NINGPAWT NINGHPANG 38
38
Yuda Hte Htama
1Dai aten daram hta, Yuda gaw shi a kahpu kanau ni kaw nna pru mat wa nhtawm Adulam mare na Hira mying ai wa hte rau sa nga nga ai. 2Dai yang e, Shua mying ai Hkanani masha langai mi a shayi sha hpe sa hkrum nna shi hpe la kau wu ai. 3Dai numsha mung shi a matu shadang sha langai shangai ya nhtawm shi hpe Era ngu nna shamying wu ai. 4Shi gaw na-um nasin hkum bai tai wa ai hte shadang sha kaga langai shangai wu ai; shi hpe Onan ngu nna shamying wu ai. 5Dai hpang shadang sha langai mi bai shangai wu ai rai nna shi hpe Shela ngu shamying wu ai. Dai ma hpe shangai ai shaloi Yuda gaw Hkezib mare e nga nga ai.
6Yuda gaw shi a kasha alat Era a matu Htama mying ai numsha hpe la ya wu ai. 7Era a sat lawat chyawm gaw n hkru n shawp nga ai rai nna dai gaw dai Madu hpe n sharawng awng shangun nga ai. Dai rai nna dai Madu gaw shi hpe sat kau wu ai. 8Dai hpang Yuda gaw Era a kanau Onan hpe, “Na nhpu a gaida jan kaw sa shang yup su. Shi madu wa a kanau zawn shi hpe kahkyin ra ai na a lit hpe jahpring shatsup u, na nhpu a amyu matu ni matut lu na rai ndai,” ngu nna tsun wu ai. 9Rai ti mung kashu kasha ni hpe shi madu lu na n rai nga ai hpe Onan chye wu ai rai nna shi kahpu a kashu kasha matu ni n dawng wa u ga, kahpu a gaida jan hte kanawn ai aten hta shi a azu hpe ga de jahkaw wu ai. 10Shi galaw ai lam hpe dai Madu n ra sharawng wu ai majaw shi hpe mung sat kau wu ai. 11Dai hpang Yuda gaw shi a kanam Htama hpe, “Ngai sha Shela kaba wa ai aten du hkra gaida tai nna, na nwa a nta de wa nhtang nga su,” ngu nna tsun wu ai. Shela chyawm gaw shi a kahpu yan zawn sat kau hkrum na hpe hkrit ai majaw shi dai ga hpe tsun wu ai. Shing rai Htama mung shi kawa a nta de wa mat wu ai.
12Ya aten tsawmra mi na mat ai hpang, Yuda a madu jan mung si mat lu ai. Shi yawn bran ngut ai hpang, shi hte shi a jinghku Adulam masha Hira hte rau shi a sagu mun rep ai Htimna de sa wa ma ai. 13Masha langai ngai gaw na a n-gu shi a sagu mun rep na nga Htimna de sa wa nga ai, ngu nna Htama hpe tsun dan wu ai. 14Shi gaw, shi hpun hpun re ai gaida hpun palawng hpe galai kau nhtawm man magap hte shi myi man hpe magap kau nna Htimna de sa wa ai lam hta nga ai Enaim mare chyinghka lam e sa dung nga wu ai. Hpa majaw nga yang, Yuda a shadang sha hpungdim Shela kaba ti mung shi hpe n hta shangun wu ai gaw, shi hkrak sha chye da wu ai.
15Dai num hpe Yuda mu wu yang, shi a myi man hpe magap da wu ai majaw dai num gaw shawa num rai nga ai ngu nna myit nawn da wu ai. 16Yuda gaw lam a wora maga mi de lai sa nhtawm, “Rai sa, nang hpe jahpu kade daram jaw ra na ta?,” ngu nna tsun wu ai. (Shi gaw shi a kanam rai nga wu ai hpe n chye nga ai.)
Dai num mahtang, “Nang ngai hpe hpa jaw na n ta?,” ngu nna tsun wu ai.
17Yuda mahtang, “Nye a yam nga hpung kaw na bainam kasha langai mi nang hpe jaw dat na nngai,” ngu nna htan wu ai.
