Yuxan 7
7
Iysa hám Onıń inileri
1Sońınan Iysa Galila boylap júrdi, óytkeni yahudiy basshıları Onı óltirmekshi bolǵanlıqtan, Ol Yahudiyada júriwdi qálemedi. 2Yahudiylerdiń Qos bayramı jaqınlap qalǵan edi. 3Sonda Iysanıń inileri Oǵan:
– Bul jerden ketip, Yahudiyaǵa bar. Seniń islep atırǵan islerińdi shákirtleriń de kórsin. 4Sebebi ózin ashıq tanıtpaqshı bolǵan adam jasırın is islemeydi. Eger Sen usınday isler islep atırǵan bolsań, Ózińdi dúnyaǵa kórset, – dedi.
5Óytkeni Oǵan, hátte, inileri de isenbeytuǵın edi.
6Iysa olarǵa:
– Men ushın ılayıqlı waqıt ele kelmedi. Al sizler ushın hár qanday waqıt qolaylı. 7Dúnya sizlerdi jek kóre almaydı, biraq Meni jek kóredi. Sebebi Men onıń isleriniń jaman ekenligi haqqında gúwalıq berip júrmen. 8Sizler bayramǵa barıńlar. Men házirshe bul bayramǵa barmayman, óytkeni Meniń waqtım ele tolmadı, – dedi.
9Iysa olarǵa usılardı aytıp, Galilada qaldı.
Iysa Erusalimdegi bayramda
10Biraq inileri bayramǵa ketkennen soń, Iysanıń Ózi de bardı. Ashıq túrde emes, al jasırın bardı. 11Yahudiy basshıları Iysanı bayramda izlep: «Ol qayaqta?» – dep soradı.
12Xalıq arasında Ol haqqında kóp sıbırlı sózler boldı. Birewler: «Ol jaqsı Adam», – dese, basqalar: «Yaq, Ol xalıqtı joldan azǵırıp atır», – dedi. 13Biraq yahudiy basshılarınan qorqqanlıqtan, hesh kim Ol haqqında ashıq sóyley almaytuǵın edi.
14Bayramnıń yarımı ótkende Iysa Ibadatxanaǵa kirip, tálim bere basladı. 15Yahudiy basshıları:
– Bul Adam hesh oqımaǵan bolsa da, usınshama bilimdi qayaqtan alǵan? – dep tań qalıstı.
16Iysa olarǵa juwap berip bılay dedi:
– Meniń tálimatım Ózimdiki emes, al Meni Jibergendiki. 17Kim de kim Qudaydıń erkin orınlaǵısı kelse, bul tálimattıń Qudaydan ba yamasa Men Ózligimnen aytıp atırman ba, bilip aladı. 18Óz atınan sóylewshi ózine ullılıq izleydi, al Ózin Jibergenniń ullılıǵın izlewshi – haqıyqatshıl, Onda jalǵan joq. 19Muwsa sizlerge Muxaddes Nızamdı bermedi me? Biraq hesh birińiz de Muxaddes Nızamdı orınlamaysızlar. Meni ne ushın óltirmekshisizler?
20Xalıq:
– Seni jin urǵan ba? Kim Seni óltirmekshi? – dedi.
21Iysa sózin dawam etip, olarǵa bılay dedi:
– Men bir is isledim, hámmeńiz buǵan hayran qalıp atırsızlar. 22Muwsa sizlerge súnnetti buyırǵanlıqtan, sizler Shabbat kúninde de balanı súnnet etesizler. Biraq haqıyqatında, súnnet Muwsadan emes, al onnan da aldınǵı ata-babalarıńızdan qalǵan#7:22 Jar 17:9-14.. 23Muwsanıń Nızamı buzılmasın dep, bala Shabbat kúni bolsa da súnnet qılınadı eken, nege sizler Maǵan Shabbat kúni bir adamǵa tolıq shıpa berdiń, dep ashıwlanasızlar? 24Sırtqı kóriniske qarap húkim etpeńler, al ádillik penen húkim shıǵarıńlar.
Iysa – Masiyx pa?
25Sonda ayırım erusalimliler:
– Óltirmekshi bolıp atırǵanı usı Adam emes pe? 26Mine, Ol ashıq sóylep tur, al olar Oǵan hesh nárse dep atırǵan joq. Múmkin, basshılar Onıń Masiyx ekenin haqıyqattan da tán alǵan shıǵar? 27Biraq bizler bul Adamnıń qayaqtan kelgenin bilemiz. Al Masiyx kelgende, Onıń qayaqtan kelgenin hesh kim bilmeydi, – desti.
