Yuxan 11

Lazardıń ólimi

1-2Betaniya degen awılda Lazar atlı bir adam awırıp atırǵan edi. Onıń qarındasları Máriyam menen Marta da sol awılda jasaytuǵın edi. Keyinirek Iyemizge átir may quyıp, Onıń ayaqların shashı menen súrtetuǵın hayal, usı Máriyam edi. 3Apalı-sińlili Iysaǵa: «Iyem, Seniń jaqsı kóretuǵın adamıń awırıp atır», – dep xabar jiberdi.

4Iysa bunı esitip:

– Bul awırıwdıń izi ólim menen juwmaqlanbaydı, al Qudaydıń ullılanıwı ushın boladı. Solay etip, bul arqalı Qudaydıń Ulı da ullılanadı, – dedi.

5Iysa Martanı, onıń sińlisin hám Lazardı súyetuǵın edi. 6Iysa Lazardıń awırıp atırǵanın esitse de, Ózi bolıp atırǵan jerde jáne eki kún qaldı.

7Sońınan shákirtlerine:

– Jáne Yahudiyaǵa barayıq, – dedi.

8Shákirtleri Oǵan:

– Ustaz, yahudiyler Seni jaqında ǵana tas boran qılmaqshı edi-ǵo. Sen jáne sol jerge barajaqsań ba? – dedi.

9Iysa juwap berip:

– Kúndiz on eki saat bar emes pe? Kúndiz júrgen adam súrnigip jıǵılmaydı, óytkeni ol bul dúnyanıń nurın kóredi. 10Al túnde júriwshi súrnigip jıǵıladı, sebebi onda nur joq, – dedi.

11Iysa bul sózlerdi aytqannan soń, olarǵa jáne bılay dedi:

– Dostımız Lazar uyıqlap qaldı. Biraq Men onı oyatıw ushın ketip baratırman.

12– Iyem, uyıqlap qalǵan bolsa, táwir boladı, – dedi shákirtleri.

13Iysa Lazardıń ólimin názerde tutqan edi. Biraq olar Iysa qádimgi uyqı haqqında ayttı, dep oyladı.

14Sonda Iysa olarǵa ashıq aytıp:

– Lazar óldi. 15Sizlerdiń iseniwińiz ushın, Meniń sol jerde bolmaǵanıma sizler ushın quwanıshlıman. Al endi oǵan barayıq, – dedi.

16Sonda Egiz dep atalǵan Tomas shákirtlerge:

– Júrińler kettik, bizler de Onıń menen birge ólemiz, – dedi.

Iysa – qayta tiriliw hám ómir

17Iysa Betaniyaǵa jaqınlaǵanda, Lazardıń qábirge qoyılǵanına tórt kún bolǵanın bildi. 18Betaniya Erusalimge jaqın, úsh shaqırımday jerde bolǵanlıqtan, 19kóp yahudiyler Marta menen Máriyamǵa ájaǵasınıń ólimi sebepli kewil aytıwǵa keldi. 20Marta Iysanıń kiyatırǵanın esitip, Onı qarsı alıwǵa shıqtı. Al Máriyam úyde qaldı.

21Marta Iysaǵa:

– Iyem! Eger Sen usı jerde bolǵanıńda, ájaǵam ólmes edi. 22Biraq házir de Sen Qudaydan ne sorasań da, Qudaydıń Saǵan beretuǵının bilemen, – dedi.

23Iysa oǵan:

– Seniń ájaǵań tiriledi, – dedi.

24– Aqırettegi qayta tiriliwde onıń da qayta tiriletuǵının bilemen, – dedi Marta.

25Iysa oǵan:

– Men qayta tiriliw hám ómirmen. Maǵan isengen adam ólse de, jasaydı. 26Maǵan isenip jasap atırǵan hár bir adam hesh qashan ólmeydi. Usıǵan iseneseń be? – dedi.

27Marta Oǵan:

– Awa, Iyem. Seniń dúnyaǵa keletuǵın Masiyx, Qudaydıń Ulı ekenińe isenemen, – dedi.

28Marta usını aytıp bolıp ketip qaldı hám Máriyamdı shaqırıp alıp:

– Ustaz usı jerde, seni shaqırıp atır, – dep oǵan sıbırladı.

29Máriyam bunı esitiwden tez ornınan turdı da, Iysanıń janına ketti. 30Iysa ele awılǵa kirmegen bolıp, Ol Marta menen ushırasqan jerde edi. 31Máriyam menen birge úyde bolǵan hám oǵan kewil aytıp otırǵan yahudiyler onıń asıǵıslıq penen ornınan turıp, sırtqa shıqqanın kórdi. Olar onı jılaw ushın qábirge ketti dep oylap, izine erdi.

