. A do vɛɛ ai yɛ: ‹Ài yi julaya kɛ a lɔ ka sii ǹ kɔsei la.›

14«Kɛɛ aa jamanakɔnɔmɔɔlu k'a lagbeyaɲɛ. Wo lɔ, ai ka keladennu lataa a kɔ ko ai t'a fɛ a yi masaya kɛ ai kunna.

15«A wɔlinin masaya sɔlɔnna ka seikɔ, a ka aa bɔidennu kili, a na wɔli dila minu ma, fɔsa a a lɔn ai na tɔnɔ mindɛ sɔlɔnna julaya lɔ. 16Bɔiden kunfɔlɔ ka na k'a fɔ a yɛ, a vɛɛ: ‹Ǹ kuntii, i na wɔligbɛ gbana kelen min tola m̀ bolo, m̀'ɛ wɔligbɛ gbana tan tɔnɔ sɔlɔn wo kɔkan.› 17Masakɛ do vɛɛ a yɛ: ‹I gbu n'a kɛ yi la kobɛn, bɔiden ɲuma! Komi i na kɛla lanande le ko fitinin nɔ, wo le y'a ma, ǹ kɛtɔ i lasiila so tan ne kunna.› 18Wo kɔ, bɔiden filana ka na k'a fɔ a yɛ: ‹Ǹ kuntii, i na wɔligbɛ gbana kelen min tola m̀ bolo, m̀'ɛ wɔligbɛ gbana loolu tɔnɔ sɔlɔn wo kɔkan.› 19Masakɛ do vɛɛ a yɛ: ‹Ile fana kɛtɔ i siila so loolu le kunna.› 20Wo kɔ, a dɔgbɛlɛ ka na k'a fɔ a yɛ, a vɛɛ: ‹Ǹ kuntii, a ye. Iya wɔligbɛ gbana le ne. A ladalonin tɛɛ m̀ bolo faani lɔ. 21Ǹ tɛɛ siyanna i ɲa, kamasɔlɔn iya ko gbeleyayine. I yi fen ne tala, i ma min bila je. I do yi malo kalila, i ma min sɛnɛ.› 22Masakɛ do vɛɛ a yɛ: ‹Ile bɔiden kɛwon! Ǹ kɛtɔ i jobaliyala ka bɛn i jɛlɛkanu dalakan ne ma. I tɛɛ k'a lɔn ǹa ko gbeleyayine, ani ko ǹ'i fen ne tala, m̀ ma min bila je, ani ko ǹ'i malo kalila, m̀ ma min sɛnɛ. 23Wo lɔ saa, mindɛ kɛnin i ma taa ǹa wɔli bila wɔlilamalabon na, fɔsa ǹ tɛɛ tɔnɔ sɔlɔn a la ǹ nanin min tɛ yi ne?›

24«Wo fɔ masakɛ bolo, a vɛɛ a dafɛmɔɔlu yɛ: ‹Ài yi wɔli wo mina a la, k'a di wɔligbɛ gbana tan tii ma.› 25Kɛɛ ai do vɛɛ a yɛ: ‹Masakɛ, wɔligbɛ gbana tan ne yi wo bolo butu!› 26#Matiyu 13.12; Malɛkɛ 4.25; Luka 8.18.Kɛɛ masakɛ do vɛɛ ai yɛ: ‹Ǹ'a fɔ ài yɛ, ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali minni y'a bolo, wo minatɔle a la. 27#Matiyu 25.14-30.Ǹ juulu koni, minu tɛɛ tɛ a fɛ ǹ'i masaya kɛ ai kunna, ài yi na ai bɛ le jan k'ai faa ǹ ɲakɔlɔ.› »

Isa ka don Jelusalɛmu sofalini kɔkan teme

Matiyu 21.1-11; Malɛkɛ 11.1-11; Yohana 12.12-19

28Isa wɔlinin sana wo lala, a vɛ bilala jama ɲa ka taa Jelusalɛmu. 29A masulunyanin Betifase ni Betani sonilu la, a ka se tini dɔ ma, ai y'a fɔla min ma ko Zeituna tini. Wo lɔ, a ka aa keladen mɔɔ fila lataa ai ɲa, 30k'a fɔ ai yɛ, a vɛɛ: «Soni min yi mɔ ɲa ve, ài yi taa je. Ài vɛ donna so kɔnɔ, ài kɛtɔ sofalini bolan dɔ silinin yena, mɔɔ m'i sii ba min kɔkan bene. Ài y'a fɔlin ka na a le jan. 31Ni mɔɔ dɔ k'ài maɲininga ko: ‹Mindɛ lɔ ài y'a fɔlinna?›, ài vɛɛ wo tii yɛ: ‹Mɔ Kuntii le mako y'a la.› »

