NINGPAWT NINGHPANG 27
27
Isak Yaku Hpe Shaman Ya Ai
1Ya, Isak dingla wa nna myi amam wa wu ai majaw myi n mu lu nu ai. Shi a shadang sha kaba Esaw hpe shaga la nhtawm, “Ngai sha e,” ngu nna tsun wu ai.
Shi mung, “Rai sa, nang e nga nga nngai,” ngu nna htan wu ai.
2Isak gaw, “Ngai dingla nga ni ai rai nna kade n na yang, si mat na hpe nang mu na ndai. 3Na a ndan hte pala ni hpe la nhtawm prang de pru sa nna nye a matu shan sa tam sat wa rit. 4Ngai sha ra hkra mu mai ai hku lusha shadu nhtawm ngai hpang de la wa rit. Dai hpe sha ngut ai hte rau nye a nsa garai n htum mat ai laman, hpang jahtum ngai tsun na shaman ga, nang hpe ngai jaw na we ai,” ngu nna tsun wu ai.
5Isak gaw Esaw hpe shing nga tsun ai ga hpe Rebeka madat la wu ai. Esaw gaw shan tam na nga pru mat wa ai shaloi, 6-7Rebeka gaw Yaku hpe, “Na a nwa gaw, ngai garai n si yang, dai Madu a man e nang hpe shaman ya de ga, nye a matu shan la wa nna dai hpe nye a matu shadu u,” nga nna Esaw hpe tsun ai na nwa a ga hpe ngai na ni ai. 8Rebeka gaw, “Ngai sha e, ya nye a ga hpe madat u; ngai tsun ai hte maren galaw u. 9Ya, dai bainam hpung de sa nna hpum tsawm ai bainam kasha lahkawng la wa rit; dai ni hpe ngai shadu nna na nwa grai sha ra ai hku lusha hpe lajang ya na nngai. 10Shi garai n si yang shi nang hpe shaman jaw da lu u ga, dai shan shat mai shi sha na matu nang la wa ya lu na ndai,” ngu nna tsun wu ai.
11Rai ti mung, Yaku mahtang shi a kanu hpe, “Esaw gaw amun tu ai wa rai nna, ngai chyawm gaw akrin sha rai nga nngai hpe nang chye nga ndai. 12Nye wa ngai hpe hkap masawp yu na ra ai nhten; shi hpe ngai masu hkalem nga ai hpe shi chye kau na ra ai; ndai lam hku nna shaman ya ai hkam la na malai, ngai hkum nan matsa kau ai she hkrum sha nga na ra ai,” ngu nna tsun wu ai.
13Shaloi kanu gaw, “Ngai sha e nang hkrum na matsa mawa gaw nye a ntsa e she hkrat wa ru ga; ngai tsun ai hte maren she galaw u; nye a matu bainam kasha yan hpe sa la wa rit,” ngu nna htan wu ai. 14Dai majaw dai ni hpe shi sa la wa nna kanu kaw dun wa ya wu ai; kanu mung shi a kawa sha ra ai hku shan shat mai shadu wu ai. 15Dai hpang Rebeka gaw nta e shi kaw nga ai Esaw a kaja htum ai hpun palawng hpe la nhtawm Yaku hpe jahpun wu ai. 16Shi gaw bainam hpyi ni hte shi a lata hte amun n tu ai du hkan kayawp ya wu ai. 17Dai hpang mu mai ai shan shat mai hte shi kabaw ai muk hte hpawn Yaku a lata hta jaw dat wu ai.
18Dai hpang Yaku gaw kawa hpang de shang nhtawm, “Wa e!,” ngu nna tsun wu ai.
Shi mung, “Rai sa, nga nga nngai,” ngu nna htan let, nang kadai mahtang rai nga n ni?,” ngu nna bai san wu ai.
19Yaku mahtang, “Ngai gaw na a kasha alat Esaw rai nga nngai, nang tsun ai hte maren galaw se ai; chyeju hte rawt dung nna ndai na a matu ngai la wa ya ai shan shat mai sha u; na a shaman ga ngai hpe jaw lu na rai ndai,” ngu nna htan wu ai.
