APAN AQAO: 3
3
Byu Mho Dao: Magyo" Ra" Khyo
1Ana"-lhao maui wa Asang Mao"So kad' to" ra" gug'nyhug' mae" pyag' thao" ra" ja: ngad: ra". Lhao maui wa ai: myiqe: re khyae khug mae yaug: ra" agae alhab' mae" shi: re: dazo: ge,- ga: Mao"So wa gaigai: yao: ni" shid' tao re ta" ra" i? ga: myid' ra".
2-3Ailao" Myiqe: wa- khyae agaung: mae yaug: ra" agae nho: ashi: mae" je yang: khyae mae" sag' gae khogae mae" shi: rere: nga" shid' zo: gai: zo" ra". Mao"So wa nga" shid' tao re ai: sag' gae mae" ashi: re mazo: nae"- tin: lhao" re: maye: tin: nae" ta" to" ra". Nga" shid' tao zo" re wa nga" shid' tao shid: li" nae" ga: phaug' tau" ra".
4Lhao maui wa ai wa madang ngad: ra"- ni" shid' tao mashid genae"- 5Mao"So airu: ta" ru wa ni" shid' tao ai: shi: re zo: gelao" ni" shid' tao wa Mao"So we' dau: li" mung: gai: ru we' magai: rure ba: kho' li" genae" rure Mao"So ba yang: ta" ru ngad: ra"- ga: phaug' tau" ra". 6Ai: myiqe: wa sag' gae wa gyai yaung" ru we' ashi: qu" zo: nug sho' gai: rure myao: ra". Amung: yao: wa khoqhi" sho' mug' pho: pha,jhi" ba: li" nae" rure myid' ra". Airumung: yao: wa ai: ashi: re phyo' yu yang: zo" ra". Yao: wa dajhid' re yao" yham sang pho" re byid' ra". Yao: re: ai: shi: re zo" ra". 7Yao: shid' tao ai: shi: re bin: zo: we' yao: shid' tao wa ba: gyo" rure qo" yu mung: yao: shid' tao gaung pyad' ngad: rure beim" li" ako". Airumung: yao: tao wa pho' ham" vho' re khyab' jhui mung: yao: tao yao" gaung re nghoe' ako".
8Ai:- myi" thao re Asang Mao"So wa khyae khug mae su" lhau thoe re yao: tao the' gyo" ako". Amung: yao: tao wa sag' gae jham: agyo: mae vho' jo; ako". 9Ngadqere: Asang Mao"So wa yauggai re nao khai: mae na: i? ga: khai: ke' ra".
10Yauggai wa khyae khug mae ni" thoe re ngo the' gyo"- ngo wa gaung pyad' ngad: rumung: gyaug yang: vho' jo; ga: tau" ra".
11Mao"So wa Ni" shid' tao gaung pyad' ngad ko" rure khag' ta" kyo" ra" i? Ngo dazo: ge, ein: ta" to" ra" shi: re naotao zo: vako" i? ga: myid' ra".
12Yauggai wa- Nao: yang cemae ngo we' daga" nha: to: byid' ra" myiqe: wa ngore ai: shi: byid: mung: ngo zo: va" ga: phaug' tau" ra".
13 Asang Mao"So wa ai: myiqe: re Pe"mung: nao ceru re kad' i? ga: myid' ra".
Myiqe: wa lhao maui wa ai: shi: re zo: nae" qhid' mae" ngore mhug' pyag' ra" ga: tau" ra".
Mao"So Dao: Kho' Ra" Khyo
14Ailao" Asang Mao"So wa lhaomaui re ce: mathao mae nao wa qobo dae qhug' li" nae". Ce: nhang: kheim: re gug'nyhug' alhab' mae" nao za: qhug' kham zo: ca" ra". Ana" mae" thoe gu: nao yao" vae: dug' yang: yoe" lhau: li" nae". Nao daui: na: ra" ayo, gu: mae nao wa myid zhai: zo: ca" li" nae". 15Ngo wa nao re we' myiqe: re yao: cao: jho" nghang: nhao nae"- yao" zo: dau qe we' ni" zo: dau qe wa khonhae" re: gyevo qe ngad: li" genae". Yao" zo: dau qe wa ni" au: re be, khyoe' li" genae"-nao wa yao: bam: khonhag' thaung: thao re thoe" li" nae"- ga: ta" ra".
16Amung: Mao"So wa myiqe: re ngo wa ni" nho: gaung la" rumae qug: khai: myo" laug: li" nhao mung: zo:khau no no: li" nae". Ceru: boe" sho' ngadqere: nao wa naoyao" yham sang pho" re o kao bau: ra" myid bo: jo; shi nae". Nao wa yao" qao: mae na: ca" li" nae"- ga: ta" ra".
17Yao: wa yauggai re Nao wa ni" yham sang myhi" mho dao: re gyo: mung: ngo dazo: ein: ta" to" ra" shi: re nao zo" ra". Nao airu: kad' ruyang myid gaung wa nhang: kheim: zao" li" nae". Nao wa ni" qhid' mae" zo:ve laug sho' qo" sho' ni" pyad geim" mae mau" zaui: qam: ke' ca" li" nae". 18Myid gaung wa myo, gae jham we' zau: kyin jham re yaug: thug' li" nhao mung: nao wa agae lae" jham re zo: ca" li" nae". 19Nao re akhyao kad' yu: ra" myid zhai: khyo nao dam: tug' lo" yo, joe" sho' nao wa mau" zaui: qam: ke' mung: bau kyoe: thug' yang: khao" zo: ca" li" nae". Nao wa myid zhai: mae" kad' yu: ru ngad mung: myid zhai: dam: boe" lo" li" nae" ga:ta" ra".
20Adam wa yao" yham sang myhi" re Eva ga: mhang" byid' ra". Pe"mung:ga"re yao: wa xao su byu alhab' nho: yao: myhi" ngad: ra". 21Asang Mao"So wa Adam we' yao" yham sang myhi" qhid' mae" shoqid mai bau: re kad' mung: yao: shid' tao re panglai: byid' ra".
Adam We' Eva Re Khyae Khug Mae" Nhao: Thug' Ke' Ra" Khyo
22Ai: thao Asang Mao"So wa ana" byu wa ngonhaung" mae" dayaug we' dau: li" mung: gai: ru we' magai: rure ba: kho' ra" laba lajhao pha,jhi" re qo" ava". Yao: wa ai: kao so' byid' ra" ashi: re phyo' yu mung: aire zo: yang: apyad ato daui: na nae" akhang" magai: byid: ngad: ra"- ga: ta" ra". 23Airumung: Asang Mao"So wa yao: re ai: Edin khyae mae" nhao: thug' ke' mung: yao: re akhyao kad' yu: ra" myid gaung re mau" zaui: yang: zo: nhao: ra". 24Aimung: yao: wa ai: khyae ba thug' shad' mae kherubin re nha: to: mung: shad' khao: ngo" khyo lhang: na: ra" myishae de; ra" shae re to: byid' ra". Ceru wa kao so' byid' ra" sag' gae khyo dayaug yaug te' li" na: rure gug: gam nae" qhid' mae" ngad: ra".
Selectat acum:
APAN AQAO: 3: LHCL
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Bible Society of Myanmar 2009