Dai num gaw, “Rai sa, nang bainam kasha jaw dat ai aten du hkra, ga sadi hpe shatup lu u ga, arai lama ma hpe n jaw da lu na n ni?,” ngu nna tsun wu ai.
18Yuda gaw, “Ngai nang hpe ga sadi hku hpa arai hpe jaw na rai nga a ta?,” ngu nna san wu ai.
Dai num mung, “Na a dazik hte saidawng mung, nang lang ai dawhkrawng mung jaw da e,” ngu nna htan wu ai. Shi mung dai ni hpe jaw da wu ai. Dai hpang shan lahkawng kanawn mu ai rai nna, dai num hta na-um nasin hkum rai wa sai. 19Dai hpang Htama mung nta de wa nhtawm shi a man magap hpe la kau nna gaida bu hpun palawng bai hpun da wu ai.
20Ya Yuda gaw dai num kaw tang da ai ga sadi arung arai ni hpe bai shaw la na matu shi a jinghku wa Hira hpe bainam kasha langai mi ya dat wu ai; rai ti mung, Hira mahtang dai num hpe n mu wu ai. 21Shi gaw Enaim na lasha nkau mi hpe, “Ndai lam makau e nga ai shawa num kanang rai nga a ta?,” ngu nna san wu ai. Shanhte mahtang, “Ndai yang e shawa num langai galoi mung n nga yu ai,” ngu nna htan dat mu ai.
22Shi gaw Yuda hpang de bai wa nna, “Ngai dai num hpe n lu tam nngai. Dai yang na lasha ni mung, ndai yang e shawa num galoi mung n nga yu ai,” ngu nna tsun mu ai.
23Yuda gaw, “Ngai shi hpe jaw shakut ti mung, nang shi hpe n mu tam nit dai majaw, an hpe masha ni e mani asawng kau na hpe n ra nga ga ai hte maren, arai dai ni hpe shi la kau sanu ga,” ngu nna tsun wu ai.
24Shata masum daram na ai hpang, marai langai mi gaw Yuda hpe, “Na a kanam Htama gaw shawa num zawn hpye hkawm nna, ya na-um nasin rai nga wu ai,” ngu nna tsun dan wu ai.
Yuda gaw, “Shi hpe woi shapraw la nhtawm wan nat sat kau mu,” ngu nna hkang dat wu ai.
25Shi woi shapraw hkrum ai hte rau shi a kagu hpang de, “Ndai arung arai ni hpe madu ai wa a majaw ngai na-um nasin rai nga nngai. Ndai arai ni hpe yu yu u-ndai dazik hte de a saidawng, ndai dawhkrawng ni kade na rai nga ai gaw mada yu u,” ngu nna shiga shana dat wu ai.
26Yuda mung dai arai ni hpe yu matsing nna, “Shi mahtang ngai hta grau ding man nga ai. Ngai shi hpe ngai sha Shela hte kahkyin shangun ang ai rai tim, dai nye a lit hpe ngai hprai kau se ai,” ngu nna tsun wu ai. Dai hpang Yuda shi hte galoi mung bai n kanawn mat wu ai.
27Ya shi a shangai nhtoi gu wa ai shaloi, shi hta ma marun rawng nga ai hpe chye lu nga ai. 28Shi ma shangai nga yang, langai wa lata shaw dat wu ai rai nna, shangai karum ya ai jan gaw dai hpe magra jum da nna hkyeng ai ri hte lata e gyit gumbat ya nna, “Ndai mahtang shawng shangai na ru ai,” ngu nna tsun wu ai. 29Rai ti mung, dai lata hpe shi bai dawm la kau ai shaloi, shi a kahpu shawng shangai wa sai. Shaloi shangai karum ai jan gaw, “Na a lam nang hpaw nga n hka!,” ngu wu ai. Dai rai nna shi hpe Hparet ngu nna shamying mu ai. 30Dai hpang lata e ri ahkyeng hte gumbat da ai shi a kanau shangai wa ai rai nna shi hpe Zera ngu nna shamying mu ai.
Selectat acum:
NINGPAWT NINGHPANG 38: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.