20Isak gaw, “Ngai sha e, kaning rai ndai daram lawan nna mu tam a ni?,” ngu nna hkap san wu ai.
Yaku mahtang, “Dai Madu na a Karai Kasang gaw ngai hpe karum la ai hte mu tam la nngai,” ngu nna htan wu ai.
21Isak gaw Yaku hpe, “Nang Esaw teng teng rai nga n ni? Ngai nang hpe masawp yu lu n ga, chyeju hte ngai hpang de sit wa yu rit,” ngu nna tsun wu ai. 22Yaku mung shi a kawa hpang de sit wa nna shi hpe masawp yu let, “Na a nsen gaw Yaku a nsen, lata chyawm gaw Esaw a lata zawn rai nga ai,” ngu nna tsun wu ai. 23Yaku a lata gaw Esaw zawn mun tu nga wu ai majaw, Isak gaw shi hpe n chye matsing nga wu ai. Isak gaw shi a shaman ga Yaku hpe jaw hkyen nga nu ai; 24rai ti mung, “Nang teng teng Esaw rai nga n ni?,” ngu nna bai kahtap san wu ai.
Shi mung, “Ngai rai nga nngai,” ngu nna htan wu ai.
25Isak gaw, “Dai rai taw gaw, shan shat mai la wa yu rit. Dai hpe sha ngut jang, nye a shaman ga ngai nang hpe jaw na de ai,” ngu nna tsun wu ai. Yaku gaw shan shat mai hpe shi hpang de la wa nhtawm lu na matu sabyi ntsin hpe mung la wa ya wu ai. 26Dai hpang shi a kawa mung Yaku hpe, “Ngai sha e, ngai kaw sit wa nna, ngai hpe pup e,” ngu nna tsun wu ai. 27Yaku mung sit lung wa nna shi hpe pup wu ai; Isak gaw shi a palawng sama hpe manam la nhtawm shi hpe shaman ya wu ai. Shi gaw, “Nye kasha a manam pyaw ai sama gaw dai Madu shaman ya ai yi hkauna nngawt bat hte bung nga ai. 28Karai Kasang gaw nang hpe lamu na numri jaw ya nhtawm na a yi sun hkauna ni hpe ga sau tung shangun u ga! Nai mam law law hte sabyi ntsin ni mung nang hpe jaw na nit dai! 29Masha amyu baw ni na a shangun ma ni tai mat mu ga; amyu masha ni mung nang hpe dingnyawm gum dagup nga mu ga. Na amyu matu mara ni yawng hpe nang up hkang nna na ningnu a amyu matu ni na a man e dingnyawm nga mu ga; nang hpe matsa ai ni matsa ai bai hkrum mu ga; nang hpe shaman ai ni shaman ai bai hkrum mu ga,” ngu nna tsun wu ai. #Heb 11:20; Nin 12:3.
Isak A Shaman Ga Hpe Esaw Hpyi Ai
30Ya, Isak gaw shi a shaman ga jaw ngut ai hte Yaku pru mat wa ai hpang kade n na yang, shi a kahpu Esaw shan tam ai kaw nna du shang wa wu ai. 31Shi mung shan shat mai shadu ngut ai hpang kawa kaw la wa wu ai. Shi gaw, “Wa e, chyeju hte rawt dung nna na a matu ngai la wa ya ai ndai shan shat mai hpe sha ya e, shaloi na a shaman ga ngai hpe jaw lu na ndai,” ngu nna tsun wu ai.
32Isak gaw, “Rai taw, nang kadai rai nga n ta?,” ngu nna shi san wu ai.
Shi gaw, “Na a nsha alat Esaw wa rai nga nngai,” ngu nna htan wu ai.
