Luka 9
9
On eki elshiniń tapsırma alıwı
(Mat 10:5-15; Mrk 6:7-13)
1Iysa qasına on eki shákirtin shaqırıp alıp, olarǵa barlıq jinlerdi quwıp shıǵarıwǵa hám awırıwlarǵa shıpa beriwge kúsh hám biylik berdi. 2Qudaydıń Patshalıǵın járiyalap, awırıw adamlarǵa shıpa beriw ushın olardı jiberip, 3Iysa bılay dedi:
– Jolǵa hesh nárse: tayaq ta, qalta da, nan da, aqsha da, artıq kiyim de almańlar. 4Qaysı úyge kirseńler de, ol jerden ketkenińizshe, sol úyde bolıńlar. 5Eger bir qalada sizlerdi qabıl almasa, sol qaladan shıǵıp baratırıp, olarǵa eskertiw retinde ayaqlarıńızdaǵı shańdı qaǵıp ketińler.
6Shákirtler jolǵa shıqtı. Olar hámme jerde Xosh Xabardı járiyaladı hám awırıwlarǵa shıpa berip, awıllardı aralap júrdi.
Iysa hám Hirod
(Mat 14:1-12; Mrk 6:14-29)
7Úlke húkimdarı Hirod bolıp atırǵan barlıq waqıyalar haqqında esitip, tınıshsızlanıp qaldı. Sebebi geybirewler: «Yaqıya ólimnen qayta tirilipti» dese, 8basqalar: «Iliyas payda bolıptı» dep, jáne birewler: «Burınǵı payǵambarlardıń biri tirilipti», – deytuǵın edi. 9Al Hirod: «Yaqıyanıń basın kestirgen edim-ǵo. Endi mınaday islerdi islep atır dep, men esitken Adam kim boldı eken?» – dep Iysanı kóriwdiń jolın izlestirdi.
Iysanıń bes mıńnan aslam adamdı toyǵızıwı
(Mat 14:13-21; Mrk 6:30-44; Yuxn 6:1-14)
10Elshiler qaytıp kelip, islegen hámme isleri haqqında Iysaǵa aytıp berdi. Iysa Ózi menen birge tek olardı ǵana alıp, Betsayda dep atalǵan qalaǵa#Luk 9:10 Betsayda dep atalǵan qalaǵa – Bazı qoljazbalarda «Betsayda degen qalaǵa jaqın jerdegi bir shólge». ketti. 11Biraq xalıq bunı bilip, Iysanıń izinen keldi. Iysa olardı jaqsı qabıl alıp, olarǵa Qudaydıń Patshalıǵı haqqında ayttı hám shıpaǵa mútáj adamlarǵa shıpa berdi.
12Kún kesh bola baslaǵanda, on eki elshisi Iysanıń aldına kelip:
– Xalıqtı jiber. Átiraptaǵı awıl-elatlarǵa barıp, túneytuǵın jer menen azıq-awqat tapsın. Óytkeni bizler bir elsiz jerdemiz-ǵo, – dedi.
13Biraq Iysa olarǵa:
– Olarǵa sizler awqat berińler, – dedi.
– Bizler barıp, sonsha adamǵa azıq satıp almasaq, bes nan menen eki balıqtan basqa hesh nársemiz joq, – dedi shákirtleri.
14Sebebi ol jerde bes mıńǵa shamalas er adam bar edi.
Iysa shákirtlerine:
– Olardı eliw-eliwden topqa bólip otırǵızıńlar, – dedi.
15Shákirtleri solay islep, hámmesin jerge otırǵızdı. 16Iysa bes nan menen eki balıqtı alıp, aspanǵa qarap olar ushın Qudayǵa shúkirlik etti. Olardı sındırıp, xalıqqa tarqatıw ushın, shákirtlerine berdi. 17Hámme jep toydı. Awısqan bóleklerin jıynap, úlken on eki sebet toltırdı.
Petrdiń Iysanıń Masiyx ekenligin moyınlawı
(Mat 16:13-19; Mrk 8:27-29)
18Kúnlerdiń birinde Iysa awlaq jerde duwa etip turǵanda, shákirtleri de Onıń menen birge edi. Iysa olardan:
– Xalıq Meni kim dep sanaydı? – dep soradı.
19Shákirtleri juwap berip bılay dedi:
– Shomıldırıwshı Yaqıya dep sanaydı, al bazıları Iliyas, jáne basqaları: «Burınǵı payǵambarlardıń biri tirilip kelipti», – desedi.
20Iysa olardan:
– Al sizler Meni kim dep sanaysızlar? – dep soradı.
