Yohana 1
1
Ala Kumakan
1A damina lɔ, Kumakan tɛɛ je. Kumakan wo tɛɛ Ala fɛ, ado Kumakan wo yi Ala le le. 2Kumakan do tɛɛ Ala fɛ a damina lɔ. 3Fen bɛ la ka dan ale le sabu la, hali fen kelen gbu ma dan a kɔ. 4Niimaya yi sɔlɔnna ale le fɛ, ado niimaya wo na kɛla kɛnɛya le adamadennu yɛ. 5Kɛnɛya wo yi mɛnɛnna divi lɔ, divi do ma see sɔlɔn a ma.
6 #
Matiyu 3.1; Malɛkɛ 1.4; Luka 3.1, 2. Ala ka kɛ́ dɔ kelaya, min tɔɔ tɛɛ ko Yaya. 7A do ka na ka kɛ kɛnɛya wo masele le, fɔsa bɛ yi limaniya a sabu la. 8Ale gbu tɛɛ tɛ kɛnɛya wo le, mafɔ a ka na ka kɛ sele le kɛnɛya wo ma. 9Kɛnɛya bɛlɛbɛlɛ min yi kɛnɛya dila bɛ ma, wo tɛɛ nala dunuɲa.
10A tɛɛ dunuɲa kɔnɔ, dunuɲa do la ka dan ale le sabu la, kɛɛ dunuɲa tɛɛ ma a lɔn. 11A ka na a jɛlɛkanu mɔɔlu fɛlɔ, kɛɛ a jɛlɛkanu mɔɔlu ma ai bolo sii a kɔlɔ. 12Kɛɛ mɔɔ minu k'ai bolo sii a kɔlɔ ka limaniya a ma, a ka see di wolu bɛ ma k'ai kɛ Ala den ne. 13Ai ma kɛ Ala den ne iwo adamadennu yi den sɔlɔnna teme. Ai do ma sɔlɔn ka bɛn mɔɔlu sawo ma, mafɔ Ala sawo.
14Kumakan ka kɛ adamaden ne k'i sii mɔ tɛma. Mɔ do na aa magbiliyali yena, ale Denkɛ kelenpesa min Fa na a lanala aa magbiliyali lɔ, nɛɛma ni tuɲandeya dafanin min nɔ.
15Yaya tɛɛ seleya dila ka bɛn a ma. A do k'a kan labɔ, a vɛɛ: «Ǹ kan tɛɛ min ma, ale le ne, ǹ ko: ‹Mɔɔ dɔ natɔ ǹ kɔ min buɲanin ǹ ne, kamasɔlɔn jani ǹ tɛɛ sɔlɔn, ale tɛɛ je.› »
16Mɔ bɛ v'a dɔ sɔlɔn aa nɛɛma dafanin nɔ, ka nɛɛma dɔ kafon a dɔ kɔkan. 17Kamasɔlɔn seliya dinin Nabi Musa le sabu la, kɛɛ nɛɛma ni tuɲandeya nanin Masa Tɔɔmasenin Isa le sabu la. 18Mɔɔ suu suu ma Ala ye ba a ɲa la bene. Kɛɛ ale kelenpesa min ni Ala yi kelen ne, min siinin mɔ Fa Ala tɔɔfɛ, wo vɛ mɔ lalɔnni Ala ya ko la.
Yaya ya seleyakan
Matiyu 3.1-12; Malɛkɛ 1.1-8; Luka 3.15-17
19Yaya ya seleyakan le ne, Jahudiya kuntiilu ka salakalasebalu ni Levi kabiladen dɔlu kelaya a ma waate min nɔ ka bɔ Jelusalɛmu. Ai do ka taa ka Yaya maɲininga, ai vɛɛ: «Jene i le le?»
20A do m'i ban ai javila, mafɔ k'a lagbɛ, a vɛɛ: «Ǹ tɛ Masa Tɔɔmasenin ne.»