33Isak gaw, “Ataw, dusat hpe sat nna ngai kaw la sa wa ai wa gaw kadai ta? Nang garai n du yang ngai dai hpe sha kau se ai. Shi hpe nye a hpang jahtum na shaman ga hte shaman kau ni ai rai nna dai gaw shi hta htani htana agrin nga na ra ai,” ngu nna grai gari ashun ai hte san wu ai.
34Dai lam hpe Esaw na jang, ja ja jahtau hkrap let, “Wa e, na a shaman ga ngai hpe mung jaw e law!,” ngu nna hpyi wu ai.
35Isak gaw, “Na nnau wa sa nna ngai hpe masu hkalem kau ni ai. Na shaman chyeju hpe mung shi la kau nu ai,” ngu nna tsun dan wu ai.
36Esaw gaw, “Ndai lang hte lahkawng lang shi ngai hpe maw sha kau nu ai. Dai rai nna shi a mying Yaku rai nga wu ai gaw hpa mau shara n rai nga ai. Nye a hpu lat aya hpe mung shi la kau nu ai. Ya mung nye a shaman chyeju hpe la kau ya nu ai. Nye a matu shaman chyeju langai mi mung nang n ngam da ya sani?,” ngu nna tsun wu ai.#Nin 25:29-34.
37Isak gaw, “Ngai shi hpe na a madu tai shangun se ai. Shi a amyu matu mara ni yawng mung shi a mayam ni tai mat shangun kau se ai. Nai mam hte sabyi ntsin mung ngai shi hpe jaw se ai. Ngai sha e, ya gaw na a matu ngai galaw ya lu ai lam hpa mung n nga sai!,” ngu nna htan wu ai.
38Rai ti mung, Esaw mahtang shi a kawa hpe, “Wa e, nang gaw shaman chyeju langai sha lu n ni? Wa e, ngai hpe mung shaman ya e!,” ngu nna jahtau hkrap let matut hpyi lajin wu ai. #Heb 12:17.
39Dai hpang Isak gaw shi hpe,
“Na a matu lamu na numri hkrat na n rai;
Na a matu ga sau rawng ai yi sun hkauna ni nga na n rai.
40Na a nhtu hte nang hkrung nga lu na ndai.
Rai ti mung na a kanau a mayam tai nga u;
Nang gumlau rawt yang, shi a reng hkang ai hpe nang daw kau ya lu na rin dai,” ngu nna tsun wu ai. #Heb 11:20.
41Yaku hpe shi kawa jaw ya ai shaman chyeju a majaw Esaw mahtang Yaku hpe n dawng da wu ai. Esaw gaw, “Nye wa a si hkrung si htan hta yawn hkyen na aten gaw ni wa sai; shaloi Yaku hpe ngai sat kau na we ai,” ngu nna shi hkum hpe tsun wu ai.
42Rai ti mung, Esaw a yaw shada ai lam hpe Rebeka na wu ai rai nna Yaku hpe shaga la nhtawm, “Madat u, na a nhpu Esaw nang hpe mara tam nna sat kau na maw nga ai. 43Dai majaw, ngai sha e, ngai tsun ai hte maren, ya jang galaw u. Haran e nga ai ngai yung Laban hpang de ya jang rawt sa wa su. 44Na nhpu masin kawp nna nang shi hpe di ai amu ni hpe shi malap kau ai aten du hkra, shi kaw tawng marang mi sa nga su; 45dai hpang nang hpe sa woi la na matu marai langai ngai hpe shangun dat ya na nngai. Dai rai nna, lani jan hta sha, nye kasha lahkawng yan hpe ngai hpa majaw jasum kau na rai nga a ni?, ngu nna tsun wu ai.
Isak Gaw Yaku Hpe Laban Hpang De Shangun Dat Ai
46Rebeka gaw Isak hpe, “Ngai gaw Esaw a maigan num ni a majaw hki ba ai hte masin yu machyi la nga nngai. Yaku mung ndai Heti numsha ni hta na langai mi hpe la hkrup ai rai yang gaw si mat na mahtang ngai ging nga nngai,” ngu nna tsun wu ai.
Selectat acum:
NINGPAWT NINGHPANG 27: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.