28Sol waqıtta Ibadatxanada tálim berip turǵan Iysa bálent dawıs penen bılay dedi:
– Sizler Meni hám Meniń qayaqtan ekenimdi bilesizler. Men Óz-Ózimnen kelgenim joq. Meni Jibergen Haq, sizler Onı bilmeysizler. 29Biraq Men Onı bilemen, sebebi Men Onnan keldim, Meni Ol jiberdi.
30Sonda olar Iysanı uslawǵa tırıstı, biraq hesh kim Oǵan qol tiygizbedi. Óytkeni Onıń waqtı ele kelmegen edi. 31Al xalıq arasında kóp adamlar Oǵan isenip:
– Masiyx kelgende, bul Adamnan da kóbirek káramatlı belgiler isler me eken? – dedi.
32Pariseyler Iysa haqqında xalıq arasındaǵı bul sózlerdi esitti. Sonlıqtan olar hám bas ruwxaniyler Iysanı uslaw ushın saqshılardı jiberdi.
33Iysa bılay dedi:
– Men sizler menen birge az waqıt bolaman, sońınan Meni Jibergenge qaytıp baraman. 34Meni izleysizler, biraq tappaysızlar. Men bolatuǵın jerge sizler kele almaysızlar.
35Sonda yahudiy basshıları óz ara:
– Bul Adam bizler taba almaytuǵınday qayaqqa barmaqshı? Ol grekler arasına tarqalıp ketken yahudiylerge barıp, greklerge tálim bermekshi me? 36«Meni izleysizler, biraq tappaysızlar. Men bolatuǵın jerge sizler kele almaysızlar», – degen sózler neni ańlatadı eken? – desti.
Tiri suw
37Bayramnıń sońǵı, ullı kúninde Iysa ornınan turıp, bálent dawıs penen bılay dedi:
– Kim de kim shóllese, Maǵan kelip ishsin. 38Muxaddes Jazıwda aytılǵanday, Maǵan isengen adamnıń ishinen tiri suw dárya bolıp aǵadı.
39Iysa bunday dep, Ózine isenetuǵınlar alatuǵın Muxaddes Ruwx haqqında aytqan edi. Sebebi Ol ele ullılıqqa erispegenlikten, olarǵa Muxaddes Ruwx ele berilmegen edi.
40Xalıq arasınan ayırımlar bul sózlerdi esitip:
– Bul – haqıyqattan da Payǵambar, – dedi.
41Basqaları: «Bul – Masiyx», – dedi.
Al geybirewleri: «Yaq, Masiyx Galiladan keletuǵın ba edi? 42Muxaddes Jazıwda Masiyx Dawıttıń urpaǵınan bolıp, Dawıttıń ana jurtı Beytlehem awılınan keletuǵını#7:42 2Pat 7:12; Mix 5:2. jazılǵan emes pe?» – dedi.
43Solay etip, Iysa sebepli xalıq arasında bóliniw payda boldı. 44Olardıń geybirewleri Onı uslamaqshı boldı, biraq hesh kim Oǵan qol tiygizbedi.
Yahudiy basshılarınıń Iysaǵa isenbewi
45Saqshılar qaytıp kelgende, bas ruwxaniyler menen pariseyler olardan:
– Nege Onı alıp kelmedińler? – dep soradı.
46Saqshılar juwap berip:
– Hesh kim hesh qashan bul Adam sıyaqlı sóylegen emes, – dedi.
47Pariseyler olarǵa:
– Sizler de aldandıńız ba? 48Basshılardan yamasa pariseylerden Oǵan isengen adam boldı ma, sirá? 49Biraq, Muxaddes Nızamdı bilmeytuǵın bul xalıq nálet etilgen, – dedi.
50Olardıń biri, burın Iysaǵa kelgen Nikodim atlı adam olarǵa:
51– Nızamımız boyınsha, dáslep adamdı tıńlamay turıp, onıń ne islegenin bilmesten, húkim etiwge bola ma? – dedi.
52Oǵan:
– Sen de Galiladansań ba? Muxaddes Jazıwdı jaqsılap oqı, sonda Galiladan payǵambar shıqpaytuǵının bileseń, – dedi olar.
53Sońınan hámmesi úylerine tarqastı.
Selectat acum:
Yuxan 7: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
