NINGPAWT NINGHPANG 45
45
Yosep Gaw Shi Kadai Rai Nga Ai Lam Kahpu Kanau Ni Hpe Tsun Dan Ai
1Yosep mung shi a hkam sha ai lam, shi a shangun ma ni a man e n sharang da lu nu ai rai nna, shanhte yawng hpe gawk kaw na pru mat wa na matu hkang dat wu ai. Yosep gaw shi a kahpu kanau ni hpe shi kadai rai nga ai lam tsun dan wu ai shaloi, masha kaga kadai mung shi kaw n nga ma ai. #Kas 7:13. 2Shi ja ja hkrap nga ai hpe Egutu masha ni mung na ma ai. Dai shiga gaw hkawhkam htingnu de hkrang pru wa nga sai. 3Yosep gaw shi a kahpu kanau ni hpe, “Ngai gaw Yosep rai nga nngai; nye a wa naw hkrung nga a ni?,” ngu nna san wu ai. Rai ti mung shi a kahpu ni dai lam hpe na ma ai shaloi ga n lu htan mat ma ai hte grai hkrit gari mat ma ai. 4Dai hpang Yosep gaw shanhte hpe, “Chyeju hte sit sa wa marit,” ngu nna tsun wu yang, shanhte mung shi a makau de sit sa wa ma ai. Shi gaw, “Ngai gaw nanhte Egutu mung de dut kau hkrum ai nanhte a kanau Yosep rai nga nngai. 5Ya chyawm gaw ngai hpe ndai mung de dut kau dat myit dai majaw myit hkum ru myit; tinang hkum hpe mung mara hkum shagun nga myit. Ndai gaw masha ni a asak hkye mawai la na matu she, nanhte a shawng e Karai Kasang ngai hpe shangun dat ai lam rai nga ai. 6Ndai mung hta hku hku ai lahkawng ning sha naw rai nga ai; yi hkauna n galau lu na hte mam n dan lu na manga ning naw nga nga ai. 7Nanhte hte nanhte a matu mara ni hpe ngam nga shangun na matu mung, ndai zawn re ai mauhpa lam hta na nanhte hpe hkye mawai la na matu mung, Karai Kasang gaw nanhte a shawng e ngai hpe shangun dat ni ai. 8Dai re ai majaw, ngai hpe ndai de shangun dat ai gaw teng teng nanhte rai myit dai n rai; Karai Kasang mahtang shangun dat ai she rai nga ai. Shi gaw ngai hpe hkawhkam wa a tsaw htum ai arawng aya hte hpring ai mung du shatai ni ai. Ngai mahtang shi a mung ting hpe hpareng ai wa rai nga nngai; Egutu mung ting hpe up hkang ai wa mung ngai rai nga nngai.
9Ya alawan, wa hpang de nhtang wa nna, shi a kasha Yosep ning nga nna shi hpe htet ai lam wa tsun masu: ‘Karai Kasang gaw ngai hpe Egutu mung ting hpe up hkang shangun ni ai; dai majaw loi mi mung n kanung nga ai sha ngai hpang de yu wa marit.#Kas 7:14. 10Ngai hte ani sha rai nga ai Goshen mung hta nang mung, na a kasha ni hte kashu ni mung, sagu bainam ni mung, dumsu yam nga ni hte nang lu malu mahkra hte shanu nga lu na ndai. 11Goshen mung hta nang shanu nga ai rai yang, ngai nang hpe bau maka lu na nngai. Ya hku hku na manga ning naw nga ai rai nna nang mung, na a dinghku hte yam nga hpung ni kawsi kyet na hpe n yu sharawng nngai,’” ngu nna tsun dat wu ai.
12Yosep gaw matut nna, “Ya nanhte yawng hte nang Benyamin mung, ngai nan Yosep rai nga nngai hpe mu lu manit dai. 13Egutu mung hta ngai kade daram ahkang aya rawng nga nngai hte nanhte mu mamu mahkra, wa hpe tsun dan mu. Shi hpe tin tin ndai ga de woi yu wa mi,” ngu nna tsun wu ai.