Petr Oǵan:
– Sen – Qudaydıń jibergen Masiyxısań, – dep juwap berdi.
Iysanıń Óz ólimi hám qayta tiriliwi haqqında bildiriwi
(Mat 16:20-28; Mrk 8:31-38)
21Iysa bul tuwralı hesh kimge aytpawların olarǵa qatań eskertti de:
22– Adam Ulı kóp azap shegip, aqsaqallar, bas ruwxaniyler hám diniy muǵallimler tárepinen qabıl alınbay óltiriliwi hám úshinshi kúni qayta tiriliwi tiyis, – dedi.
23Sonda Iysa hámmege bılay dedi:
– Kim de kim Maǵan ergisi kelse, ózinen keshsin hám hár kúni óz atanaq aǵashın arqalap, Meniń izime ersin. 24Kim de kim óz janın saqlamaqshı bolsa, onı joǵaltadı, al kim de kim óz janın Men ushın joǵaltsa, ol onı saqlap qaladı. 25Eger adam pútkil dúnyanı iyelegeni menen, óz janın joytıp, ózine zıyan keltirse, bunnan oǵan ne payda? 26Kim de kim Mennen hám Meniń sózlerimnen arlansa, Adam Ulı da Óziniń, Ákesiniń hám muxaddes perishtelerdiń saltanatında kelgende, onnan arlanadı. 27Sizlerge shının aytaman: bul jerde turǵanlardıń geybirewleri Qudaydıń Patshalıǵın kórmegenshe, ólmeydi.
Iysanıń túr-túsiniń ózgeriwi
(Mat 17:1-8; Mrk 9:2-8)
28Bul sózlerdi aytqannan soń segiz kúndey ótkende, Iysa Petr, Yuxan hám Yaqıptı qasına alıp, duwa etiw ushın tawǵa shıqtı. 29Iysa duwa etkende, Onıń túr-túsi ózgerdi, kiyimleri de appaq túske enip, jarqırap ketti. 30Sonda eki er adam Onıń menen sóylesip turǵan edi. Bular Muwsa menen Iliyas edi. 31Olar ullı saltanat penen kórinip, Iysanıń jaqında Erusalim qalasında dúnyadan ótip, Qudaydıń erkin orınlawı tiyis ekeni haqqında sóylesti. 32Al Petr menen onıń qasındaǵılardı kúshli uyqı basqan edi. Olar oyanıp ketip, Iysanıń ullılıǵın hám Onıń menen turǵan eki er adamdı kórdi. 33Olar Iysanıń janınan kete baslaǵanda, Petr Iysaǵa:
– Ustaz, bul jerde bolǵanımız qanday jaqsı! Bizler úsh qos qurayıq: birewin Saǵan, birewin Muwsaǵa, birewin Iliyasqa, – dedi.
Ol ne aytqanın ózi bilmedi.
34Petr usılardı aytıp turǵanda bir bult payda bolıp, olardı qapladı. Shákirtler bult ishine kirgende qorqısıp qaldı. 35Sonda bulttan:
– Bul – Meniń tańlap alǵan Ulım, Onıń aytqanın tıńlańlar! – degen saza esitildi.
36Dawıs tınıp qalǵannan soń, Iysanıń jalǵız Ózi qaldı. Shákirtleri tis jarıp, kórgenleri haqqında sol kúnleri hesh kimge aytpadı.
Iysanıń jin urǵan balanı azat qılıwı
(Mat 17:14-21; Mrk 9:14-29)
37Kelesi kúni olar tawdan túskende, Iysanı kóp xalıq kútip aldı. 38Kútilmegende xalıq arasınan birew baqırıp:
– Ustaz, Sennen ótinip sorayman, meniń balama bir názer sala gór! Ol meniń jalǵız balam! 39Balamdı jawız ruwx tutqanda, ol birden qıshqırıp jiberedi. Jawız ruwx onı qaltıratıp, awzınan kóbik aǵızadı da, azaplap bolǵannan soń, zorǵa degende onnan ketedi. 40Men Seniń shákirtlerińnen jawız ruwxtı quwıp shıǵarıwdı ótingen edim, biraq olardıń qolınan kelmedi, – dedi.
41Iysa juwap berip:
– Háy, isenbeytuǵın, adasqan áwlad! Men qashanǵa deyin sizler menen birge bolıp, sizlerge shıdayman? Balańdı bul jerge alıp kel, – dedi.