32Máriyam Iysa turǵan jerge kelgende, Onı kórip, ayaqlarına jıǵıldı da:

– Iyem! Eger Sen usı jerde bolǵanıńda, ájaǵam ólmes edi, – dedi.

33Máriyamnıń hám onıń menen kelgen yahudiylerdiń jılaǵanın kórgende, Iysa ruwxıy qıynalıp, janı ashıdı.

34– Onı qay jerge qoydıńlar? – dep soradı.

– Iyem, kelip kór, – dedi olar.

35Iysa kózine jas aldı.

36Sonda yahudiyler:

– Qarańlar, onı qanshelli súyer eken! – dedi.

37Biraq olardıń ayırımları:

– Soqırdıń kózlerin ashqan bul Adam Lazardı ólimnen aman alıp qala almas pa edi? – dedi.

Iysanıń Lazardı tiriltiwi

38Iysa jáne ishinen tereń qayǵırıp, qábirge bardı. Qábir bir úńgirde bolıp, onıń awzı tas penen jabılǵan edi. 39Iysa:

– Tastı alıp qoyıńlar, – dedi.

Marhumnıń qarındası Marta Iysaǵa:

– Iyem! Ol iyislenip ketken shıǵar. Óytkeni onıń qábirge qoyılǵanına tórt kún boldı, – dedi.

40Iysa oǵan:

– «Eger Maǵan isenseń, Qudaydıń ullılıǵın kóreseń», – dep saǵan aytqan joq pa edim? – dedi.

41Solay etip, olar tastı alıp qoydı. Iysa kózlerin aspanǵa tigip, bılay dedi:

– Áke! Meniń tilegimdi esitkeniń ushın, Saǵan minnetdarshılıq bildiremen. 42Meni hámme waqıt esitetuǵınıńdı bilemen. Biraq Men bunı usı jerde turǵan xalıq Meni Seniń jibergenińe iseniwi ushın ayttım.

43Iysa usılardı aytıp, bálent dawıs penen:

– Lazar, sırtqa shıq! – dep baqırdı.

44Sonda ayaq-qolları kepinlik penen oralǵan, beti oramal menen baylanǵan óli tirilip, sırtqa shıqtı. Iysa olarǵa:

– Onı sheshindirip jiberińler, kete bersin, – dedi.

Iysanı óltiriw ushın til biriktiriw

(Mat 26:1-5; Mrk 14:1-2; Luk 22:1-2)

45Solay etip, Máriyamǵa kelip, Iysanıń qılǵan islerin kórgen yahudiylerdiń kóbisi Iysaǵa isendi. 46Biraq ayırımları pariseylerge barıp, Iysanıń qılǵan isleri haqqında aytıp berdi. 47Sonda bas ruwxaniyler menen pariseyler joqarǵı keńeste jıynalıp:

– Bizler ne qılıwımız kerek? Bul Adam kóp káramatlı belgiler islemekte. 48Eger Onı Óz erkine jibersek, hámme Oǵan isenip ketedi. Sonda rimliler kelip, Ibadatxanamızdı da, elimizdi de joq qıladı, – dedi.

49Olardıń biri, sol jılı bas ruwxaniy bolǵan Kayafa:

– Sizler hesh nárseni bilmeysizler. 50Pútkil xalıq nabıt bolǵanınan góre, xalıq ushın bir adamnıń óliwi sizler ushın jaqsıraq ekenin túsinbeysizler me? – dedi.

51-52Ol bul sózlerdi ózliginen aytpaǵan edi. Sol jılı ol bas ruwxaniy bolǵanlıqtan, Iysanıń yahudiy xalqı ushın, tek yahudiy xalqı ushın ǵana emes, al Qudaydıń tarqalıp ketken balaların jıynap birlestiriw ushın óletuǵının boljap aytqan edi.

53Solay etip, sol kúnnen baslap olar Iysanı óltiriwge til biriktirdi. 54Sonlıqtan Iysa endi yahudiyler arasında ashıq júre almaytuǵın boldı. Sonda Ol shólge jaqın jerdegi Efrayım degen qalashaǵa ketip, shákirtleri menen birge sol jerde qaldı.

55Yahudiylerdiń Qutqarılıw bayramı jaqınlap qalǵan edi. Diniy rásim boyınsha tazalanıw ushın, eldiń hámme tárepinen kóp adamlar bayramnan burın Erusalimge keldi. 56Olar Iysanı izledi hám Ibadatxanada turıp:

– Qalay oylaysızlar. Ol bayramǵa keler me eken? – dep bir-birinen soradı. 57Al bas ruwxaniyler menen pariseyler Iysanı uslaw ushın, kim de kim Onıń qay jerde ekenin bilse, xabar beriwdi buyırǵan edi.

Selectat acum:

Yuxan 11: QrqMK22

Evidențiere

Partajează

Copiază