NINGPAWT NINGHPANG 6
6
Shinggyim Masha A N Hkru N Hkra Lam
1Shinggyim masha gaw mungkan ga ting hta chyam bra wa nna, shayi sha ni shangai wa ma ai shaloi, 2sumsing shadang sha ni #6:2: sumsing kasha ni: Ndai hpe Karai Kasang a shadang sha ni ngu nna mung tsun ai. ni gaw dai shayi sha ni tsawm htap nga ma ai hpe mu ma ai rai nna, shanhte yu ra nga ma ai hte maren la ma ai. 3Dai hpang dai Madu gaw, “Shinggyim masha ni hpe ngai htani htana ahkrung nga shangun na n rai; shanhte gaw si chye ai ni rai nga ai. Shanhte gaw ya kaw nna asak latsa e hkun ning hta n jan ai sha nga lu na rai ma ai,” ngu nna tsun wu ai. 4Dai prat e mung, dai prat a hpang e mung, dai shinggyim numsha ni hte Karai Kasang a shadang sha ni a aru arat ni gaw ginding aga ntsa e grai galu kaba ai ni rai ma ai. Shanhte gaw moi prat kaw nna magrau grang ai share ninghkrin ni hte kajai gumhkawng ai masha ni rai ma ai. #Bhk 13:33.
5Ga ntsa na shinggyim masha shagu hte gaw kade wa n shawp n kap nga ai hte aten shagu hta shanhte a myit mang ai lam kade wa n hkru nga ma ai hpe dai Madu mu ai shaloi, 6shi shanhte hpe hpan da nna ginding aga ntsa e shanu nga shangun ai hpe shi a kraw lawang e yawn nga ai. 7Shi grai wa myit malai lu ai hte, “Ngai hpan da sai ndai shinggyim masha ni hpe mung, dusat yam nga hte ntsa malen u ni hpe mung atsai awai di kau na nngai; hpa majaw nga yang, dai ni hpe ngai hpan da ai majaw ngai myit yawn nga nngai,” ngu nna tsun wu ai. 8Rai ti mung dai Madu chyawm gaw Noa hpe awng sharawng nga wu ai. #Mat 24:37; Luk 17:26; 1Pe 3:20.
Noa
9-10Da ndai gaw Noa a maumwi rai nga ai. Shi gaw shadang sha masum lu ai; dai ni gaw Shem, Ham, hte Yahpet ni rai nga ai. Noa gaw yubak mara hpa mung n lu ai hte shi a aten hta shi chyu sha mai kaja ai wa rai nga ai. Shi gaw Karai Kasang hte rau kanawn mazum let hkrung nga ai. #2Pe 2:5. 11Rai ti mung shinggyim masha shagu gaw Karai Kasang a man e n hkru nga ma ai hte kashun kashe du daw sai hkaw amu gaw shara shagu hkan chyam bra nga ai. 12Karai Kasang gaw mungkan ga hpe mada yu wu yang, dai gaw n hkru n shawp ai amu hte hpring nga ai hpe mu wu ai; hpa majaw nga yang, shinggyim masha ni mahtang n hkru n shawp ai asak hkrun lam hta hkawm sa nga ma ai.
13Karai Kasang gaw Noa hpe, “Ndai shinggyim masha ni yawng hpe jahtum kau na matu, ngai daw dan da se ai. Shanhte a kashun kashe du daw sai hkaw amu ni gaw ndai mungkan hta hpring chyat nga ai majaw, shanhte hpe ngai atsai awai shamyit kau na nngai. 14Na a matu kaja ai hpun ngau hte sanghpaw li shachyaw u; dai hta gawk ni bang nna, de a kata hte shinggan maga de mung hpun naw chya da u. 15Dai hpe galu maga de pe 450, nda maga de pe 75 hte tsaw maga de pe 45 di nna galaw u. 16Dai sanghpaw li hta hkuwawt langai hpaw nhtawm hkuwawt hte nhkrem ni a lapran e yungnu 18 gang ai shara tawn da u. Tsang masum rawng ai li nang shachyaw nhtawm nhkrem e numgaw chyinghka langai waw na rai ndai. 17Ngai mung asak hkrung ai ni yawng hte hpe shamyit kau na matu ga ntsa de hka kaba hte sha-u sha-ing dat na nngai. Ga ntsa na nga manga hte gaw si htum mat na mara ai, 18rai ti mung, nang hte chyawm gaw ga shaka ngai tawn da na nngai. Nang hte na a madu jan mung, na a shadang sha ni hte shanhte a madu jan ni mung sanghpaw li kata de shang wa mu. 19-20Dusat yam nga amyu shagu hte ntsa malen u amyu shagu hkrung nga na matu, dai ni hta na ayi ala ni hpe sanghpaw li kata de jashawn da u. 21Nang hte dai ni a matu malu masha hkum sumhpa yawng hpe htun da u,” ngu nna tsun wu ai. 22Karai Kasang shi hpe hkang da wu ai hte maren, lam shagu hte hpe shi galaw wu ai. #Heb 11:7.
Selectat acum:
NINGPAWT NINGHPANG 6: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.