42Bala kiyatırǵanda jin onı jerge jıǵıp, qaltırata basladı. Biraq Iysa jawız ruwxqa tıyım salıp, balaǵa shıpa berdi hám onı ákesine tapsırdı. 43Hámme Qudaydıń ullılıǵına tań qalıstı.
Xalıq Iysanıń barlıq islerine hayran qalıp turǵanda, Iysa Óz shákirtlerine:
44– Mına sózlerimdi qulaqlarıńızǵa quyıp alıńlar: Adam Ulı adamlardıń qolına uslap beriledi, – dedi.
45Biraq olar bul sózdiń mánisin túsinbedi. Onıń mánisi olarǵa jasırın bolǵanlıqtan, olar onı uǵa almadı. Al bul sóz tuwralı Iysadan sorawǵa qorqtı.
Aspan Patshalıǵında eń ullı kim?
(Mat 18:1-5; Mrk 9:33-37)
46Shákirtler óz ara:
– Qaysı birimiz ullımız? – dep tartısa basladı.
47Iysa olardıń kewillerindegi oydı bilip, bir kishkene balanı aldı da, onı janına qoyıp, 48olarǵa bılay dedi:
– Kim de kim bul balanı Meniń atım ushın qabıl etse, onıń Meni qabıl etkeni boladı. Al kim de kim Meni qabıl etse, onıń Meni Jibergendi qabıl etkeni boladı. Óytkeni arańızda kim eń kishkene bolsa, sol eń ullı boladı.
49Sonda Yuxan:
– Ustaz! Seniń atıń menen jinlerdi quwıp shıǵarıp júrgen bir adamdı kórdik. Biraq ol bizler menen birge Saǵan ermegenlikten, oǵan tıyım saldıq, – dedi.
50Iysa Yuxanǵa:
– Oǵan tıyım salmańlar. Sebebi kim de kim sizlerge qarsı bolmasa, ol sizlerdiń tárepdarıńız, – dedi.
Samariyalılardıń Iysanı tán almawı
51Iysanıń bul dúnyadan aspanǵa alınatuǵın kúnleri jaqınlaǵanda, Ol Erusalimge barıwǵa qarar etti. 52Ol aldınan xabarshıların jiberdi. Olar barıp, Iysanıń keliwine tayarlıq kóriw ushın, Samariyanıń bir awılına kirdi. 53Biraq Iysa Erusalimge qaray baratırǵanlıqtan, ol jerde Onı qabıl etpedi. 54Shákirtleri Yaqıp penen Yuxan bunı kórip:
– Iyem! Bulardı joq qılıp jiberiw ushın#Luk 9:54 Bazı qoljazbalarda «Iliyastıń islegenindey» degen sózler de bar., aspannan ot túsiwin buyırıwımızdı qáleyseń be? – dedi.
55Biraq Iysa burılıp, olarǵa keyidi#Luk 9:55 olarǵa keyidi – Bazı qoljazbalarda «olarǵa keyip, bılay dedi: „Sizler qaysı ruwxqa tiyisli ekenińizdi bilmeysiz“».. 56Sońınan olar basqa awılǵa ketti#Luk 9:56 Sońınan olar basqa awılǵa ketti – Bazı qoljazbalarda: «„Sebebi Adam Ulı adamlardı joq qılıw ushın emes, al olardı qutqarıwǵa keldi.“ Sońınan olar basqa awılǵa ketti»..
Iysaǵa shákirt bolıwdıń shártleri
(Mat 8:19-22)
57Olar jolda kiyatırǵanda, birew Iysaǵa:
– Sen qayaqqa barsań da, men Saǵan eremen, – dedi.
58Iysa oǵan:
– Túlkilerdiń inleri, aspandaǵı quslardıń uyaları bar. Biraq Adam Ulınıń bas qoyıp tınıǵatuǵın ornı da joq, – dedi.
59Al basqa birewine:
– Meniń izime er, – dedi.
Biraq ol:
– Iyem, dáslep barıp, ákemdi jerlewime ruxsat et, – dedi.
60Iysa oǵan:
– Ólilerdi jerlewdi ólilerdiń ózlerine qaldır. Al sen barıp, Qudaydıń Patshalıǵı tuwralı járiyala, – dedi.
61Jáne birew Iysaǵa:
– Iyem, men Seniń izińe eremen, biraq dáslep úy-ishim menen xoshlasıp keliwime ruxsat et, – dedi.
62Biraq Iysa oǵan:
– Atızdı súriwdi baslap, artına qaray beretuǵın adam Qudaydıń Patshalıǵına ılayıqlı emes, – dedi.
Selectat acum:
Luka 9: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