14Shi gaw kanau Benyamin hpe ahpum nna hkrap wu ai. Benyamin mung shi hpe ahpum let hkrap wu ai. 15Dai hpang shi a kahpu ni langai hte langai hpe ahpum pup let naw hkrap nga wu ai. Dai hpang she, shi a kahpu kanau ni shi hte ga shaga hpang wa ma ai.
16Yosep a kahpu kanau ni du sai shiga hkawhkam hkaw de hkrang shang wa ai shaloi, hkawhkam wa hte shi a du salang ni na sharawng nga ma ai. 17Hkawhkam wa gaw Yosep hpe, “Na a nhpu nnau ni hpe shanhte a yam nga ni hta daw mara nna, Hkanan mung de nhtang wa shangun wu. 18Shanhte a kawa hte shanhte a dinghku masha ni yawng hpe ndai mung de nhtang sa wa shangun mu. Ngai mung shanhte hpe Egutu mung na kaja htum ai lamu ga jaw na mawe ai; shaloi shanhte hpring kabrat hkra ngamu ngamai wa nna matut shanu nga lu na marin dai lam hpe tsun dan u. 19Shanhte a madu jan ni hte kaji ai ma ni, shanhte hte rau kawa hpe mung htaw la na matu, ndai Egutu mung na leng ni hpe la wa na shanhte hpe tsun u. 20Shanhte gaw shingdu de shanhte a sut rai ni hpe tawn kau da ai a jaw e, shanhte hpa mung myit ru ra na ma ai n rai; Egutu mung ting na kaja htum ai gaw shanhte a matu rai nga manu ai,” ngu nna tsun mu ai.
21Shanhte tsun matsun hte maren, Yaku a shadang sha ni galaw ma ai rai nna, Yosep mung hkawhkam wa hkang dat ai hte maren shanhte hpe leng mung, hkrun lam e sha na malu masha ni hpe mung jaw dat wu ai. 22Shanhte hpe hpun palawng gahti galai langai hpra jaw dat wu ai; rai ti mung, Benyamin hpe mahtang gumhpraw masum tsa hte hpun palawng man manga naw kahtap jaw wu ai. 23Shi gaw shi a kawa hpang de Egutu mung na kaja htum ai arung arai htaw ai daw hte hpawn lawze shi, hkrun lam a matu mam hte muk, kaga lusha htaw ai lawze shi shangun dat ya wu ai. 24Shi gaw shi a kahpu kanau ni hpe shangun dat nhtawm shanhte pru wa ai shaloi, shi shanhte hpe, “Hkrun lam hkan e, ndang kalang hkum rai hkat myit,” ngu nna tsun dat wu ai.
25Shanhte gaw Egutu mung kaw nna pru wa nhtawm Hkanan mung na shanhte a kawa Yaku shanu nga ai nta de nhtang wa ma ai. 26Dai hpang shanhte gaw shi hpe, “Yosep naw hkrung nga ai! Shi gaw Egutu mung ting hpe up nga ai!,” ngu nna tsun dan mu ai. Yaku gaw sai kajawng mat nna shanhte hpe n kam da wu ai.
27Rai ti mung, Yosep shanhte hpe tsun dat ai ga shi hpe tsun dan nna shi hpe Egutu mung de woi yu wa na matu Yosep shangun dat ai leng ni hpe shi mu wu yang, kajawng kahpra ai myit hte bran mat wu ai. 28Shi gaw, “Ngai sha Yosep gaw naw hkrung nga a hka! Ndai lam yawng hpe ngai san sagawn lu ni ai! Ngai garai n si yang, shi hpe sa jahkrum na matu yu sa na we ai,” ngu nna tsun wu ai.
Selectat acum:
NINGPAWT NINGHPANG 45: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.