32Keladen fila wolu ka bɔ je ka taa a talan iwo Isa k'a fɔ ai yɛ teme. 33Ai tɛɛ sofalini bolan fɔlinna waate min nɔ, a tiilu ka na k'a fɔ ai yɛ, ai vɛɛ: «Ài yi sofalini fɔlinna mindɛ lɔ?» 34Ai do ka wolu javi, ai vɛɛ: «Mɔ Kuntii mako y'a la.» 35Wo fɔ, ai ka sofalini bolan ta ka taa a le Isa fɛ. Ai do k'aiya faanilu lala sofalini kɔkan, ka ban ka Isa lajɛlɛ a kɔkan. 36A taatɔla, mɔɔlu vɛ aiya faanilu lɔfɛzɛnna siya kɔkan a ɲa. 37Isa k'i masulunya Jelusalɛmu la ka se Zeituna tini lajii lɔ mingɛ, a kɔbiladen jama ba vɛ sawala ka kɛ Ala tanule kan ba lɔ ka bɛn kawanankolu bɛ ma, ai na minu yena.

38Ai vɛɛ:

«Duwawu yi masakɛ yɛ min yi nala mɔ Tii tɔɔ lɔ!

Hɛlɛ yi kɛ haijɛnɛ!

Magbiliyali yi kɛ Ala yɛ haijɛnɛ dingila kɔlɔtanin nɔ!»

39Falisi dɔlu ka to jama tɛma k'a fɔ Isa yɛ, ai vɛɛ: «Kalanmɔɔ, a fɔ i kɔbiladennu yɛ ko ai yi jeden.»

40Isa do k'ai javi, a vɛɛ: «Ǹ'a fɔ ài yɛ, ni ai ka jeden, hali kawakulunnu gbu gbanɔtɔ.»

Isa ka kasi teme ka bɛn Jelusalɛmu ma

41Isa masulunyanin Jelusalɛmu la ka so ye, a vɛ kasila ka bɛn a ma, a vɛɛ: 42«Ni i tɛɛ vɛ hɛlɛ sɔlɔnɲa lɔnna bi lon min nɔ, wo tɛɛ bɛnne i ma. Kɛɛ wo doonnin i ma yi ne. 43Lon dɔ sentɔ, i juulu natɔ i lamininna fan bɛ lɔ, k'iya siya bɛ tɛɛ fɔɔ k'i bila jiin nɔ. 44Ai kɛtɔ ile ni iya mɔɔlu halakila, hali iya kawakulun fila gbu tɛnala tola i ɲɔɔ kɔkan, kamasɔlɔn Ala nanin bɔla i ma waate min nɔ, i ma wo lon jate ko le!»

Isa ka julalu gbɛn ka bɔ lɔhɔlɔmabonba luu kɔnɔ teme

Matiyu 21.12-17; Malɛkɛ 11.15-19; Yohana 2.13-22

45Wo kɔ, Isa ka don lɔhɔlɔmabonba luu kɔnɔ, ka julalu gbɛn damina k'ai labɔ je. 46A do vɛɛ ai yɛ: «A sɛvɛnin kitabu kɔnɔ, ko: ‹Ǹa bon kɛtɔ Aladalibon ne le.› Kɛɛ ài do vɛ je kɛ sonnu doonya le.»

47 # Luka 21.37. Isa tɛɛ mɔɔlu kalanna lon bɛ lɔhɔlɔmabonba luu kɔnɔ. Salakalase kuntiibalu ni seliya kalanmɔɔlu ni jamana ɲamɔɔlu tɛɛ a faako ɲaɲininna, 48kɛɛ ai tɛɛ tɛ se, kamasɔlɔn Isa ya ko tɛɛ vɛ mɔɔ bɛ kun mina. Ai bɛ tɛɛ ai tolomalɔla a la kobɛn.

Selectat acum:

Luka 19: MBT2023

Evidențiere

Partajează

Copiază