NINGPAWT NINGHPANG 43
43
Yosep A Kahpu Ni Benyamin Hte Rau Egutu Mung De Bai Yu Sa Ai
1Hkanan mung hta hkuwa grau laja wa ai rai nna, Egutu mung na 2shanhte htaw wa ai nai mam ni yawng hpe Yaku a dinghku masha ni sha kau ngut jang, Yaku gaw shi a shadang sha ni hpe, “Anhte a matu lusha loi mi naw sa mari la na, bai rawt yu masu,” ngu nna tsun wu ai.
3Yuda mahtang shi hpe, “Anhte a kanau wa hpe anhte hte rau n woi sa ai rai yang, shi a man de anhte shang lu na ga ai n rai, nga nna dai wa anhte hpe ja ja sadi jaw dat mi ai. 4Anhte a kanau wa hpe anhte hte rau jahkan dat na nang kam ai rai yang gaw, na a matu lusha anhte sa mari na ga ai. 5Rai ti mung nang n kam ai hte anhte a kanau wa hpe mung anhte hte rau n woi sa ai rai yang chyawm gaw shi a man de shang lu na ga ai n rai,” ngu nna shi anhte hpe tsun da mani ai majaw anhte n yu sa lu na ga ai,” ngu nna tsun wu ai.
6Yaku mung, “Nanhte hta kaga kanau naw nga ai lam, dai wa hpe tsun dan nna ngai hpe hpa rai tsin-yam tsindam shabyin nga myit ta?,” ngu nna tsun wu ai.
7Shanhte gaw, “Dai wa mahtang anhte a lam, anhte a dinghku a lam grai grai san let, ‘Nanhte a kawa naw hkrung nga malit ni? Nanhte hta kaga kanau naw nga myit ni?,’ nga ai majaw shi a ga san ni hpe anhte htai kau ya saga ai. Anhte a kanau hpe anhte hte rau woi sa shangun mu, nga nna shi anhte hpe tsun dat ai hpe anhte kaning rai chye lu na rai nga ga ta?,” ngu nna htan mu ai.
8Yuda gaw kawa hpe, “Dai ma hpe ngai hte rau jahkan dat wu. Dai rai jang, anhte ya jang rawt sa wa na ga ai. Anhte kadai mung kawsi kyet si na ga ai n rai. 9Ngai gaw nye a asak ap let ga sadi shagrin da nngai rai nna shi a majaw ngai hpe mara shagun lu na ndai. Ngai shi hpe shim lum hkam kaja ai hte nang hpang de bai n woi wa ai rai yang, dai mara hpe ngai tut nawng gun nga na nngai.
10Anhte grai wa na mat hkra n la ra ga taw gaw, dai mung de lahkawng lang pyi bat lu na saga ai,” ngu nna tsun wu ai.
11Shanhte a kawa chyawm gaw, “Dai rai taw, ning rai mu: dai mung du wa a matu kumhpa shatai na ndai mung na kaja htum ai balsam naw loi mi, lagat ntsin loi mi, manam hawm ai baw namji namya ni, mura, chyaran si hte batan si ni hpe nanhte a magun lit ni hta bang nna la sa ya mu. 12Nanhte mung gumhpraw htam lahkawng la gun mu, hpa majaw nga yang, nanhte a lit mahka hta nhtang ya dat ai gumhpraw ni hpe mung gun sa mu; dai gaw shut ai amu rai yang mung rai na sai. 13Nanhte a kanau hpe mung woi nna, ya jang dai wa hpang de nhtang sa wa manu. 14Chyahtum Chyalai N-gun Rawng Ai Karai Kasang gaw dai wa a jaw e, nanhte hpe matsan dum la shangun nga u ga; Benyamin hta kaga nanhte a hpu nau langai mi hpe ngai hpang de bai woi nhtang wa na shi dat dat ya na ru ai. Nye a matu chyawm gaw, kasha ni sum mat ai rai yang mung sum mat sanu ga,” ngu nna shanhte hpe tsun wu ai.
15Shan nau ni gaw kumhpa ni hte gumhpraw htam lahkawng la lang nna Benyamin hte rau Egutu mung de rawt sa mat wa ma ai. Shanhte hkum nan Yosep kaw sa du ma ai. 16Shanhte hte rau Benyamin lawm sa wa ai hpe Yosep mu wu yang, shi a nta hpareng ya ai shangun ma wa hpe, “Ndai ni hpe nye a nta de woi wa su; ngai hte rau dai ni shani ka-ang e shat lusha sha lu na ma ai; shan sat nhtawm lusha wa hkyen su,” ngu nna shi hpe hkang dat wu ai. 17Shi hkang dat ai hte maren shangun ma wa galaw nna kahpu kanau ni hpe Yosep a nta de woi wa ma ai.