21Ai do k'a maɲininga, ai vɛɛ: «Jene i le le wo lɔ? Nabi Iliya le i le le?»
A do vɛɛ: «Ɛnɛn, ǹe tɛ wo le.»
Ai k'a maɲininga kɔtunun, ai vɛɛ: «A yi di wo lɔ? Ile le Kelaba le min ka kan ka na?»
A vɛɛ: «Ɛnɛn.»
22Wo fɔ a bolo, ai do vɛɛ a yɛ: «Jene i le le wo lɔ? Javili di mɔ ma, fɔsa m'i taa wo fɔ mɔ kelabalu yɛ. I y'a fɔla di i jɛlɛ ma?»
23Wo lɔ, Yaya k'ai javi Nabi Ezayi ya kuma le le, a vɛɛ:
«Mɔɔ min yi gbanɔla fuwa lɔ ko:
‹Ài yi siya latelen mɔ Tii yɛ!›
Ǹe le wo tii le.»
24Falisilu na mɔɔ minu kelayala, 25wolu ka Yaya maɲininga, ai vɛɛ: «Mindɛ lɔ i yi mɔɔlu makola k'a talan i tɛ Masa Tɔɔmasenin ne, niwotɛ Nabi Iliya, niwotɛ Kelaba?»
26Yaya k'ai javi, a vɛɛ: «Ǹ'i makoli kɛla ji le le, kɛɛ mɔɔ dɔ y'ài tɛma, ài ma min lɔn. 27Ale le natɔ ǹ kɔ, kɛɛ hali ka aa samala julu fɔlin a yɛ, ǹe dɔɔyayine wo ma.»
28Ko wolu bɛ ka timin Betani so le dafɛ Julidɛn kɔɔ kɔma, Yaya tɛɛ mɔɔlu makola tɛɛminja.
Ala ya Saa Bolan
29Wo kɛnɛbɔlon, Yaya ka Isa natɔla ye a ma k'a fɔ, a vɛɛ: «Ài ɲa kaa! Ala ya Saa Bolan ne ve le, min yi julumbu bɔla dunuɲamɔɔlu ma. 30Ǹ kan tɛɛ min ma, ale le ne, ǹ ko: ‹Mɔɔ dɔ natɔ ǹ kɔ min buɲanin ǹ ne, kamasɔlɔn jani ǹ tɛɛ sɔlɔn, ale tɛɛ je.› 31Ǹe koni tɛɛ m'a lɔn kunfɔlɔ le, kɛɛ ǹ nanin mɔɔlu makola ji le le, fɔsa a la yi nkɛnɛmaya Bani Isilankalu yɛ.»
32Yaya ka seleya min di, a vɛɛ: «Ǹ na Nii Sɛnɛyanin jiitɔla yena ka bɔ sangbolo lɔ iwo poponi, a do ka to a fɛ. 33Ǹe koni tɛɛ m'a lɔn kunfɔlɔ le, kɛɛ min na ǹ kelayala ka mɔɔlu mako ji le, wo tii le n'a fɔla ǹ yɛ, a vɛɛ: ‹I vɛ Nii Sɛnɛyanin jiitɔla yena ka to mɔɔ min fɛ, wo tii le kɛtɔ mɔɔlu makola Nii Sɛnɛyanin ne.› 34Ǹ na wo kɛnin yena, ani m̀'ɛ seleya di ko Ala Denkɛ le a le.»
Isa ka a kɔbiladen kunfɔlɔlu kili teme
35Wo kɛnɛbɔlon, Yaya ni a kɔbiladen fila tɛɛ lɔnin je kɔtunun. 36A do ka Isa timintɔla ye k'a fɔ, a vɛɛ: «Ài ɲa kaa! Ala ya Saa Bolan ne ve le!»