18Shanhte nta de woi wa hkrum ma ai shaloi, shanhte gaw, “Shawng na lang anhte a nhpye htingpa ni hta bai bang dat ya ai gumhpraw a majaw ndai yang e anhte woi la ai hkrum nga saga ai. Shanhte gaw anhte hpe akajawng sha htim gasat nhtawm anhte a lawze ni hpe la kau ya ai hte anhte hpe mayam shatai kau na mu ai,” ngu nna shanhte hkrit ai hte myit nawn da ma ai. 19Dai rai nna shanhte gaw hpareng shangun ma wa hpe nta chyinghka e, “Madu e, nang ra sharawng ai rai yang, 20anhte ndai yang e, lusha mari na matu shawng de kalang mi du yu saga ai. 21Nta de wa ai hkrun lam na dabang hta anhte nga nga ga ai shaloi, anhte a nhpye htingpa ni hpe hpaw yu ga yang, tinang nang a nhpye htingpa mahka hta myi na ta n yawm ai sha rawng nga ai gumhpraw ni hpe an nau ni mu ga ai. Dai hpe nang hpang de anhte la sa raga ai. 22Ya mung, lusha mari na matu anhte hte rau gumhpraw hpe mung grau law la sa ga ai. Anhte a nhpye htingpa ni hta dai anhte a gumhpraw ni hpe kadai bang dat ya ai gaw, anhte n chye ga ai,” ngu nna tsun dan ma ai.
23Dai shangun ma wa chyawm gaw, “Hkum myit ru myit; hkrit mung hkum hkrit myit. Nanhte a Karai Kasang dai nanhte a kawa a Karai Kasang gaw nanhte a nhpye htingpa ni hta nanhte a matu gumhpraw bang ya manit dai. Nanhte a gumhpraw hpe ngai lu la ni ai,” ngu tsun nhtawm Simun hpe shapraw ya ma ai.
24Dai shangun ma wa gaw shan nau ni hpe nta de woi shang wa wu ai. Shi shanhte hpe ntsin jaw wu ai rai nna, shanhte lagaw shin la lu ma ai; lawze ni hpe mung ushat jaw ya wu ai. 25Shanhte gaw Yosep hte rau lusha jawm sha na matu saw shaga da hkrum nga ma ai majaw shani ka-ang shi du wa ai shaloi, shi hpe jaw na kumhpa ni hpe mung jin jin lajang da mu ai. 26Yosep gaw nta nhku de du shang wa ai shaloi, shi nga ai nta nhku de kumhpa ni hpe shanhte la shang wa nhtawm shi a man e ga du hkra gum dagup nga ma ai. 27Shi gaw shanhte a hkam kaja lam hpe san yu nhtawm, “Nanhte a kawa dingla a lam ngai hpe tsun dan yu manit dai-shi gara hku rai nga a ni? Shi naw hkrung nna hkam kaja nga a ni?,” ngu nna san wu ai.
28Shanhte mung, “Nang hpe hkungga ai shangun ma, anhte a kawa gaw naw hkrung nga nna hkam kaja nga ai,” ngu nna htan let shi a man e hput di nhtawm gum dagup ma ai.
29Dai yang e Yosep a kanau Benyamin hpe shi mu wu ai shaloi, shi gaw, “Ndai wa gaw nanhte ngai hpe tsun dan yu sai nanhte a kanau hpungdim wa rai nga a ni? Ngai sha e, Karai Kasang nang hpe shaman chyeju jaw u ga,” ngu nna tsun wu ai. 30Dai hpang Yosep gaw shi a myit masin hta n-gaw n wai ai myit hpring nga lu ai majaw akajawng sha pru mat wa wu ai. Shi gaw sharai n lu gawng run wu ai rai nna, shi a gawk kata de shang hkrap nga ai. 31Shi gaw man myit kau nhtawm tinang hkum hkang let pru wa nna, lusha daw jau na matu hkang dat wu ai. 32Yosep a matu sha ku langai, shi a kahpu kanau ni a matu kaga shara mi di nna lajang ya ma ai. Dai yang e sha ai Egutu masha ni a matu mung kaga tawn ya mu ai. Dai gaw shanhte mahtang Hebre masha ni hte rau sha na matu arawng sum dum nga ai ngu, shanhte myit nawn la ai majaw rai nga ai. 33Kahpu kanau ni gaw hpu lat wa kaw nna hpungdim wa kaw du hkra tinang a asak kaji kaba hku hkan nna Yosep hte man hkrum rai sha ku saboi e greng rai dung nga ma ai; shanhte kaning rai dung nga ai hpe shanhte mu ai shaloi shanhte shada da yu nna mau nga ma ai. 34Shat lusha hpe Yosep a sha ku kaw nna shanhte hpe daw jau mu ai rai nna Benyamin hpe mahtang kaga ni hta jan nna manga lang jat ya wu ai. Dai rai nna shanhte gaw Yosep hte rau shanhte lu nang mat ai aten du hkra rau lu rau sha nga ma ai.
Selectat acum:
NINGPAWT NINGHPANG 43: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.