37Yaya kɔbiladen mɔɔ fila ka aa kuma wo mɛn mingɛ, ai do vɛ bilala Isa kɔ. 38Isa k'i ɲa tilimin mingɛ k'ai ye a kɔ, a k'ai maɲininga, a vɛɛ: «Ài yi mindɛ kɔ?»
Ai do vɛɛ a yɛ: «Labi, i jiya yi min ne?» (Labi kɔlɔ le ko Kalanmɔɔ).
39Isa k'ai javi, a vɛɛ: «Ài yi na, ài kɛtɔ je yena.»
Wo lɔ, ai ka taa ka a makɛya ye ka tele tɔ kɛ je, kamasɔlɔn tele ma tɛɛ vɛ jii.
40Mɔɔ fila minu ka Yaya kumakan mɛn ka bila Isa kɔ, wo kelen tɔɔ le tɛɛ ko Andele, min yi Simɔn Piyɛli dɔɔni le. 41Ale le ka taa kunfɔlɔ le ka a kɔlɔkɛ Simɔn talan k'a fɔ a yɛ, a vɛɛ: «Mɔ na Alimasihu yena!» (Alimasihu kɔlɔ le ko Masa Tɔɔmasenin.)
42Wo ma, Andele ka taa Simɔn ne Isa fɛ. Isa do k'i ɲa kaa a lɔ k'a fɔ a yɛ, a vɛɛ: «Yohana denkɛ Simɔn ne i le le, ai do kɛtɔ a fɔla i ma ko Sefasi.» (Sefasi ni Piyɛli yi tɔɔ kelen ne le. Ai kɔlɔ le ko Kawa.)
Filipe ni Nataniyɛli ka bila Isa kɔ teme
43Wo dusagbɛlon, Isa ka miliya ta ko a yi taa Galile koovi lɔ. A do ka Filipe ye k'a fɔ a yɛ, a vɛɛ: «Na, i yi bila ǹ kɔ.» 44Filipe bɔnin tɛɛ Betisaida so le la, Andele ni Piyɛli ya so. 45Filipe ka Nataniyɛli ye mingɛ, a do vɛɛ a yɛ: «Mɔɔ min ya ko sɛvɛnin Nabi Musa ya Taulati ni kela dɔgbɛlɛlu ya kitabulu kɔnɔ, mɔ na wo tii yena. Nazalɛtika Isa le, Jusufu denkɛ.»
46Nataniyɛli do vɛɛ a yɛ: «Jalasa kokein yi sene bɔla Nazalɛti?»
Filipe k'a javi, a vɛɛ: «Na, i y'a ye.»
47Isa ka Nataniyɛli natɔla ye a ma mingɛ, a ka kuma ka bɛn a ma, a vɛɛ: «Bani Isilanka gbugbu le min ne, min joso lɔgbɛnin.»
48Wo lɔ, Nataniyɛli k'a maɲininga, a vɛɛ: «I na ǹ lɔnna di?»
Isa k'a javi, a vɛɛ: «Ǹ na i siinin yena toloju kɔlɔ jani Filipe tɛɛ i kili.»
49Nataniyɛli k'a javi, a vɛɛ: «Kalanmɔɔ, Ala Denkɛ le i le le, ani Isilan masakɛ!»
50Isa do vɛɛ a yɛ: «Ǹ n'a fɔ mingɛla i yɛ, ǹ ko, ǹ n'i yena toloju kɔlɔ, wo le na i limaniyala m̀ ma? I kɛtɔ ko gbɛlɛlu yena minu buɲanin vɛ wo le!»
51A do vɛɛ kɔtunun: «Ǹ'i tuɲa fɔ ài yɛ, ài kɛtɔ sangbolo dalakanin yena ka Ala ya mɛlɛkalu ye jii ni jɛlɛla Mɔɔnivin Tanin kunna.»
Selectat acum:
Yohana 1: MBT2023
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Manya Bible Translation, © SIM International, 2023
